1. Antoy naiisip tayo no maminsan?

KASIN no maminsan et natatakot o nanaaburido ka ed saray asingger lan nagawa ed arapen—say pakaderal na palson relihyon, say iyataki na Gog na Magog, tan say guerra na Armagedon? Seguro naisip mo, ‘Makapanmatoor ak kasi no nagawa la iratan?’ No ontan so iisipen mo, makatulong ed sika iyan artikulo ya akabase ed sayan imbaga nen Jesus ed saray disipulo to: “Agyo aabuloyan a nagonigon so kapusoan yo. Ipatnag yoy pananisia.” (Juan 14:1) No mabiskeg so pananisia tayo, nasarag tayo so anggan anton subok ya nagawad arapen.

2. Panon tayon napabiskeg so pananisia tayo, tan antoy aralen tayo ed sayan artikulo?

² Panon tayon napabiskeg so pananisia tayo? Kaukolan tayon usisaen no panon tayon aarapen iray subok natan. Ditan tayo naamtaan no kasin mabiskeg so pananisia tayo o andi, tan naamtaan mod reaksion mo no anto ni ray kaukolan mon paaligwasen ed sarilim. Tan kada no nalampasan mo so sakey ya subok, mas ombiskeg so pananisiam. Kanian no natan ni labat et gagawaen mo lay anggaay nayarian mon anosan iray subok, ipaparaan mo lay sarilim ed saray subok ed arapen. Aralen tayo ed sayan artikulo so apatiran situasyon ya kakkaukolan na saray Kristiano so mabiskeg ya pananisia. Insan tayo pantongtongan no panon tayon nasarag iratan, tan no panon iratan ya makatulong pian akaparaan tayo la ed saray nagawad arapen.

3. Base ed Mateo 6:30, 33, antoy indanet nen Jesus ya gawaen tayo anggano mairap so bilay?

³ No sakey kan ulo na pamilya, antam ya responsabilidad mon itarya so pankaukolan na asawam tan ananak mo—singa say panangan, kawes, tan panayaman. Pero subok itan ed arum ta mairap  so bilay natan. Wala ray agagi tayo ya nakal ed trabaho, tan anggano abaybayag la ran manaanap, agni ran siansia akalmo na balon trabaho da. Say arum et agda inawat so sakey ya trabaho, ta ag-itan nayari ed saray Kristiano. No ontan so situasyon tayo, kaukolan tayoy mabiskeg ya pananisia ya iter nen Jehova so pankaukolan na pamilya tayo. Atan so impaseguro nen Jesus ed saray disipulo to diad samay Sermon ed Palandey. (Basaen so Mateo 6:30, 33.) No kombinsido tayo ya agan balot mamaulyan si Aman Jehova, iyuna tayo nin siansia so Panarian anggano mairap so bilay. Diman tayo nanengneng ya ag-antikey so lima nen Jehova, kanian mas lalon onasingger so liknaan tayod sikato tan mas ombiskeg so pananisia tayo.

4-5. Antoy akatulong ed sakey ya pamilya nen problema day pambilay da?

⁴ Imanoen tayo so eksperiensya na pamilyan Castro ed Venezuela tan no panon iran tinulongan nen Jehova nen problema day pambilay da. Dati, walay daralusan da ya ditan so pangalaan da na pambilay. Pero nilusob ira na grupo na saray armadon lalaki tan pinalayas da ra ed dalin da. Oniay imbaga na tatay ya si Miguel: “Mitatanem kami labat la natan. Kada kabangon koy kabuasan, say pikakasik ed si Aman Jehova et iter to komon so nakaukolan mi parad sanagew.” Anggano mair-irap so bilay na sayan pamilya, mabiskeg so pananisia ra ya ag-iran balot paulyanan na maar-aron Ama tayo. Kanian regular ni ran siansia ya mimiaral tan manpupulong. Lapud iyuuna dad bilay da so Panarian, iiter nen Jehova iray nakaukolan da.

⁵ Anggan antoy irap na pamilya da, say nampokusan nen Miguel tan say asawa ton si Yurai et no panon iran aasikasoen tan bebendisyonan nen Jehova. No maminsan, uusaren nen Jehova iray agagi pian mangiter na melag ya tulong, odino iyanapan day Miguel na sideline to. Wala met iray pagkakataon ya inusar nen Jehova so branch office pian niiter iray manunan pankaukolan da. On, ag-iran balot pinaulyanan nen Aman Jehova kanian lalon binmiskeg so pananisia na pamilya ra. Oniay imbaga na panguloan ya anak dan bii ya si Yoselin: “Anengneng kon mismo ya aliwan antikey so lima nen Jehova. Nata-touch ak kada no isipen ko ya si Jehova et kaarok, ya lanang ya wadtan parad siak. Lapud sarayan subok ya dinalan na pamilya mi, akaparaan kami la ed saray mas graben subok ya nagawad arapen.”

6. Panon mon napabiskeg so pananisiam no mair-irap so pananap na pambilay ed lugar yo?

⁶ Kasin diad lugar yo et mair-irap so mananap na pambilay? Tua ya mair-irap itan ya situasyon. Pero anggano ontan so situasyon yo, sarag yo nin siansia ya pabiskegen so pananisia yo. Panon mon nagawaan itan? Manpikasi kad si Jehova, insan basam imay imbaga nen Jesus ya walad Mateo 6:25-34. Dalepdep mo itan, insan ka man-research na saray eksperiensya na agagi ya mamapaneknek ya agbalot paulyanan nen Aman Jehova iramay mangiyuuna ed panlabayan to. (1 Cor. 15:58) No gawaen mo itan, lalon ombiskeg so pananisiam ya tulongan ka met na  Ama tayod tawen no panon ya tinulongan to la ray arum ya lingkor to. Amta to iray nakaukolan mo, tan amta to no panon to itan ya iter ed sika. No naeksperiensyam ya mismo so tulong nen Jehova, mas ombiskeg so pananisiam kanian akaparaan ka lan arapen iray mas grabe nin subok.—Hab. 3:17, 18.

7. Base ed Mateo 8:23-26, panon ya asubok so pananisia na saray disipulo nen Jesus nen nabotan ira na maksil a bagyo?

⁷ Nen nabotan na maksil a bagyo si Jesus tan saray disipulo to diad pegley na dayat, inusar iman nen Jesus ya pagkakataon pian ibangat ira ya kaukolan dan pabiskegen so pananisia da. (Basaen so Mateo 8:23-26.) Diad saman et ngalngali la onlereg so baloto da ta angkakabaleg so daluyon, pero masamit so ugip nen Jesus. Balet, natatakot ya maong iray disipulo. Kanian binangon da tan imbaga ran, “Katawan, iliktar mo kami!” Pero oniay imbaga nen Jesus: “Akin et agaylay takot yo, sikayo ran kulang na pananisia?” Diad tua, anggapo komon so nepeg ya takotan na saray disipulo ta kaiba day Jesus tan sarasarag iran protektaan nen Jehova. Antoy naaralan tayod saya? No mabiskeg so pananisia tayo, nasarag tayo so anggan anton “maksil a bagyo”—literal man itan ya bagyo odino saray singa bagyon problema ed bilay tayo.

8-9. Panon ya asubok so pananisia nen Sister Anel, tan antoy akatulong ed sikato?

⁸ Imanoen tayo so alimbawa nen Anel ya sakey ya single sister ed Puerto Rico, tan no panon ya binmiskeg so pananisia to nen dinmalan ed mair-irap ya subok. Literal ya bagyo so naeksperiensya to. Nen 2017, dineral na Bagyon Maria so abung nen Anel tan lapud saman ya bagyo et nakal ed trabaho. “Aburido ak ya maong,” so kuan nen Anel. “Pero lapud saman, naaralan koy manmatalek ed si Jehova, ta nagmaliw ak ya mas mapikasi tan agak nampatalo ed problemak.”

⁹ Imbaga met nen Anel ya say sakey nin akatulong ed sikato et say inyunor tod instruksion. Imbaga to: “Lapud inunor ko ray instruksion na organisasyon nen Jehova, kalmado ak labat. Inusar nen Jehova iray agagi pian tulongan tan pasesegen ak, tan angiter met iray materyal ya tulong.” Onia ni imbaga to: “Sobsobra so inter ed siak nen Jehova ya tulong. Binmiskeg ya maong so pananisiak!”

10. Antoy gawaen mo no walay “maksil a bagyo” ed bilay mo?

¹⁰ Kasin walay “maksil a bagyo” ed bilay mo natan? Ompan naapektoan ka na literal ya bagyo odino arum nin kalamidad. Ompan walay aarapen mon singa bagyon problema. Singa bilang, ompan walay graben sakit mo tan agmo la amtay gawaen mo. Tua ya makapaaburido itan, pero no manmatalek kad si Jehova, agka nadaeg na problema. Manpikasi kan lanang tan ibagam ed sikato so amin ya naliliknam. Nonot mo tan dalepdep mo no panon ka lan tinulongan nen Jehova nensaman. (Sal. 77:11, 12) No ontan so gawaen mo, ombiskeg so pananisiam tan magmaliw kan kombinsido ya antokaman so nagawa, agkan balot paulyanan nen Jehova.

11. Akin et determinado tayon unoren iray mangidadaulo?

 ¹¹ Anto ni makatulong pian nasarag mo ray subok? Singa imbaga nen Sister Anel, importante ya unoren tayo ray instruksion. Pantiwalaan tayo iray mangidadaulo ta pantitiwalaan ira nen Jehova tan Jesus. Ompan no maminsan nalikna tayo ya aliwan praktikal so instruksion da, pero tandaan tayo ya say bebendisyonan nen Jehova et saray maunor. Base ed saray salaysay ed Biblia tungkol ed saray matoor ya lingkor nen Jehova, say iyunor ed instruksion so mangiliktar ed bilay na sakey ya too. (Exo. 14:1-4; 2 Awa. 20:17) Dalepdep mo iratan ya alimbawa pian mas lalon ombiskeg so determinasyon mo ya unoren iray instruksion na organisasyon nen Jehova natan tan diad arapen. (Heb. 13:17) No gawaen mo la itan natan, anggapoy nepeg mon takotan no onsabi la so sankakasilan ya “bagyo”—say baleg a kairapan.—Pro. 3:25.

12. Base ed Lucas 18:1-8, akin et nasarag tayo so ag-inkahustisya no mabiskeg so pananisia tayo?

¹² Amta nen Jesus ya sakey ed saray subok ya arapen na saray disipulo to et say ag-inkahustisya. Pian niparaan to ira, walay imbaga ton ilustrasyon ya akarekord ed libro na Lucas. Tungkol iya ed sakey ya abalon bii ya ag-onsasawan mikasi ed sakey ya agmatunong ya ukom, ta amta to ya no ag-ontundan mikasi et naawat to lanlamang so hustisya. Lapud inkaanos to, inter lanlamang na ukom so kekerewen ton hustisya. Antoy naaralan tayod saya? Aliwan singa saman ya ukom, si Jehova et matunong ya Dios. No saman ya agmatunong ya ukom et inter toy hustisya, di lalo lay Jehova. Kanian oniay imbaga nen Jesus: “Agta segurado sirin ya iter na Dios so hustisya ed saray pinili to ya ontatawag ed sikato ed agew tan labi?” (Basaen so Lucas 18:1-8, tan paimanod leksab.) Oniay intuloy nen Jesus: “No onsabi so Anak na too, talaga kasin naromog to iyan klase na pananisia diad dalin?” No makaeksperiensya tayo na ag-inkahustisya, aligen tayo imay balon bii—ipanengneng tayo so mabiskeg ya pananisia. No onman kabiskeg so pananisia tayo, makapan-anos tayo tan agtayo onsawan onkerew na tulong ed si Jehova ta segurado tayo ya onsabi panaon et iter to lanlamang so hustisya. Lanang tayo met ya tandaan ya balbaleg so nagawaan na pikakasi. Tan no maminsan, eebatan nen Jehova so pikakasi tayo diad paraan ya agtayon balot naisip.

13. Panon ya akatulong so pikakasi ed sakey ya pamilya nen walay agawad sikara ya ag-inkahustisya?

¹³ Imanoen so eksperiensya nen Sister Vero ya taga Democratic Republic of the Congo. Nen walay grupo na militar ya linmusob ed baryo da, tinmakas si Sister Vero kaibay asawa to ya aliwan Tasi, tan say anak dan bii ya 15 años. Legan iran ontatakas, akasabi ra ed sakey ya checkpoint. Pinatunda ira na saray sundalo tan imbaga ran pateyen da ra. Manakis si Sister Vero, kanian nampikasin maksil so anak to pian napakalma toy nanay to. Aminpiga ton binitla so ngaran nen Jehova. Kayari ton  nampikasi, tinepetan na samay komander: “Siopay nambangat ed sikan mandasal?” Oniay inyebat to may anak nen Sister Vero: “Si nanay ko, Sir. Imbangat dad siak may paraan na panagpikasi ya nabasad Mateo 6:9-13.” Kanian imbaga na komander: “Sige, la kayo la sirin, tan protektaan kayo komon na Dios yon Jehova.”

14. Antoy sakey ya pakasubokan na pananisia tayo, tan antoy makatulong ed sika diad ontan ya situasyon?

¹⁴ Naaralan tayod satan ya eksperiensya ya agtayo dapat leleglemewen so pakayari na pikakasi. Pero ompan nasubok so pananisiam no aliwan nikadkaduma so ebat nen Jehova ed pikakasim odino ompan agni ingen itan naebatan. No ontan so situasyon mo, alig mo imay balon bii diad ilustrasyon nen Jesus. Agka ontutundan manpikasi. Manmatalek ka ya agkan balot paulyanan nen Jehova tan ebatan to lanlamang so pikakasim. Ipikasim ya lanang to kan ikdan na masanton espiritu to. (Fil. 4:13) Tandaan mo met ya diad manasingger lan balon mundo, nalingwanan mo lan amin so irap tan ag-inkahustisya ya dadalanen mo natan lapud karakel na bendisyon nen Jehova ed sika! Legan mon aanosan iray ag-inkahustisya diad tulong nen Jehova, ombiskeg so pananisiam kanian mas nasarag mo la ray subok ed arapen.—1 Ped. 1:6, 7.

15. Base ed Mateo 17:19, 20, anton subok so inarap na saray disipulo nen Jesus?

¹⁵ Imbaga nen Jesus ed saray disipulo to ya nasarag dan gawaen iray singa imposible no walay pananisia da. (Basaen so Mateo 17:19, 20.) Aminsan, agda napapaway so sakey ya demonyo anta agawaan da la itan dati. Akin kasi? Imbaga nen Jesus ed sikara ya kinmulang so pananisia ra. Impaliwawa to ya no mabiskeg so pananisia ra, anggan say palandey et sarasarag dan iyalis! Saray Kristiano natan et nayarin nipaarap met ed singa nipalandey iran problema.

16. Panon ya akatulong so pananisia nen Geydi pian nalabanan toy ermen to nen inatey so asawa to?

¹⁶ Imanoen so eksperiensya nen Sister Geydi ya taga Guatemala. Say asawa ton si Edi et pinatey na saray kriminal nen aminsan ya pasempet la rad abung da kayari na aral. Panon ya akatulong so pananisia nen Geydi pian nalabanan toy ermen to? Imbaga to: “Ondedeen so nonot ko kada no manpikasi ak ed si Jehova tan no ipapaawit kod sikato iray ambelbelat ya awit ko. Inusar nen Jehova so pamilyak tan saray kakaarok ed kongregasyon. Agda ak balot pinaulyanan. Lapud akapokus ak ed ministeryo, nababawasan so ermen tan pakakaaburidok, tan nasasarag koy kada agew. Lapud sayan dinalan ko, kombinsido ak ya anggan anto ni ’tay subok ya onsabi ed bilay ko, nasarag ko diad tulong nen Jehova, si Jesus, tan say organisasyon.”

17. Antoy gawaen tayo no nipaarap tayo ed singa nipalandey iran problema?

¹⁷ Kasin maneermen ka ed impatey na kapamilyam o kaarom? Maabig no basaen mo iray salaysay na Biblia tungkol ed saray pinaoli nen Aman Jehova nensaman pian ombiskeg so pananisiam ed sipan to ya bilayen to iray  inaatey diad arapen. Kasin maneermen ka ta adispelo so kapamilyam? I-personal study’m no akin ya lanang ya duga so panagdisiplina nen Jehova tan parad pankaabigan tayo lanlamang itan. Antokaman so problema ya dadalanen mo natan, tandaan mo ya nausar mo itan ya pagkakataon pian napabiskeg mo so pananisiam. Ibagam ed si Jehova so amin ya naliliknam. Imbes ya isian moy sarilim ed saray agagi, paelet moy pikakaarom ed sikara. (Pro. 18:1) Ompan no maminsan et makaakis ka nin siansia no nanonotan mo iray makapaermen ya agawgawa ed bilay mo. Iyakis mo labat, pero agmo komon papaulyanan so espiritualidad mo ta atan so ontulong ed sikan makapan-anos. (Sal. 126:5, 6) Itultuloy moy miaral, manpulong, tan manbasa na Biblia. Tan isip mon lanang iray bendisyon ya ipaparaan nen Jehova parad sika. Kada no naliknam so tulong nen Jehova, mas ombiskeg so pananisiam ed sikato.

18. Antoy gawaen mo no nalikas mon aliwa nin masyadon mabiskeg so pananisiam?

¹⁸ No diad saray probleman dinalan mo nensaman o dadalanen mo natan et alikas mo ya aliwa nin mabiskeg so pananisiam, agka nadidismaya. Tandaan mo ya pagkakataon mo itan pian napabiskeg moy pananisiam. Alig mo imay ginawa na saray apostol nen imbaga ran, “Aruman moy pananisia mi.” (Luc. 17:5) Isip mo met so alimbawa na saray agagi ya apantongtongan tayo ed sayan artikulo. Singa si Miguel tan Yurai, agmo lilingwanan no panon ka lan tinulongan tan inasikaso nen Jehova. Singa si Anel tan say anak nen Vero, manpikasi kan impapuso, lalo la no ondadalan kad graben subok. Tan singa si Geydi, awat moy tulong na kapamilyam tan kakaarom, ta sakey ira ed saray uusaren nen Jehova ya ontulong ed sika. No manpatulong kad si Jehova ed saray dadalanen mon subok natan tan naliknam ya agto ka papaulyanan, mas magmaliw kan kombinsido ya tulongan to ka ed arapen anggan anto ni ’tay onsabin subok.

19. Antoy pantitiwalaan nen Jesus ya nasarag ya gawaen na saray disipulo to, tan antoy dapat ya isipen mo ya seguradon nasarag mo?

¹⁹ Nen anengneng nen Jesus ya kulang ni so pananisia na saray disipulo to, impaimano to itan ed sikara. Pero walay tiwala to ya diad tulong nen Jehova, napabiskeg day pananisia da tan nasarag da iray dalanen dan subok. (Juan 14:1; 16:33) Ontan met natan, walay tiwala nen Jesus ya makaliktar so “baleg ya ulop” ed onsabin baleg a kairapan ta mabiskeg so pananisia da. (Apo. 7:9, 14) Kasin kaiba ka ed saray makaliktar? On! Makaliktar ka diad tulong nen Jehova, tan no natan ni labat et gawaen mo lay anggaay nayarian mo pian pabiskegen so pananisiam!—Heb. 10:39.