1. No manpulong tayo, antoy ilaloan tayon reaksion na totoo, pero antoy nasegurado tayo?

 NO MANPUPULONG tayo, agtayo la nabibigla no wala ray onkontra ta iilaloan tayo la itan. Diad tua, amta tayo ya onloor ni so isusumpa diad arapen. (Dan. 11:44; 2 Tim. 3:12; Apo. 16:21) Pero, segurado tayo ya tulongan itayo nen Jehova. Akin ey? On ta manlapu la nensaman et tutulongan nen Jehova iray lingkor to pian nasumpal day kimey ya ipapagawa to ed sikara—anggan panon kairap itan. Say sakey ed sikara et si propetan Ezequiel. Amtaen tayod sayan artikulo no panon ya imparaan nen Jehova si Ezequiel antis ton pulongan iray Judio ya naaripen ed Babilonia.

2. Panon ya indeskribe nen Jehova iray pulongan nen Ezequiel, tan antoy aralen tayo ed sayan artikulo? (Ezequiel 2:3-6)

² Anton klase na totoo so pulongan nen Ezequiel? Sikaray indeskribe nen Jehova ya “anawet-impanpuso” tan “rebelyoso.” Singa ra kuno sabit ya makaturok, tan singa ra maditan alakdan. Kampega la ya aminpigan imbaga nen Jehova ed si Ezequiel ya ag-ontatakot. (Basaen so Ezequiel 2:3-6.) Agawaan nen Ezequiel so mairap ya asainmin to lapud (1) amta to ya sikatoy imbaki nen Jehova, (2) sikatoy pinabiskeg na masanton espiritu na Dios, tan (3) sikatoy pinakasil na Salita na Dios. Panon ya akatulong iratan ed si Ezequiel? Tan panon met ya makatulong iratan ed sikatayo natan?

3. Anto ray imbaga nen Jehova ya amabiskeg ed si Ezequiel, tan panon ton pinaseguroan ya suportaan to?

³ Imbaga nen Jehova ed si Ezequiel: ‘Ibaki ta ka.’ (Eze. 2:3, 4) Seguradon binmiskeg so liknaan nen Ezequiel ed satan. Akin ey? On ta posiblin anonotan to ya ontan met so imbaga  nen Jehova ed si Moises tan Isaias nen imbaki To ran magmaliw ya propeta To. (Exo. 3:10; Isa. 6:8) Amta met nen Ezequiel no panon ya tinulongan nen Jehova irayan propeta pian nasarag day mair-irap ya asainmin da. Kanian nen amiduan imbaga nen Jehova ya: ‘Ibaki ta ka,’ agla nanduaruwa si Ezequiel ya sikatoy tulongan nen Jehova. Sakey ni, diad libron Ezequiel et maminpiga tayon nabasa iya: “Oniay mensahe nen Jehova a sinmabi ed siak.” (Eze. 3:16) Tan dakel met so nabasan: “Oniay mensahe nen Jehova a sinmabi lamet ed siak.” (Eze. 6:1) On, mapatpatnag ya kombinsido si Ezequiel ya sikatoy imbaki nen Jehova. Sakey ni, say ama to et saserdote, kanian seguradon naistoryad sikato nen ama to no panon ya pinaseguroan nen Jehova iray propeta tan lingkor To ya tulongan To ra. Singa bilang, imbaga nen Jehova ed si Isaac tan Jacob ya, “Wala ak ed sika,” tan imbaga tod si Jeremias ya, “Agka natatakot . . . ta wadia ak a mangiliktar ed sika.”—Gen. 26:24; 28:15; Jer. 1:8.

4. Antoy imbaga nen Jehova ed si Ezequiel pian ag-onkapuy so liknaan to?

⁴ Antoy magmaliw a reaksion na maslak ya Israelita ed mensahe nen Ezequiel? Oniay imbaga nen Jehova: “Ag-ondengel ed sika so sankaabungan na Israel, ta agda labay so ondengel ed siak.” (Eze. 3:7) Singa ibabaga nen Jehova ya sikaton mismo so agda labay ya dengelen no ibaliwala day mensahe nen Ezequiel. Kanian apaseguroan si Ezequiel ya anggano ag-ondengel iray totoo, agto labay ya ibaga ya sikatoy makapuy ya propeta. Tan impaseguro met nen Jehova ed si Ezequiel ya no nagawa lay inyabawag ton panangukom, diman “naamtaan [na saray totoo] a walay propeta ed limog da.” (Eze. 2:5; 33:33) Seguradon akatulong iratan ya imbaga nen Jehova pian ag-onkapuy so liknaan nen Ezequiel tan nasumpal to so ministeryo to.

5. Akin et makapabiskeg na liknaan imay nabasa ed Isaias 44:8?

⁵ Ombibiskeg met so liknaan tayo ta amta tayon imbaki itayo met nen Jehova. Baleg ya kagalangan ya tinawag to tayon “tasi” to. (Isa. 43:10) On, si Jehova ya mismo so angibaki ed sikatayon manpulong! No nensaman et imbaga nen Jehova ed si Ezequiel ya: “Agka ontatakot,” ibabaga met nen Jehova ed sikatayo natan ya: “Agkayo onkekebbiew.” Agtayo sirin tatakotan iray onkokontra ed panagpulong tayo. Singa si Ezequiel, tandaan tayo ya imbaki itayo nen Jehova tan suportaan to tayo.—Basaen so Isaias 44:8.

6. (a) Antoy impaseguro nen Jehova ed sikatayo? (b) Antoy nepeg tayon tandaan pian ag-onkapuy so liknaan tayo?

⁶ Walay balibalin imbaga nen Jehova pian ipaseguron suportaan to tayo. Antis ton imbaga ya: “Sikayo ray tasik,” onia ni imbaga to: “Wala ak ed sika sano ombaliw kad saray aralem a danum, tan agka nalener sano ombaliw kad saray ilog. Sano ondalan kad apoy, agka napoolan, tan agka nasinit.” (Isa. 43:2) Diad pampupulong tayo, wala ray aarapen tayon subok—singa iratan makalener ya danum tan makasinit ya apoy. Pero tutulongan itayo nen Jehova pian nalampasan tayo iratan tan agtayo ontundan manpulong. (Isa. 41:13) Singa diad panaon nen Ezequiel, maslak a totoo natan et agda labay ya dengelen so mensahe tayo. Pero tandaan tayo ya aglabay ya ibaga na satan ya makapuy tayon manpulong. Anggano ontan so reaksion da, agtayo manpapaapekto, ta say importante et amta tayon naliliketan si Jehova ed matoor ya pangipupulong tayo ed mensahe to. Imbaga nen apostol Pablo: “Kada sakey et mangawat na tumang [o premyo] to unong ed kinimeyan to.” (1 Cor. 3:8; 4:1, 2) Oniay imbaga na sakey a sister ya abayag lan payunir: “Naliliketan ak ta amtak ya bendisyonan itayo nen Jehova lapud pansasagpot tayo.”

7. Antoy epektod si Ezequiel kada no nanonotan to may anengneng tod pasingawey? (Nengnengen so litrato ed apis.)

⁷ Anengneng nen Ezequiel no panon kabiskeg so masanton espiritu na Dios. Diad pasingawey, anengneng to ya say masanton espiritu so puersa ya ontutulong ed saray makapanyarin anghel tan manpapaandar ed saray angkakabaleg ya dalig na karwahe nen Jehova. (Eze. 1:20, 21) Antoy reaksion nen Ezequiel? Imbaga to: “Sanen anengneng ko itan, dinmakmomo ak.” Agaylay pandinayew nen Ezequiel kanian kinmebkeb ed dalin. (Eze. 1:28) Kada no nanonotan nen Ezequiel itan ya anengneng to, seguradon ombibiskeg so liknaan to tan kombinsido ya nasumpal toy ministeryo to diad tulong na masanton espiritu na Dios.

8-9. (a) Antoy epekto ed si Ezequiel nen ingganggan nen Jehova ya: “Alagey ka”? (b) Anto ni imbaga nen Jehova ed si Ezequiel pian mas determinadon manpulong anggano anawet so teritorya to?

⁸ Oniay ingganggan nen Jehova ed si Ezequiel nen anengneng to ya kinmebkeb: “Anak na too, alagey ka ta walay ibagak ed sika.” Nen arengel nen Ezequiel itan ya imbaga nen Jehova tan nen tinulongan na masanton espiritu, kinmasil so liknaan to. Oniay insulat ton agawa: “Niwalad siak so espiritu tan pinaalagey ak na satan.” (Eze. 2:1, 2) Diad interon ministeryo nen Ezequiel, sikatoy inggiya na “lima” o pakayari na Dios—say masanton espiritu. (Eze. 3:22, paimanod leksab; 8:1; 33:22; 37:1; 40:1) Atan so amabiskeg ed si Ezequiel pian napulongan to ray totoo ed teritorya to ya “anawet so ulo tan puso” ra. (Eze. 3:7) Onia ni so imbaga nen Jehova ed si Ezequiel: “Pinaawet koy lupam  a singa inkaawet na lupa ra tan say moling mo a singa inkaawet na moling da. Say moling mo et impagmaliw kon singa sakey a diamante, tan anawet nen say bato. Agka ontatakot ed sikara odino onkekebbiew ed saray lupa ra.” (Eze. 3:8, 9) Singa ibabaga nen Jehova ed si Ezequiel: ‘Siak so akauley ed sika. Agka nadidismaya ed inkabenger da.’

⁹ Kayari na satan, inyakar na espiritu na Dios si Ezequiel ed teritoryan pampulongan to. “Kinmiwas ed siak so pakayari nen Jehova,” so insulat nen Ezequiel. Diad tua, sakey simba ton dinalepdep tan impapuso so mensahen ipulong to. (Eze. 3:14, 15) Insan sikatoy pinaonla nen Jehova ed sakey a lugar ya ditan et “niwalad [sikato] so espiritu.” (Eze. 3:23, 24) On, akaparaan lay Ezequiel ya manpulong!

10. Antoy mamabiskeg ed sikatayo pian tuloytuloy tayon makapanpulong, tan akin et kakkaukolan tayo itan?

¹⁰ Antoy mamabiskeg ed sikatayo pian tuloytuloy tayon makapanpulong? Pian naebatan tayo itan, pawilen tayo imay agawad si Ezequiel. Antis ya ginmapon nampulong, sikatoy pinabiskeg na Dios panamegley na masanton espiritu. Ontan met ed sikatayo natan. Nagawaan tayo so panagpulong a kimey dia labat ed tulong na masanton espiritu na Dios. Akin et kakkaukolan tayo itan? Kakalabanen itayo nen Satanas ta labay ton patundaen so kimey a panagpulong. (Apo. 12:17) Ompan isipen na arum ya anggapoy kalaban-laban tayo ta mas mabiskeg si Satanas nen say sikatayo. Pero diad tua, tataloen tayo si Satanas lapud panagpulong tayo! (Apo. 12:9-11) Akin et ontan so nibaga tayo? On ta kada no pansasagpotan tayon gawaey ministeryo tayo, ipapanengneng tayo ya agtayo natatakot ed si Satanas. Kanian kada no manpulong tayo, natatalo si Satanas. Anggano dakdakel lay ginawa ton paraan pian napatunda so kimey tayo, agton balot itan napatunda. Prueba itan ya tutulongan itayo na masanton espiritu tan bebendisyonan nen Jehova iray sagpot tayo.—Mat. 5:10-12; 1 Ped. 4:14.

11. Panon itayon tutulongan na masanton espiritu na Dios natan, tan antoy gawaen tayo pian tuloytuloy itayon ikdan nen Jehova na espiritu to?

 ¹¹ Antoy naaralan tayo ed samay imbaga nen Jehova ed si Ezequiel ya paaweten toy lupa tan moling to? No walad sikatayo so espiritu na Dios, anggapo ’tay subok ed ministeryo ya agtayo nakaya. (2 Cor. 4:7-9) Anto sirin so gawaen tayo pian tuloytuloy tayon ikdan nen Jehova na masanton espiritu to? Tuloytuloy tayon kerewen itan kada no manpikasi tayo, tan agtayo panduaruwaan ya iter itan nen Jehova. Tandaan tayo iyan bilin nen Jesus: “Mantultuloy kayon onkerew, . . . mantultuloy kayon mananap, . . . mantultuloy kayon ontoktok.” Seguradon ‘iter nen Jehova so masanton espiritu to ed saramay onkekerew ed sikato.’—Luc. 11:9, 13; Gawa 1:14; 2:4.

12. Base ed Ezequiel 2:9–3:3, iner so nanlapuan na lukot tan antoy akasulat ditan?

¹² Aliwa labat ya masanton espiritu so inusar na Dios pian pabiskegen si Ezequiel. Pinakasil to met panamegley na saray salita to. Diad pasingawey, anengneng nen Ezequiel so lima ya walay bemben ton lukot. (Basaen so Ezequiel 2:9–3:3.) Iner so nanlapuan na lukot? Antoy akasulat ditan? Antoy epekto na satan ed si Ezequiel? Nengnengen tayo. Satan a lukot et nanlapud trono nen Jehova. Posiblin sakey ed saramay apatiran anghel ya anengneng nen Ezequiel ed pasingawey so imbaki nen Jehova ya mangiderew na lukot. (Eze. 1:8; 10:7, 20) Akasulat ed lukot iray salita na Dios—say mensahe na panangukom ya ipulong nen Ezequiel ed saray rebelden Judio. (Eze. 2:7) Satan ya mensahe et akasulat ed arap tan beneg na lukot.

13. Antoy imbaga nen Jehova ya gawaen nen Ezequiel ed samay lukot, tan akin et “masamsamit” itan?

¹³ Imbaga nen Jehova ed si Ezequiel ya kanen to imay lukot “pian napesel.” Maunor si Ezequiel kanian kinan to. Antoy labay ya ibaga na saya? Say mensahe ya ipulong nen Ezequiel et singa to iloob ed laman to—nepeg ton iyulo tan ipapuso pian napakiwas ya manpulong. Mankelaw si Ezequiel ta samay lukot et “masamsamit . . . a singa dilo.” (Eze. 3:3) On, parad si Ezequiel, say asainmin ton irepresenta si Jehova et “masamsamit” o makapaliket. (Sal. 19:8-11) Misatsalamat ed si Jehova ed pribilehyo ton manlingkor bilang propeta.

14. Antoy akatulong ed si Ezequiel pian akaparaan ed asainmin to?

¹⁴ Oniay sinmublay ya imbaga nen Jehova ed si Ezequiel: “Ipapusom tan dengel moy amin ya ibagak ed sika.” (Eze. 3:10) On, labay nen Jehova ya tandaan tan dalepdepen nen Ezequiel so amin ya akasulat ed lukot. Seguradon inunor itan nen Ezequiel kanian kinmasil so liknaan to. Malinew met lad sikato so mensahe na panangukom ya kaukolan ton ipulong. (Eze. 3:11) Lapud impapuso la nen Ezequiel so mensahen ibaga to, akaparaan la ed asainmin to tan desididon sumpalen itan.—Ikompara so Salmo 19:14.

15. Antoy kaukolan tayon ipapuso pian ag-onkapuy so seseg tayo ed ministeryo?

¹⁵ Pian ag-onkapuy so seseg tayod ministeryo, kaukolan tayo met ya tuloytuloy ya aralen so Salita na Dios. Kaukolan tayon ipapuso so amin ya ibabaga nen Jehova ed sikatayo. Mitotongtong si Jehova ed sikatayo panamegley na Biblia. Antoy gawaen tayo sirin pian nipapuso tayo ray nababasa tayod Biblia?

16. Antoy kaukolan tayon gawaen ed Salita na Dios, tan panon tayon nipapuso itan?

¹⁶ No mamangan tayo, gagatgaten tayon maong ta labay tayon nasepsep na laman tayo iray sustansia na kakanen tayo. Ontan met ed Salita na Dios. Kaukolan tayon aralen tan  dalepdepen itan pian ombiskeg so espiritualidad tayo. Di ba, diad samay pasingawey et ingganggan nen Jehova si Ezequiel ya kanen to imay lukot “pian napesel”? Ontan met so labay nen Jehova ya gawaen tayo no manbabasa tayoy Biblia. Kaukolan tayo met ya kanen itan anggad napesel tayo. Labay ton ibaga, talosan tayon maong so Salita to. Panon tayon nagawaan itan? Antis tayon onggapon manbasa, manpikasi tayo ni pian akaparaan so puso tayon paibangat ed Dios. Insan legan tayon manbabasa, ontunda tayon magano sagpaminsan pian mandalepdep o isipen ya maong iray nababasa tayo. Antoy resulta no ontay gawaen tayo? Mas onsepsep ed puso tayo so Salita na Dios.

17. Akin et importantin dalepdepen tayo iray nababasa tayo ed Biblia?

¹⁷ Akin et importantin manbasa tayo na Biblia tan dalepdepen tayo iray nababasa tayo? Importante itan pian walay kasil na liknaan tayon mangipulong ed mensahe na Panarian natan tan walay pakpel tayon mangiyabawag ed ambelbelat ya mensahe na panangukom diad arapen. Sakey ni, no diman tayo mas dadalepdepen iray balibalin ugali nen Jehova, diman met mas oneelet so pikakaaro tayod sikato. No kaaro tayoy Jehova, “masamsamit” o maliket so bilay tayo ta mareen so nonot tayo tan kontento tayod bilay.—Sal. 119:103.

18. Antoy bidbiren lanlamang na saray totoo ed teritorya tayo, tan akin?

¹⁸ Anggapod sikatayo natan so propeta ya singa si Ezequiel. Balet singa sikato, desidido tayon ipulong so mensahen impaisulat nen Jehova ed Biblia. Ontunda tayo labat la no ibaga nen Jehova ya asumpal la. Kanian no onsabi so panangukom, agnibaraan na saray totoo ed teritorya tayo ya agtayo ra pinasakbayan tan ag-ira inikdan na Dios na tsansa ya manguman. (Eze. 3:19; 18:23) Diad satan ya panaon, bidbiren da met lanlamang ya say mensahen impulong tayo et nanlapud Dios.

19. Antoy makatulong pian nasumpal tayoy ministeryo tayo?

¹⁹ Antoy makatulong pian nasumpal tayoy ministeryo tayo? Amay talora met lanlamang ya akatulong ed si Ezequiel. Singa si Ezequiel, desidido tayon manpulong lapud amta tayo ya imbaki itayo nen Jehova, papabiskegen itayo na masanton espiritu na Dios, tan papakasilen itayo na Salitay Dios. Lapud amta tayo ya tutulongan itayo nen Jehova, ag-onkapuy so seseg tayon manpulong “anggad [isabi na] anggaan.”—Mat. 24:13.