1-2. Akin et maabig no ipanengneng tayo so matoor a panangaro ed sakey tan sakey?

AKIN et maabig no ipanengneng tayo so matoor a panangaro ed sakey tan sakey? Imanoen so pigaran rason ya nabasad Biblia: “Agmo aabuloyan a taynan ka na matoor a panangaro tan katooran. . . . Diad ontan et nagamoran moy panangabobon na Dios tan too.” “Say [toon] mangipapatnag na matoor a panangaro et manggagaway kamaongan ed sarili to.” “Siopaman a manaanap na inkatunong tan matoor a panangaro et makaromog na bilay.”—Pro. 3:3, 4; 11:17, paimanod leksab; 21:21.

² Abitla ed sarayan bersikulo so taloran rason no akin ya kaukolan tayon ipanengneng so matoor a panangaro. Say unona, no ipanengneng tayoy matoor a panangaro, naala tayoy pabor na Dios. Komadua, parad pankamaongan tayo lanlamang no ipanengneng tayo so matoor a panangaro. Singa bilang, labalabay itayo na arum kanian nawalaan tayoy tuan kakaaro. Komatlo, dakel so naawat tayon bendisyon, kaiba lay bilay ya andi-anggaan. On, talagan maabig no unoren tayo iyan bilin nen Jehova: “Ipatnag yo ed balang sakey so matoor a panangaro tan panangasi.”—Zac. 7:9.

3. Anto ran tepet so pantongtongan tayod sayan artikulo?

³ Diad sayan artikulo, pantongtongan tayoy ebat ed sarayan apatiran tepet: Siopa ray nepeg tayon panengnengan na matoor a panangaro? Anto ray naaralan tayo ed libro na Ruth tungkol ed pangipanengneng na matoor a panangaro? Panon tayon nipanengneng so matoor a panangaro natan? Anto ray maabig ya resulta no ipanengneng tayoy matoor a panangaro?

4. Panon tayon naalig si Jehova diad pangipanengneng na matoor a panangaro? (Marcos 10:29, 30)

⁴ Singa naaralan tayo ed imbeneg ya artikulo, irereserba nen Jehova so matoor a panangaro to ed saramay mangaaro tan manlilingkor ed sikato. (Dan. 9:4) Labay tayon ‘aligen so Dios bilang inad-aro ton ananak.’ (Efe. 5:1) Nagawaan tayo itan no ipanengneng tayo met so matoor a panangaro ed saray kapara tayon manlilingkor ed si Jehova—saray agagi tayo.—Basaen so Marcos 10:29, 30.

5-6. Antoy makatulong pian mas natalosan tayo so matoor a panangaro? Iyilustra.

⁵ No mas natatalosan tayo so labay ya ibaga na matoor a panangaro, mas nipanengneng tayo itan ed saray agagi. Pian mas natalosan tayo so matoor a panangaro, ikompara tayo itan ed sakey nin balibalin kualidad—say katooran.

⁶ Isipen pa so sakey ya empleyado ya abayag lan mantratrabaho ed sakey ya kompanya. Say ontan ya empleyado et nibagan matoor odino “loyal” ed pantratrabahoan to. Pero agto labay ya ibagan inar-aro to iray akanggawa ed satan ya kompanya. Tan ompan agto ni ran balot personal ya akabat. Diad tua, ompan agni ingen kompormi ed arum ya instruksion ya tutumboken ed loob na kompanya. Pero makulikulin mantratrabaho pian walay pambilay na pamilya to. Ompan agla onekal ditan anggad panretiro to, puera labat seguro no walay man-offer ed sikato na mas baleg ya sueldo o mas atagey ya posisyon.

7-8. (a) Antoy mas importante nen say pangipanengneng na katooran? (b) Akin et aralen tayo so libro na Ruth?

⁷ On tua, balibalin kualidad so katooran, pero antoy mas importante nen say pangipanengneng na katooran? Say motibo o rason no akin ya manmamatoor so sakey. Antoy motibo na saray lingkor na Dios nen impanengneng da so katooran? Impanengneng da itan aliwan lapud naoobliga ra, noagta lapud panangaro. Imanoen so alimbawa nen David. Sikatoy matoor ed kaaro ton si Jonatan anggano labay ya ipapatey nen Saul, say mismon ama nen Jonatan. Diad tua, anggano inatey lay Jonatan, nibagan ag-anguman so katooran nen David ta inasikaso toy anak nen Jonatan ya si Mefiboset. Akin et ontan lay katooran nen David ed si Jonatan? On, ta inar-aro to. Atan so matoor ya panangaro!—1 Sam. 20:9, 14, 15; 2 Sam. 4:4; 8:15; 9:1, 6, 7.

⁸ Dakel met so naaralan tayo tungkol ed matoor a panangaro diad libro na Biblia ya Ruth. Anto ran leksion so naaralan tayo ed saray lingkor na Dios ya abitla ed libron Ruth? Panon tayon niyaplika iratan diad kongregasyon tayo? *

9. Akin et inisip nen Noemi ya sikatoy dudusaen nen Jehova?

⁹ Diad libro na Ruth, nabasa tayo so istorya nen Noemi, say manugang ton si Ruth, tan si Boaz ya sakey a lakin matakot ed Dios tan kanayon na asawa nen Noemi ya si Elimelec. Nen walay agawan eras ed Israel, apilitan si Noemi tan Elimelec, tan saray ananak da ya onalis ed Moab. Ag-abayag, inatey si Elimelec. Angasawa imay duaran ananak da, pero makapaermen ta inatey met ira. (Ruth 1:3-5; 2:1) Lapud sarayan trahedya, pinasyay ermen nen Noemi ya anggad punton inisip to ya sikatoy dudusaen nen Jehova. Imanoen so ambelbelat ya nalilikna to ed sarayan  imbaga to: “Sinmumpad siak si Jehova.” “Inyabuloy na Makapanyarin-amin a magmaliw a maer-ermen so bilay ko.” Imbaga to ni ingen: “Say Makapanyarin-amin so sengegay paniirap ko.”—Ruth 1:13, 20, 21.

10. Antoy reaksion nen Jehova ed saray ansasakit ya imbaga nen Noemi?

¹⁰ Antoy reaksion nen Jehova ed saray ansasakit ya imbaga nen Noemi? Imbes ya ombarong si Aman Jehova, tinalosan toy pakaskasin situasyon nen Noemi. Amta nen Jehova ya “say panamairap et gawaen ton ambagel so sakey a marunong.” (Ecl. 7:7) Kanian anggano onman so imbaga nen Noemi, labay nen Jehova ya ipalikna ed sikato ya agton balot paulyanan. Panon ton ginawa itan? (1 Sam. 2:8) Inusar toy Ruth pian ipanengneng so matoor ya panangaro ed si Noemi. Maar-aron manugang si Ruth. Mabulbulos ton tinulongan si Noemi pian ombiskeg lamet so liknaan to tan nalikna toy panangaro nen Jehova. Antoy naaralan tayo ed alimbawa nen Ruth?

11. Akin et akaparaan iray agagi ya ontulong ed saray kakongregasyon dan maneermen?

¹¹ Say matoor a panangaro so mamakiwas ed sikatayo ya ontulong ed saray maneermen. Singa si Ruth ya agto tinaynan si Noemi, saray maar-aron agagi natan et akaparaan tan ag-onsasawan ontulong ed saray kakongregasyon da ya maneermen o nadi-depress. Inar-aro da ira, kanian labay da ran tulongan. (Pro. 12:25; 24:10) Uunoren da iyan bilin nen apostol Pablo: “Ligliwa yo iramay maer-ermen, tulongan yo iramay makapuy, anosan yo so amin.”—1 Tes. 5:14.

12. Antoy sakey ya epektibon paraan pian natulongan mo so agin maneermen odino onkakapuy so liknaan to?

¹² Antoy sakey ya epektibon paraan pian natulongan mo so agin maneermen odino onkakapuy so liknaan to? No ibabalikas toy liknaan tod sika, dengel mon maong tan ipasegurom ed sikato ya inar-arom. Papablien nen Jehova so atension ya ipapanengneng mo ed inar-aro ton lingkor. (Sal. 41:1) Oniay ibabaga na Proverbio 19:17: “Samay mangipapatnag na kaabigan ed pakaskasi et manpapautang ed si Jehova, tan sikatoy balesen To ed gagawaen to.”

13. Anto so mandumaan ya desisyon nen Ruth tan Orpa, tan akin ya nibagan impanengneng nen Ruth so matoor a panangaro? (Nengnengen so litrato ed apis.)

¹³ Mas natalosan tayo nin maong so matoor a panangaro no pawilen tayoy agawa nen abalo lay Noemi tan inatey la ray ananak to. Nen abalitaan nen Noemi ya anggapo lay eras ed Israel ta “inimano la nen Jehova iray totoo to,” nandesisyon ya onsempet la. (Ruth 1:6) Akila ed sikato so duaran manugang to, pero legan iran walad dalan, amitlo to ran binagaan ya ompawil la rad Moab. Antoy desisyon da ey? Oniay nabasa tayo: “Inangoban nen Orpa so katulangan to tan inmalis la. Balet si Ruth et nansiansian kaiba to.” (Ruth 1:7-14)  Nandesisyon si Orpa ya onsempet la ta atan so imbaga na katulangan to. Duma balet so desisyon nen Ruth. Sarag to la komon so onsempet, pero agto itan ginawa. Sikatoy akaparaan ya mansakripisyo ta inar-aro toy Noemi tan labay ton asikasoen. (Ruth 1:16, 17) Ginawa to itan aliwan lapud naoobliga, noagta atan so labay ton gawaen. Atan so matoor a panangaro! Anto so naaralan tayo ed ginawa nen Ruth?

14. (a) Antoy gagawaen na saray maar-aron agagi natan? (b) Base ed Hebreo 13:16, naliliketan si Jehova ed anto?

¹⁴ Say matoor a panangaro so mamakiwas ed sikatayon mansakripisyo parad arum. Singa saray lingkor na Dios nensaman, dakel met natan so mangipapanengneng na matoor ya panangaro ed saray kaagian da, anggan diad saramay agda ni akabat ed personal. Singa bilang, no walay agawan kalamidad, mantetepet iran tampol no panon iran makatulong. No walay kakongregasyon da ya mankakkaukolan, onkikiwas iran tampol pian natulongan da. Singa saray Kristiano diad Macedonia nensaman, saray maar-aron agagi natan et akaparaan ya mansakripisyo pian natulongan iray agagin maniirap, tan mabulos iran mangiiter ya “lampas ni ingen ed pakasarag da.” (2 Cor. 8:3) Seguradon naliliketan si Aman Jehova ed matoor ya panangaro ya ipapanengneng da!—Basaen so Hebreo 13:16.

15-16. Akin et nibagan agbasta-basta sinmuko si Ruth?

¹⁵ Dakel so naaralan tayon leksion ed intulong nen Ruth ed si Noemi. Nia ray pigara.

¹⁶ Agka basta-basta onsusuko. Nen imbaga nen Ruth ed Noemi ya milad Juda, diad unaan et aglabay nen Noemi. Pero talagan mapilit si Ruth. Antoy reaksion nen Noemi? Nen anengneng to ya “mapilit si Ruth,” pinaulyan to la ya milad sikato.—Ruth 1:15-18.

17. No walay tutulongan tayon nadi-depress, antoy makatulong pian agtayo basta-basta onsusuko?

¹⁷ Leksion: Kaukolan so anos no labay tayon tulongan so sakey ya nadi-depress. Singa bilang, ompan diad unaan et aglabay na sakey ya agi so patulongan. Pero say matoor a panangaro so mamakiwas ed sikatayo ya agbasta-basta onsusuko. (Gal. 6:2) Gawaen tayo nin siansia so anggaay nayarian tayo ta ompan onsabi so panaon ya awaten to lanlamang so tulong tayo.

18. Antoy imbaga nen Noemi ya seguradon akasakit ed si Ruth?

¹⁸ Agka ombabarong. Kasabi nen Noemi tan Ruth diad Betlehem, anengneng ira na saray kabandaan nen Noemi. Oniay imbaga tod sikara: “Walad siak ya amin nen inmalis ak, balet ta pinapawil ak nen Jehova a kalimalima.” (Ruth 1:21) Imadyin mo pay alikna nen Ruth nen ontan so imbaga na katulangan to. Nen maer-ermen si Noemi, wadtay Ruth ya akiakis ed sikato. Pinabiskeg to tan inibaan to ni ingen ya nanakar na pigaran agew. Anta balbaleg so insakripisyo nen Ruth, insan imbaga nen Noemi ya “pinapawil nen Jehova a kalimalima”! Singa aminpinsan ton alingwanan so ginawa nen Ruth parad sikato! Imadyin mo pay Ruth ya akaalagey ed abay nen Noemi tan onman so narerengel to. Seguradon asakitan si Ruth. Pero anggano ontan so agawa, agto tinaynan si Noemi.

19. Antoy makatulong pian tuloytuloy tayon natulongan so sakey ya agi ya nadi-depress?

¹⁹ Leksion: No say sakey ya agi et nadi-depress, ompan wala ray ansakit ya naibaga to ed sikatayo, anggano gagawaen tayo lay anggaay nayarian tayo ya ontulong ed sikato. No bilang ta ontan so nagawa, agtayo komon ombabarong. Imbes, itultuloy tayon tulongan  tan ipikasi tayo ed si Jehova ya makanonot tayo ni na arum ya paraan pian napabiskeg tayo iyan agi.—Pro. 17:17.

20. Antoy sakey ya amabiskeg ed si Ruth pian maseet ton naasikaso si Noemi?

²⁰ Agmo isisiblet so panamaseseg. Impanengneng nen Ruth so matoor a panangaro ed si Noemi, pero siempre, kaukolan met nen Ruth so panamaseseg. Kanian pinakiwas nen Jehova si Boaz pian pasesegen si Ruth. Oniay imbaga nen Boaz ed si Ruth: “Komon ta bendisyonan nen Jehova so gagawaen mo, tan wala komoy sigpot a tumang mo manlapud si Jehova a Dios na Israel, a diad silong na saray payak to et manpapasalimbeng ka.” Apaseseg ya maong si Ruth, kanian imbaga tod si Boaz: “Niligliwam ak tan makapabiskeg na liknaan so imbagam ed [siak].” (Ruth 2:12, 13) Talagan kakkaukolan nen Ruth iman ya panamaseseg! Aman so sakey ya amabiskeg ed sikato pian maseet ton naasikaso si Noemi.

21. Base ed Isaias 32:1, 2, antoy gagawaen na saray maar-aron elder?

²¹ Leksion: Anggan saramay mangipapanengneng na matoor a panangaro et kaukolan da met so panamaseseg. Nen anengneng nen Boaz so panangaro nen Ruth ed si Noemi, kinomendaan to. Ontan met so gagawaen na saray elder natan. No nanenengneng da so pansasagpot na saray kakongregasyon da ya ontulong ed arum, aapresyaen tan kokomendaan da ra. Kakkaukolan na sarayan agagi so maaron komendasyon. Atan so mamabiskeg ed sikara ya ag-onsawan ontulong ed arum.—Basaen so Isaias 32:1, 2.

22-23. Antoy agawan pananguman ed si Noemi, tan akin? (Salmo 136:23, 26)

²² Ag-abayag, dakdakel so abaston inter nen Boaz ed si Ruth tan Noemi. (Ruth 2:14-18)  Antoy reaksion nen Noemi ed kamaongan ya impanengneng nen Boaz ed sikara? Imbaga to: “Komon ta sikatoy bendisyonan nen Jehova, a naynay a mangipapatnag na matoor a panangaro ed saray mabilay tan inatey.” (Ruth 2:20a) Anguman lay liknaan nen Noemi. No nensaman et maer-ermen ton imbaga ya: “Sinmumpad siak si Jehova,” natan et malikeliket ton imbaga ya: ‘Si Jehova et naynay a mangipapatnag na matoor a panangaro.’ Akin et malikeliket la natan si Noemi?

²³ Atalosan ya siansia nen Noemi ya sikatoy agan balot pinaulyanan nen Jehova. Alikna to ya inusar nen Jehova si Ruth pian walay onalalay ed sikato diad isempet tod Juda. (Ruth 1:16) Alikna met nen Noemi so tulong nen Jehova nen dakel so abaston inter nen Boaz, ya sakey ed saray “mananondon” da. * (Ruth 2: 19, 20b) Seguro, oniay nibaga nen Noemi ed si Jehova: “Salamat Ama, ta agmo ak pinaulyanan manlapu la nensaman anggad natan.” (Basaen so Salmo 136:23, 26.) Seguradon misalsalamat met si Noemi ed si Ruth tan Boaz, ta ag-ira sinmawan tinmulong ed sikato. Seguradon malikeliket iran amin ta pinmawil lay ligsa nen Noemi!

24. Akin et ipapanengneng tayo so matoor a panangaro ed saray agagi tayo?

²⁴ Anto ray naaralan tayo ed libro na Ruth tungkol ed matoor a panangaro? Say matoor a panangaro so mamakiwas ed sikatayo ya agbasta-basta onsusuko no tutulongan tayo ray agagi ya nadi-depress. Lapud matoor a panangaro, akaparaan tayon mansakripisyo parad sikara. Importantin pasesegen na saray elder iray agagin mangipapanengneng na matoor a panangaro. Seguradon malikeliket tayo no nanengneng tayon ompawil lay ligsa na saray tutulongan tayo. (Gawa 20:35) Pero tandaan tayo ya say manunan rason no akin ya ipapanengneng tayo so matoor a panangaro et lapud labay tayon aligen tan paliketen si Jehova, say Dios ya “abalbaleg ed matoor a panangaro.”—Exo. 34:6; Sal. 33:22.