1-2. Akin ya no maminsan et nabiktima tayo na ag-inkahustisya?

 DIAD sakey ya ilustrasyon nen Jesus, walay balon bii ya paulit-ulit ya linmad sakey ya huis pian onkerew na hustisya. Seguradon madengedengel iray disipulo nen Jesus ed satan ya inistorya to! Ta diad saman a panaon et dakel so biktima na ag-inkahustisya. (Luc. 18:​1-5) Makaaral tayo met ed satan lapud amin tayo et nayarin makaeksperiensya na ag-inkahustisya.

² Diad panaon tayo, amayamay so biktima na diskriminasyon, aliwan patas ya panagtrato, tan panamairap. Kanian agti la pankelawan no makaeksperiensya tayo na ag-inkahustisya. (Ecl. 5:8) Balet mas ansakit no say nanggawad satan et mismon kaagian tayo. Siempre, aliwan kalaban iray agagi tan agda gagalaen ya sakitan da tayo. No maminsan, nagawaan da itan lapud aliwa ran perpekto. Balet makaaral tayo ed reaksion nen Jesus nen abiktima na ag-inkahustisya. Di ba aanosan tayo ray aliwliwan panagtrato na saray onkokontra ed katuaan, di lalo lan anosan tayo iray mismon agagi tayo. Anton talaga balet so nalilikna nen Jehova no biktima tayoy ag-inkahustisya lapud ginawa na arum, balanglan agagi odino andi? Kasin iimanoen toy agawad sika tan say naliliknam?

3. Kasin iimanoen nen Jehova so nagagawan ag-inkahustisya ed sikatayo, panon tayon amta?

³ Labay nen Jehova ya duga so pantrato na arum ed sikatayo, tan naiimano to no makakaeksperiensya tayo na ag-inkahustisya. Ibabaga na Biblia ya “aaroen nen Jehova so  hustisya.” (Sal. 37:28) Papaseguroan itayo nen Jesus ya diad dugan panaon nen Jehova et ‘iter Ton tampol so hustisya.’ (Luc. 18:​7, 8) Asingsingger met lan ekalen na Dios so amin ya ansakisakit ya epekto na ag-inkahustisya, tan agto lan balot abuloyan ya nagawa lamet itan ed sikatayo.—Sal. 72:​1, 2.

4. Panon itayon tutulongan nen Jehova natan?

⁴ Legan tayon aalagaren imay panaon ya ekalen la nen Jehova so ag-inkahustisya, natan ni labat et wala lay tulong ya iiter tod sikatayo. (2 Ped. 3:13) Ibabangat to no antoy dugan reaksion tayo no aliwliway impantrato na arum ed sikatayo. Say sakey ya paraan et impaisulat tod Biblia so perpekton alimbawa na Anak to pian walay aligen tayo no nipaarap tayod ag-inkahustisya. Tan angiter met na saray praktikal a bilin ya sarag tayon iyaplika.

MANALWAR KAD REAKSION MO

5. Akin et kaukolan tayoy manalwar ed reaksion tayo?

⁵ No walay nagawad sikatayo ya ag-inkahustisya, normal labat ya nasakitan tayo. (Ecl. 7:7) Alikna met itan na saray matoor ya lingkor na Dios nensaman ya singa si Job tan Habacuc. (Job 6:​2, 3; Hab. 1:​1-3) Pero tandaan ya anggano normal labat itan ya nalikna, manalwar tayo nin siansia ed reaksion tayo. Ta ompan makapangibaga o makagawa tayoy pagbabawian tayo lanlamang.

6. Antoy naaralan tayod samay aliwan ginawa nen Absalom? (Nengnengen met so litrato.)

⁶ No aliwliway impantrato na arum ed sikatayo o diad saray kapamilya tayo, ompan salien tayoy manggawa na paraan pian ombawi. Delikado ’tan ta ompan onloor laingen so situasyon. Ontan so ginawa na anak nen Arin David ya si Absalom. Sinmanok ya maong ta say agi ton si Tamar et ni-rape na agi dad ama ya si Amnon. Base ed Mosaikon Ganggan, patey so dusa ed samay ginawa nen Amnon. (Lev. 20:17) Tua, walay rason nen Absalom ya onsanok, pero anggapoy karapatan ton mamatey ed si Amnon.​—2 Sam. 13:​20-23, 28, 29.

7. Antoy inisip na salmista nen nanenengneng toy ag-inkahustisya?

⁷ No singa agnadudusa iray manggagaway mauges, ompan isipen mon anggapo lanlamang so gunggona na panggagawam na duga. Ontan so alikna na salmista nen naobserbaan to ya mas onaaligwas iray mauges ya manmamaltrato ed saray maong ya  totoo. Imbaga to ya ‘saray mauges a totoo et main-inomay dan naalay labay da.’ (Sal. 73:12) Adismaya met ed nanenengneng ton ag-inkahustisya kanian naisip to ya singa aliwan sulit so panlilingkor tod si Jehova. Kuan to: “Sanen sinalik iyan talosan, agonigon ak.” (Sal. 73:​14, 16) Diad tua, oniay inamin to: “Aliwa lawari inarap na saray salik, ngalngali ak nikarunyas.” (Sal. 73:2) Ontan met so agawa ed si Brother Alberto. a

8. Antoy epekto na ag-inkahustisya ed si Alberto?

⁸ Inakusaan na arum ya agagi si Alberto ya mantatakew kuno ed pundo na kongregasyon. Lapud satan, nakal ya elder tan nakal met so respeto ed sikato na dakel ya agagi. “Mansyodot tan adismaya ak ya maong,” so kuan to. Lapud nampokus ed sakit ya alikna to, kinmapuy laingen so espiritualidad to. Nagmaliw ni ingen ya inactive na limay taon. Kanian nanengneng tayo ed sayan eksperiensya to no antoy posiblin nagawa no agtayo kontroley pasnok tayo no biktima tayo na ag-inkahustisya.

ALIGEN SO ALIMBAWA NEN JESUS

9. Anto ran ag-inkahustisya so inanosan nen Jesus? (Nengnengen met so litrato.)

⁹ Angipanengneng si Jesus na perpekton  alimbawa no antoy dugan gawaen no walay ag-inkahustisya. Nen wadiad dalin, aliwliway impantrato ed sikato na dakel ya totoo tan na mismon kapamilya to. Inakusaan met na saray agmananisian kakanayon to ya nadederal lay ulo to. Imbaga met na saray lider na relihyon ya say pakayari to et manlalapu kuno ed saray demonyo. Tan sikatoy ininsulto, pinairap, tan pinatey ni ingen na saray Romanon sundalo. (Mar. 3:​21, 22; 14:55; 15:​16-20, 35-37) Pero amin iratan et inanosan nen Jesus tan agbalot binmawi. Antoy naaralan tayo ed alimbawa to?

10. Antoy reaksion nen Jesus nen abiktima na ag-inkahustisya? (1 Pedro 2:​21-23)

¹⁰ Basaen so 1 Pedro 2:​21-23. b Impanengneng nen Jesus so dugan reaksion no walay nagawad sikatayon ag-inkahustisya. Amta to so dugan panaon na ag-iyesel tan panaon na pansalita. (Mat. 26:​62-64) Agto indepensay sarili to ed amin ya palson akusasyon ed sikato. (Mat. 11:19) Pero nen kaukolan toy mansalita, agto nansalitaay mauges odino binantaan iray mamubusol ed sikato. Akontrol nen Jesus so liknaan to lapud “inmatalek toy sarili to ed samay matunong ya ukom.” Segurado si Jesus ya nanenengneng nen Jehova so amin ya ag-inkahustisya ya nagagawad sikato. Tan amta to ya onkiwas met si Jehova pian resolbien so amin ya ag-inkahustisya diad dugan panaon.

11. Diad anto ran paraan ya kaukolan tayon kontrolen so dila tayo? (Nengnengen met so litrato.)

¹¹ No aliwliway impantrato ed sikatayo na arum, naalig tayoy Jesus no kontrolen tayoy dila tayo. No agmet itan seryoso, mas maong no palampasen ti la. Odino agti la  mansasalita pian agtayo makapangibaga na manpaloor laingen na situasyon. (Ecl. 3:7; Sant. 1:​19, 20) No maminsan balet, kaukolan tayoy mansalita no walay nanenengneng tayon aliwan patas ya nagagawa tan no kaukolan tayon idepensa so katuaan. (Gawa 6:​1, 2) Balet tandaan ya no kaukolan tayoy mansalita, apipigeren tayo komon tan marespeto so pangibaga tayo.—1 Ped. 3:15. c

12. Panon tayon imatalek so sarili tayo ed si Jehova, say “matunong ya ukom”?

¹² Naalig tayo met si Jesus no imatalek tayoy sarili tayo ed si Jehova, say “matunong ya ukom.” Kanian no bilang ta walay nanhusga o akasakit ed sikatayo, segurado tayon amta nen Jehova no anton talagay tua. No atan so sankanonot tayo, makapan-anos tayo ta amta tayon ipetek lanlamang iratan nen Aman Jehova. Sakey ni, lapud impalima ti lad si Jehova, naiwasan tayoy onsanok odino busolen imay toon akasakit ed sikatayo. Ta no agtayo ekalen iratan ed puso tayo, seguradon makapangibaga o makagawa tayo lanlamang na aliwa, naekal met so liket tayo, tan ompan naderal ni ingen so relasyon tayod si Jehova.​—Sal. 37:8.

13. Anto ray tandaan tayo pian tuloytuloy tayon naanosan so ag-inkahustisya?

¹³ Siempre, agtayo perpekton naalig so alimbawa nen Jesus. No maminsan, makagawa odino makapangibaga tayo nin siansia na pagbabawian tayo. (Sant. 3:2) Wala ra balet so ag-inkahustisya ya grabe so epekto tod sikatayo, singa sugat ya dia lad balon mundo onabig. No ontan so situasyon mo, makaseguro ka ya amta nen Jehova so dadalanen mo. Tan natatalosan nen Jesus so naliliknam ta anggan sikato et abiktima met na ag-inkahustisya. (Heb. 4:​15, 16) Balet aliwan say perpekton alimbawa labat nen Jesus so inter nen Jehova, angiter met na saray bilin ed Biblia ya makatulong ed sikatayo pian nasarag tayoy ag-inkahustisya. Pantongtongan tayo so duaran bersikulo ya nabasad libro na Roma.

“IKDAN YO NA PASEN SO SANOK”

14. Anton sanok so tutukoyen na Roma 12:19?

¹⁴ Basaen so Roma 12:19. Nen imbaga nen apostol Pablo ed saray Kristiano ya “ikdan yo na pasen so sanok,” anton sanok so tutukoyen to? Base ed konteksto, say sanok nen Jehova. Iikdan tayoy pasen so sanok nen Jehova no aalagaren tayoy dugan panaon tan paraan na ikiwas to pian iter so hustisya. Oniay imbaga nen Brother John nen sikatoy abiktima na ag-inkahustisya: “Nilabanan ko may liknaan ya kaukolan kon ipetek may aliwan ginawa na samay agi ed siak. Pero akatulong so Roma 12:19 pian agko unaan so hustisya nen Jehova.”

15. Akin et mas maong no alagaren tayon si Jehova so mangipetek ed problema?

¹⁵ Parad pankaabigan tayo lanlamang no alagaren tayon si Jehova so manayos ed problema. Tan no ontan so gawaen tayo, nalemewan tan agtayo na-stress diad pananap tayoy solusyon ed problema. Labalabay itayon tulongan nen Jehova. Singa to ibabagan, ‘Siak so akauley, ayosen ko ’tay ag-inkahustisyan agawad sika.’ No mantiwala tayo ed sipan nen Jehova ya “Siak so ombawi,” imatalek ti lan amin ed sikato ta amta tayon asikasoen to itan diad sankaabigan a paraan. Atan so akatulong ed si Brother John ya abitla niman. Imbaga to: “Amtak ya no maanos kon alagaren si Jehova, mas maong so solusyon to nen say antokaman ya naisip ko.”

 “ITULTULOY MON DAEGEN SO MAUGES DIAD PANAMEGLEY NA MAONG”

16-17. Panon ya makatulong so pikakasi pian ‘tuloytuloy tayon nadaeg so mauges diad panamegley na maong’? (Roma 12:21)

¹⁶ Basaen so Roma 12:21. Pinaseseg nen Pablo iray Kristiano ya ‘itultuloy dan daegen so mauges diad panamegley na maong.’ Diad samay Sermon nen Jesus ed Palandey, imbaga to: “Itultuloy yon aroen iray mamubusol ed sikayo tan ipikasi iramay mamapasegsegang ed sikayo.” (Mat. 5:44) Ontan ya mismoy ginawa nen Jesus. Seguro nanonotan tayod saya may nen sikatoy impasak na saray Romanon sundalo ed poste. Seguradon graben sakit so alikna to tan agaylan kababaingan tan ag-inkahustisya so inanosan to.

¹⁷ Balet anggano onmay agawad sikato, matoor nin siansia ed si Jehova. Imbes ya kerewen ton nadusa iramay sundalo, oniay impikasi to: “Ama, perdonam ira, ta agda amtay gagawaen da.” (Luc. 23:34) Naaralan tayod satan ya no ipikasi tayo iramay akagaway aliwa ed sikatayo, nabawasan so nalilikna tayon sakit na linawa tan sanok. Ompan manguman ni ingen so pakanengneng tayod sikara.

18. Antoy nitulong na pikakasi ed si Alberto tan John?

¹⁸ Baleg so nitulong na pikakasi ed si Alberto tan John pian nakontrol day reaksion da nen walay agawan ag-inkahustisya ed sikara. Oniay imbaga nen Alberto: “Impikasik iramay agagin angakusa ed siak. Aminpigak ya kinerew ed si Jehova ya agko komon sankanonot may ginawa dad siak pian onkepay pasnok ko.” Makapaliket ta natan et sikatoy matoor ya manlilingkor lamet ed si Jehova. Onia met so imbaga nen John: “Paulit-ulit kon impikasi may brother ya akasakit ed siak. Tinulongan ak nen Jehova ya naperdona may agi tan agko la pansakitay ulo may ginawa to. Akatulong iraman ya pikakasi pian ondeen so nonot ko.”

19. Anggad agni aderal iyan mundo nen Satanas, antoy tuloytuloy tayon gawaen? (1 Pedro 3:​8, 9)

¹⁹ Anggad agni aderal iyan mundo nen Satanas, posiblin nabiktima tayoy ag-inkahustisya. Balet no bilang ta nagawa itan ed sikatayo, agtayo komon ontutundan manpikasi ed si Jehova ya tulongan to tayo. Aligen tayo met so alimbawa nen Jesus tan itultuloy tayo labat ya iyaplika iray prinsipyo ed Biblia. No gawaen tayo iratan, seguradon bendisyonan itayo nen Aman Jehova.​—Basaen so 1 Pedro 3:​8, 9.