1. Anton sipan nen Jehova so makaligliwa ed sikatayo no say pakalikna tayo et bukbukor tayo odino nantatabonan la ray problema tayo? (Salmo 118:5-7)

KASIN say pakaliknam no maminsan et bukbukor mo, tan anggapo labat so ontutulong ed sika diad amayamay ya problemam? Dakel so makakalikna na ontan, anggan saray matoor ya lingkor nen Jehova. (1 Ara. 19:14) No bilang ta naliknam itan, tandaan mo iyan sipan nen Jehova: “Agta kan balot taynanan, tan agta kan balot paulyanan.” Kanian ombiskeg so liknaan mo, tan nibagam ya: “Si Jehova so mananulong ko; agak ontakot.” (Heb. 13:5, 6) Saratan ya balikas et insulat nen apostol Pablo parad saray Kristiano ed Judea nen manga 61 C.E. Ipanonot na satan ed sikatayo imay nabasa ed Salmo 118:5-7.​—Basaen.

2. Antoy pantongtongan tayo ed sayan artikulo, tan akin?

² Singa samay angisulat ed Salmo 118, asalin mismo nen Pablo ya sikatoy tinulongan nen Jehova. Singa bilang, masulok ya duay taon antis ton sinulatan iray Hebreon Kristiano, sikatoy linmugan ed barko tan nabotan na makmaksil ya bagyo ed dayat. (Gawa 27:4, 15, 20) Diad satan ya impanbiahe to tan diad saray agawgawa antis na satan, nanduruman paraan so ginawa nen Jehova pian natulongan toy Pablo. Pantongtongan tayo so talora ed saratan. Sikatoy tinulongan nen Jehova (1) panamegley nen Jesus tan saray anghel, (2) panamegley na saray nanduruman opisyal na gobierno, tan (3) panamegley na saray agagi. Legan tayon aaralen irayan agawgawa ed bilay nen Pablo, seguradon ombiskeg so panagmatalek tayo ed sipan nen Jehova ya tulongan To tayo tan ebatan To iray pikakasi tayo.

3. Antoy nayarin naisip nen Pablo, tan akin?

³ Kakkaukolan nen Pablo so tulong. Nen manga 56 C.E., sikatoy inggayugoy na saray totoo ed paway na templo diad Jerusalem ta labay dan pateyen. Diad sinmublay ya agew, nen inawit day Pablo ed Sanhedrin, labay da lamet ya pateyen lapud petang na ulo da. (Gawa 21:30-32; 22:30; 23:6-10) Seguro diad saman ya agawa ed si Pablo, nayarin naisip to, ‘Anggad kapigan ko kasi itepel iyan irap?’

4. Panon ya tinulongan nen Jehova si Pablo panamegley nen Jesus?

⁴ Anton tulong so naawat nen Pablo? Diad samay labi ya inaresto si Pablo, ‘inmalagey ed abay to so Katawan’ ya Jesus, tan inkuan to: “Manpakpel ka! Ta no panon a sigpot mon tatasian ed Jerusalem so nipaakar ed siak, ontan met so nepeg a pantasim diad Roma.” (Gawa 23:11) Seguradon apaseseg si Pablo! Sikatoy kinomendaan nen Jesus ed balbaleg ya agawaan tod Jerusalem. Tan insipan to ya makasabi si Pablo ed Roma tan ituloy toy manpulong diman. Lapud satan, seguradon linmigen so liknaan nen Pablo, ya singa ugaw a sankalakap na maar-aron ama to.

5. Panon ya tinulongan nen Jehova si Pablo panamegley na sakey ya anghel? (Nengnengen so litrato ed apis.)

⁵ Anto ni ran irap so dinalan nen Pablo? Manga duay taon kayari na samay agawa ed Jerusalem, sikatoy linmugan ed barko paonla ed Italya. Diad dayat et biglan binmagyo na agaylay kasil, tan inisip na saray marino tan saray kaiba ton akalugan ya ompatey la ra. Balet kalmado labat si Pablo. Akin ey? Oniay imbaga to ed saray akalugan ed barko: “Nen kalabian et inmalagey ed abay ko so sakey ya anghel na Dios a dadayewen ko tan panlilingkoran ko tan inkuan to: ‘Agka natatakot, Pablo. Nepeg kan onarap ed Cesar, tan iliktar na Dios so amin a kaibam ed barko.’” Imbaki nen Jehova so sakey ya anghel pian uliten imay panamaseguro To ed si Pablo ya imbaga to la nen unaan panamegley nen Jesus. Tan tinmua itan ya insipan nen Jehova ta akasabi ed Roma si Pablo.​—Gawa 27:20-25; 28:16.

6. Anton sipan nen Jesus so mamapabiskeg ed sikatayo, tan akin?

⁶ Anton tulong so awaten tayo? Seguradon tulongan itayo nen Jesus a singa ginawa to ed si Pablo. Singa bilang, oniay insipan nen Jesus ed amin ya Kristiano: “Wala ak ed sikayo ed amin ya agew anggad kaunoran a parte na sistema na mundo.” (Mat. 28:20) Napapaseseg itayo ed saratan ya imbaga nen Jesus. Akin? On ta manbibilay tayo ed agaylay irap ya panaon tan kaukolan tayoy mananos. Singa bilang, no inateyan tayo na kapamilya o kaaro, ompan aliwa labat ya pigaran agew so panermen tayo. Nayarin ombayag ni ingen na pigaran taon. Wala met iray agagi tayo  ya mairap so situasyon da lapud matatken la ra. Saray arum et nadi-depress tan mair-irap dan labanan so negatibon nalilikna ra. Anggan wala ray ontan ya dadalanen tayo, ombibiskeg so liknaan tayo lapud amta tayo ya tulongan itayo nen Jesus diad “amin ya agew,” anggan diad saray sankairapan ya agew na bilay tayo.​—Mat. 11:28-30.

7. Base ed Apocalipsis 14:6, panon itayon tutulongan nen Jehova natan?

⁷ Ipapaseguro ed sikatayo na Biblia ya tulongan itayo nen Jehova panamegley na saray anghel to. (Heb. 1:7, 14) Singa bilang, tutulongan tan igigiya itayo na saray anghel legan tayon ipupulong so “maong a balita na Panarian” ed saray totoo “diad kada nasyon tan tribu tan lenguahe.”​—Mat. 24:13, 14; basaen so Apocalipsis 14:6.

8. Panon ya tinulongan nen Jehova si Pablo panamegley na sakey a komander na militar?

⁸ Anton tulong so naawat nen Pablo? Abitla nen niman ya nen 56 C.E. et imbaga nen Jesus ed si Pablo ya seguradon makasabi ed Roma. Balet wala ray Judio ed Jerusalem ya implano dan sabaten si Pablo ta labay dan pateyen. Nen naamtaan itan na Romanon komander na militar ya si Claudio Lisias, prinotektaan toy Pablo. Angibakin tampol na dakdakel a sundalo ya mangiba ed si Pablo diad pambiahe to paonlad Cesarea, ya say dinalan da et amay rota ya manga 105 kilometro manlapud Jerusalem. Kasabi nen Pablo ed Cesarea, ingganggan nen Gobernador Felix ya sikatoy ‘bantayan a maong diad palasyo nen Herodes.’ Kanian agla nagawaan na saray mamubusol ed si Pablo imay plano ra.​—Gawa 23:12-35.

9. Panon ya atulongan nen Gobernador Festo si Pablo?

⁹ Kalabas na duay taon, akapriso nin siansia si Pablo ed Cesarea. Aliwa lan si Felix so gobernador, noagta si Festo la. Akikasi iray Judio ed si Festo ya dia lad Jerusalem so panlitisan ed kaso nen Pablo, balet ag-inmabuloy si Festo. Nayarin akasabid sikato ya plaplanoen na saray Judio ya “sabaten si Pablo diad dalan pian pateyen da.”​—Gawa 24:27–25:5.

10. Antoy ebat nen Gobernador Festo nen imbaga nen Pablo ya onapela ed Cesar?

¹⁰ Ag-abayag, dia lad Cesarea agawa so impanlitis ed kaso nen Pablo. Lapud labay nen Festo ya “naalay pabor na saray Judio,” oniay intepet to ed si Pablo: “Labay moy onlad Jerusalem pian diman so pangukoman ed sika?” Amta nen Pablo ya no diad Jerusalem so panlitisan ed sikato, sikatoy pateyen na saray Judio. No ontan so nagawa, agla makaonla ed Roma tan agto la nituloy so ministeryo to. Kanian oniay imbaga nen Pablo: “Onapela ak ed Cesar!” Kayarin kinonsulta nen Festo iray mananimbawa to, oniay ebat to: “Lapud inmapela kad Cesar, onla ka sirin ed Cesar.” Aligtas so bilay nen Pablo ed satan ya desisyon nen Festo. Ag-abayag, wala lad Roma si Pablo tan agla natumbok na saray Judion malabay ya mamatey ed sikato.​—Gawa 25:6-12.

11. Anton panamaseguro ya insulat nen Isaias so posiblin inisip ya maong nen Pablo?

¹¹ Legan ya aalagaren nen Pablo so pambiahe to paonlad Italya, posiblin inisip ton maong imay impasakbay nen propeta Isaias ed saray onkokontra ed si Jehova: “Manplano kayo, balet naderal itan! Mansalita kayo na anggan anto, balet ag-itan nagawa, lapud walad sikami so Dios!” (Isa. 8:10) Matalek si Pablo ya sikatoy tulongan na Dios, tan satan so amabiskeg ed sikato ya nasarag to ray onsabi nin subok.

12. Panon so impantrato nen Julio ed si Pablo, tan antoy seguradon alikna nen Pablo?

¹² Nen 58 C.E., ginmapoy impanbiahe nen Pablo paonlad Italya. Lapud sakey ya priso,  sikatoy babantayan na opisyal na armada na Roma ya si Julio. Manlapud imbuat da, si Julio la so akauley ed si Pablo. Kasin maong so pantrato to ed si Pablo o pairapen to? Nen dinmaong ira diad sinmublay ya agew, “maomaong so impitoo nen Julio ed si Pablo tan inabuloyan ton onlad saray kakaaro to.” Diad tua et inligtas ni ingen nen Julio so bilay nen Pablo. Ta nen agaygay so barko ya niluganan da, labay na saray sundalo ya pateyen so amin ya akalugan ya priso pian ag-ira makatakas, balet pinigilan nen Julio iray sundalo. Akin? Labay nen Julio ya “iliktar si Pablo.” Seguradon alikna nen Pablo ya inusar nen Jehova si Julio pian iliktar so bilay to.​—Gawa 27:1-3, 42-44.

13. Panon so posiblin pangusar nen Jehova ed saray opisyal na gobierno?

¹³ Anton tulong so awaten tayo? Pian nasumpal so gagala nen Jehova, nayarin usaren to so masanton espiritu to pian pakiwasen iray opisyal na gobierno ya gawaen so panlabayan to. Insulat nen Arin Solomon: “Say puso na ari et singa ag-agus na danum diad lima nen Jehova. Ipapaarap To itan ed anggan iner a labay To.” (Pro. 21:1) Antoy labay ya ibaga na sayan proverbio? Saray totoo et sarag day mankotkot na agusan na danum pian onarap itan diad direksion ya labay da, diad ontan et nasumpal so plano ra. Mipadpara, sarag nen Jehova ya usaren so masanton espiritu to pian ipaarap so kanonotan na saray opisyal na gobierno diad direksion ya labay to, diad ontan et nasumpal so gagala to. Lapud satan, saray opisyal et napakiwas ya manggaway desisyon ya pabor ed saray totoo na Dios.​—Ikompara so Esdras 7:21, 25, 26.

14. Singa ginawa na saray agagi nensaman ya nabasa ed Gawa 12:5, siopa ray ipikasi tayo?

¹⁴ Antoy sarag tayon gawaen? Sarag tayon ipikasi iray “arari tan amin a walad atagey a posisyon” no manggagawa ray desisyon ya walay epekto to ed bilay tan ministeryo tayo. (1 Tim. 2:1, 2; Neh. 1:11) Singa samay ginawa na saray Kristiano nen inmunan siglo, sarag tayo met so mikasi ed Dios ya tulongan to ray agagi tayon akapriso. (Basaen so Gawa 12:5; Heb. 13:3) Sakey ni, sarag tayo met ya ipikasi iray guardia ed prisoan ya manbabantay ed saray agagi tayo. Mikasi tayo ed si Jehova ya pakiwasen to ra ya ‘maong komon so pitotoo ra’ ed saray agagi tayon akapriso, ya singa impantrato nen Julio ed si Pablo.

15-16. Panon ya tinulongan nen Jehova si Pablo panamegley nen Aristarco tan Lucas?

¹⁵ Anton tulong so naawat nen Pablo? Tinulongan nen Jehova si Pablo panamegley  na saray agagi legan na pambiabiahe to paonlad Roma. Nengnengen tayo so pigaran alimbawa.

¹⁶ Walay duaran matoor ya kakaaro nen Pablo, si Aristarco tan Lucas. Inibaan day Pablo ed impanbiahe to paonlad Roma. * Mabulos dan inibaan anggano amta ran nipeligro so bilay da, tan anggapoy ibabaga na Biblia ya pinaseguroan met ira nen Jesus ya makasabi ra ed Roma. Nen manbiabiahe la ra insan da labat naamtaan ya anggapoy mauges ya nagawad sikara. Seguro nen ombuat lay barko ya niluganan da ed Cesarea, agaylay pisasalamat nen Pablo ed si Aman Jehova lapud inusar toy Aristarco tan Lucas ya makpel ya ontulong ed sikato ed sayan pambiahe to.​—Gawa 27:1, 2, 20-25.

17. Panon ya tinulongan nen Jehova si Pablo panamegley na saray agagi?

¹⁷ Legan na pambiabiahe nen Pablo, aminpigapigan tinulongan na saray agagi. Singa bilang, diad daongan ed syudad na Sidon, inabuloyan nen Julio si Pablo ya “onlad saray kakaaro to pian naasikaso ra.” Tan nen akasabi ra ed syudad na Puteoli, wala ray akabat dan agagi tan akikasi irayan agagi ya no nayari et mansiansia ra di Pablo diman na pitoy agew. Legan ya kaiba nen Pablo irayan agagi ya nampatuloy ed sikara, seguradon angistorya na makapaseseg iran eksperiensya kanian malikeliket ira. (Ikompara so Gawa 15:2, 3.) Kayari na pitoy agew, intuloy lamet nen Pablo tan saray kakaiba to so biahe ra.​—Gawa 27:3; 28:13, 14.

18. Akin ya apabiskeg si Pablo tan akisalamat ed Dios?

¹⁸ Nen akasabi ed Roma si Pablo, seguradon anonotan to may insulat to ed kongregasyon ditan taloy taon lay apalabas: “Abaybayag ko lan pipirawatey onlad sikayo.” (Roma 15:23) Balet agbalot naisip nen Pablo ya sikatoy priso ya onsabi ditan. Seguradon sikatoy apaseseg nen anengneng to ray agagi ya manaalagar ed dalan pian minengneng ed sikato! “Sanen anengneng ira nen Pablo, sikatoy akisalamat ed Dios tan apabiskeg.” (Gawa 28:15) Akin  ey? Lapud alikna lamet nen Pablo ya sikatoy tutulongan nen Jehova panamegley na saray agagi.

19. Base ed 1 Pedro 4:10, panon itayon usaren nen Jehova pian tulongan iray lingkor ton mankaukolan?

¹⁹ Antoy sarag tayon gawaen? Kasin walay kakongregasyon mo ya naeermenan o naiirapan lapud sakit odino amayamay so problema to? Odino ompan inateyan na kapamilya o kaaro. No naamtaan mo ya walay kakongregasyon mon mankaukolan na tulong, ipikasim ed si Jehova ya makapangibaga ka komon na mamabiskeg ed sayan agi tan natulongan mo pian nalikna ton walay mangaaro ed sikato. Ompan say kaukolan labat na saray agagi et say panamaseseg tan tulong tayo pian ombiskeg ira. (Basaen so 1 Pedro 4:10.) * No gawaen tayoy anggaay nayarian tayon ontulong, nalikna dan mismo ya talagan totooren nen Jehova imay sipan to ya, “Agta kan balot taynanan, tan agta kan balot paulyanan.” Baleg ya pribilehyo ya usaren ka nen Jehova ya ontulong ed saray lingkor ton mankaukolan!

20. Akin et matalek tayon nibaga ya: “Si Jehova so mananulong ko”?

²⁰ Diad bilay tayo et nayarin nipaarap tayo met ed singa bagyo iran problema, ya singa naeksperiensya nen Pablo tan saray kakaiba to. Balet seguradon nasarag tayo iratan lapud kaiba tayoy Jehova. Tutulongan to tayo panamegley nen Jesus tan saray anghel. Tan sarag nen Jehova ya tulongan itayo panamegley na saray opisyal na gobierno pian nasumpal so gagala to. Tan seguradon asali tayo met lan mismo ya tinulongan itayo nen Jehova panamegley na saray agagi ya pinakiwas na masanton espiritu to. Kanian singa si apostol Pablo, matalek tayo met ya mangibaga: “Si Jehova so mananulong ko; agak ontakot. Antoy nagawaan na too ed siak?”​—Heb. 13:6.