KASIN no maminsan et mairap mon tumboken so eskedyul mod sinimban pam-personal study, tan singa makapa-boring la? Aliwan sika labat so makakaliknay ontan. Pero isip mo pa labat iray arum ya gagawaen mon regular, singa say panames. Di ba walay eskedyul to ’tan, tan gagalaen mon talagay manames? Pero kayari to, antoy naliknam? Narepreskoan ka! Ontan met so naliknam no regular kan manpi-personal study. Narepreskoan ka na ‘danum, say salita na Dios.’ (Efe. 5:26) Nia ray pigaran makatulong ed sika:

• Dapat walay eskedyul mo. Say personal ya panag-aral na Biblia et sakey ed saray “mas importantin bengatla” ya agdapat papaulyanan na sakey a Kristiano. (Fil. 1:10) No akapili ka lay agew tan oras, maabig no isulat mo itan insan mo ipeket ed pasen ya mainomay mon nanengneng, singa bilang diad kuartom odino diad ref. Odino nayari met no mangi-set kay alarm ed cellphone mo pian agmo nalingwanan.

• Pilim may paraan tan karukey na panag-aral ya epektibo ed sika. Dinan so mas epektibo ed sika—amay andukey ya panag-aral o antikey labat? Mas kabat moy sarilim kanian pilim no anto may dugaruga ed situasyon mo. Balet no singa nangingirasan kan manaral no eskedyul mo la, anto kasi no salien moy manaral anggano samploran minuto labat? Ta anggano atan labat so kayam, dakel nin siansiay naaralan mo kompara ed samay agkan balot nanaral. Malay mo, no naumpisaan mo la, tuloytuloy la ta nai-enjoy mo la.—Fil. 2:13.

• Dapat akapili ka lay topic ya aralen mo. No say pampilim ni na topic et amay diad mismon eskedyul na panaral mo, ompan agmo ‘nausar ed sankaabigan so panaon mo.’ (Efe. 5:16) Maabig sirin no ilistam iray artikulo odino topic ya labay mon aralen. No legan kan manaaral et biglan walay tepet mo, isulat mo iratan. Nayarin ilistam met iray topic ya labay mon aralen kada kayarim ya manaral.

• Akaparaan ka komon ya man-adjust. No maminsan, ompan kaukolan mon i-adjust so eskedyul mo, singa say karukey na panaral mo odino saray topic ya pinilim. Tandaan ya ayos labat anggano i-adjust moy eskedyul mo, no panon karukey so panaral mo, odino say topic ya aralen mo. Basta say importante, sinimba kan makapan-personal study.

On, sikatayo lanlamang so nagunggonaan no natutumbok tayoy sinimban eskedyul tayo ya man-personal study. Seguradon narepreskoan tayo, naaralan tayoy mandesisyon na duga, tan lalo tayon onapit ed si Jehova.—Jos. 1:8.