1-2. (a) Akin et importantin manmatalek ed si Jehova iray balon kasal? (Salmo 37:3, 4) (b) Anto ray aralen tayo ed sayan artikulo?

KASIN balon kasal ka, o manasingger met lay pankasal mo? No on, seguradon eksayted ka la ya nakaiban legay-bilay so toon inar-arom. Pero siempre, walan-walay subok ed bilay na sanasawa, tan wala ray kaukolan yon desisyonan. Say reaksion yo ed saray subok tan saray gawaen yon desisyon et baleg so epekto to ed bilay yon sanasawa. No manmatalek kayod si Jehova, maong so pansumpalan na saray desisyon yo, lalon ombiskeg so aroan yo, tan mas maliket so ulopan yo. Pero no ibaliwala yo ray bilin na Dios, wala ray onlesan problema ya apektoen toy relasyon yo kanian agkayo maliket.—Basaen so Salmo 37:3, 4.

² Anggano parad saray balon kasal iyan artikulo, saray subok ya natalakay dia et dadalanen na halos amin ya sanasawa. Pantongtongan tayo dia so alimbawa na pigaran matoor ya lingkor na Dios nensaman. Amtaen tayo no antoy naaralan tayod sikara ya niyaplika tayod bilay tayo, partikular la ed bilay na sanasawa. Amtaen tayo met no antoy naaralan tayo ed eksperiensya na saray sanasawa ya manlilingkor ed si Jehova natan.

3-4. Anto ran subok so nayarin arapen na balon kasal?

³ Ompan wala ray man-pressure ed balon kasal ya aligen da met so bilay na arum. Singa bilang, ompan bagaan ira na atateng o kakanayon da ya manpamilya la ran tampol. Odino ompan  kombinsien ira na kakaaro o kapamilya da ya manpaalagey na baleg ya abung tan manpundar na dakel ya gamit.

⁴ No unor-unor labat so balon kasal ed ibabaga na arum, ompan agda la isipen ya maong iray desisyon da, tan makautang ira laingen na baleg. No ontan so nagawa, napilitan iran dua ya mantrabaho lan mantrabaho pian makabayar ira. Kanian ompan ngalngali anggapo lay panaon dan manpulong, man-personal study, tan man-family worship. Ompan agda met la naatendian so amin ya aral pian makapan-overtime ira ta kaukolan day onkita na ekstra odino pian ag-ira naekal ed trabaho. No ontan so situasyon na balon kasal, sasayangen da iray akalukas ya pribilehyo pian napalaknab da komon so panaglingkor da ed si Jehova.

5. Antoy naaralan mo ed naeksperiensya nen Klaus tan Marisa?

⁵ No materyal so iyuuna tayod bilay tayo, agtayo magmaliw ya maliket. Dakdakel lay akaeksperiensya na ontan. Imanoen pay eksperiensya na sanasawan Klaus tan Marisa. * Nen kakkapankasal da, parehon full-time so trabaho da kanian nasaliw day amin ya labay da. Pero diad tua, ag-ira maliket. Oniay inamin nen Klaus: “Mainaway bilay mi, pero anggapoy goal mid espiritual. Diad tua, komplikado tan makapa-stress so bilay mi.” Seguro naeksperiensyam met la iyay agawad si Klaus tan Marisa, tan apruebaan mo ya aliwan say materyal so mangiter na tuan liket. No ontan so situasyon mo, makatulong no imanoen moy maong ya alimbawa na arum pian naamtaan mo no anto ray kaukolan mon umanen ed bilay mo. Pantongtongan tayo nin unona no antoy naaralan na saray asawan lalaki ed alimbawa nen Arin Jehosafat.

6. Panon ya inyaplika nen Arin Jehosafat imay walad Proverbio 3:5, 6 nen walay dakdakel ya sundalo ya plano day onlusob ed Juda?

⁶ Sikayo ran asawan lalaki, kasin say pakalikna yo no maminsan et ambelbelat iray responsabilidad yo? No on, makaaral kayo ed alimbawa nen Arin Jehosafat. Ambelbelat so responsabilidad to ta sikato so ari, tan kaukolan ton protektaan so interon nasyon! Anto ray ginawa to? Sikatoy angipaalagey na saray panag-amotan ed Juda, tan walay masulok ya 1,160,000 ya sundalo ya imparaan to parad guerra. On, ginawa toy anggaay nayarian to pian naprotektaan iray sakop to. (2 Awa. 17:12-19) Ag-abayag, nan-alyansa iray Ammonita, Moabita, tan saray taga Seir tan plano dan lusoben so Juda. Kanian napepeligroy pamilya nen Jehosafat tan saray sakop to! (2 Awa. 20:1, 2) Antoy ginawa to? Sikatoy nampikasi tan kinmerew na tulong ed si Jehova. Inunor to imay bilin ya walad Proverbio 3:5, 6. (Basaen.) No basaen mo so mapaabeban pikakasi nen Jehosafat ya walad 2 Awaran 20:5-12, naliknam ya talagan balbaleg so talek to ed maar-aron Ama to ed tawen. Panon ya inebatan nen Jehova so pikakasi nen Jehosafat?

7. Panon ya inebatan nen Jehova so pikakasi nen Jehosafat?

 ⁷ Inusar nen Jehova so Levita ya si Jahaziel pian ipasabi so mensahe To ed si Jehosafat. Oniay imbaga nen Jehova: “Omposisyon kayo, alagey kayo labat, tan nengneng yo so panangiliktar nen Jehova parad sikayo.” (2 Awa. 20:13-17) Imbaga nen Jehova ya onalagey ira labat tan agda kaukolan so milaban. Nikadkaduma itan ya instruksion! Pero sankanonot nen Jehosafat ya nanlapu itan ed si Jehova. Lapud balbaleg so talek tod Dios, inunor to itan. Nen akiabetan ed kalaban si Jehosafat tan saray sundalo to, say inyan tod arapan et aliwan saray marundunong ya sundalo, noagta saray lalaki ya inyasain ton mangansion parad si Jehova tan anggapoy armas da. Antoy agawa? Tinoor nen Jehova so imbaga tod si Jehosafat. Tinalo To iray kalaban!—2 Awa. 20:18-23.

8. Antoy naaralan na saray asawan lalaki ed alimbawa nen Jehosafat?

⁸ Sikayo ran asawan lalaki, makaaral kayo ed alimbawa nen Jehosafat. Lapud sikayo so ulo na pamilya, responsabilidad yon asikasoen so pamilya yo. Seguradon gagawaen yoy anggaay nayarian yon legpeten tan protektaan ira. Pero no walay onsabin problema, ompan say pakaliknam et sarag mon solusyonan itan ya bukor. Aleg komon. Alig moy Jehosafat, agka manmamatalek ed sarilim. Manpatulong kad si Jehova. Diad personal ya pikakasim, ibagam ed sikato ya tulongan to kan makagawa na dugan desisyon. Insan manpikasi ka kaibay asawam. Naamtaan mo no antoy panlabayan nen Jehova no man-research ka ed Biblia tan ed saray publikasyon na organisasyon tayo, tan iyaplikam iray prinsipyon a-research mo. Pero ompan balawen odino kontraen na arum so desisyon mo ya imbasem ed Biblia, tan ibaga da ni ingen ya agmo uusaren so ulom. Ompan sugsogan da ka ya mananap ka lan mananap na kuarta ta atan kunoy sankaabigan ya niiter mod pamilyam. Balet tandaan moy alimbawa nen Jehosafat. Sikatoy nanmatalek ed si Jehova tan inmunor ed instruksion to. No panon ya agpinaulyanan nen Jehova si Jehosafat ta matoor ed sikato, seguradon agto ka met paulyanan. (Sal. 37:28; Heb. 13:5) Antoy makatulong ed sanasawa pian mansiansian maliket so ulopan da?

9. Antoy nibaga tayo ed si propetan Isaias tan say asawa to?

⁹ Say panlingkor ed si Jehova so manuna ed bilay nen propetan Isaias tan say asawa to. Propeta si Isaias tan posiblin inikdan met nen Jehova so asawa to na asainmin, ta ibabaga na Biblia ya sikatoy sakey ya “propetesa.” (Isa. 8:1-4) Akapokus iran sanasawa ed panagdayew da ed si Jehova. Talagan maabig iran alimbawa ed saray sanasawa natan!

10. Antoy epekto ed sanasawa no saniba dan aralen iray propesiya ed Biblia?

¹⁰ Naalig na saray sanasawa natan so alimbawa nen propetan Isaias tan say asawa to no iyuna da met ed bilay da so panlingkor ed si Jehova. Maabig no saniba dan aralen iray propesiya ed Biblia pian nanengneng da ya lanang iratan ya ontutua tan pian lalon ombiskeg so tiwala da ed si Jehova. * (Tito 1:2) Maabig no isipen da met no panon iran makatulong ed pakasumpal na espisipiko iran propesiya ed Biblia. Singa bilang, walay nitulong da pian nasumpal so propesiya nen Jesus ya  say maong a balita et nipulong ed interon dalin antis ya onsabi so anggaan. (Mat. 24:14) No diman nanenengneng na sanasawa so pakakasumpal na espisipiko iran propesiya na Biblia, mas napakiwas iran gawaen so anggaay nayarian da parad si Jehova.

11. Anto ray agawaan nen Priscila tan Aquila, tan akin?

¹¹ Makaaral iray sanasawa natan ed si Priscila tan Aquila. Sayan sanasawan Judio et tagad Roma. Ditan ira apulongan tungkol ed si Jesus ya anggad nagmaliw iran Kristiano. Seguro kontento la ra ed bilay da ditan. Pero anguman so bilay da nen ingganggan nen Emperador Claudio ya taynan na amin ya Judio so Roma. Imadyin yo pay subok ya dinalan nen Aquila tan Priscila lapud satan. Kaukolan day ondayo ed arum ya lugar, mananap na balon panayaman, tan man-umpisa lamet ed negosyo ran panaggawa na tolda. Kasin kinmapuy lay seseg da ed panaglingkor ed si Jehova ta anguman lay situasyon da? Seguradon amta yo lay ebat. Nen wala lad Corinto si Priscila tan Aquila, aktibo ira ed kongregasyon diman, tan tinulongan day apostol Pablo ya mamaseseg ed saray agagi. Inmalis ni ra ingen ed ararawin lugar ya mas baleg so pankaukolan. (Gawa 18:18-21; Roma 16:3-5) Seguradon malikeliket ira ta inyuna dad bilay da so Panarian!

12. Akin et maabig no say sanasawa et walay goal da ed espiritual?

¹² Naalig na saray sanasawa natan si Priscila tan Aquila no iyuna da met ed bilay da so Panarian. Legan ya saninaro ni labat so sakey ya brother tan sister, kaukolan da lan pantongtongan iray goal da ed espiritual. No parehas so goal da tan mantulongan ira pian nagawaan da itan, mas nalikna day tulong nen Aman Jehova. (Ecl. 4:9, 12) Imanoen so eksperiensya nen Russell tan Elizabeth. Oniay imbaga nen Russell: “Nen saninaro kami ni, nantongtongan mi la ray goal mi ed espiritual.” Onia met so inkuan nen Elizabeth: “Nantongtongan mi la iman pian no sanasawa kami la, agkami manggawa na desisyon ya makaamper ed goal mi.” Lapud akapokus si Russell tan Elizabeth ed goal da, akapanboluntaryo ira ed Micronesia, ya ditan et baleg so pankaukolan.

13. Base ed Salmo 28:7, antoy epekto ed sanasawa no mantiwala rad si Jehova?

 ¹³ Singa si Russell tan Elizabeth, dakel nin sanasawa so nandesisyon ya simpli labat so bilay da pian mas dakel ya panaon so nausar da ed ministeryo. No say sanasawa et walay goal da ed espiritual tan mantulongan ira pian nagawaan da itan, seguradon nabendisyonan ira. Nanengneng dan mismo no panon iran asikasoen nen Jehova, lalon ombiskeg so panagmatalek da ed sikato, tan nalikna day tuan liket.—Basaen so Salmo 28:7.

14. Panon ya impanengneng nen apostol Pedro tan say asawa to ya walay talek da ed samay sipan ya walad Mateo 6:25, 31-34?

¹⁴ Makaaral met iray sanasawa ed alimbawa nen apostol Pedro tan say asawa to. Kayari na manga anem bulan ya anggad sakey taon manlapu nen akabat nen Pedro si Jesus, sikatoy inimbitaan nen Jesus ya magmaliw ya patumbok to tan mila ed pampupulong to. Anto kasi desisyon nen Pedro? No magmaliw ya patumbok nen Jesus, panon lan makapansigay ta atan so pambibilay tod pamilya to? (Luc. 5:1-11) Pero inawat toy imbitasyon nen Jesus. Aga alingo-lingo ed satan ya desisyon to! Tan seguradon sinuportaan nen asawa to. Base ed rekord na Biblia, kayari na inkioli nen Jesus, wala ray panaon ya akila so asawa nen Pedro diad imbisita to ed saray kongregasyon. (1 Cor. 9:5) Seguradon maespiritual ya bii so asawa nen Pedro. Say sakey ya prueba et inusar nen Jehova si Pedro pian bilinen iray sanasawan Kristiano. Ag-itan ipaisulat nen Jehova ed si Pedro no aliwan maong ya alimbawa so asawa to. (1 Ped. 3:1-7) On, mapatpatnag ya nanmatalek si Pedro tan say asawa to ed sipan nen Jehova ya itarya To iray pankaukolan da, basta iyuna dad bilay da so Panarian.—Basaen so Mateo 6:25, 31-34.

15. Antoy naaralan mo ed eksperiensya nen Tiago tan Esther?

¹⁵ No bilang ta pigaran taon kayo lan kasal, antoy gawaen yo pian napalaknab yo ni ministeryo yo? Maabig no amtaen yoy ginawa na arum ya sanasawa pian makaaral kayo ed eksperiensya da. Singa bilang, basa yo so serye na artikulon “Mabulbulos Dan Inyapay so Inkasikara.” Akatulong itan ed sanasawan Tiago tan Esther ya taga Brazil. Nen binasa da iratan ya artikulo, apakiwas iran manboluntaryo ed lugar ya mas baleg so pankaukolan. Oniay imbaga nen Tiago: “Nen abasa mi iray eksperiensya na agagi no panon iran tinulongan nen Jehova, labay mi met ya nasali iman pian nalikna min mismo so panangigiya tan panangasikaso nen Jehova.” Nen 2014, namboluntaryo si Tiago tan Esther ed Paraguay, tan ontutulong ira ed kongregasyon ya mansasalitay Portuguese. Oniay imbaga nen Esther: “Say sakey ya paborito min teksto et amay Efeso 3:20. Aminpiga mi lan apatunayan ya tua itan.” Diad satan ya sulat nen Pablo ed saray taga Efeso, imbaga to ya sarasarag ya iter nen Jehova so amin ya kekerewen tayo, tan say iter to ni ingen et mas ni nen say iisipen tayo. Talagan makapantiwala tayo ed satan ya sipan!

16. Siopa ray naasinggeran na saray balon kasal ya makatulong ed sikara pian nagawaan da ray goal da ed espiritual?

¹⁶ Makaaral iray balon kasal ed saray agagi ya baleg so talek da ed si Jehova. Wala ray sanasawa ya pigaran dekada lan manpapayunir. Maabig no onkerew kayoy advice ed sikara. Tepetan yo ra no antoy makatulong pian nagawaan  yo ray goal yo ed espiritual. No ontay gawaen yo, ipapanengneng yo ya mantitiwala kayo ed si Jehova. (Pro. 22:17, 19) Maabig no mitongtong kayo met ed saray elder pian natulongan da kayo ed saray plano yo.

17. Antoy naeksperiensya nen Klaus tan Marisa, tan antoy naaralan tayo ed satan?

¹⁷ No maminsan, walay sankanonot tayon goal pero duma manayay pangusaran nen Jehova ed sikatayo. Ontan so agawa ed si Klaus tan Marisa, ya abitla ed parapo 5. Nen taloy taon la ran kasal, namboluntaryo ra ed construction na Finland branch. Pero naamtaan da ya anem bulan labat so nayarin pamboluntaryo da diman. Diad unaan, adismaya ra. Pero ag-abayag, naimbitaan ira ya manaral na lenguahen Arabic. Tan natan et malikeliket iran manlilingkor ed arum ya bansa, diad kongregasyon ya mansasalita na Arabic. Oniay imbaga nen Marisa: “No walay ipagawa nen Jehova ya agmo nin balot asali, ompan natatakot ka. Pero mantiwala ka labat ed sikato. Anengneng kon mismo no panon kamin tinulongan nen Jehova diad paraan ya agmin balot naisip. Kanian mas binmiskeg so talek kod sikato.” Singa naeksperiensya nen Klaus tan Marisa, makaseguro kayo ya bendisyonan kayo nen Jehova no talagan mantiwala kayo ed sikato.

18. Antoy makatulong ed saray sanasawa pian manmatalek ira ed si Jehova?

¹⁸ Say pangasawa tan piasawa et regalo ya nanlapud si Jehova. (Mat. 19:5, 6) Labay to ya na-enjoy itan na saray sanasawa. (Pro. 5:18) Sikayo ran agagi mi ya balon kasal, panon yon nipanengneng ya papablien yo itan ya regalo tan arum nin regalo ya inter nen Jehova ed sikayo? Usisa yo no antoy panguusaran yod bilay yo. Manpikasi kayo ed si Jehova tan kerew yoy panangigiya to. Anap yod Salita to iray prinsipyo ya dugaruga ed situasyon yo, tan iyaplika yo iratan. Seguradon maliket so ulopan yon sanasawa no iyuna yoy Jehova ed bilay yo!