Kasin labay mon mas dakel so naaralan mo ed personal study’m? Nia ray pigaran tip pian mas makapampokus ka:

• Manpili kay pasen ya makapan-aral ka. No posible, amay aliwa komon ya atakatak so kaliberliber mo, tan amay dugarugay liwawa pian agka nairapan ya manbasa. Sarag mo met so man-lamisaan odino mananap na komportablen pasen diad paway na abung.

• Mananap kay pasen ya anggapoy makadisturbo ed sika. Asaksakbay ya binmangon si Jesus insan “linmad sakey a nisulinek a pasen” pian makapanpikasi. (Mar. 1:35) No aliwan posible ya makapanbukbukor ka, ibagam ed saray kapamilyam odino kakaibam ed abung no antoy eskedyul mon man-personal study. Tan kerew mod sikara ya agda ka iisturboen legan kan manaaral.

• Dapat akapokus ka. No manguusar kay cellphone odino tablet diad personal study’m, maabig no iyan mod silent mode odino usar moy airplane mode pian agka nadisturbo. Pero no biglan naisip mo ya walay kaukolan mon gawaen, isulat mo nin magano pian agmo nalingwanan, insan mo gawaen kayarim ya manaral. Tan no talagan naiirapan ka lan manpokus, tunda kan magano, manakar-akar ka odino man-stretching ka.