1-2. (a) Anto ran tepet so pantongtongan tayo? (b) Antoy prueba ya labalabay itayon tulongan nen Jehova?

 SARASARAG itayon tulongan nen Jehova pian nalampasan tayo ray subok tan mansiansia tayon maliket ed panlilingkor tayod sikato. Panon to tayon tutulongan? Tan antoy gawaen tayo pian naawat tayoy tulong to? Naebatan iratan ya tepet diad sayan artikulo. Pero, pantongtongan tayo ni so ebat ed sayan tepet: Talaga kasin labalabay itayon tulongan nen Jehova?

² Naamtaan tayoy ebat diad samay sulat nen apostol Pablo ed saray Hebreon Kristiano. Kuan to: “Si Jehova so mananulong ko; agak ontakot. Antoy nagawaan na too ed siak?” (Heb. 13:6) Base ed sakey ya reperensya, say salitan “mananulong” ed sayan bersikulo et ontutukoy ed sakey ya aliston onaksion tan manapuran ombatik no walay narengel ton onkekerew na tulong. Ontan ya ontan si Jehova. No walay onkerew na tulong ed sikato, onrespondin tampol. Imadyin mo pay Jehova ya manaapura pian natulongan to ka. On, talagan sarasarag tan labalabay to itayon tulongan. Tan siempre, no kaiba tayoy Jehova, maliket tayo tan anggapo ’tay subok ya agtayo nakaya.

3. Antoy taloran paraan ya tutulongan itayo nen Jehova pian naanosan tayo ray subok tan mansiansia tayon maliket?

³ Anto ray paraan ya tutulongan itayo nen Jehova pian naanosan tayo ray subok tan mansiansia tayon maliket? Makatulong so libro na Isaias pian naebatan tayo itan. Akin ey? On ta maslak ed saray propesiya ed sayan libro et insulat parad saray  lingkor na Dios natan. Tan indeskribe nen Isaias si Jehova diad paraan ya matmainomay tayon natalosan. Pantongtongan tayo natan so Isaias kapitulo 30. Nabasa tayo ditan iray marakdakep ya ilustrasyon ya pakaaralan tayo no panon ya tutulongan nen Jehova iray lingkor to. Naaralan tayo ditan ya (1) dedengelen tan eebatan to iray pikakasi tayo, (2) igigiya to tayo ed dugan dalan, tan (3) bebendisyonan to tayo natan tan bendisyonan to tayo diad arapen. Sansakey tayo irayan pantongtongan.

4. (a) Panon ya indeskribe nen Jehova iray Judio diad panaon nen Isaias, tan antoy nansumpalan da? (b) Antoy insipan nen Jehova ya gawaen to parad saray matoor ya Judio? (Isaias 30:18, 19)

⁴ Diad gapo na Isaias kapitulo 30, imbaga nen Jehova ya saray Judio et “benger ya ananak” tan nantatabonan lay kasalanan da. Imbaga to met ya “rebelyoso iran totoo [tan] agda labay so ondengel ed ganggan nen Jehova.” (Isa. 30:1, 9) Lapud anawet so ulo ra, impropesiya nen Isaias ya aliwliway pansumpalan da tan niiyan irad “kababaingan tan kabandayan.” (Isa. 30:5, 17; Jer. 25:8-11) Ontan ya ontan so agawa nen inawit tan inaripen ira diad Babilonia. Pero, aliwan amin ya Judio et benger. Walay mensahe nen Isaias ya angiter na ilalo ed sarayan matoor. Imbaga to ya onsabi so panaon ya ipawil ira lanlamang nen Jehova diad Jerusalem. (Basaen so Isaias 30:18, 19.) Tinoor nen Jehova so sipan to. Sinmabi so panaon ya imbulos to ira. Abitla diad samay propesiya ya “si Jehova et maan-anos a manaalagar ed pangipatnag toy kaabigan.” Labay ton ibaga, onlabas ni panaon antis to ran ibulos. Diad tua, 70 taon nin nanayam ed Babilonia iray matoor ya Judio antis iran akapawil diad Jerusalem. (Isa. 10:21; Jer. 29:10) Nen naaripen irad Babilonia, manakis ira lapud ermen. Pero nen akapawil la rad Jerusalem, manakis ira lapud liket!

5. Akin et makapabiskeg na liknaan so Isaias 30:19?

⁵ Oniay makapaseseg ya nabasa ed Isaias 30:19: “Seguradon kasian to ka sano narengel toy ikerew moy tulong.” Ipapaseguro ed sikatayo na sayan bersikulo ya dengelen itayo nen Jehova no onkerew tayoy tulong ed sikato tan onkiwas ya tampol no manpikasi tayo. Oniay nabasad sampot na teksto: “Ebatan to kan tampol sano narengel to itan.” On, ipapanonot na sayan teksto ya ag-itayo nabaingan no si Jehova so asinggeran tayo ta labalabay to tayon tulongan pian naanosan tayo ray subok. Makapaliket itan ya naamtaan, awa?

6. Base ed samay imbaga nen Isaias, antoy prueba ya dedengelen nen Jehova so pikakasi na kada lingkor to?

⁶ Anto ni naaralan tayo ed satan ya teksto? Naaralan tayo ditan ya dedengelen nen Jehova so pikakasi na kada sakey ed sikatayo. Seguro, naimano yo ya diad gapo na Isaias kapitulo 30, say inusar iran salita et “yo,” “kayo,” tan “sikayo” ta say katongtong nen Jehova et saray Judio bilang sakey ya nasyon. Pero anguman diad bersikulo 19. Say nausar la et “ka” ta satan ya mensahe et parad kada sakey a lingkor to. Insulat nen Isaias: “Agka la onakis”; “kasian to ka”; “ebatan to kan tampol.” Maar-aron Ama si Jehova. No nanengneng to ya walay anak ton onkakapuy so liknaan to, agto bagaan ya, “Ni, nengneng moy kuyam tan si atsim, mabisbiskeg ira. Dapat sika met.” Amta to ya aliwa tayon parepareho tan nanduruma so pankaukolan tayo kanian sansasakey ton dedengelen iray pikakasi tayo.—Sal. 116:1; Isa. 57:15.

7. Antoy imbaga nen Isaias tan Jesus tungkol ed pampikasi?

⁷ No ipikasim ed si Jehova so sakey ya problema, antoy gawaen to pian naebatan ton tampol so pikakasim? Say sakey et ikdan to  kay biskeg pian nasarag moy situasyon mo. No bilang ta ipipikasim ya ontunda la komon itan pero tuloytuloy ni, dapat tuloytuloy mo met ya ipikasi ed si Jehova ya tulongan to kan ag-onsuko. Diad tua, labay nen Jehova ya agtayo onsawan onkerew na tulong ed sikato. Imanoen iyan imbaga nen Isaias: “Agyo pampapainawaen [si Jehova].” (Isa. 62:7) Singa ibabaga nen Isaias ya kuliten tayo labat si Jehova. Agtayo pampapainawaen anggad iter toy kekerewen tayo. Nanonotan tayod satan ya teksto imay ilustrasyon nen Jesus ya nabasad Lucas 11:8-10, 13. Say punto nen Jesus et agtayo dapat nababaingan ya onasingger ed si Jehova tan tuloytuloy tayon onkerew na masanton espiritu. Ipikasi tayo met ed si Jehova ya igiya to tayo pian duga iray desisyon tayo.

8. Panon ya asumpal ed saray Judio so Isaias 30:20, 21?

⁸ Basaen so Isaias 30:20, 21. Nen binarikadaan na saray sundalo na Babilonia so Jerusalem diad loob na sakey tan kapalduan taon, agaylay irap na bilay na saray Judio. Kanian ‘gonigon so pinagkatinapay da tan panamairap so pinagkadanum da.’ Pero diad bersikulo 20 tan 21, insipan nen Jehova ya tulongan to iray Judio no magbabawi tan manguman ira. Imbaga nen Isaias ya si Jehova so “Makapadinayew a Managbangat” da, tan ibangat tod sikara so dugan panagdayew. Agawa itan nen akapawil iray Judio diad Jerusalem. Talagan si Jehova so nagmaliw ya Makapadinayew a Managbangat da ta inggiya to ira pian nipawil so dugan panagdayew. Misatsalamat tayo ta ibabangat itayo met nen Jehova natan.

9. Antoy sakey ya uusaren nen Jehova pian nibangat to tayo natan?

⁹ No isipen tayo may ilustrasyon nen Isaias, singa tayo sirin estudyante nen Aman Jehova. Imbaga nen Isaias ya walay duaran paraan ya ibabangat itayo nen Jehova. Oniay imbaga to ya unonan paraan: “Nanengneng yon mismo so Makapadinayew a Managbangat yo.” Labay ton ibaga, si Aman Jehova et singa managbangat ya akaalagey ed arapan na saray estudyante to. Baleg ya pribilehyo ya Maestro tayoy Aman Jehova! Panon to tayon babangatan? Uusaren to so organisasyon to. Misatsalamat tayo ed saray malinew ya instruksion ya manlalapud organisasyon to! Lanang itayon nabibilin diad saray aral tan kombension. Wadtan met iray nanduruman publikasyon tan programa ed JW Broadcasting^®. Makakatulong iratan ya amin pian nasarag tayo iray dadalanen tayon subok tan mansiansia tayon maliket.

10. Panon tayon narerengel so boses nen Jehova diad “benegan” tayo?

 ¹⁰ Binitla nen Isaias so komaduan paraan ya ibabangat itayo nen Jehova. Kuan to: “Makarengel kayo na salita ed benegan yo.” Antoy naimadyin tayod saya ey? Si Jehova et singa maestro ya manaakar diad benegan na saray estudyante to, tan ibabaga tod sikara no iner ira onarap. Panon tayon narengel so boses nen Jehova natan? Narengel tayo itan no manbasa tayoy Biblia. Abaybayag lan impaisulat itan nen Jehova, kanian no babasaen tayo, singa tayo narerengel so boses to diad benegan tayo.—Isa. 51:4.

11. Antoy duara ya nepeg tayon gawaen pian naanosan tayo ray subok tan mansiansia tayon maliket, tan akin et importante itan ya dua?

¹¹ Antoy gawaen tayo pian talagan minabang tayo ed pangibabangat nen Jehova panamegley na organisasyon to tan say Biblia? Imanoen imay duaran abitla diad Isaias 30:21. Unona, imbaga nen Jehova ya: “Saya so dalan.” Ipapaamta tod sikatayo no anto ray ganggan tan bilin to. Nabasa iratan diad Biblia tan mas ipapalinew na organisasyon to. Komadua, say kuan nen Jehova et: “Dia so panakaran yo.” Labay ton ibaga, dapat iyaplika tayo iray nanaaralan tayo. No amta tayoy dugan dalan pero agtayo lanlamang manakar ditan, anggapo lanlamang so gunggona. Kanian no labay tayon naanosan iray subok tan mansiansia tayon maliket, kaukolan tayon amtaen iray ganggan tan bilin nen Jehova tan iyaplika tayo iratan. No gawaen tayo itan ya dua, seguradon bendisyonan itayo nen Jehova.

12. Base ed Isaias 30:23-26, panon ya benendisyonan nen Jehova iray Judio?

¹² Basaen so Isaias 30:23-26. Panon ya asumpal iyan propesiya nen akapawil la ray Judio diad Israel? Dakdakel so materyal tan espiritual ya bendisyon nen Jehova ed sikara. Agnasabaan so suplay na panangan da. Pero say sankaimportantian ya bendisyon ya naawat da et say agnasabaan ya espiritual a naakan ta kalkalnan pinmawil so dugan panagdayew. Sayan dakdakel ya espiritual ya bendisyon et first time ya nagawad Israel. Tan base ed bersikulo 26, diad tulong nen Jehova et mas linmiwawa so pakatalos da ed Salita to. (Isa. 60:2) Sarayan bendisyon nen Jehova so angiter ed sikara na “maabig a kipapasen na puso” kanian maliket iran akapanlingkor anggano wala ray subok.—Isa. 65:14.

13. Panon ya asumpal diad panaon tayo imay propesiya tungkol ed ipawil na dugan panagdayew?

¹³ Kasin agawa met ed panaon tayo imay  propesiya tungkol ed kipawil na dugan panagdayew? On! Manlapu la nen 1919, minilyon lan totoo so akablos ed Makapanyarin Babilonia, say empiryo na palson relihyon ed interon mundo. Inggiya ira nen Jehova diad espiritual ya paraiso. Mas marakep ingen itan nen say Insipan a Dalin. (Isa. 51:3; 66:8) Anto ’tay espiritual ya paraiso?

14. Anto ’tay espiritual ya paraiso, tan siopa ray manaayam ditan natan? (Nengnengen so Kabaliksan na Salita.)

¹⁴ Manlapu la nen 1919, saray alanaan ya lingkor nen Jehova et manaayam lad espiritual ya paraiso. b Diad inlabas na panaon, anggan saray parad dalin (say ‘arum a karnero’) et manaayam met la ed espiritual ya paraiso tan dakdakel ya bendisyon so iiter nen Jehova ed sikara.—Juan 10:16; Isa. 25:6; 65:13.

15. Iner so kawalaan na espiritual ya paraiso?

¹⁵ Diad panaon tayo, iner so kawalaan to yay espiritual ya paraiso? Saray lingkor nen Jehova et walad interon mundo. Kanian say espiritual a paraiso et walad interon mundo. On, basta maseseg tayon mandadayew ed si Jehova diad dugan paraan, wala tayod espiritual ya paraiso anggan iner so panaayaman tayo.

16. Antoy gawaen tayo pian nanengneng tayoy dakep na espiritual ya paraiso?

¹⁶ No labay tayo ya tuloytuloy tayon manayam diad espiritual ya paraiso, dapat pablien tayoy impanaagi tayo. Pian nagawaan tayo itan, manpokus tayo ed saray balibalin ugali na agagi, aliwan diad saray lingo ra. (Juan 17:20, 21) Akin et importante itan? Singa onia ’tan ay: Isip mo pa ya wala kad marakdakep ya park o palandey. Di ba, nanduruman klase na kiew so nanengneng mo? Ontan met ed espiritual ya paraiso. Saray agagi et singa ra nanduruman kiew. (Isa. 44:4; 61:3) Naapresya tayo kasi so dakep na interon park o palandey no say pampokusan tayo et no anto ray aliwliwa ed kada “kiew” ya nanengneng tayo? Kanian anggano walay nanengneng tayon lingo o kakapuyan na saray kakongregasyon tayo, tandaan  tayo ya amin tayon sanaagi et parte na marakdakep ya espiritual ya paraiso diad interon mundo.

17. Antoy nitulong na kada sakey ed sikatayo pian mansiansiay pankakasakey ed kongregasyon?

¹⁷ Wala kasi nitulong mo pian mansiansia so pankakasakey ed kongregasyon? On, wala. Bibilinen itayo na Biblia ya magmaliw itayon mikakareenan. (Mat. 5:9; Roma 12:18) No gagawaen tayoy anggaay nayarian tayo ya ayosen iray agpantatalosan diad kongregasyon, singa tayo pararakepen ya lalo so espiritual ya paraiso. Tandaan tayo ya kada agi et inyasingger nen Jehova ed dugan panagdayew pian makapanayam ed espiritual ya paraiso. (Juan 6:44) On, seguradon makakaliket si Jehova no nanenengneng to ya mitutulongan ka pian agnaderal so pankakasakey tan deen diad kongregasyon—ta mabmabli ed sikato so kada lingkor to.—Isa. 26:3; Ag. 2:7.

18. Anto ray lanang tayon dalepdepen, tan akin?

¹⁸ Antoy gawaen tayo pian talagan minabang tayo ed saray bendisyon ya iiter nen Jehova ed saray lingkor to? Aralen tayo so Biblia tan saray publikasyon tayo, tan dalepdepen tayo iray nanaaralan tayo. No maaral tan madalepdep ka, mas mainomay mon naalig so ugali nen Jehova tan Jesus, kanian lalom ya nipanengneng so panangaro tan panamabli ed agagi. (Roma 12:10) Lanang tayo met ya dalepdepen iray iiter nen Jehova ya bendisyon pian lalon onelet so pikakaaro tayod sikato. Tan diad tua, no dalepdepen tayo met iray iter to nin bendisyon diad arapen, mabilabilay ed isip tayo so ilalo tayon manbilay ya andi-anggaan. No dalepdepen tayo iratan ya amin, mansiansia tayon maliket ed panlilingkor tayod si Jehova.

19. (a) Base ed Isaias 30:18, antoy seguradon gawaen nen Jehova? (b) Antoy makatulong pian naanosan tayo ray subok tan mansiansia tayon maliket?

¹⁹ Onsabi so agew ya “onalagey” si Jehova parad saray lingkor to tan deralen to iyan mauges a mundo. (Isa. 30:18) Si Jehova et “Dios na inkahustisya,” kanian seguradoen to ya naderal iyan mundo nen Satanas diad eksakton agew ya inyeskedyul to, tan agan balot ompayag ya na-postpone itan na anggan saksakey ya agew! (Isa. 25:9) Maanos tayo sirin ya alagaren so agew ya pangiliktar nen Jehova ed sikatayo. Legan tayon aalagaren itan, komon ta lanang tayon manpikasi, aralen tayo so Biblia tan iyaplika tayo itan, tan dalepdepen tayo iray iiter nen Jehova ya bendisyon. No gawaen tayo iratan ya amin, seguradon tulongan itayo nen Jehova pian naanosan tayo ray subok tan mansiansia tayon maliket diad pandadayew tayod sikato.