1. Panon ya nibagan limpio so panagnonot na sakey ya Kristiano? (1 Pedro 4:7)

 NO ONDADALAN tayod irap tan problema, nasubok so katooran tayod si Jehova tan ed organisasyon to. Antoy gawaen tayo pian ag-itayo nadaeg na saray subok? Dapat limpio so panagnonot tayo tan mansiansia tayon aliing ed espiritual pian ag-onkapuy so pananisia tayo. (Basaen so 1 Pedro 4:7.) Say sakey ya Kristiano et limpio so panagnonot to no mansiansian kalmado, agmanpapadaeg ed emosyon to, tan aaligen toy panagnonot nen Jehova anggano ondadalan ed subok.

2. Antoy pantongtongan tayo ed sayan artikulo?

² Diad imbeneg ya artikulo, nantongtongan tayoy taloran subok ya manlalapud paway na kongregasyon. Pero diad sayan artikulo, pantongtongan tayo so taloran subok ya manlalapu ed mismon loob na kongregasyon: (1) no say pakaliknam et aliwliway impantrato ed sika na sakey ya agi, (2) no akaawat kay disiplina, tan (3) no nanairapan kan man-adjust ed saray pananguman ed organisasyon. No ondalan tayod ontan iran situasyon, panon tayon napansiansia ya limpio so panagnonot tayo pian ag-itayo makaarawi ed si Jehova tan ed organisasyon to?

3. Antoy maslak ya reaksion tayo no say pakalikna tayo et aliwliway impantrato ed sikatayo na sakey ya agi?

³ Kasin asalim la ya say pakaliknam et aliwliway impantrato ed sika na agi, ya ompan walay pribilehyo to ni ingen? Seguradon agto ka ginagalan sakitan. (Roma 3:23; Sant. 3:2) Pero anggano agto ginagala, ompan mansyodot kan maong ed imbaga o ginawa to, tan agmo ingen itan pakakaugipan. Ompan nakuestion mo laingen no talaga kasin organisasyon iya na Dios, tan naisip mo, ‘Anta wala pa ni met so pribilehyo to, onman  so gawaen to.’ Ontan so labay nen Satanas ya naliknam. (2 Cor. 2:11) Akin ey? On ta no negatibo la so iisipen mo ed saray agagi, ompan idamay mo met lay Jehova tan say organisasyon to. Kanian no say pakaliknam et aliwliway impantrato ed sika na sakey ya brother o sister, antoy gawaen mo pian agnasamalan nen Satanas so nonot mo?

4. Antoy ginawa nen Jose anggano aliwliway impantrato ed sikato na saray kuya to, tan antoy naaralan tayod alimbawa to? (Genesis 50:19-21)

⁴ Agka mantatanem na sakit na linawa. Nen tinedyer si Jose ya anak nen Jacob, aliwliway impantrato ed sikato na saray kuya to. Kakkabusol da, tan labay da ni ingen ya pateyen. (Gen. 37:4, 18-22) Diad tua, inlako da pian magmaliw ya aripen. Lapud satan ya ginawa ra, graben irap so inanosan to diad loob na 13 ya taon! Kasin tinetel nen Jose si Jehova tan inisip to ya sikatoy ag-inaro tan pinaulyan la na Dios? Andi, agan balot nanhinanakit si Jose. Inalig toy panagnonot nen Jehova. Anggano wala komoy tsansa ton ombawi ed saray kuya to, nansiansian kalmado. Kinasian tan pinerdona to ra. (Gen. 45:4, 5) Akin et ontan so reaksion nen Jose? On ta agnampatalo ed emosyon to, kanian akapannonot na duga. Imbes ya sarili to labat so isipen to, say nampokusan to et no antoy gagala nen Jehova. (Basaen so Genesis 50:19-21.) Antoy naaralan tayod si Jose? No walay aliwliwan ginawad sika na sakey ya agi, agka komon manhihinanakit ed si Jehova, tan agmo iisipen ya agto ka inaro. Mas maabig no say isipen mo et no panon kan tutulongan nen Jehova pian nitepel moy situasyon mo. Tan gawam so anggaay nayarian mo ya sakoban la na aro so lingo na arum.—1 Ped. 4:8.

5. Antoy ginawa nen Brother Miqueas nen say pakalikna to et aliwliway impantratod sikato na arum ya agagi?

⁵ Imanoen so eksperiensya nen Brother Miqueas b ya elder ed South America. Wala may panaon ya aliwliwa kunoy ginawad sikato na pigaran brother ya walay pribilehyo dad organisasyon. Kuan to: “Agak makapanisia ya nagawa iman ed siak. Na-stress ak ya maong. Natatakot ak. Agak ingen makakaugip, tan akis ak lan akis ta agko la amtay gawaen ko.” Pero ginawa nen Miqueas so anggaay nayarian to pian nakontrol toy liknaan to tan makapannonot na duga. Pikasi lan pikasi, tan lanang ya onkekerew ed si Jehova na masanton espiritu pian ag-onkapuy so liknaan to tan ag-ontabang ed panlilingkor to. Nan-research met ed saray publikasyon tayo no antoy maabig ya gawaen to. Antoy naaralan tayo ed si Brother Miqueas? No say pakaliknam et aliwliway impantrato ed sika na sakey ya brother o sister, komon ta limpio nin siansia so panagnonot mo—mansiansia kan kalmado tan kontrol moy liknaan mo. Agkan tampol maniisip na negatibo ta agmo amta no antoy rason akin et onman so imbaga o ginawa to. Ipikasim ed si Jehova ya tulongan to ka pian natalosan moy situasyon to may agi. No ontan so gawaen mo, ompan na-realize mo ya agto ka met manaya ginagalan sakitan. Kanian mas mainomay mon naperdona. (Pro. 19:11) Tandaan mo ya amta nen Jehova so dadalanen mo tan tulongan to ka pian agka onkapuy ed espiritual.—2 Awa. 16:9; Ecl. 5:8.

6. No akaawat tayoy disiplina, akin et importantin tandaan tayo ya panangaro itan nen Aman Jehova? (Hebreo 12:5, 6, 11)

⁶ Tua, ansakit so nadisiplina. Pero no manpokus tayo labat ed liknaan tayo, ompan isipen tayo ya singa anggapo met so ginawa tayon aliwa, odino sobsobra imay naawat tayon disiplina. No ontan so isipen tayo, ompan  nibaliwala tayo la imay ibabaga na Biblia ya say disiplina et panangaro nen Jehova. (Basaen so Hebreo 12:5, 6, 11.) No puros negatibo so iisipen tayo, usaren itan nen Satanas pian onkapuy so espiritualidad tayo. Say labay to et agtayo ondengel ed disiplina, ya anggad kalkalna tayo lan ontunda ed panlilingkor tayod si Jehova tan iyarawi tayo lay sarili tayo ed kongregasyon. No bilang ta akaawat kay disiplina, antoy gawaen mo pian mansiansian limpio so panagnonot mo?

7. (a) Singa nanengneng ed litrato, anto ran pribilehyo so inter nen Jehova ed si apostol Pedro lapud inawat toy disiplina? (b) Antoy naaralan mo ed alimbawa nen Pedro?

⁷ Awat moy disiplina tan gawam so anggaay nayarian mon manguman. Ontan so ginawa nen apostol Pedro. Aliwa labat ya aminsan ya sikatoy impetek nen Jesus diad arap na arum nin apostol. (Mar. 8:33; Luc. 22:31-34) Seguradon abaibaingan si Pedro! Pero anggano onman so agawa, sikatoy nanmatoor ed si Jesus. Lapud inawat nen Pedro so disiplina tan akaaral ed saray lingo to, sikatoy benendisyonan nen Jehova tan inikdan To na ambelat iran responsabilidad diad kongregasyon. (Juan 21:15-17; Gawa 10:24-33; 1 Ped. 1:1) Antoy naaralan tayo ed alimbawa nen Pedro? Awaten tayoy disiplina ta parad pankaabigan tayo lanlamang itan tan na arum. Kanian imbes ya manpokus tayo ed liknaan tayo, gawaen tayo komoy anggaay nayarian tayon manguman. No ontan so gawaen tayo, magmaliw tayon mas mausar ed si Jehova tan ed kongregasyon.

8-9. Antoy alikna nen Brother Bernardo nen adisiplina, pero antoy akatulong pian makapannonot na duga?

⁸ Imanoen so agawad si Brother Bernardo ya tagad Mozambique. Sikatoy nakal ya elder. Antoy alikna to nen ontan so agawa? Kuan to: “Asakisakitan ak ta agko naawat ya nakal ak.” Sankanonot nen Bernardo no antoy ibaga na agagi. Oniay inamin to: “Pigaran bulan ni linmabas antis kon atanggap so situasyon ko tan apapawil koy tiwalak ed si Jehova tan ed organisasyon to.” Antoy akatulong ed si Bernardo pian mansiansian limpio so panagnonot to?

⁹ Oniay imbaga to: “Nen elder ak ni, lanang kon uusaren so Hebreo 12:7 pian ipaseseg ed saray agagi ya awaten day disiplina nen Jehova. Naisip ko, ‘Siopay dapat ya mangiyaplika ed sayan teksto a?’ Amin ya lingkor nen Jehova, pati siak.” Pian napapawil nen Bernardo so tiwala to ed si Jehova tan ed organisasyon,  nambasa lan nambasa na Biblia, tan dinakelan toy oras ton mandalepdep. Diad tua, naiisip to ni sagpaminsan no anto kasi pakanengneng na agagi ed sikato, pero mimiulop nin siansia ed sikara diad panagpulong tan lanang ya mankokomento ed aral. Kalabas na saray taon, sikatoy apribilehyoan ya manlingkor lamet bilang elder. No pareho so situasyon mo ed si Bernardo, awat mo komoy disiplina. Agka manpopokus ed liknaan mo, tan gawam so anggaay nayarian mon manguman. c (Pro. 8:33; 22:4) No ontan so gawaen mo, bendisyonan nen Jehova so panmamatoor mod sikato tan ed organisasyon to.

10. Anton pananguman ed Israel nensaman so nayarin akasubokan na katooran na saray Israelitan lalaki?

¹⁰ Nasubok met so katooran tayo no wala ray pananguman ed organisasyon. No agtayo manalwar, ompan makaarawi tayo ed si Jehova. Imanoen so sakey ya pananguman ya agawad Israel nensaman ya nayarin mairap ya awaten na arum ya Israelitan lalaki. Antis ya inter nen Jehova so Mosaikon Ganggan, saray ama so pinagka-saserdote na pamilya. Sikara so mangipapaalagey na saray altar tan irerepresenta day pamilya ra no manbabagat irad si Jehova. (Gen. 8:20, 21; 12:7; 26:25; 35:1, 6, 7; Job 1:5) Pero nen wala lay Mosaikon Ganggan, agda la nayarin gawaen itan. Say tinuro la nen Jehova ya mangiyapay na saray bagat et saray saserdote ya nanlapud pamilya nen Aaron. No say sakey ya ama ya agnanlapud pamilya nen Aaron et gawaen toy kimey ya para labat ed saray saserdote, sikatoy nepeg ya pateyen. d (Lev. 17:3-6, 8, 9) Posible kasi ya aya so sakey ya rason no akin ya si Kora, Datan, Abiram, tan say 250 ya kaiba dan lalaki et nanrebelde ed si Moises tan Aaron? (Num. 16:1-3) Agtayo amta ta anggapoy nabasad Biblia. Antokaman so rason da, pinili day agmanmatoor ed si Jehova. Sikatayo ey, antoy gawaen tayo no nanairapan tayon man-adjust ed saray pananguman ed organisasyon?

11. Antoy naaralan tayo ed alimbawa na saray Kohatita?

¹¹ Suportaan mo iray pananguman ed organisasyon. Antis ya akasabid Insipan ya Dalin iray Israelita, espisyal so asainmin ya inter nen Jehova ed saray Kohatita. Kada no onalis na pankampoan iray Israelita, saray Kohatita so mansakbat ed kaban na sipanan tan sankanengneng ira na amin. (Num. 3:29, 31; 10:33; Jos. 3:2-4) Nikadkaduma itan ya pribilehyo! Pero anguman so situasyon nen wala lad Insipan ya Dalin iray Israelita. Agla kaukolan ya iyalis-alis so kaban na sipanan. Kanian diad panaon nen Arin Solomon, inyasain to so arum ya Kohatita bilang managkansion, managbantay na puerta, tan say arum et manag-asikaso na saray bodega ya pangiinan na abasto. (1 Awa. 6:31-33; 26:1, 24) Anggapon balot so nabasad Biblia ya nanreklamo iray Kohatita o nampa-importante ira ta dati et espisyal so asainmin da. Antoy naaralan tayod sikara? No wala ray pananguman ed organisasyon nen Jehova, mabulos tayon suportaan itan anggano manguman so asainmin tayo. Panliketan mo so anggan anton asainmin. Tandaan mo ya say panangaro nen Jehova ed sika et ag-akadepende ed pribilehyom.  Say importante ed sikato et say katooran tan katutulok mo anggan anto ni tay asainmin mo.—1 Sam. 15:22.

12. Antoy alikna nen Sister Zaina nen anguman so asainmin to kayari na dakel ya taon ya impanlingkor tod Bethel?

¹² Imanoen so alimbawa nen Sister Zaina ya taga Middle East. Inar-aro toy asainmin to bilang Bethelite. Pero kayari na masulok ya 23 taon ya impanlingkor tod Bethel, sikatoy a-reassign bilang espisyal payunir. Onia kunoy reaksion to: “Abigla ak ya maong nen naamtaan ko ya na-reassign ak. Pakaliknak et anggapo lay usar ko. Lanang kon iisipen, ‘Anto kasi ginawak ya aliwa?’” Say akaaru-arum ni, wala ray kakongregasyon to ya angibagan: “Ompan agyo la kaya so trabaho kanian in-reassign da ki la.” Abayag ya nilabi-labin onaakis si Sister Zaina ta maer-ermen. Pero oniay imbaga to: “Agkon balot kinuestion no kasin inaro ak nen Jehova tan agan balot nakal so tiwalak ed organisasyon.” Antoy akatulong ed si Sister Zaina pian mansiansian limpio so panagnonot to?

13. Antoy ginawa nen Sister Zaina pian nalabanan toy liknaan to?

¹³ Agnampadaeg si Sister Zaina ed emosyon to. Antoy ginawa to? Sikatoy nambasa na saray artikulo ed publikasyon tayo tungkol ed situasyon to. Baleg kunoy nitulong na artikulon “Nayarian Mon Talonaay Pakadismaya!” ed Pebrero 1, 2001, ya isyu na Say Panag-bantayan. Nabasa ed satan ya artikulo so alimbawa na disipulon si Marcos, ya sakey ed saray nansulat na Biblia. Posible ya kinmapuy met so liknaan nen Marcos nen anguman so asainmin to. Oniay imbaga nen Sister Zaina: “Say alimbawa nen Marcos so pinagka-tambal ko nen maer-ermen ak.” Agmet pinultot nen Sister Zaina so komunikasyon tod saray kakaaro to. Agto imbiig so sarili to ed saray agagi. Imbes ya isipen to ya pakaskasi so situasyon to, say inisip to la et igigiya na masanton espiritu so organisasyon nen Jehova tan sikatoy inar-aro na saray brother ya mangidadaulo. A-realize to met ya walan talaga ray pananguman ed organisasyon pian nasumpal so gagala nen Jehova.

14. Anton pananguman so agtampol atanggap nen Brother Vlado, pero antoy akatulong pian naalig toy panagnonot nen Jehova?

¹⁴ Si Brother Vlado et elder ed Slovenia ya mantaon na 73. Nen in-merge so kongregasyon da ed arum ya kongregasyon, nairapan ed saray pananguman tan agto natanggap  ya duma lan Kingdom Hall so usaren da. Kuan to: “Agko natalosan akin et agla usaren may Kingdom Hall mi anta balibali. Diad tua, asakitan ak ta kakkapan-renovate mi. Siak so nanggawa ingen ed saramay arum ya balon kagawaan ta karpentero ak. Sakey ni, lapud dakel so pananguman, nairapan kami ran mamasiken tan akukulaw.” Antoy akatulong ed si Brother Vlado pian mabulos ton suportaan iray pananguman? Oniay imbaga to: “Say ninonot ko la, no onunor kad instruksion na organisasyon nen Jehova, nabendisyonan ka. Ipapasal itayo la na organisasyon parad mas baleg iran pananguman diad arapen.” Kasin apektado ka na reassignment o impan-merge na saray kongregasyon, tan nanairapan kan man-adjust? Tandaan mo ya natatalosan nen Jehova so naliliknam. Seguradon bendisyonan to ka no suportaan mo iratan ya pananguman tan no manmatoor kad sikato tan ed organisasyon to.—Sal. 18:25.

15. Antoy gawaen tayo no wala ray subok diad mismon loob na kongregasyon?

¹⁵ Legan ya manasingger so anggaan na sayan sistema, ilaloan tayo la ya walan-wala ray subok ed mismon loob na kongregasyon. No nagawa iratan, nasubok so katooran tayo ed si Jehova kanian importantin limpio so panagnonot tayo. No say pakaliknam et aliwliway impantrato ed sika na sakey ya agi—agka manhihinanakit. No adisiplina ka—labanan mo iray negatibon naliliknam, awat moy disiplina, tan gawam so anggaay nayarian mon manguman. Tan no apektado ka ed saray pananguman ed organisasyon—mabulos mon suportaan iratan tan unor kad instruksion.

16. Antoy gawaen mo pian ag-onkapuy so tiwalam ed si Jehova tan ed organisasyon to?

¹⁶ Anggano wala ray subok, agkan balot ompapayag ya onkapuy so tiwalam ed si Jehova tan ed organisasyon to. Nagawaan mo itan no pansiansiaen mon limpio so panagnonot mo. Labay ton ibaga, mansiansia kan kalmado, agka manpapadaeg ed emosyon mo, tan alig moy panagnonot nen Jehova. I-personal study’m iray karakter ed Biblia ya parehas so situasyon da ed sika, tan dalepdep moy alimbawa ra. Manpikasi kad si Jehova tan kerew moy tulong to. Tan agmon balot isisian so sarilim ed kongregasyon. No gawaen mo iratan ya amin, agkan balot niyarawi nen Satanas ed si Jehova tan ed organisasyon.—Sant. 4:7.