1. Akin et kombinsido tayo ya labalabay nen Jehova ya onapit tayo ed sikato?

 LABALABAY nen Jehova ya onapit tayo ed sikato. (Sant. 4:8) Sikato so Dios tayo, pero labay to ya ituring tayo met bilang Ama tan Kaaro. Eebatan to ray pikakasi tayo tan tutulongan to tayo no ondadalan tayod saray subok. Uusaren to met so organisasyon to pian bangatan tan protektaan itayo. Pero antoy gawaen tayo pian onapit tayod Dios?

2. Antoy gawaen tayo pian onapit tayod si Jehova?

² Onapit tayod si Jehova no manpikasi tayo ed sikato, tan no basaen tayoy Salita to tan dalepdepen tayo iray nababasa tayo ditan. No ontan so gawaen tayo, mas naar-aro tayoy Aman Jehova tan nanengneng tayo ray balibalin ugali to. Sikatoy labalabay tayon unoren tan idayew ta amta tayon kanepegan to itan. (Apo. 4:11) No diman tayo mas nakakabat si Jehova, diman met mas ombiskeg so tiwala tayo ed sikato tan ed organisasyon to.

3. Antoy gagawaen na Diablo pian makaarawi tayo ed si Jehova, pero antoy makatulong pian agtayo taynan si Jehova tan say organisasyon to? (Salmo 31:13, 14)

³ Pero no ondadalan tayod saray subok, samboten itan na Diablo pian makaarawi tayo ed si Jehova. Antoy teknik nen Satanas? Kalkalna ton papakapuyen so tiwala tayod si Jehova tan ed organisasyon. Pero no mabiskeg so pananisia tan tiwala tayo ed si Jehova, ag-itayo nabiktima na Diablo,  tan agtayon balot taynan so Dios tayo tan say organisasyon.—Basaen so Salmo 31:13, 14.

4. Antoy aralen tayo ed sayan artikulo?

⁴ Pantongtongan tayod sayan artikulo so taloran subok ya manlalapud paway na kongregasyon ya nayarin mamakapuy ed tiwala tayod si Jehova tan ed organisasyon to. Akin et posiblin makaarawi tayod si Jehova no ondadalan tayo ed saratan ya subok? Tan antoy gawaen tayo pian ag-itayo nabiktima nen Satanas?

5. No ondadalan tayod mair-irap ya situasyon, akin et posiblin onkapuy so tiwala tayod si Jehova tan ed organisasyon to?

⁵ Nanduruman irap so aarapen tayo. Say arum ya agagi et kokontraen na kapamilya ra ed pandadayew dad si Jehova, tan say arum et nakal ed trabaho. Akin et posiblin makaarawi tayod si Jehova tan onkapuy met lay tiwala tayod organisasyon no oniay situasyon tayo? No abaybayag tayo lan aanosan so sakey ya problema, ompan naekalan tayo lay ilalo ya anggad na-depress ti la. Sasamboten nen Satanas iratan ya situasyon pian isipen tayo ya ag-itayo inaro nen Jehova. Labay na Diablo ya tetelen tayoy Jehova tan say organisasyon To ed paniirap tayo. Ontan so agawa ed saray Israelita nen wala rad Ehipto. Nen unaan, manisia ra ya si Moises tan Aaron so pinili nen Jehova ya mangibulos ed sikara ed impakaaripen da. (Exo. 4:29-31) Pero nen mas pinabelat na Faraon so kimey da, say tinetel da et si Moises tan si Aaron. Oniay imbaga rad si Moises tan Aaron: “Binusol kami na Faraon tan saray lingkor to lapud sikayo, tan inyan yod lima ra so espada a mamatey ed sikami.” (Exo. 5:19-21) Makapaermen ta say tinetel da laingen et saray matoor ya lingkor na Dios! No bilang ta abaybayag mo lan aanosan so irap o problema, antoy gawaen mo pian ag-onkapuy so tiwalam ed si Jehova tan ed organisasyon to?

6. No ondadalan tayod irap o problema, antoy gawaen tayo ya singa ginawa nen propetan Habacuc? (Habacuc 3:17-19)

⁶ Manpikasi kad si Jehova, ibagam so amin ya naliliknam, tan kerew moy tulong to. Dakel ya irap so dinalan nen propetan Habacuc. Sinmabi ingen ed punto ya singa pandududaan to la no kasin sikatoy imamalasakit nen Jehova. Kanian imbaga tod si Jehova so amin ya nalilikna to. Kuan to: “Anggad kapigan, O Jehova, so ikerew koy tulong, anta agmo ak met lanlamang dengelen? . . . Akin et aabuloyan mo so panamairap? (Hab. 1:2, 3) Dinengel tan inebatan nen Jehova so impapuson pikakasi na sayan matoor ya lingkor to. (Hab. 2:2, 3) Nen dinalepdep nen Habacuc iray ginawgawa la nen Jehova nensaman parad saray lingkor To, pinmawil so liket tan ligsa to. Kanian binmiskeg so talek to ya sikatoy tulongan tan asikasoen nen Jehova. (Basaen so Habacuc 3:17-19.) Antoy naaralan tayo? No walay aarapen mon mair-irap ya situasyon o problema, manpikasi kad si Jehova, ibagam ed sikato so amin ya naliliknam, tan kerew moy tulong to. Dalepdep mo met no anto la ray ginawa nen Jehova parad sika nensaman. No ontan so gawaen mo, ombiskeg so tiwalam ya tulongan to ka nen Jehova ya makapan-anos. Tan no diman mo nalilikna so tulong to, lalon ombiskeg so pananisiam.

7. Antoy imbaga na kapamilya nen Sister Shirley, pero antoy ginawa to pian ag-onkapuy so pananisia tod si Jehova?

⁷ Agmo papaulyanan so espiritualidad mo. Ontan so ginawa nen Sister Shirley ya taga  Papua New Guinea. b Mairap so pamilya ra tan no maminsan et sankaalmo-sankaluto so bilay da. Oniay imbaga na agi to ya aliwan Tasi: “Say kuan mo, tutulongan kayo na masanton espiritu na Dios, akin balet et mair-irap nin siansiay bilay yo? Pipirdien yo labat so oras yo ed satay pampupulong yo.” Oniay inamin nen Shirley: “Apaisip ak laingen, ‘Anggapo amon tuay pibabali na Dios ed sikami.’ Kanian nampikasi ak ya tampol ed si Jehova tan imbagak ed sikato so amin ya walad isip ko. Nambasa ak lan nambasa na Biblia tan saray publikasyon tayo. Lanang ak ya manpupulong tan agko papaulyanay pipiaral.” Diman to a-realize ya aasikasoen pa nen Jehova so pamilya to. Walan-walay panangan da tan maliket ira. Oniay imbaga nen Shirley: “Alikliknak ya inebatan nen Jehova iray pikakasik.” (1 Tim. 6:6-8) On, no agmo paulyanan so espiritualidad mo, naekal so panduaruwa ed nonot mo, tan agka onarawi ed si Jehova anggano mairap so bilay.

8. Antoy posiblin nagawa ed saray agagin mangidadaulo ed organisasyon nen Jehova?

⁸ Uusaren nen Satanas so media tan social network pian mangikayat na tila tungkol ed saray brother ya mangidadaulo ed organisasyon nen Jehova. (Sal. 31:13) Say arum ed sarayan brother et inaresto, kinasoan, tan impasen a kriminal. Agawa la itan nen inmunan siglo nen inaresto tan impriso si apostol Pablo. Nen ontan so agawa, antoy reaksion na saray agagi?

9. Antoy reaksion na arum ya agagi nen apriso si apostol Pablo?

⁹ Nen apriso si apostol Pablo ed Roma, sikatoy tinaynan na arum ya agagi. (2 Tim. 1:8, 15) Akin kasi? Ompan ibabaing day Pablo ta say pakanengneng na totoo ed sikato et kriminal. (2 Tim. 2:8, 9) Odino ompan natatakot ira ya sikaray onsublay ya arestoen na gobierno. Antokaman so rason, seguradon ansakisakit iman ed si Pablo. Agto inilaloan ya onman so gawaen da ta dakel so intepel  ton irap tan inrisga to ni ingen so bilay to parad sikara. (Gawa 20:18-21; 2 Cor. 1:8) Agtayo komon aaligen irayan agagi ya tinaynan day Pablo anta kakkaukolan to ra. Anto sirin so tandaan tayo no ontan met so nagawa ed saray brother ya mangidadaulo natan?

10. Antoy tandaan tayo no arestoen tan ipriso iray brother ya mangidadaulo? Akin et importantin tandaan tayo itan?

¹⁰ Tandaan no akin ya dakel so onkokontra tan mamapairap ed sikatayo tan no siopay lapuan na satan. Oniay ibabaga na 2 Timoteo 3:12: “Amin a malabay a manbilay a walaay debosyon ed Dios bilang disipulo nen Kristo Jesus et napasegsegang.” Agtayo la sirin nabibigla no pupuntiryaen nen Satanas iray brother ya mangidadaulo. Pakana to itan pian itakwil na sarayan agagi si Jehova tan nataktakot to tayo.—1 Ped. 5:8.

11. Antoy naaralan tayo ed si Onesiforo? (2 Timoteo 1:16-18)

¹¹ Itultuloy ya ipanengneng so suporta tan panangaro ed saray brother ya mangidadaulo. (Basaen so 2 Timoteo 1:16-18.) Walay agi nen inmunan siglo ya dumay reaksion to nen aprisoy Pablo. Say ngaran to et Onesiforo. ‘Agto imbaing si Pablo anggano akagulonggulong.’ Diad tua, inanap nen Onesiforo si Pablo. Nen aromog to, nanggaway paraan pian natulongan to. Ginawa to iman anggano amta to ya posiblin naaresto met tan ompan ipapatey ni ingen na gobierno. Antoy naaralan tayod saya? No wala ray brother ya arestoen tan napriso, kasin agtayo la ra suportaan ta natatakot tayod too? Andi. Kakkaukolan day panangaro tan suporta tayo. Kanian komon ta wadtan tayon lanang parad sikara.—Pro. 17:17.

12. Antoy naaralan tayo ed saray brother tan sister ed Russia?

¹² Isip mo pa ray brother tan sister ed Russia ya masuporta ed saray agagin impriso. No walay agi ya lilitisen, dakel ya agagi so oonla ed korte pian ipalikna so suporta da. Antoy naaralan tayo? No akusaan, arestoen, o ipriso iray agagi tayo, agtayo komon natatakot. Ipikasi tayo ra, asikasoen tayoy pamilya ra, tan manisip tayoy paraan pian nipalikna tayoy suporta tayo.—Gawa 12:5; 2 Cor. 1:10, 11.

13. Akin et posiblin onkapuy so tiwala tayod si Jehova tan ed organisasyon to no wala ray mamabalaw ed sikatayo?

¹³ Ompan balawen itayo na saray aliwan Tasi ya kanayon, katrabaho, o kaeskuela tayo lapud pampupulong tayo tan uunoren tayo ray ganggan nen Jehova. (1 Ped. 4:4) Ompan ibaga ra: “Amtak mabait kan too, pero amayamay so bawal ed relihyon yo, tan makaluma kayo.” Wala met iray mankukuestion ed panagtrato tayo ed saray dispelo. Ibabaga ra: “Aliwliwa ’tay gagawaen yo. Say kuan yo, inaro yoy kapara yon too?” No wala ray onian narengel tayo, ompan pandudaan tayo la iray ganggan nen Jehova. Baka naisip mo: ‘Singa masyado amon istriktoy Aman Jehova. Dakel ya tuay bawal ed organisasyon to.’ No ontay naisip mo, antoy gawaen mo pian agka makaarawi ed si Jehova tan ed organisasyon to?

14. Antoy gawaen mo no walay mamabalaw ed sika ta uunoren moy ganggan nen Jehova? (Salmo 119:50-52)

¹⁴ Dapat kombinsido ka ya lanang ya duga iray ganggan nen Jehova pian desidido kan unoren iratan. Balibalin aligen so alimbawa nen Job ta tuloytuloy ton inunor so ganggan nen Jehova anggano binalaw na arum. Wala ingen so angibaga ed sikato ya anggapo kunoy gunggona na panguunor to ed Dios ta anggapo met lanlamang so pibabali na Dios. (Job 4:17, 18; 22:3) Pero ag-anisia si Job ta  amta ton katilaan iratan. Sikatoy kombinsido ya lanang ya duga so estandarte nen Jehova kanian desidido ya unoren itan. Aga pinmayag ya lapu labat ed ibabaga na arum et ikbanan to lay katooran tod si Jehova. (Job 27:5, 6) Antoy naaralan tayo? No walay manbalaw ed sika, agmo komon kukuestionen so estandarte nen Jehova. Isip mo pa ray agawgawa ed bilay mo. Di ba, naiwasan mo ray problema tan duga iray desisyon mo nen inunor mo ray ganggan nen Jehova? No dalepdepen mo itan, mas determinado kan mansiansia ed organisasyon to. Amta tayo ya anggapo lay arum ya organisasyon ya manguunor ed estandarte nen Jehova. No kombinsido tayod satan, agtayon balot onarawi ed sikato anggan antoy pambalaw na totoo.—Basaen so Salmo 119:50-52.

15. Siopa ray nambalaw ed si Brithi, tan akin?

¹⁵ Imanoen so eksperiensya nen Sister Brithi ya taga India. Sikatoy binalaw na saray kapamilya to nen nan-Tasi. Ag-abayag kayari ton abautismoan nen 1997, nakal ed trabaho so asawa to ya aliwan Tasi. Lapud satan, apilitan ya miayam so pamilya ra ed katulangan nen Brithi ed arum ya syudad ta atan so desisyon na asawa to. Mas inmirap so situasyon nen Brithi. Lapud anggapoy trabaho nen asawa to, sikato so manaanap na pambilay na pamilya ra. Sakey ni, say sankaasinggeran ya kongregasyon et manga 350 ya kilometro so kaarawi to. Say akaaru-arum ni, sikatoy balaw-balawen na pamilyay asawa to. Lapud kontra iran maong, apilitan lamet ya onalis so pamilya nen Brithi. Insan biglaan ya inatey so asawa to. Ag-abayag, inatey ed cancer so komatlon anak dan bii ya 12 ni labat so taon to. Si Brithi so tetetelen na saray kakanayon to ed sarayan agawa. Ibabaga ra ya agawa irayan amin lapud nan-Tasi. Pero, aga inmikban si Brithi ed si Jehova tan ed organisasyon To.

16. Panon ya abendisyonan si Sister Brithi lapud impanmatoor tod si Jehova tan ed organisasyon?

¹⁶ Lapud arawrawi so Kingdom Hall ed abung di Sister Brithi, in-suggest na circuit overseer ya gawaen ton personal a teritorya to imay lugar da, tan sikato met lay mangikondukta  na aral diad abung da. Nen unaan, inisip to ya singa agto kaya. Pero inunor to imay imbaga na brother. Nampulong ed lugar da, inkondukta toy aral ed abung da, tan indaulo toy family worship ed saray ananak to. Antoy resulta? Amayamay so naiyaralan nen Sister Brithi, tan dakel ed sikara so nan-Tasi. Sikatoy nan-regular payunir nen 2005. Abendisyonan so impantiwala tod si Jehova tan impanmatoor tod organisasyon. Natan et maseseg met ya manlilingkor ed si Jehova iray ananak to, tan wala lay duaran kongregasyon ed lugar da! Kombinsido si Brithi ya sikatoy tinulongan nen Aman Jehova kanian asarag toy amin ya irap tan say panagbalaw na saray kapamilya to.

17. Antoy determinadom ya gawaen?

¹⁷ No mairap so bilay, labay nen Satanas ya isipen mon anggapoy malasakit nen Jehova ed sika tan mas maong lay onarawi ed organisasyon. No naakusaan, naaresto, o ipriso iray agagin mangidadaulo, labay nen Satanas ya nataktakot tayo. Tan no wala ray manbalaw, labay ton isipen tayo ya masyadon istrikto si Jehova tan say organisasyon To. Maong labat ta amta tayo ya pakana labat iraya nen si Satanas. Agka ompapayag ya nabiktima to ka! (2 Cor. 2:11) Agmo papanisiaan iray katilaan to. Komon ta determinado kan mansiansian matoor ed si Jehova tan ed organisasyon to. Tandaan mo ya agto kan balot taynanan nen Jehova. (Sal. 28:7) Anggan anto sirin so nagawa, agkan balot ompapayag ya makaarawi ka ed si Jehova!—Roma 8:35-39.

18. Antoy aralen tayo ed onsublay ya artikulo?

¹⁸ Apantongtongan ed sayan artikulo so taloran subok ya manlalapud paway na kongregasyon. Pero nasubok met so tiwala tayo ed si Jehova tan ed organisasyon to diad mismon loob na kongregasyon. No walay ontan ya nagawa, antoy makatulong pian mansiansia tayon matoor ed si Jehova tan ed organisasyon to? Atan so pantongtongan tayo ed ontumbok ya artikulo.