1. Akin et dakel so naaralan tayo ed saray maedad la?

 AMIN tayo et kaukolan tayoy panangigiya pian makapandesisyon tayoy duga. Dakel ya bilin so niiter na saray elder tan saray maespiritual ya agagi. Balet no bilang ta maedad la ran maong, agtayo komon iisipen ya karaanan la tan aliwa lan mausar iray bilin da. Diad tua, labay ingen nen Jehova ya makaaral tayo ed sikara. Lapud kabayag da lan manbibilay, mas dakel lay eksperiensya da tan mas malawak lay panagnonot tan pakatalos da.​—Job 12:12.

2. Antoy pantongtongan tayo ed sayan artikulo?

² Manlapu la nensaman, uusaren la nen Jehova iray matoor ya maedad lan lingkor to pian pasesegen tan igiya iray totoo to. Singa bilang, inusar to ra di Moises, David, tan apostol Juan. Nambilay ira ed nanduruman panaon tan aliwan parepareho so situasyon da. Nen asingger lan manampot so bilay da, wala ray importantin imbaga da ed saray mas ugugaw. Imbangat dan talo no akin ya importante so iyunor ed Dios. Saray imbaga da et impaisulat nen Jehova parad sikatayo natan. Kanian amin tayo, balanglan ugaw o matatken, makaaral tayo ed saray bilin da. (Roma 15:4; 2 Tim. 3:16) Pantongtongan tayo sirin diad sayan artikulo iray sampot lan imbaga na sarayan maedad lan matoor ya lalaki tan no antoy naaralan tayo.

“MANBILAY KAYO NA ANDUKEY”

3. Anto ray angusaran nen Jehova ed si Moises?

³ Inusar nen Moises so interon bilay to parad si Jehova. Sikatoy nagmaliw ya propeta, ukom, lider, tan managsulat. Kanian nibagan dakel lay eksperiensya nen Moises! Indaulo toy bansan Israel pian ibulos ira manlapud impakaaripen da ed  Ehipto. Tan anengneng ton mismo iray dakdakel ya milagron ginawa nen Jehova. Impaisulat met nen Jehova ed sikato so unonan limaran libro na Biblia, say Salmo 90, tan nayarin anggan say Salmo 91. Tan posiblin sikato met so nansulat ed libron Job.

4. Siopa ray pinaseseg nen Moises, tan akin?

⁴ Nen 120 la so edad nen Moises tan asingger lan ompatey, tinipon to so amin ya Israelita pian ipanonot ed sikara iray ginawa nen Jehova. Nen kabataan ni arum ed sarayan Israelita, anengneng dan mismo iray makapakelaw ya tanda tan milagro nen Jehova, tan no panon ton dinusa iray Ehipsio. (Exo. 7:​3, 4) Akapanakar ira ed pegley na Ambalangan Dayat nen binelsay itan nen Jehova. Tan anengneng da met no panon ton dineral so armada na Faraon. (Exo. 14:​29-31) Diad loob na 40 taon ya impanakar-akar da, alikna day proteksion tan panangasikaso nen Jehova. (Deu. 8:​3, 4) Nen asingger lan makaloob ed Insipan ya Dalin iray Israelita, sinambot nen Moises iyan pankanawnawa pian pasesegen ira. a

5. Diad samay sampot ya imbaga nen Moises ya nabasad Deuteronomio 30:​19, 20, antoy impaseguro to ed saray Israelita?

⁵ Antoy imbaga nen Moises? (Basaen so Deuteronomio 30:​19, 20.) Impanonot to ed saray Israelita ya balibalin bilay so manatalaran ed sikara. Tooren nen Jehova may sipan to ya manbilay ira na andukey diad dalin ya laen da. Talagan marakdakep iman ya lugar tan mabuna so dalin diman! Pian na-imadyin na saray Israelita so dalin ya laen da, oniay imbaga nen Moises: “Angkakabaleg tan mararakep a syudad ya agmo impaalagey, kaabungan a napno na amin a klase na maabig a bengatla ya agmo nankimeyan, saray bobon ya agmo kinotkot, tan saray kaubasan tan saray kiew ya olibo ya agmo intanem.”​—Deu. 6:​10, 11.

6. Akin et inabuloyan na Dios ya nasakop na arum ya bansa so Israel?

⁶ Pinasakbayan met nen Moises iray Israelita. Pian manbilay ira na andukey diad Insipan ya Dalin, kaukolan dan unoren iray ganggan nen Jehova. Binilin ira nen Moises ya dapat dan “pilien so bilay.” Nagawaan da itan no dengelen day Jehova tan ‘mansiansia rad sikato.’ Makapaermen balet ta nanrebelde ed si Jehova iray Israelita. Kanian lapud satan, inabuloyan na Dios ya nasakop ira na Asirya tan asabi panaon, sinakop met ira na Babilonia insan da ra binihag.​—2 Ara. 17:​6-8, 13, 14; 2 Awa. 36:​15-17, 20.

7. Antoy naaralan tayo ed saray imbaga nen Moises? (Nengnengen met so litrato.)

⁷ Antoy naaralan tayo? No unoren tayoy Jehova, manbilay tayo na andi-anggaan. Singa saray Israelita nensaman ya asingsingger lan makaloob ed Insipan a Dalin, asingsingger ti met la natan ya makasabi ed insipan na Dios ya balon mundo. Tan agla manbayag, magmaliw lan paraiso so interon dalin! (Isa. 35:1; Luc. 23:43) Anggapo lay impluensya nen Satanas tan saray demonyo to. (Apo. 20:​2, 3) Naandi la ray palson relihyon ya mangibabangat na katilaan nipaakar ed si Jehova. (Apo. 17:16) Naandi met la ray gobierno na totoo ya mamapairap ed saray nasasakopan da. (Apo. 19:​19, 20) Anggapo met lay mauges a totoo ya manayam ed paraiso. (Sal. 37:​10, 11) Amin ya totoo et maunor la ed saray ganggan nen Jehova kanian walay pankakasakey tan mareen la so interon mundo. Amin ya manaayam ditan et manaaroan tan walay tiwala da ed sakey tan  sakey. (Isa. 11:9) Talagan labalabay ti la ’tan ya nagawa! On, no unoren tayoy Jehova, aliwan sanlasus taon labat so pambilay tayo ed paraiso, noagta manbilay tayo na andi-anggaan!—Sal. 37:29; Juan 3:16.

8. Panon ya akatulong ed sakey ya abayag lan missionary so sipan na Dios ya bilay ya andi-anggaan? (Judas 20, 21)

⁸ No lanang tayon sankanonot so sipan na Dios ya bilay ya andi-anggaan, agtayon balot ikbanan so katooran tayo anggan anto ni ’tay subok ya onsabi. (Basaen so Judas 20, 21.) Makatulong met itan ya sipan na Dios pian nalabanan tayo ray kakapuyan tayo. Walay sakey ya brother ed Africa ya abayag lan manlilingkor bilang missionary. Oniay imbaga to no panon ton nilabanan so kakapuyan to: “Kada no isipen kon posiblin nabalang so ilalok ya manbilay na andi-anggaan no manpadaeg ak ed kakapuyan ko, mas determinado ak ya manmatoor tan lanang ya ipikasi itan. Alabanan ko ’tan ya siansia diad tulong nen Aman Jehova.”

“ONTALONA KA”

9. Anto ran subok so dinadalan nen David?

⁹ Si David et matoor ya ari. Sakey met ya managtogtog, manag-compose na kansion tan tula, sundalo, tan propeta. Pero dakel met so dinadalan ton subok. Pigay taon ya nanamot-amot ta labay ya ipapatey nen Arin Saul. Tan nen ari lay David, kaukolan to lamet so ontakas ta labay na anak ton si Absalom ya samsamen so inkaari to. Pero anggano mair-irap iray dinadalan nen David tan akagawa ni ingen na saray seryoson kasalanan, mas pinili toy manmatoor ed Dios anggad sampot na bilay to. Kampegan sikatoy tinawag nen Jehova ya “lakin makapaliket ed puso [To].” Duga labat sirin ya dengelen tayo iray bilin nen David!—Gawa 13:22; 1 Ara. 15:5.

10. Akin et kaukolan ya bilinen nen David so anak ton si Solomon?

¹⁰ Singa bilang, imanoen tayo pay bilin nen David ed anak ton si Solomon, say onsublay ed sikato ya ari. Pinili nen Jehova so ugaw nin si Solomon pian mangipaalagey ed templo ya usaren parad dugan panagdayew. (1 Awa. 22:5) Aliwa ’tan ya mainomay tan seguradon kaukolan toy tulong nen Jehova pian nidaulo toy bansan Israel. Kanian anto kasi bilin nen ama to? Nengnengen tayo.

11. Base ed 1 Arari 2:​2, 3, antoy bilin nen David ed si Solomon, tan antoy resulta nen inunor to itan? (Nengnengen met so litrato.)

¹¹ Antoy bilin nen David? (Basaen so 1 Arari 2:​2, 3.) Imbaga nen David ed anak to ya no unoren toy Jehova, sikatoy magmaliw ya maong ya ari tan seguradon nabendisyonan. Tan ontan so agawad si Solomon diad dakel a taon lapud inunor to si Jehova. (1 Awa. 29:​23-25) Asumpal ton impaalagey so makapadinayew ya templo. Angisulat met na pigaran libro na Biblia tan wala ray imbaga to ya naromog ed arum a parte na Biblia. Akabkabat met si  Solomon lapud karunongan tan karakel na kayamanan to. (1 Ara. 4:34) Pero singa imbaga la nen ama to, maong so pansumpalan nen Solomon basta unoren to labat si Jehova. Makapaermen balet ta no kapigan tinmakken, diman nandayew ed palson dirios. Kanian abalang to laingen so pabor nen Jehova, pati say karunongan na Dios ya mangigiya komon ed sikato pian magmaliw ya maong tan patas so pananguley to.—1 Ara. 11:​9, 10; 12:4.

12. Antoy naaralan tayo ed saray imbaga nen David?

¹² Antoy naaralan tayo? No unoren tayoy Jehova, bendisyonan tan igiya to tayo. (Sal. 1:​1-3) Tua, ag-isisipan nen Jehova ya onyaman tan nakabkabat tayo ya singa si Solomon. Balet impaseguro nen Jehova ya no unoren tayo, seguradon igiya to tayo pian makapanggawa tayo na duga iran desisyon. (Pro. 2:​6, 7; Sant. 1:5) Singa bilang, makatulong iray prinsipyo ed Biblia no mandedesisyon tayo nipaakar ed trabaho, edukasyon, panagligliwaan, tan kuarta. No iyaplika tayo ray bilin to, naprotektaan so relasyon tayod sikato tan agnabalang so ilalo tayon manbilay na andi-anggaan. (Pro. 2:​10, 11) Nawalaan tayo met na tuan kakaaro tan magmaliw ya maliket so pamilya tayo.

13. Antoy akatulong ed si Carmen pian makapanggaway dugan desisyon?

¹³ Inisip nen Carmen ya taga Mozambique ya no mangalay atagey ya edukasyon, seguradon maong so pansumpalan to. Kanian nan-enroll ed sakey ya university tan angalay kurson architecture. Oniay imbaga to: “Nai-enjoy koy panaaral ko. Balet uupoten na satan so panaon tan biskeg ko. Kasi sanagew ak ya walad eskuelaan, manlapud 7:30 na kabuasan anggad alas 6 na labi. Ngalngali aga ak makapiaral kanian apektadon maong so espiritualidad ko. A-realize kon sasalien koy manlingkor ed duaran katawan.” (Mat. 6:24) Nen ontan so naisip to, nampikasi ed si Jehova tan nan-research ed saray publikasyon tayo. Onia ni imbaga to: “Akatulong ed siak iray simbawa na saray elder tan nen nanay ko. Kanian nandesisyon ak ya itunday panaaral kod university tan nanlingkor ak ed si Jehova ya full-time. Sakey ’tan ed saray sankaabigan ya desisyon ko, tan agkon balot ’tan pagbabawian.”

14. Antoy impaseseg nen Moises tan David?

¹⁴ Inar-aro nen Moises tan David si Jehova, tan atalosan da ya importantin maong so  pangunor dad sikato. Kanian pinaseseg day arum ya aligen day alimbawa ra tan mansiansia ran matoor ed si Jehova. Imbaga da met ya no taynan day Jehova, nabalang day pabor to tan agda naawat iray bendisyon ya insipan tod sikara. Anggad natan, praktikal ni iratan ya bilin nen Moises tan David. Pero kayari nilasus a taon, wala ni sakey ya lingkor na Dios ya indanet to no akin ya importantin manmatoor tayo ed si Jehova.

“ANGGAPO LAY MAS PANLILIKETAN KO”

15. Anto ray naeksperiensya nen apostol Juan?

¹⁵ Si Juan et inar-aron apostol nen Jesu-Kristo. (Mat. 10:2; Juan 19:26) Sikatoy akaiba nen Jesus legan na ministeryo to. Anengneng to met a mismo iray milagron ginawa to tan agton balot tinaynan si Jesus anggan diad mairap iran situasyon. Wadman met nen impasak si Jesus tan kaiba ed saray akanengneng nen apaoli la. Asubaybayan nen Juan so indakel na saray Kristiano nen inmunan siglo. Tan lapud andukey so impanbilay to, anengneng to no panon a nipulong so maong a balita ed dakel ya totoo.​—Col. 1:23.

16. Siopa ray apaseseg ed sulat nen Juan?

¹⁶ Nen magano lan manampot so bilay nen Juan, naikdan na pribilehyon mangisulat ed sampot ya libro ed Biblia—say makapadinayew a libro ya Apocalipsis. (Apo. 1:1) Sikato met so nansulat ed Ebanghelyo ya inngaran ed sikato, pati say taloran sulat ya unona, komadua, tan komatlon Juan. Say sinulatan to diad samay komatlo et si Gayo, sakey ya matoor a Kristiano ya impasen ton inar-aro ton anak. (3 Juan 1) Diad saman, posiblin wala ni ray arum ya ipapasen nen Juan ya singa to ananak. Seguradon apaseseg iray papatumbok nen Jesus ed insulat to ya anggad sikatayo met natan.

17. Base ed 3 Juan 4, akin ya malikeliket si Juan?

¹⁷ Antoy karga na sulat nen Juan? (Basaen so 3 Juan 4.) Imbaga to ya malikeliket lapud nanenengneng ton maunor ed Dios iray pinabpabli ton agagi. Akin kasi? On ta diad saman et wala ray mangikakayat na palson bangat tan mandederal ed pankakasakey na kongregasyon. Maong labat ta wala ray Kristianon tuloytuloy ya “manaakar ed katuaan” tan ‘uunoren da iray ganggan nen Jehova.’ (2 Juan 4, 6) Aliwan si Juan labat so apaliket na sarayan matoor ya Kristiano, apaliket da met si Jehova!​—Pro. 27:11.

18. Base ed samay imbaga nen Juan, antoy resulta no manmatoor tayod si Jehova?

¹⁸ Antoy naaralan tayo? No matoor tayod si  Jehova, dakel so napaliket tayo. (1 Juan 5:3) Singa bilang, malikeliket tayo ta amta tayon napapaliket tayoy puso nen Jehova. Proud ed sikatayo no iiwasan tayo ray tukso tan uunoren tayo ray ganggan to. (Pro. 23:15) Malikeliket met iray anghel ed tawen. (Luc. 15:10) Anggan sikatayo et maliket met no nanenengneng tayon manmamatoor iray agagi anggano nasusubok tan natutukso iran manggaway aliwa. (2 Tes. 1:4) Tan no wala ti lad balon mundo, seguradon malikeliket tayo ta akapanmatoor tayod si Jehova anggano nambilay tayo ed mauges ya mundo nen Satanas.

19. Antoy nalilikna nen Sister Rachel ed pangibabangat toy katuaan ed arum? (Nengnengen met so litrato.)

¹⁹ Lalo tayon naliknay liket no ibabangat tayod arum so katuaan. Ontan so alikna nen Rachel ya taga Dominican Republic. Imbaga to ya baleg a pribilehyo ya ibangat so arum nipaakar ed si Jehova. Wala ray atulongan ton nagmaliw ya lingkor nen Jehova tan impasen to ran espiritual ya ananak to. Oniay imbaga to: “Agko nipaliwaway liket ya naliliknak kada no nanenengneng ko ray iyaaralan ko ya onaapit ed si Jehova, no nanenengneng kon mantitiwala irad sikato, tan no manggagawa ray pananguman ed bilay da. No ikomparak so liket ya naliliknak natan, melmelag labat iramay sagpot tan sakripisyon ginawak nen iyaaralan ko ni ra.”

IPAPUSOM IRAY SAMPOT LAN IMBAGA NA MATOOR YA LALAKI

20. Antoy pamparehoan tayo ed sikara di Moises, David, tan Juan?

²⁰ No ikomparad sikatayo, duman maong so panaon tan situasyon ya nambilayan di Moises, David, tan Juan. Balet wala ray pamparehoan tayod sikara. Kapareho tayo ran manlilingkor ed tuan Dios. Singa sarayan matoor ya lalaki, manpipikasi, mantitiwala, tan manpapaigiya tayo met ed si Jehova. Tan singa sikara, kombinsido tayo met ya bendisyonan nen Jehova iramay manguunor ed sikato.

21. No ipapuso tayo iray sampot lan imbaga di Moises, David, tan Juan, anto ray naawat tayon bendisyon?

²¹ Komon ta ipapuso tayo iray sampot lan imbaga na sarayan matoor a lalaki tan unoren tayo ray ganggan nen Jehova. Bilang resulta, ontalona so amin ya gawaen tayo. ‘Manbilay tayo met na andukey,’ on, diad andi-anggaan! (Deu. 30:20) Tan magmaliw tayo met ya maliket ta amta tayon napapaliket tayoy puso nen Aman Jehova, say Dios ya mamendisyon ed sikatayo diad paraan ya agtayon balot na-imadyin.​—Efe. 3:20.