1-2. Anto ran “maabig a kimey” so gagawaen na saray elder?

 NO SAKEY ka lan ministeryal a lingkor, nayarin pankikimeyan mo met la iray kualipikasyon parad sakey ya elder. Kasin labay moy onkualipika parad satan ya “maabig a kimey”?​—1 Tim. 3:1.

² Anto ray gagawaen na saray elder? Idadaulo day panagpulong, makulikuli ran man-shepherding, tan manbangat. Papasesegen da met iray agagi diad saray ibabaga tan gagawaen da. Kampega lan tinawag na Biblia irayan makukulin elder ya “regalo a lalaki.”​—Efe. 4:8.

3. Panon a magmaliw ya elder so sakey ya brother? (1 Timoteo 3:​1-7; Tito 1:​5-9)

³ Panon a magmaliw ya elder so sakey ya brother? Say kualipikasyon parad saray elder et aliwan singa diad pan-aplay na trabaho. Kaslakan, naala kad trabaho basta walad sika iray skill ya aanapen na sakey ya kompanya. Duma balet no labay moy magmaliw ya elder. Aliwan magenap may basta marunong kan manpulong tan manbangat. Kaukolan mon pankimeyan iray kualipikasyon parad saray elder ya nabasad 1 Timoteo 3:​1-7 tan Tito 1:​5-9. (Basaen.) Aralen tayod sayan artikulo iray kualipikasyon ya abitlad saratan ya bersikulo. Naapag iraya diad taloran kategorya: Unona, no panon ya nawalaan na maong ya reputasyon so sakey ya brother. Komadua, no panon ton magmaliw ya maong ya ulo na pamilya. Tan komatlo, no antoy makatulong ed sikaton mabulos ya manlingkor ed kongregasyon.

KAUKOLAN YA MAABIG SO REPUTASYON MO

4. Antoy labay ya ibaga na “anggapoy nabalaw ed sikato”?

⁴ Say sakey ya kualipikasyon na sakey ya elder et “anggapoy nabalaw ed sikato.” Labay ton ibaga, rerespetoen ka na saray  agagi ed kongregasyon ta maong so ugalim tan kagagawam. Sakey ni, dapat ya “maabig so reputasyon [mo] ed saray totoo ed paway.” Anggano wala ray onkontra ed saray papanisiaan mo, dapat anggapoy naituklaw da lapud kabkabat kan matua tan maong ya too. (Dan. 6:​4, 5) Kanian tepetan moy sarilim, ‘Kasin maong so reputasyon kod saray agagi tan ed saray aliwan Tasi?’

5. Panon ya nipanengneng na sakey ya sikatoy “maaro ed kamaongan”?

⁵ Say sakey ya elder et “maaro ed kamaongan.” Nipanengneng mo itan no manpokus kad saray maong ya nagagawaan na arum tan komendaan mo ra. Maliket ka met ya manggawa na kamaongan ed arum anggano agka obligado ya gawaen itan. (1 Tes. 2:8; nengnengen so “laging gumagawa ng mabuti” ed study note na Tito 1:8 diad nwtsty-TG.) Akin ya importantin ‘maaro ed kamaongan’ iray elder? On ta atan so manpakiwas ed sikaran usaren so panaon dan man-shepherding tan manggawa na saray asainmin da. (1 Ped. 5:​1-3) Siempre, nalikna da met so kesaw, pero seguradon sulit so amin ya sakripisyo da.​—Gawa 20:35.

6. Antoy pakanengnengan ya say sakey et “maparawes”? (Hebreo 13:​2, 16; nengnengen met so litrato.)

⁶ Ipapanengneng mon “maparawes” ka no manggagawa ka na kamaongan ed arum, aliwa labat ya diad saray maapit a kakaarom. (1 Ped. 4:9) Oniay imbaga na sakey ya reperensya ed sakey ya toon maparawes: “Lukas so abung to tan say puso to ya mangawat tan mansangkaili ed saray agto kabat.” Tepetay sarilim, ‘Kasin kabkabat ak ya maparawes?’ (Basaen so Hebreo 13:​2, 16.) Say toon maparawes et malikeliket ya manggagaway kamaongan ed amin ya klase na bisita. Singa bilang, paparawesen to ray mairap-bilay, inimbitaan ya manpaliwawa, kaiba la ray mansasagpot pian pasesegen iray agagi, singa saray manangasikaso na sirkito.​—Gen. 18:​2-8; Pro. 3:27; Luc. 14:​13, 14; Gawa 16:15; Roma 12:13.

7. Panon ya nibagan say sakey ya elder et “aliwan maaro ed kuarta”?

⁷ “Aliwan maaro ed kuarta.” Labay ton ibaga, aliwan diad saray materyal iran bengatla so akapokusan na bilay mo. Balanglan mayaman o mairap ka, say panlingkor ed si Jehova so sankaimportantian ed bilay mo. (Mat. 6:33) Uusaren moy panaon, biskeg, tan arum nin kaykayarian mo diad panagdayew ed si Jehova, diad pangasikaso ed pamilyam, tan diad panlingkor mo ed kongregasyon. (Mat. 6:24; 1 Juan 2:​15-17) Tepetay sarilim: ‘Panon kaimportante ed siak so kuarta? Kasin kontento ak  la ed saray manunan pankaukolan ko ed bilay? Odino akapokus ak ed pananap na kuarta tan pakawalaan na dakel ya kaykayarian?’​—1 Tim. 6:​6, 17-19.

8. Anto ray pakanengnengan ya ‘maadia ka ed saray kagagawam’ tan ‘walay kontrol mod sarilim’?

⁸ Kaukolan ya say sakey ya elder et “maadia ed saray kagagawa to” tan “walay kontrol tod sarili to.” Importante sirin ya balanse ka tan antam so limitasyon mo ed amin ya gagawaen mo. Singa bilang, aliwan sobsobra so panangan tan kakainum mo, masimpit so panangawes tan panag-ayos mo, tan duga iray pipilien mon panagligliwaan. Agmo aaligen so paraan na kabibilay na totoo ed sayan mundo. (Luc. 21:34; Sant. 4:4) Tan kalmado ka labat anggano walay makapasyodot ya situasyon. Nepeg met ya “aliwa [kan] buanges” odino kabkabat ya mainum na alak. Tepetan moy sarilim, ‘Kasin balanse ak ed saray kagagawak tan walay kontrol kod sarilik?’

9. Panon mon nipanengneng ya “limpioy kanonotan” mo tan “mauksoy” ka?

⁹ Importante ya “limpioy kanonotan” mo. Labay ton ibaga, aamtaen mo iray prinsipyo na Biblia ed kada situasyon. Insan mo iratan dalepdepen a maong pian magmaliw kan marunong tan mas onlawak so pakatalos mo. Agka met basta-basta mandedesisyon, imbes aamtaen mo nin unona so amin ya importantin detalye. (Pro. 18:13) No ontan so gawaen mo, makagawa kay makabat ya desisyon tan naalig moy paraan na panagnonot nen Jehova. Importante met ya “mauksoy” ka. Labay ton ibaga, organisado ka ta susumpalen mod dugan panaon iray responsabilidad mo tan agka naaatrasado. Kabkabat ka met ya napandependian tan maunor ed saray instruksion. On, no pansagpotan mon ipanengneng iray kualidad ya apantongtongan tayo, seguradon nawalaan kay maabig ya reputasyon. Natan, amtaen tayo no antoy ibabaga na Biblia ya kaukolan a gawaen na sakey ya elder pian magmaliw ya maong ya alimbawa bilang ulo na pamilya.

KAUKOLAN YA MAABIG KAN ALIMBAWA BILANG ULO NA PAMILYA

10. Panon ya nipanengneng na sakey ya ulo na pamilya ya ‘maabig so panangidaulo to ed mismon pamilya to’?

¹⁰ No sakey kan ulo na pamilya tan labay moy manlingkor bilang elder, importante met ya maong so reputasyon na pamilyam. Labay ton ibaga, ‘maabig so panangidaulom ed mismon pamilyam.’ Importante ya kabkabat kan maar-aro tan responsablin ulo na pamilya. Nanengneng itan no idadaulom so family worship yo, no regular kayon mimiaral bilang pamilya, tan no tutulongan mo ran magmaliw ya epektibo ed ministeryo. Akin et importantin nagagawaan itan na sakey ya brother ya labay toy manlingkor bilang elder? Oniay imbaga nen apostol Pablo: “No walay laki ya agto amtan idaulo so dilin sankaabungan to, panon ton naasikasoy kongregasyon na Dios?”​—1 Tim. 3:5.

11-12. No say sakey ya brother et labay toy manlingkor bilang elder, akin et importante ya maong so reputasyon na ananak to? (Nengnengen met so litrato.)

¹¹ No sakey kan ama tan menor-de-edad ni ray ananak mo, kaukolan ya ‘matulok tan makalakal ira.’ Importante sirin ya maar-arom iran bangatan tan ipasal. Siempre, normal labat ed ugugaw so manggalaw tan man-enjoy. Balet no maong so pangipapasal mod sikara, magmaliw iran matulok, marespeto, tan makalakal. Ontan met, importante ya tulongan mo ray ananak mo ya onapit ed si Jehova, iyaplika da ray prinsipyo na Biblia, tan pankimeyan da so manpabautismo.

¹² “Saray anak to et mananisia tan ag-ira naakusaan ya rebelyoso odino alablabas so kagagawa ra.” Antoy epekto ed ama no say mananisian anak to ya wala nid pudir to et akagawa na  seryoson kasalanan? No agawa itan lapud mapaulyan so ama tan agto didisiplinaen so anak to, sikatoy ag-onkualipikan manlingkor bilang elder.​—Nengnengen so Oktubre 15, 1996, isyu na Say Panag-bantayan, p. 21, par. 6-7.

MABULOS YA MANLINGKOR ED KONGREGASYON

13. Panon mon nipanengneng ya “makatunongan” ka tan “aliwan awet”?

¹³ Mausa-usar ed kongregasyon iray brother ya walad sikara iray balibalin kualidad na sakey ya Kristiano. Say toon “makatunongan” et pansiasiansiaen toy mareen ya relasyon to ed arum tan tutulongan to ra ya ontan met so gawaen da. Nipanengneng mo ya makatunongan ka no dedengelen moy ibabaga na arum tan tatalosan mo no akin ya onmay nalilikna tan iisipen da. Singa bilang, panon to no diad sakey ya miting et dumay labay mo ed labay na saray kakaibam? Kasin akaparaan kan manpalugar tan suportaan so desisyon na karaklan no anggapo met so nakokontran ganggan o prinsipyo na Biblia? Say sakey ya elder et “aliwan awet.” Labay ton ibaga, agmo ipipilit ed arum so labay mo. Imbes, dedengelen moy opinyon da antis kan mandesisyon. (Gen. 13:​8, 9; Pro. 15:22) Nepeg met ya ‘aliwa kan makolkol’ odino ‘mipepetang so ulom.’ Labay ton ibaga, aliwa kan mamaong odino mairap ya katalosan, noagta mauyamo tan maalwar kad panagsalitam. Importante met ya “mareen” kan too. Gagawaen moy anggaay nayarian mon sika lay mikareenan anggano wala kad katunongan. (Sant. 3:​17, 18) No mauyamo so pitotongtong mo, nayarin napakalmam anggan saramay onkokontra ed papanisiaan tayo.​—Ukom 8:​1-3; Pro. 20:3; 25:15; Mat. 5:​23, 24.

14. Antoy labay ya ibaga na “aliwan balobalo a mananisia” tan “matoor”?

¹⁴ Pian onkualipikan magmaliw ya elder so sakey ya brother, dapat “aliwan balobalo a mananisia.” Agto labay ya ibaga ya dapat et abaybayag ka lan abautismoan. Pero siempre, linmabas met lay magenap ya panaon kanian matatken ka lad espiritual. Antis kan magmaliw ya elder, nanengneng ya talagan mapaabeba ka ya singa si Jesus tan maanos mo met ya aalagaren so antokaman ya asainmin ya iter ed  sika nen Jehova. (Mat. 20:23; Fil. 2:​5-8) Importante met ya “matoor” ka. Labay ton ibaga, talagan iyaaplikam ed bilay mo iray prinsipyo tan ganggan nen Jehova. Tan uunoren moy amin ya instruksion ya iiter to panamegley na organisasyon to.​—1 Tim. 4:15.

15. Kasin kaukolan ya marundunong a manpaliwawa so sakey ya brother pian magmaliw ya elder? Ipaliwawa.

¹⁵ Malinlinew ya ibabaga na Biblia ya say sakey ya elder et nepeg ya “kualipikadon manbangat.” Pero labay to kasin ibaga ya dapat et nayaryari kan manpaliwawa? Andi. Dakel pay elder ya aliwa met ya marundunong ya manpaliwawa ed kongregasyon. Pero no diad ministeryo tan no pasesegen da ray agagi, marundunong dan uusaren so Biblia. (Nengnengen so “kuwalipikadong magturo” ed study note na 1 Timoteo 3:2 diad nwtsty-TG; ikompara so 1 Corinto 12:​28, 29 tan Efeso 4:11.) Pero siempre, kaukolan mo nin siansia so tuloytuloy ya mansagpot pian napaaligwas moy paraan na panagbangat mo. Pero panon mon mas napaaligwas so panagbangat mo?

16. Anto ray gawaen mo pian mas epektibo kan manbangat? (Nengnengen met so litrato.)

¹⁶ “Maapit ton tutumboken so napanmatalkan a salita.” Pian mas epektibo kan manbangat, dapat akabase ed Biblia so paliwawam tan simbawam. Kaukolan mo sirin ya aralen a maong so Biblia tan saray publikasyon tayo. (Pro. 15:28; 16:23; nengnengen so “maghigpit na nanghahawakan sa mapananaligang mensahe” ed study note na Tito 1:9 diad nwtsty-TG.) Kanian legan kan manaaral, imanom ya maong no panon ya impaliwawa ed saray publikasyon tayo iray teksto ed Biblia pian duga so pangiyaplikam ed saratan. Tan no manbabangat tan manpapaliwawa ka, pansagpotan mon sabien so puso na saray ondedengel. Onaligwas met so panagbangat mo no onkerew kay suhestion ed saray eksperiensyadon elder tan iyaplikam iratan. (1 Tim. 5:17) Kaukolan ya say elder et “nayarian toy mamaseseg.” No maminsan balet, kaukolan toy mansimbawa odino “mangipetek.” Pero naynay ton gawaen iratan diad maaron paraan. No say paraan na panagbangat  mo et mauyamo, maaro, tan akabase ed Salita na Dios, seguradon onaligwas kad panagbangat mo. Tan ipapanengneng mo ya aaligen moy Sankamaongan a Managbangat, si Jesus.​—Mat. 11:​28-30; 2 Tim. 2:24.

ITULTULOY MON PANKIMEYAN IRAY KUALIPIKASYON

17. (a) Anto ray makatulong ed saray ministeryal a lingkor pian tuloytuloy dan napankimeyan iray kualipikasyon? (b) Antoy nepeg ya tandaan na saray elder no rerebyuen da iray kualipikasyon na sakey ya brother ya irekomenda dan magmaliw ya elder? (Nengnengen so kahon ya “ Magmaliw ya Balanse No Walay Irekomenda ya Brother.”)

¹⁷ Kayari tayon inaral iray kualipikasyon na pagmaliw ya elder, ompan isipen na arum ya ministeryal a lingkor ya imposiblin onkualipika ra ta dakel so kaukolan dan pankimeyan. Balet, tandaan mo ya agbalot iilaloan nen Jehova tan na organisasyon to ya perpektom ya naabot iratan ya kualipikasyon. (1 Ped. 2:21) Wadtan so masanton espiritu nen Jehova ya ontulong ed sika. (Fil. 2:13) Kanian maabig no tepetan moy sarilim: ‘Dinan ed saratan so kaukolan ko nin pankimeyan?’ Ipikasim itan ed si Jehova. Makatulong met no man-research ka nipaakar ed satan, tan tepetan moy sakey ya elder no anto ni ray kaukolan mon paaligwasen.

18. No sakey kan ministeryal a lingkor, antoy pansagpotan mon gawaen?

¹⁸ Sikayo ran brother, kaiba la ray manlilingkor ya elder, komon ta itultuloy yon pankimeyan iray kualipikasyon ya inaral tayo ed sayan artikulo. (Fil. 3:16) No sakey kan ministeryal a lingkor natan, pansagpotan moy onaligwas! Paipasal kad si Jehova pian magmaliw kan mas mausar ed sikato tan ed kongregasyon. (Isa. 64:8) No gawaen mo iratan, seguradon bendisyonan nen Jehova so pansasagpot mon onkualipika ya manlingkor bilang elder.