Antis kon istoryaen no antoy tinmumbok ya agawa, istoryaen ko nid sikayo no panon ak ya ginmapo ed full-time ya panaglingkor.

Inyanak ak nen 1942 diad Curaçao. Balibali yan isla ed Caribbean. Taga Suriname si tatay ko, pero inmalis ed Curaçao ta ditan akalmoy trabaho. Sakey si tatay ed saray sankaunaan ya Tasi nen Jehova ed Curaçao. a Abautismoan ira pigaran taon antis ak ya inyanak. Amin min sanaagi et sinimba dan iyaaralan. No maminsan agmi labay so manaral, pero inanosan da kami. Nen 14 so taon ko, nandesisyon si tatay ya onalis kamid Suriname ta ontatatken lay bai mi, tan kaukolan mi ran asikasoen.

Nen wala kami lad Suriname, akaarok iray maseseg ya kabataan ed kongregasyon. Panguloan labat iray pigaran taon ed siak, pero regular payunir la ra. No iistoryaen da ray eksperiensya ra ed panagpulong, nalikas mod lupa ra ya malikeliket ira. Kayari aral, nanduruman topic ed Biblia so napantotongtongan mi—no maminsan et maniistoryaan kami legan kamin akatangay ed mabitewen ya tawen. Lapud maong ya impluensya na sarayan kakaarok, a-realize ko no anton talagay labay kon gawaen ed bilay ko—labay kon panserbian si Jehova. Kanian nampabautismo ak nen 16 so taon ko, tan nampayunir ak nen 18 ko.

Nen nampayunir ak, dakdakel so naaralan ko ya akatulong ed full-time ya panlilingkor ko. Say sakey ya naaralan ko et importante ya ipasal so arum. Nen balo ak ni labat ya payunir, kinaaro ak na sakey ya missionary, si Brother Willem van Seijl. b Imbangat to ak no panon kon asikasoen iray responsabilidad kod kongregasyon. Balbaleg so nitulong na  impangipasal dad siak, ta diad tinmumbok ya taon et niyasain ak bilang espisyal payunir. Nakaukolan kon idaulo so nanduruman grupo na agagi ya manaayam ed katakelan na Suriname. Maong labat ta wala ray agagin angipasal ed siak ya singa si Kuya Willem! Kanian manlapu lad saman, labalabay ko met ya ipasal so arum.

Say komaduan naaralan ko et mas maabig so manbilay na simpli, pero dapat planadon amin. Kagapo ni labat na bulan, pantongtongan mi la na partner kon espisyal payunir no anto ray panangan tan suplay ya kaukolan mi parad ontutumbok ya simba. Sakey ed sikami so manbiahe na arawrawi paonlad syudad tan mangaliw na saray pankaukolan mi. Seseguradoen mi ya dugaruga ed allowance mi iray saliwen tan ombayag so abasto mi na sakey bulan. Ta no naupotan kami, anggapoy napangalaan mi diad takel. Lapud naaralan koy manbilay ya organisado tan simpli, akatulong iman pian mas akapokus ak ed panseserbik ed si Jehova diad interon bilay ko.

Say komatlon naaralan ko et mas maabig no iyaralan mo ray totoo diad mismon lenguahe ra. Amtak so mansalitay Dutch, English, Papiamento, tan Sranantongo (say arum ya tawag et Sranan), say lenguahe na maslak ya totoo ed Suriname. Pero diad katakelan, dumay salita na totoo. Tan alikas ko ya mas ondengel ira no narengel da so maong a balita diad mismon lenguahe ra. Nairapan ak ya aralen so arum ed saratan ya lenguahe, singa say Saramaccan, ta walay tono na panagsalita ra. Pero anggano mairap, sulit ta dakdakel so naiyaralan ko nen inaral koy salita ra.

Pero siempre, wala ray makapalek ya eksperiensyak. Singa bilang, walay study min bii ya say salita to et Saramaccan. Kinumustak ta manliliknay eges to, pero say nibagak manaya et no kasin malukon! Nababaingan laingen. Anggano wala ray onian lingok, ayos labat ta labay kon talaga ya aralen so lenguahe na totoo ed teritorya mi.

Nen 1970, niyasain ak bilang manangasikaso na sirkito. Diad saman ya taon, impabantay ko so slides ya “Visiting the World Headquarters of Jehovah’s Witnesses” ed dakel ya grupo na agagi diad katakelan. Pian nasabik irayan agagi, wala ray brother ya mangiba ed siak pian manbaloto kami ed ilog. Awi-awit mi generator, portable ya tangke na gasolina, lamparaan, tan projector. Kasabi mid takel, manakar kami ni na arawrawi ya awi-awit mi iratan anggad makasabi kami ed lugar ya pampabantayan mi. Sulit so amin a kesaw, ta labalabay irayan bantayan na totoo ya manaayam ed sulinek iran pasen. Malikeliket ak ya natutulongan ko ran nakabat si Jehova tan naamtaan day organisasyon to. Kanian anggano kaukolay sakripisyo, ayos labat ta balbaleg ya pribilehyo so mikimeyan ed si Jehova.

Nausa-usar koy inka-balolakik diad full-time ya panaglingkor, pero asabi panaon ya aliknak ya kaukolan ko lay kapareha ed bilay. Kanian inggapok ya impikasi ed si Jehova ya ikdan to  ak komon na kapareha ya maliket to ak ya ibaan ed sayan mair-irap ya asainmin ko. Kalabas na sakey taon, nandesisyon ak ya karawen so sakey ya masakripisyon espisyal payunir, si Ethel. Nen ugaw ni Ethel, paborito to lay apostol Pablo tan labay ton aligen so inkakuli nen Pablo diad panagpulong. Nankasal kami nen Setyembre 1971 tan saniba kamin nanlingkor ed kimey diad sirkito.

Apasal ed irap na bilay si Ethel, kanian aka-adjust ya tampol ed bilay diad takel. Singa bilang, no say kongregasyon ya bisitaen mi et talagan nisulinek, daiset labat so awiten mi. Diad ilog so pampepesakan tan panaamesan mi. No antoy iparungo na agagi, sikatoy kanen mi—anggan iguana, pirana, o antokaman ya naerel da diad takel o ilog. No anggapoy plato, mangan kamid bulong na ponti. No anggapoy kutsara-tinidor, mantumpok kami. Tua, dakel so sakripisyo mi nen Ethel, pero lapud satan, mas inmelet so aroan mi tan say relasyon mi ed si Jehova. (Ecl. 4:12) Saraman ya naeksperiensya mi et agmin balot isalat ed anggan anto!

Aminsan, nen asumpal lay imbisita mi ed saray agagi diad katakelan, diman mi naeksperiensya may istoryak ed gapo. Nen akasabi kamid parte na ilog ya maksil so agus, biglan linmereg may baloto mi pero linmetaw met ya tampol. Maong labat ta aka-life jacket kami tan aga tinmaob may baloto. Pero alooban na danum. Say ginawa mi, imbantak mi karga na saray kaserola ya awit mi tan aman lay impanlimas mi.

Anggapo la laingen so naakan mi. Kanian sinali mi nanbanwit ed ilog. Pero anggapoy nala mi. Kanian nampikasi kami ya ikdan kami komon nen Jehova na pangdeman mi. Kayari min nampikasi, akabanwit may kaiba min brother na balbaleg a sira, dugaruga ed sikamin lima tan naksel kami.

Nen limay taon kami lan saniban manlilingkor nen Ethel diad kimey ed sirkito, walay naawat min bendisyon ya agmi iilaloan—magmaliw kami lan ateng! Malikeliket ak, pero siempre sankanonot ko no anto la kasi magmaliw ya bilay mi. Labalabay mi nen Ethel so mansiansia ed full-time anggad posible. Nen 1976, inyanak si Ethniël. Kalabas na duara tan kapalduan taon, pinmaway so komaduan anak mi, si Giovanni.

Lapud baleg so pankaukolan ed Suriname diad saman ya panaon, inyabuloy na branch ya makapantultuloy ak nin siansia ya manlingkor bilang manangasikaso na sirkito legan min papabalegen iray ananak mi. Nen ugugaw ni ra, say iyaasain dad siak ya sirkito et amay medyo daiset so kongregasyon. Kanian makakapanlingkor ak ed pigaran simba kada bulan bilang manangasikaso na sirkito tan no anggapoy bisitaen ko et manpapayunir ak ed kongregasyon ya inyasain dad sikami. No asingger ed abung mi so kongregasyon ya bisitaen ko, mila si Ethel tan saramay duaran ugugaw. Pero bukor koy ombisita no say laen kon kongregasyon o asemblea et diad takel.

Kaukolan kon iplano so eskedyul ko pian nagawaan kon amin so responsabilidad ko. Seseguradoen ko ya sinimba kamin makapan-family study. No diad katakelan so bibisitaen ko, si Ethel so mangidadaulo na family study ed saray ugugaw. Seseguroen mi met ya anggad posible et saniba kamin pamilya. Walay panaon min manrelaks—manggagalaw kami o ipasyar mi ray ugugaw. Mabetbet ak ya napupuyat ta manpaparaan ak na paliwawa. Maong labat ta maomaong ya asawa si Ethel, singa samay adeskribe ed Proverbio 31:15. Palbangon ni labat et ipaparaan to lay almusal. Kanian antis ya onlad eskuelaan iray ugugaw, makapan-teksto kamin pamilya tan bansag kamin mangalmusal. Misatsalamat ak ta masakripisyo tan masuporta so asawak. Tinulongan to ak pian nasumpal koy amin ya responsabilidad ko!

Bilang atateng, nansagpot kami pian nipurek mi ed ananak mi ya aroen day Jehova tan say panagpulong. Pangarap mi ya man-full time met iray ananak mi. Pero agmi ra labay ya idesisyonan. No bilang ta man-full time ira, say rason komon et lapud atan so labay da. Kanian lanang min iistoryaen ed sikara ya maliket  so manlingkor ya full-time. Siempre, amta ra ya aliwa itan ya mainomay. Pero lanang min ipapaimano ed sikara no panon kamin tutulongan tan bebendisyonan nen Jehova bilang pamilya. Sinegurado mi met ya saray kakaaro da et saramay agagi ya maseseg tan iyuuna day Jehova ed bilay da.

Agkamin balot pinaulyanan nen Jehova legan min papabalegen iray ananak mi. Pero siempre, ginawak met so betang ko bilang ama. Nen pamilyado ak la, akatulong may eksperiensyak nen balolaki ak ni ya espisyal payunir. Apasal ak ya mantipid tan mantipon parad pankaukolan mi. Pero wala ran talagay panaon ya onkulang kami, anggano ginawaan mi lay anggaay nayarian mi. Diad sarayan situasyon, si Jehova lay nanggawa na paraan pian agkami napaulyanan. Singa bilang nen bandad sampot na 1980’s tan kagapo na 1990’s, walay agawan civil war ed Suriname, kanian agaylay irap na bilay. Pero agkamin balot kinmulang ta wadtay Aman Jehova. —Mat. 6:32.

Diad interon bilay mi, inasikaso kami nen Jehova tan alikna mi so tuan liket diad impanserbi mid sikato. Bendisyon ed sikami iray ananak mi, tan baleg ya pribilehyo ya apabaleg mi ran manlingkor met ed si Jehova. Makapaliket ta pinili da met so full-time ya panaglingkor. Nan-graduate si Ethniël tan Giovanni diad teokratikon eskuelaan tayo, tan natan et manlilingkor irad branch office ed Suriname kaibay asawa ra.

Masiken tan akulaw kami la nen Ethel, pero busy kami nin siansia ya manseserbi ed si Jehova bilang espisyal payunir. Diad inka-busy mi, anggad natan et agko ni amtay onlangoy ta anggapoy panaon kon manaral! Pero anggapoy pagbabawian ko. Maong labat ta tinedyer ak ni et nandesisyon ak lan manlingkor ya full-time tan atan so sakey ed saray sankaabigan ya desisyon ya ginawak.