1. Base ed Mateo 7:13, 14, akin ya singa tayo manbiabiahe?

AMIN tayo et singa tayo manbiabiahe. Say destinasyon tayo et say pambilay ed paraison dalin ya uleyan na maar-aron Ama tayo, si Jehova. Kada agew et gagawaen tayoy anggaay nayarian tayon mansiansia ed dalan ya onarap ed bilay. Balet imbaga nen Jesus ya makisir o mainget itan ya dalan, kanian no maminsan et mairap ya tontonen itan. (Basaen so Mateo 7:13, 14.) Lapud aliwa itayon perpekto, ompan natukso tayon onarawi ed satan ya dalan.​—Gal. 6:1.

2. Antoy aralen tayo ed sayan artikulo? (Nengnengen met so kahon ya “ Importante so Inkamapaabeba Pian Napetek Tayoy Panaakar Tayo.”)

² Pian ag-itayo makaarawi ed makisir ya dalan paarap ed bilay, kaukolan ya akaparaan tayon ipetek odino umanen so panag-isip, ugali, tan kagagawa tayo. Pinaseseg nen apostol Pablo iray Kristiano ed Corinto ya ‘itultuloy day paipetek.’ (2 Cor. 13:11) Importante ya unoren tayo met itan ya bilin. Diad sayan artikulo, aralen tayo no panon itayon natulongan na Biblia tan saray maespiritual ya kakaaro pian makapantultuloy tayon manakar ed dalan paarap ed bilay. Aralen tayo met iray situasyon ya nayarin nairapan tayon unoren so instruksion na organisasyon nen Jehova. Tan amtaen tayo no akin ya importante so inkamapaabeba pian nauman tayoy sarili tayo tan makapantultuloy tayo ya maliket a manlingkor ed si Jehova.

3. Panon kan natulongan na Salita na Dios?

³ Mairap ya usisaen no anton talagay nalilikna tan walad nonot tayo. Akin ey? On ta say puso tayo et agnapantiwalaan, kanian no maminsan et agtayo la nalilikas ya aliwa la manayay pangipapaarapan tod sikatayo. (Jer. 17:9) Posible met ya lapud pikewet ya panagkatunongan tayo et lolokoen tayo la manayay sarili tayo. (Sant. 1:22) Importante sirin ya usaren tayoy  Salita na Dios pian usisaen so sarili tayo. Sarag na Biblia ya ipanengneng no anton talagay inkatoo tayo, say tuan “kanonotan tan intension na puso” tayo. (Heb. 4:12, 13) Say Salita na Dios et singa X-ray ya sarag ton ipanengneng no antoy walad dalem tayo. Balet pian minabang tayo ed saray bilin na Biblia tan saray mangidadaulo, importantin mapaabeba tayo.

4. Anto ray pakapatnagan ya nagmaliw lan mapaatagey si Arin Saul?

⁴ Nanengneng tayo ed agawad si Arin Saul no antoy posiblin pansumpalan tayo no agtayo manpaabeba. Nagmaliw ya mapaatagey si Saul, kanian agto naawat ya walay kaukolan ton umanen ed sarili to. (Sal. 36:1, 2; Hab. 2:4) Lalon apatnagan ya binmaleg lay ulo to nen inikdan nen Jehova na espisipikon instruksion no antoy gawaen to no atalo to la ray Amalekita. Ag-inunor nen Saul so ganggan nen Jehova. Tan nen sikatoy kinompronta nen propeta Samuel ed saman ya ginawa to, agto inamin so kasalanan to. Nanrason ni ingen tan pinapaway ton anggapoy mauges ed ginawa to, insan to tinetel so arum. (1 Sam. 15:13-24) Antis na satan et wala lay ontan ya ginawa nen Saul. (1 Sam. 13:10-14) Makapaermen balet ta agnampaabeba. Agto impetek so panag-isip to, kanian dinisiplina nen Jehova tan inekal ton ari.

5. Antoy gawaen tayo pian agtayo naalig si Saul?

⁵ Pian agtayo naalig si Saul, maabig no itepet tayo iraya ed sarili tayo: ‘Kasin ibabaliwalak iray nababasak ya bilin ed Biblia lapud irarason ko ya aliwa itan a parad siak? Kasin iisipen ko ya agmet masyadon mauges so gagawaen ko? Kasin tetetelen koy arum?’ No walay anggan sakey ed saratan ya tepet ya say ebat mo et on, awat mo ya kaukolan mon umanen so sarilim, tan pansagpotan mon gawaen itan. Ta no andi, ompan magmaliw ya mapaatagey so pusom tan naderal so relasyon mo ed si Jehova.​—Sant. 4:6.

6. Antoy pidumaan nen Arin David ed si Arin Saul?

⁶ Duma balet si Arin David, say sinmublay ed si Arin Saul. Inar-aro nen David so “ganggan nen Jehova.” (Sal. 1:1-3) Amta nen David ya ililiktar nen Jehova iray mapaabeba tan kabkabusol to iray mapaatagey. (2 Sam. 22:28) Kanian mapaabeba ton inunor so ganggan na Dios pian nipetek toy panag-isip to. Insulat to: “Idayew koy Jehova, a mamibilin ed siak. Anggan diad labi et ipepetek ak na sankaaraleman a kanonotan ko.”​—Sal. 16:7.

7. Antoy gawaen tayo no mapaabeba tayo?

⁷ No mapaabeba tayo, amtaen tayoy ibabaga na Salita na Dios tan unoren tayo itan pian nipetek tayo so panag-isip tayo tan agtayo makagaway aliwa. Say Salita na Dios et singa boses ya mangibabagan: “Saya so dalan. Dia so panakaran yo.” Ipaamta tod sikatayo no aliwa lay aarapen tayo, ya ompan onaarap tayo lad kawigi odino kawanan. (Isa. 30:21) Diad tua, parad pankaabigan tayo lanlamang so idengel tayo ed si Jehova. (Isa. 48:17) Singa bilang, no dengelen tayoy Jehova, naiwasan tayoy kababaingan ta ag-itayo la kaukolan ya ipetek na arum. Tan mas onapit tayo ed si Jehova lapud nalikna tayon inar-aro to tayo tan ipapasen to tayon ananak kanian bibilinen to tayo.​—Heb. 12:7.

8. Base ed Santiago 1:22-25, panon tayon usaren so Salita na Dios ya pinagka-espiho tayo?

⁸ Say Salita na Dios et singa espiho. (Basaen so Santiago 1:22-25.) Kada kabuasan, mani-espiho tayo ni antis tayon onalis ed abung. Labay tayon seguroen ya maayos so itsura tayo antis tayon ompaway. Nausar tayo met so Biblia ya pinagka-espiho tayo. No inagew-agew tayo itan ya basaen, nanengneng tayo no anto ray kaukolan tayon umanen ed panag-isip tan ugali tayo. Say gagawaen na dakel ya agagi et babasaen day inagew-agew ya teksto kada kabuasan antis iran onalis ed abung da. Pero agda labat itan babasaen. Diad loob na sanagew et iisipen da no panon dan naunor so bilin  na Biblia. Balet aliwan say pambasa labat na inagew-agew ya teksto so nepeg tayon gawaen. Importante ya walan talagay eskedyul tayo pian aralen tan isipen ya maong so Biblia kada agew. Sakey itan ya paraan pian makapansiansia tayo ed makisir ya dalan paarap ed bilay.

9. Diad anto ran situasyon ya nayarin ipetek ka na kaarom?

⁹ Wala lay agawad bilay mo ya agmo aliklikas ya aliwa la manayay aarapen mo tan makakaarawi ka la ed si Jehova? (Sal. 73:2, 3) No nampakpel so maespiritual ya kaarom pian ipetek ka, kasin dinengel mo tan inunor moy bilin to? No on, duga so ginawam, tan seguradon pisalsalamatan mo ta pinasakbayan to ka.​—Pro. 1:5.

10. Antoy dugan reaksion no ipetek ka na kaarom?

¹⁰ Oniay ipapanonot ed sikatayo na Biblia: “Saray sugat a ginawa na sakey a kaaro et katooran.” (Pro. 27:6) Akin et tua itan? Imanoen iyan ilustrasyon: Imadyin mo pa ya ombasil ka ed karsada ya amayamay so luluganan. Bigla ya walay nan-text ed sika kanian ninengneng moy cellphone mo. Tuloytuloy kan manaakar tan alingwanan mo lay onnengneng ed kawanan tan kawigi. Kanian bigla kan ingguyor na kaarom pian agka natalapos. Lapud binembenan to ka ya malmalet, asireg so taklay mo, balet aligtas so bilay mo. Ompan pigay agew ya liknaen mo may sakit, balet kasin onsyodot ka ed ginawa to? Siempre andi! Misalsalamat ka ingen ta ginuyor to ka. Mipadpara, no bagaan ka na kaarom lapud anengneng to ya aliwa lay panagsalitam o gagawaen mo, ompan diad unaan et nasakitan ka. Balet agka komon ombabarong. Ibabaga na Biblia ya makulangkulang so sakey no manem-em na sakit na linawa. (Ecl. 7:9) Pisalamatan mo ni ingen so kaarom ta nampakpel pian simbawaen to ka.

11. Antoy sakey ya rason ya agtayo ondengel ed maabig ya simbawa na kaaro tayo?

¹¹ Antoy sakey ya rason ya agtayo ondengel ed maabig ya simbawa na kaaro tayo? Inkamapaatagey. Say iimanoen na totoon mapaatagey et no anto labat imay “labalabay dan narengel.” Agda labay so “ondengel ed katuaan.” (2 Tim. 4:3, 4) Bilib na bilib ira ed sarili da kanian iisipen da ya agda la kaukolan so bilin na arum. Balet oniay insulat nen apostol Pablo: “No iisipen na siopaman a sikatoy importante anta andi met, papalikdoen toy sarili to.” (Gal. 6:3) Balibali met so insulat nen Arin Solomon ed saya. Say kuan to: “Mas maong ni pobrin ugaw balet ta marunong nen say masiken lan ari balet ta makulangkulang, ya agto la amta so ondengel ed simbawa.”​—Ecl. 4:13.

12. Antoy naaralan tayo ed alimbawa nen apostol Pedro nen sinimbawa nen apostol Pablo, ya singa nabasa ed Galacia 2:11-14?

¹² Imanoen so balibalin alimbawa nen apostol Pedro nen sikatoy sinimbawa nen apostol Pablo ed arapan na dakel ya agagi. (Basaen so Galacia 2:11-14.) Wala komoy rason nen Pedro ya ombarong, ya ibaga ton aliwa imay impansimbawa nen Pablo tan anggapod lugar. Balet aliwan makulangkulang si Pedro. Inawat toy simbawa nen Pablo tan agnansinti. Diad tua, anggan onman so agawa, tinawag to nin siansia si Pablo ya ‘inar-aron agi.’​—2 Ped. 3:15.

13. Anto ray nepeg tayon tandaan no walay bilinen tayo?

¹³ No iisipen mo ya kaukolan mon bilinen odino simbawaen so kaarom, anto ray nepeg mon tandaan? Antis mon katongtongen, tepetan moy sarilim, ‘Kasin magmamaliw ak lan “sobran matunong”?’ (Ecl. 7:16) No say sakey et sobran matunong, huhusgaan toy arum base ed estandarte to, aliwan base ed no antoy ibabaga nen Jehova, tan nayarin agto nipanengneng so panangasi. No kayarim ya inusisa so sarilim et kombinsido ka ya talagan kaukolan mon katongtongen so kaarom, dapat malinew  ed sika no anton talagay problema tan manisip ka na saray tepet ya ontulong ed kaarom pian nanengneng toy lingo to. Nepeg ya ibasem ed Biblia so bilin mo, tan tandaan mo ya si Jehova so mangukom ed sikato, aliwan sika. (Roma 14:10) Manpaigiya kan lanang ed ibabaga na Biblia, tan alig moy inkamapangasi nen Jesus no manisimbawa ka. (Pro. 3:5; Mat. 12:20) Akin? On ta no kasian tayoy arum, kasian itayo met nen Jehova.​—Sant. 2:13.

14. Anto ray itatarya na organisasyon na Dios parad sikatayo?

¹⁴ Igigiya itayo nen Jehova diad dalan paarap ed bilay panamegley na kabiangay organisasyon to ya walad dalin, ya mangitatarya na saray video, publikasyon, tan pantitipon ya ontutulong ed sikatayo pian niyaplika tayo ray simbawa na Biblia. Amin iratan et nibase ed Salita na Dios. Ontan met, no mandedesisyon so Mananguley ya Ulop nipaakar ed panagpulong a kimey, manpapaigiya iran lanang ed masanton espiritu. Nenengnengen da no wala ray pananguman ya kaukolan a gawaen pian mas organisadon nagawaan itan a kimey. Akin? Lapud “say mundo a nanenengneng tayo natan et manguuman,” tan say organisasyon na Dios et kaukolan a mibagay ed saratan ya pananguman.​—1 Cor. 7:31.

15. Anton instruksion so aliwan mainomay ya unoren parad arum ya agagi?

¹⁵ No walay iter na organisasyon na Dios ya balon eksplinasyon nipaakar ed sakey a bangat na Biblia, odino mangiter iray instruksion pian mansiansia tayon malinis ed moral, aawaten tan uunoren tayon tampol iratan. Balet antoy reaksion tayo no wala ray instruksion ya duma ed apasalan tayo? Singa bilang, diad apalabas iran taon et binmili ya maong so materyales parad pampaalagey tan panmintina na saray bilding ya pandadayewan tayo. Kanian angiter so Mananguley ya Ulop na instruksion ya nepeg ya pigaran kongregasyon so mangusar ed sakey ya Kingdom Hall. Lapud satan et wala ray kongregasyon ya pinan-iba tan inlako iray arum ya Kingdom Hall. Say nanlakoan et inusar ed saray lugar ya kakkaukolan so mangipaalagey na Kingdom Hall. No manaayam kad lugar ya inlako so arum ya Kingdom Hall tan impaniiba iray kongregasyon, ompan nairapan kan man-adjust ed sayan pananguman. Wala ray agagi ya mas inmarawi so piaralan da. Saray arum et talagan nansakripisyo ira pian nipaalagey tan namintina so Kingdom Hall da,  kanian singa mairap ed linawa da nen ilako la itan. Ompan isipen da ya sayang so impansagpot da. Balet nakomendaan iratan ya agagi ta susuportaan da nin siansia iyan pananguman.

16. Akin ya mansiansia tayon maliket no iyaplika tayo imay bilin ya walad Colosas 3:23, 24?

¹⁶ Mansiansia tayon maliket ed panlilingkor tayo no tandaan tayo ya amin a gagawaen tayo et parad si Jehova tan sikato so mangidadaulo ed organisasyon to. (Basaen so Colosas 3:23, 24.) Balibali inisip nen Arin David nen nandonasyon parad pangipaalagey na templo. Oniay imbaga tod pikakasi to: “Siopa ak tan siopa ray totook, a sarag mi mangiter na singa onia ran boluntaryon apay? Ta amin a bengatla et manlalapud sika, tan say inter mid sika et nanlapu lanlamang ed limam.” (1 Awa. 29:14) No mandodonasyon tayo, say iiter tayo ed si Jehova et nanlapu lanlamang ed sikato. Balet naliliketan si Jehova no mabulos tayon usaren so panaon, biskeg, tan kaykayarian tayo pian suportaan so kimey ya pagagawa to.​—2 Cor. 9:7.

17. Akin et agka nepeg ya nadismaya no nalikas mon wala ray kaukolan mon umanen ed sarilim?

¹⁷ Pian tuloytuloy tayon makapanakar ed makisir ya dalan paarap ed bilay, gawaen tayoy anggaay nayarian tayon tumboken so bakat nen Kristo. (1 Ped. 2:21) No nalikas mo ya wala ray kaukolan mon umanen ed sarilim, agka nadidismaya. Diad tua et palatandaan itan ya sankanonot mo iray bilin nen Jehova tan labalabay mon unoren iratan. Tandaan, amta nen Jehova ya aliwa tayon perpekto, kanian agto iilaloan ya perpekto tayon naalig so alimbawa nen Jesus.

18. Antoy nepeg tayon gawaen pian makasabi tayo ed destinasyon tayo?

¹⁸ Komon ta lanang tayon sankanonot so bilay tayod arapen tan mabulos tayon ipetek odino umanen so panag-isip, ugali, tan kagagawa tayo. (Pro. 4:25; Luc. 9:62) Lanang tayon manpaabeba tan “itultuloy tayoy manliket [tan] paipetek.” (2 Cor. 13:11) No ontan, “say Dios na aro tan kareenan et niwalad [sikatayo].” Natan ni labat et maliket tayo la legan tayon manbiabiahe diad dalan paarap ed bilay, tan seguradon makasabi tayo ed destinasyon tayo.