1. Antoy labay nen Jehova ya gawaen tayo?

LABALABAY ya ipanengneng nen Jehova so matoor a panangaro. (Os. 6:6) Tan labay to ya ipanengneng met itan na saray lingkor to, kanian impaisulat tod si propetan Miqueas ya nepeg tayon ‘aroen so matoor a panangaro.’ (Miq. 6:8, paimanod leksab) Pero pian nagawaan tayo itan, kaukolan tayo nin amtaen no anto ’tay matoor a panangaro.

2. Anto so matoor a panangaro?

² Anto ’tay matoor a panangaro? Say “matoor a panangaro” et manga 230 beses ya nabasa ed Balon Mundo a Patalos na Masanton Kasulatan. Antoy labay ya ibaga na satan? Base ed “Glosaryo na Saray Termino ed Biblia” ya walad sayan patalos, ontutukoy itan ed “aro a pinakiwas na integridad, katooran, tan malet a relasyon. Maslak et uusaren itan nipaakar ed panangaro na Dios ed totoo, balet ontutukoy met itan ed panangaro na totoo ed sakey tan sakey.” Si Jehova so sankaabigan ya alimbawa na matoor a panangaro. Aralen tayo ed sayan artikulo no panon to itan ya ipapanengneng. Insan tayo pantongtongan ed ontumbok ya artikulo no panon tayon naalig si Jehova diad pangipanengneng na matoor a panangaro ed sakey tan sakey.

3. Panon ya indeskribe nen Jehova so sarili to nen katongtong toy Moises?

³ Ag-abayag manlapu nen nibulos iray Israelita ed impakaaripen da ed Ehipto, oniay imbaga nen Jehova ed si Moises tungkol ed ngaran To tan saray kualidad To: “Jehova, Jehova, a Dios a mapangasi tan maabagey, matantan a manpasnok tan abalbaleg ed matoor a panangaro tan katuaan, a mangipapatnag na  matoor a panangaro ed saray nilibo, mameperdona na impakalingo, impakasumlang, tan kasalanan.” (Exo. 34:6, 7) Diad sayan balibalin deskripsion nen Jehova ed sarili to, walay naaralan tayo ya nikadkaduma ed matoor a panangaro to. Anto itan?

4-5. (a) Panon ya indeskribe nen Jehova so matoor a panangaro to? (b) Anto ran tepet so ebatan tayo?

⁴ Nen indeskribe nen Jehova so sarili to, agto labat imbaga ya ipapanengneng toy matoor a panangaro, noagta imbaga ton ‘abalbaleg so matoor a panangaro’ to. Sayan deskripsion et nabasa ed dakel nin bersikulo ed Biblia. (Num. 14:18; Neh. 9:17; Sal. 86:15; 103:8; Joel 2:13; Jon. 4:2) Anggapon balot so too ya adeskribe ed Biblia ya ‘abalbaleg so matoor a panangaro’ to, noagta si Jehova labat. Antoy naaralan tayo ed satan? Mapatpatnag ya importantin maong ed si Jehova so matoor a panangaro. * Kampegan oniay imbaga nen Arin David: “O Jehova, say matoor a panangarom et anggad tawen . . . Alay kablian na matoor a panangarom, O Dios! Diad silong na saray payak mo et pasasalimbengan iray anak na totoo.” (Sal. 36:5, 7) Singa si David, kasin ontan met so panamablim ed matoor a panangaro na Dios?

⁵ Pian mas natalosan tayo no antoy labay ya ibaga na matoor a panangaro, ebatan tayo iyan duaran tepet: Siopa ray papanengnengan nen Jehova na matoor a panangaro? Tan antoy balibalin epekto ed sikatayo na matoor a panangaro to?

6. Siopa ray papanengnengan nen Jehova na matoor a panangaro?

⁶ Siopa ray papanengnengan nen Jehova na matoor a panangaro? Ibabaga na Biblia ya wala ray bagay ya naaro tayo, singa say “masamit a panangan,” “disiplina,” “kakabatan,” “karunongan,” tan arum ni ra. (Pro. 12:1; 21:17, Maung a Balita; 29:3) Pero say matoor a panangaro et para labat ed totoo, aliwan diad saray bagay o konsepto. Tan say nikadkaduma ni ed matoor a panangaro nen Jehova et agto itan ipapanengneng ed anggan siopa labat. Ipapanengneng to labat itan ed saray kakaaro to, ta espisyal ira ed sikato. Tooren toy amin ya insipan to ed saray kakaaro to tan agbalot onsawan mangaro ed sikara.

7. Panon ya impanengneng nen Jehova so panangaro ed amin ya totoo?

⁷ Impanengneng nen Jehova so panangaro ed amin ya totoo. Oniay imbaga nen Jesus ed sakey ya laki ya say ngaran to et Nicodemo:  “Ontan lay panangaro na Dios ed [saray totoo ed] mundo ya inter to so bogbogtong ya Anak to, pian kada sakey a mangipapanengneng na pananisia ed sikato et agnaderal noagta nawalaan na bilay ya andi-anggaan.”—Juan 3:1, 16; Mat. 5:44, 45.

8-9. (a) Akin et ipapanengneng nen Jehova so matoor a panangaro ed saray lingkor to? (b) Antoy onsublay ya aralen tayo?

⁸ Singa abitla ed parapo 6, say papanengnengan labat nen Jehova na matoor a panangaro et saray kakaaro to—saray manlilingkor ed sikato. Napatnagan itan ed imbaga nen Arin David tan propetan Daniel. Singa bilang, oniay kuan nen David: “Itultuloy mo komon ya ipatnag so matoor a panangarom ed saramay makapikabat ed sika.” “Say matoor a panangaro nen Jehova et mansiansia ya anggad angga diad saramay ontatakot ed sikato.” Tan diad pikakasi nen Daniel, oniay imbaga to: “O Jehova a tuan Dios, say . . . mangipapatnag na matoor a panangaro ed saramay mangaarod sikato tan manusumpal ed saray ganggan to.” (Sal. 36:10; 103:17; Dan. 9:4) Base ed sarayan bersikulo, ipapanengneng nen Jehova so matoor a panangaro ed saray lingkor to lapud sikatoy kabat da, ontatakot irad sikato, inar-aro da, tan uunoren da ray ganggan to. On, irereserba nen Jehova so matoor a panangaro to ed saray lingkor to—saray mandadayew ed sikato diad dugan paraan.

⁹ Nen agtayo ni manlilingkor ed si Jehova, alikna tayo lay panangaro ya ipapanengneng tod amin ya totoo. (Sal 104:14) Pero nen manlilingkor tayo lad sikato, mas espisyal lan panangaro so ipapanengneng to—say matoor a panangaro! Diad tua, oniay ipapaseguro nen Jehova ed kada lingkor to: “Agnaekal so matoor a panangarok ed sika.” (Isa. 54:10) Naeksperiensyan mismo itan nen David kanian nibaga to ya “espisyal so pantrato nen Jehova ed samay matoor ed sikato.” (Sal. 4:3) Anto sirin so gawaen tayo ta espisyal so panangaro nen Jehova ed sikatayo? Oniay imbaga na salmista: “Siopaman a marunong et . . . nonoten ton maong iray matoor a panangaron ipapatnag nen Jehova.” (Sal. 107:43) Atan so labay nen Jehova ya gawaen tayo. Aralen tayo sirin so taloran paraan no panon ya ipapanengneng nen Jehova so matoor a panangaro to tan no antoy balibalin epekto na satan ed sikatayo.

10. Antoy epekto ed sikatayo lapud amta tayon mansiansia ya anggad angga so matoor a panangaro nen Jehova? (Salmo 31:7)

¹⁰ Say matoor a panangaro na Dios et “mansiansia ya anggad angga.” Nabasa itan ya 26 beses diad Salmo 136. Oniay nabasa tayo ed bersikulo 1: “Misalamat kayo ed si Jehova, ta sikatoy maomaong; say matoor a panangaro to et mansiansia ya anggad angga.” Manlapud bersikulo 2 anggad 26, nabasa tayo iray salitan “ta say matoor a panangaro to et mansiansia ya anggad angga.” No basaen mo iyan interon salmo, seguradon manbilib ka ed dakel ya paraan ya ipapanengneng nen Jehova so matoor a panangaro ed saray lingkor to. Say impangulit ed saray salitan “ta say matoor a panangaro to et mansiansia ya anggad angga” et mangipapaseguro ed sikatayo ya agbalot manguman so panangaro nen Jehova. Makapa-touch itan! Labay ton ibaga, agto tayon balot taynanan, lalo la no maniirap tayo. No antoy epekto ed sikatayo: Lapud amta tayo ya wadtan ya lanang si Jehova anggan antoy nagawa, walay biskeg tayon arapen so antokaman ya problema tan maliket tayo nin siansia ya manlingkor ed sikato.—Basaen so Salmo 31:7.

11. Base ed Salmo 86:5, akin et ‘akaparaan ya mamerdona’ si Jehova?

¹¹ Say matoor a panangaro na Dios so rason no akin ya peperdonaen to tayo. No nanengneng nen Jehova ya magbabawi so sakey ya nankasalanan tan pansagpotan ton agla uliten itan, mabulos ton perdonaen. Oniay imbaga nen David tungkol ed si Jehova: “Agto ginawa ed sikatayo so unong ed saray kasalanan tayo, tan agto imbales ed sikatayo so manepeg ed saray lingo tayo.” (Sal. 103:8-11) Amta nen David so ermen ya nalikna na sakey ya nakokonsiensia ta sikaton mismo et akagawa na ambelat ya kasalanan. Pero apatunayan ton si Jehova et ‘akaparaan ya mamerdona.’ Akin et akaparaan ya mamerdona si Jehova? Say ebat et nabasa ed Salmo 86:5. (Basaen.) On, singa imbaga nen David ed pikakasi to, say rason et lapud ‘abalbaleg so matoor a panangaro nen Jehova ed amin ya ontatawag ed sikato.’

12-13. Antoy makatulong no nakokonsiensia tayo ni anggad natan ed agawaan tayon lingo nensaman?

¹² Normal labat ya maermen tan nakokonsiensia tayo no akagawa tayoy kasalanan.  Makatulong ingen itan pian napakiwas tayon magbabawi tan manguman. Pero wala ray lingkor na Dios ya nakokonsiensia ni anggad natan ed saray agawaan dan kasalanan nensaman. Anggano nagbabawi tan anguman la ra, say pakalikna da et agla ran balot naperdona nen Jehova. No ontan so naliliknam, makatulong no aralen tan talosan moy kabaleg na matoor a panangaro nen Jehova ed saray lingkor to.

¹³ No antoy epekto ed sikatayo: Anggano agtayo perpekto, makapanlingkor tayo ed si Jehova ya malinis so konsiensia tayo lapud “lilinisan itayo na dala nen Jesus ya Anak to ed amin a kasalanan.” (1 Juan 1:7) No nadidismaya ka ed sarilim lapud saray lingom, tandaan mo ya akaparaan si Jehova ya mamerdona no magbabawi ka. Insulat nen David ya say panamerdona nen Jehova et konektado ed matoor a panangaro to. Imbaga nen David: “No panon a say tawen et atagtagey nen say dalin, say matoor a panangaro to ed saramay ontatakot ed sikato et abalbaleg. No panoy kaarawi na bubutayan na agew manlapud seselekan to, ontan so impangiyarawi to ed . . . saray kasalanan tayo.” (Sal. 103:11, 12) On, si Jehova et talagan “mabulos a mamerdona.”—Isa. 55:7, paimanod leksab.

14. Base ed imbaga nen David, panon itayon proprotektaan na matoor a panangaro na Dios?

¹⁴ Say matoor a panangaro na Dios so manproprotekta ed espiritualidad tayo. Oniay aminsan ya pikakasi nen David ed si Jehova: “Sika so panag-amotan ko; salimbengan mo ak pian agak nagonigon. Paliberan mo ak na panliliket lapud panangiliktar mo. . . . Samay manmamatalek ed si Jehova et apaliberan na matoor a panangaro To.” (Sal. 32:7, 10) Diad panaon na Biblia, saray syudad et apaliberan na padir pian naprotektaan iray manaayam ditan ed saray onsalakay ya kalaban. Mipadpara, say matoor a panangaro nen Jehova et singa padir ya manprotekta ed sikatayo no bilang ta wala ray subok ya posiblin maneral ed espiritualidad tayo. Lapud matoor a panangaro nen Jehova, inyasingger to tayo ed sikato ta labalabay to tayon protektaan.—Jer. 31:3.

15. Akin ya say matoor a panangaro nen Jehova et singa salimbengan tan panag-amotan?

¹⁵ Wala ni angikomparaan nen David ed pamproprotekta na Dios ed saray lingkor to. Oniay insulat to: “Sika so maligen a salimbengan ko, say Dios a mangipapatnag ed siak na matoor a panangaro.” Onia ni imbaga nen David tungkol ed si Jehova: “Sikatoy mangipapatnag ed siak na matoor a panangaro tan sikatoy panag-amotan ko, say maligen a salimbengan ko tan say manangiliktar ko, say samper ko tan samay silongan ko.” (Sal. 59:17; 144:2) Akin et imbaga nen David ya say matoor a panangaro nen Jehova et singa panag-amotan tan salimbengan? On ta tulongan itayo nen Jehova pian naprotektaan tayoy relasyon tayo ed sikato anggan iner so kulaan tayo, basta matoor tayon manlilingkor. Walay ontan met ya panamaseguro ed Salmo 91, ya oniay nabasa tayo: “Ibagak ed si Jehova: ‘Sikay pansasalimbengan ko tan say panag-amotan ko.’” (Sal. 91:1-3, 9, 14) Indeskribe met nen Moises si Jehova bilang salimbengan. (Sal. 90:1, paimanod leksab) Tan antis ya ompatey, walay balibalin imbaga to tungkol ed Dios. Insulat to: “Say Dios et sakey a salimbengan manlapu la nensaman, saray andi-anggaan a taklay to et walad silong mo.” (Deu. 33:27) Antoy labay ya ibaga nen Moises nen insulat ton “saray andi-anggaan a taklay [nen Jehova] et walad silong mo”?

16. Anton duaran bendisyon so agtayo dapat lingwanan? (Salmo 136:23)

¹⁶ Anggano amta tayo ya wadtan ya lanang si Jehova ya manprotekta ed sikatayo, no maminsan, agnaiwasan ya onkapuy tayo lapud nantatabonan lay problema. No ontan so situasyon tayo, antoy gawaen nen Jehova ey? (Basaen so  Salmo 136:23.) Usaren nen Jehova so taklay to pian ‘ampopoen’ tan ‘suportaan’ itayo. On, alalayan tan tulongan to tayon ombiskeg lamet! (Sal. 28:9; 94:18) No antoy epekto ed sikatayo: Unona, segurado tayo ya protektaan itayo nen Jehova anggan iner so kulaan tayo. Komadua, kombinsido tayo ya ag-itayon balot paulyanan na maar-aron Ama tayo ed tawen anggan antoy nagawa. Komon ta agtayo lilingwanan iyan duaran bendisyon.

17. Antoy seguradon gawaen nen Jehova lapud matoor a panangaro to? (Salmo 33:18-22)

¹⁷ Singa naaralan tayo la, anggan anto ni ’tay subok ya onsabi, segurado ya tulongan to tayo nen Jehova pian makapansiansia tayon matoor. (2 Cor. 4:7-9) Oniay imbaga nen propetan Jeremias: “Ag-itayo inatey lapud matoor a panangaro nen Jehova, ta agbalot mangangga so panangasi to.” (Tag. 3:22) Makaseguro tayo ya agbalot onkupas so matoor a panangaro na Dios ed sikatayo ta oniay ibabaga na Biblia: “Say mata nen Jehova et akabantay ed saramay ontatakot ed sikato, saramay manaalagar ed matoor a panangaro to.”—Basaen so Salmo 33:18-22.

18-19. (a) Antoy nepeg tayon tandaan? (b) Antoy aralen tayo ed ontumbok ya artikulo?

¹⁸ Anto sirin so nepeg tayon tandaan? Nen agtayo ni manlilingkor ed si Jehova, alikna tayo lay panangaro ya ipapanengneng to ed amin ya totoo. Pero natan ya manlilingkor tayo la ed sikato, mas espisyal ya panangaro so ipapanengneng to ed sikatayo—say matoor a panangaro. Lapud inar-aro to itayo, lalakapen tan proprotektaan itayo na mabiskeg a taklay to. Agto tayon balot taynanan tan tooren ton amin so sipan tod sikatayo. Labay to ya kaaro to tayo anggad angga! (Sal. 46:1, 2, 7) Kanian anggan anto ni ’tay subok ya arapen tayo, ikdan itayo nen Jehova na biskeg pian makapanmatoor tayo ed sikato.

¹⁹ Naaralan tayo no panon ya ipapanengneng nen Jehova so matoor a panangaro ed saray lingkor to. Tan labay to ya ipanengneng tayo met itan ed sakey tan sakey. Panon tayon nagawaan itan? Atan so aralen tayo ed ontumbok ya artikulo.