1. Panon tayon amta ya pinablin maong nen apostol Pablo so kimey na saray ministeryal a lingkor?

 IMPORTANTIN maong so kimey na saray ministeryal a lingkor diad kongregasyon. Anggan si apostol Pablo ya mismo et pinabli ton maong so pansasagpot na sarayan matoor ya lalaki. Singa bilang, nen sinulatan to iray Kristiano ed Filipos, espisipiko ton binitla iray ministeryal a lingkor tan saray elder.—Fil. 1:1.

2. Antoy nalilikna nen Brother Luis ed asainmin to bilang ministeryal a lingkor?

² Dakel ya bautismadon brother, balanglan matatken o mas ugaw, so malikeliket ed asainmin da bilang ministeryal a lingkor. Ontan so alikna nen Devan sanen sikatoy aturo nen 18 so taon to. Malikeliket met si Luis nen nagmaliw ya ministeryal a lingkor anggan masulok lan 50 so taon to. Oniay kuan to: “Nibagak ya baleg a pribilehyo so manlingkor ed saray agagi ed onian paraan. Nipapaliknak so panangarok ed sikara tan sankaliknak ya inar-aro da ak met.” Seguradon ontan met so nalilikna na dakel ya ministeryal a lingkor!

3. Anto ran tepet so ebatan tayo ed sayan artikulo?

³ No sakey kan bautismadon brother tan aliwa ka nin ministeryal a lingkor, sarag mo kasin i-goal itan? Pero antoy dapat ya manpakiwas ed sika pian gawaen itan? Anto ray kualipikasyon ya nabasad Biblia ya kaukolan mon pankimeyan? Ebatan tayo iratan ya tepet diad sayan artikulo. Pero antis to, amtaen tayo ni no antoy gagawaen na sakey ya ministeryal a lingkor.

ANTO RAY GAGAWAEN NA MINISTERYAL A LINGKOR?

4. Anto ray gagawaen na sakey ya ministeryal a lingkor? (Nengnengen met so litrato.)

⁴ Say sakey ya ministeryal a lingkor et nepeg ya bautismadon  brother. Sikatoy tinuro na masanton espiritu pian ontulong ed saray elder diad nanduruman kimey ed kongregasyon. Singa bilang, seseguroen na arum ya ministeryal a lingkor ya walay magenap ya teritorya tan literatura na saray agagi ya usaren da ed ministeryo. Say arum balet et ontutulong ed panaglinis tan panagmintina ed Kingdom Hall. Wala met iray akaasain bilang attendant tan mangaasikaso ed audio-video legan na aral na kongregasyon. Baleg so nitutulong na saratan ya gagawaen da ed saray agagi. Pero say mas importante, dapat maespiritual iray ministeryal a lingkor, inar-aro dan maong si Jehova, tan uunoren da ray estandarte to. Tan siempre, inar-aro da met iray agagi. (Mat. 22:​37-39) Anto sirin so gawaen na sakey a bautismadon brother no labay toy magmaliw ya ministeryal a lingkor?

5. Antoy gawaen na sakey ya brother no labay toy magmaliw ya ministeryal a lingkor?

⁵ Nabasa ed Biblia iray kualipikasyon parad saramay labay day magmaliw ya ministeryal a lingkor. (1 Tim. 3:​8-10, 12, 13) No bilang ta goal mo itan, maabig no aral mon maong iray kualipikasyon insan mo iratan pankimeyan. Pero siempre, dapat dugay motibom no akin ya labay moy magmaliw ya ministeryal a lingkor.

ANTOY DAPAT YA MOTIBOM?

6. Akin et labay mon panlingkoran iray agagi? (Mateo 20:28; nengnengen met so litrato ed apis.)

⁶ Angipanengneng si Jesu-Kristo na sankaabigan ya alimbawa. Amin ya ginawa to et lapud aro. Inar-aro to so Ama to tan saray totoo. Tan atan met ya panangaro so nampakiwas ed sikaton panserbian so arum tan gawaen iray abeban kimey. (Basaen so Mateo 20:28; Juan 13:​5, 14, 15) No panangaro met so rason no akin ya labay moy magmaliw ya ministeryal a lingkor, seguradon bendisyonan tan tulongan ka nen Jehova pian naabot mo ’tan ya goal.—1 Cor. 16:14; 1 Ped. 5:5.

7. No say sakey ya brother et labay toy magmaliw ya ministeryal a lingkor, anton motibo so dapat ton paliisan?

⁷ Diad sayan mundo, kaslakan lan atagtagey so pakanengneng na totoo ed saramay mamapasyan magmaliw ya ‘number 1’ odino lanang ya manunaan. Balet aliwan ontan ed organisasyon nen Jehova. Say sakey ya brother ya aaligen toy Jesus et inar-aro to ray totoo, aliwan say posisyon so habol to odino pian  ontagey so pakanengneng na arum ed sikato. No say sakey ya maambisyon et naikdan na pribilehyo ed kongregasyon, ompan agto labay ya gawaen iray abeban kimey pian naasikaso so mablin pulok nen Jehova. Ompan isipen to met ya aliwan sikato dapat so manggawa ed satan ta walay pribilehyo to. (Juan 10:12) No say sakey et man-ambisyon pian ontagey so pakanengneng na arum ed sikato, seguradon agbendisyonan nen Jehova so pansasagpot to.—1 Cor. 10:​24, 33; 13:​4, 5.

8. Antoy bilin nen Jesus ed saray apostol to?

⁸ No maminsan, anggan saray maapit ya kakaaro nen Jesus et aliway motibo ra nen kinmerew ira na kaaruman ya pribilehyo. Ontan so ginawa na duaran apostol to, si Santiago tan Juan. Inasinggeran day Jesus tan kinerew dan ikdan to ra na espisyal ya posisyon ed Panarian to. Balet ag-agustoan nen Jesus iman ya kerew da. Kanian oniay bilin to ed saray 12 ya apostol to: “Siopaman a labay toy magmaliw a manuna ed sikayo et nepeg a magmaliw a lingkor yo, tan siopaman a labay toy magmaliw ya unaan ed sikayo et nepeg a magmaliw ya aripen na amin.” (Mar. 10:​35-37, 43, 44) Seguradon bendisyon ed kongregasyon iray brother ya dugay motibo ra diad panlilingkor da ed saray agagi.—1 Tes. 2:8.

ANTOY MAKATULONG PIAN MAS DESIDIDO KAN PANLINGKORAN SO ARUM?

9. Antoy makatulong pian mas desidido kan panlingkoran iray agagi?

⁹ Seguradon inar-arom si Jehova tan labalabay moy manlingkor ed saray agagi. Pero ompan manaalangan kan gawaen iray ekstran kimey parad sakey a ministeryal a lingkor. No ontan so naliliknam natan, antoy makatulong? Isip mo pa no panon kaliket so manlingkor ed saray agagi. Seguradon napruebaan mo iyan imbaga nen Jesus: “Mas makapaliket so mangiter nen say mangawat.” (Gawa 20:35) Ontan ya mismo so ginawa nen Jesus kanian alikna toy tuan liket! Tan ontan met so naliknam no aligen moy ginawa to.

10. Panon ya impanengneng nen Jesus ya labalabay toy manlingkor? (Marcos 6:​31-34)

¹⁰ Pantongtongan tayoy sakey ya alimbawa no panon ya impanengneng nen Jesus ya labalabay ton panlingkoran so arum. (Basaen so Marcos 6:​31-34.) Naknaksawan si Jesus tan saray apostol to kanian onla ra komon ed mareen ya pasen pian makapanpainawa ira. Balet anengneng ira na totoo tan naunaan da ran akasabi diman ta labalabay day paibangat ed si Jesus. Sarag pa komon ya ibaga nen Jesus ya agto ni ra naarap ta kaukolan da met so mangan tan manpainawa. Odino bangatan to labat ira na anggan sakey odino duaran katuaan insan to la ra paalisen. Balet lapud inaro nen Jesus iray totoo, “imbangat to ira na dakel a bengatla.” Tan tuloytuloy to ran binangatan ya anggad “onlalabi” la. (Mar. 6:35) Agpa obligado si Jesus ya gawaen itan, balet “akasian to ra.” Inar-aro to met ira kanian labalabay to ran bangatan. Talagan malikeliket si Jesus no ontutulong tan manlilingkor ed arum.

11. Anto ran praktikal ya tulong so ginawa nen Jesus parad saray totoo? (Nengnengen met so litrato.)

¹¹ Aglabat imbangat nen Jesus iray totoo, angiter met na praktikal ya tulong ed sikara. Nanggaway milagro pian nitaryay naakan da insan to impaibunog ed saray disipulo to. (Mar. 6:41) Diad satan ya ginawa to, imbangat to ray disipulo to no panon ya panlingkoran so arum. Impanengneng to met ya say itulong ed arum diad praktikal a paraan—ya singa gagawaen na saray ministeryal a lingkor natan—et talagan importante. Seguradon malikeliket iray apostol ta akapitulongan ira ed pangibunog na naakan ya mamilagron intarya nen Jesus anggad “angan iran  amin tan naksel ira”! (Mar. 6:42) Pero siempre, aliwan diad sayan pankanawnawa labat ya inyuna nen Jesus so pankaabigan na arum. Diad tua, inusar toy interon bilay to diad dalin pian panlingkoran so arum. (Mat. 4:23; 8:16) On, alikna nen Jesus so liket nen imbangat tan tinulongan to ray totoo diad praktikal a paraan. Seguradon naliknam met so liket legan mon pankikimeyan so magmaliw ya ministeryal a lingkor.

12. Akin et agtayo iisipen ya anggapoy nitulong tayo ed kongregasyon?

¹² No iisipen mo ya singa anggapo met so nikadkaduman abilidad mo, agka komon nadidismaya. Seguradon wala ray kualidad mo ya nausar mo pian natulongan so kongregasyon. Maabig no aralen tan dalepdepen mo may sulat nen Pablo ed 1 Corinto 12:​12-30. Imbaga nen Pablo ya amin ya lingkor nen Jehova, kaiba ka la, et kakkaukolan tan importante ed kongregasyon. No aliwa ka nin ministeryal a lingkor natan lapud pankikimeyan mo ni ray arum nin kualipikasyon, agka onsusuko. Gawam labat so anggaay nayarian mo diad panlilingkor mod si Jehova tan itultuloy mon tulongan iray agagi. Ilaloan mo ya ikokonsidera na saray elder iray abilidad mo tan no anto ran asainmin so sarag dan iter ed sika.—Roma 12:​4-8.

13. Siopa ni ray kaukolan ya mangiyaplika ed saray kualipikasyon parad saray ministeryal a lingkor?

¹³ Nia ni sakey a rason no akin ya agka dapat manaalangan ya pankimeyan iray kualipikasyon pian magmaliw kan ministeryal a lingkor: Maslak ed saratan ya kualipikasyon et parad amin ya Kristiano. Diad tua, amin ya Kristiano et kaukolan dan paapiten so relasyon dad si Jehova, maliket iran mangiter, tan manbilay ira diad paraan ya makapaliket ed Dios. Balet anto ni ray espisipikon pankimeyan na sakey ya brother pian onkualipika bilang ministeryal a lingkor?

ANTO RAY PANKIMEYAN MO?

14. Antoy labay ya ibaga na pagmaliw ya “seryoso”? (1 Timoteo 3:​8-10, 12)

¹⁴ Pantongtongan tayo so pigara ed saray kualipikasyon ya abitlad 1 Timoteo 3:​8-10, 12. (Basaen.) Saray ministeryal a lingkor et nepeg a “seryoso.” Nayari met itan ya ipatalos ya “karapat-dapat ya igalang” odino “kagalgalang.” Siempre, agto labay ya ibaga ya agka lan balot onelek odino manpalek. (Ecl. 3:​1, 4) Imbes, seseryosoen mo ray responsabilidad ya inmatalek ed sika. Kanian no sika may  toon naasaan tan kabkabat ya napantiwalaan, seguradon naalam so respeto na agagi.

15. Antoy labay ya ibaga na “aliwan nandumaan so ibabaga ra” tan “aliwa ran maagum a manaanap na agmanepeg a nabang”?

¹⁵ “Aliwan nandumaan so ibabaga ra.” Labay ton ibaga, nepeg ya matua tan napantiwalaan ka. Walay sakey ya salitam, totooren mo no antoy imbagam, tan agmo lolokoen so arum. (Pro. 3:32) “Aliwa ran maagum a manaanap na agmanepeg a nabang.” Labay ton ibaga, agka mansasaol no wala ray transaksion mo tan matua ka no nipaakar ed kuarta. Agmo sasamantalaen so maong ya relasyon mod saray agagi pian napankuartaan ira.

16. (a) Antoy labay ya ibaga na “aliwa ran mainum na alak”? (b) Antoy labay ya ibaga na pakawalaan na “malinis a konsiensia”?

¹⁶ “Aliwa ran mainum na alak.” Dapat aliwan alablabas so kakainum mo tan agka kabkabat ya mainum na alak. Importante met ya saray ministeryal a lingkor et walaan na “malinis a konsiensia.” Labay ton ibaga, uunoren mo ray estandarte nen Jehova. Anggano no maminsan et nalilingo ka, mareen nin siansia so liknaan mo ta antam ya maong so relasyon mod Dios.

17. Diad anton paraan ya saray brother et “nasali ni ran unona no kasin manepeg ira”? (1 Timoteo 3:10; nengnengen met so litrato.)

¹⁷ “Nasali ni ran unonan no kasin manepeg ira.” Apaneknekan la na saray elder ya napantiwalaan tan responsable ka. Kanian no bilang ta walay naawat mon asainmin, tumbok mo ray instruksion da ya nanlapud organisasyon. Seguradom ya natatalosan mo no antoy kaukolan mon gawaen tan no kapigan mo itan dapat nasumpal. Tandaan, no makulikulim ya gagawaen so asainmin mo, naimano itan na saray agagi tan nanengneng day iyaaligwas mo. Sikayo ran elder, komon ta alisto kayon mangipasal na saray bautismadon brother. (Basaen so 1 Timoteo 3:10.) Kasin wala ray bautismadon brother ed kongregasyon yo ya mantaon na 10 anggad 14, odino mas ugaw ni? Kasin nanengneng ya walay regular ya personal study da? Kasin regular iran mankokomento ed saray aral tan manpupulong? No on, maabig no ikdan yo ray asainmin, amay dugarugad edad tan abilidad da. Diad ontan et ‘nasali nin unona’ irayan brother. Insan no 17 anggad 19 la so edad da, ompan nayari la ran magmaliw a ministeryal a lingkor.

18. Antoy labay ya ibaga na “anggapoy pakaakusaan da”?

 ¹⁸ “Anggapoy pakaakusaan da.” Labay ton ibaga, anggapo dapat so antokaman a seryoson kasalanan ya pakaakusaan ed sika. Pero siempre, ompan nabiktima met iray Kristiano na saray palson akusasyon. Agawa itan ya mismo ed si Jesus tan impasakbay to la ya nayarin nagawa met itan ed saray papatumbok to. (Juan 15:20) Balet no itultuloy mo labat ya ipanengneng iray maong ya ugali ya singa ginawa nen Jesus, magmaliw ya maong so reputasyon mo ed kongregasyon.—Mat. 11:19.

19. No saray brother et walay asawa da, panon dan naunor may ibabaga na Biblia ya dapat et “saksakey so asawa ra”?

¹⁹ “Saksakey so asawa ra.” No walay asawam, dapat uunoren moy estandarte nen Jehova ed panangasawa—say sakey ya laki et para labat ed sakey ya bii. (Mat. 19:​3-9) Agnepeg ya manggawa na seksual ya imoralidad so sakey ya Kristiano. (Heb. 13:4) Pero anto ni kaukolan mon gawaen? Dapat matoor ka ed asawam, agka dapat mifi-flirt tan agka mangiiter na duman motibo ed arum ya bibii.—Job 31:1.

20. Panon ya nipanengneng na sakey ya ama ya ‘maabig so panangidaulo to ed pamilya to’?

²⁰ “Maabig so panangidaulo ra ed ananak da tan ed dilin sankaabungan da.” No sakey kan ulo na pamilya, dapat mon seryosoen iray responsabilidad mo. Regular mon idaulo so family worship yo. Pansagpotan moy makapibiang ya naynay ed ministeryo kaibay asawam tan ananak mo. Tulongan mo ray ananak mo ya nakabat tan naar-aro da si Jehova. (Efe. 6:4) Importante iratan ta no nanaasikaso na sakey ya ama so mismon pamilya to, sarag to met sirin ya asikasoen so kongregasyon.—Ikompara so 1 Timoteo 3:5.

21. No aliwa ka nin ministeryal a lingkor natan, antoy balibalin gawaen mo?

²¹ No sakey kan brother tan aliwa ka nin ministeryal a lingkor, aral mon maong iray kualipikasyon ya apantongtongan diad sayan artikulo. Ipikasim tan pansagpotan mon pankimeyan iratan. Amta mi ya inar-arom si Jehova tan saray agagi. Komon ta itultuloy mon paaralemen so panangarom ed sikara. (1 Ped. 4:​8, 10) Gawam so anggaay nayarian mon magmaliw a ministeryal a lingkor tan naliknam so liket ed panlingkor ed saray agagi. Seguradon bendisyonan nen Jehova so pansasagpot mon magmaliw ya ministeryal a lingkor!—Fil. 2:13.