1, 2. (a) Anton kimey so angipokusan nen Jesus ed bilay to, tan akin? (b) Antoy kaukolan tayon gawaen pian magmaliw tayon epektibon ‘kakimeyan na Dios’?

SI Jesu-Kristo et sakey ya karpentero tan managbangat. (Mar. 6:3; Roma 15:8) Sikatoy nagmaliw ya eksperto ed saratan ya kimey. Bilang karpentero, inaral to no panon ton usaren iray kagawaan to, pian makapanggawa na mausar iran gamit ya gawad tabla. Bilang managbangat na maong a balita, marundunong ton inusar so aralem ya kakabatan to ed Kasulatan pian tulongan so totoo ya natalosan iray katuaan ya walad Salita na Dios. (Mat. 7:28; Luc. 24:32, 45) Nen mantaon la na 30, impireg la nen Jesus iray gamit tod panagkarpentero lapud amta ton mas importante so kimey to bilang managbangat. Imbaga to ya say pangipulong na maong a balita na Panarian so sakey ya rason no akin ya sikatoy imbaki na Dios diad dalin. (Mat. 20:28; Luc. 3:23; 4:43) Si Jesus et nampokus la ed ministeryo to, tan labay ton mibiang so arum ed satan ya kimey.​—Mat. 9:35-38.

² Tua, nayarin aliwa tayon karpentero, balet managbangat tayo na maong a balita. Importantin maong itan a kimey ta kaiba tayo so Dios; tinawag itayon ‘kakimeyan na Dios.’ (1 Cor. 3:9; 2 Cor. 6:4) Bibidbiren tayon “say mismon kabaliksan na salita [nen Jehova] et katuaan.” (Sal. 119:159, 160) Kanian labay tayon seguroen ya ‘duga so panguusar tayo ed salita na katuaan’ diad ministeryo tayo. (Basaen so 2 Timoteo 2:15.) Pian nagawaan itan, kaukolan ya tuloytuloy tayon paaligwasen so dunong tayod panangusar ed Biblia, say  manunan uusaren tayo pian ibangat so katuaan nipaakar ed si Jehova, si Jesus, tan say Panarian. Pian magmaliw tayon epektibo ed ministeryo tayo, angitarya so organisasyon nen Jehova na arum nin uusaren ed panagbangat ya kaukolan tayon kabisadoen. Naromog iratan diad Uusaren ed Panagbangat tayo.

3. Antoy nepeg tayon pampokusan legan na nakekeran panaon na pampupulong tayo, tan panon ya makatulong so Gawa 13:48 pian nagawaan tayo itan?

³ Ompan iisipen mo no akin et tinawag iyan Uusaren ed Panagbangat imbes ya Uusaren ed Panagpulong. Say “pampulong” et mankabaliksan na pangipakabat na mensahe; balet say “pambangat” et pangipasabi na satan ya mensahe ed nonot tan puso na sakey ya too, pian iyaplika to iray nanaaralan to. Legan na nakekeran panaon ya pampupulong tayo, kaukolan ya manpokus tayo ed pangigapo na panangiyaral na Biblia tan pangibangat na katuaan ed totoo. Labay ton ibaga, maseet tayon anapen so amin ya totoon “walaan na dugan kipapasen na puso parad bilay ya andi-anggaan” tan tulongan iran magmaliw ya mananisia.​—Basaen so Gawa 13:44-48.

4. Panon tayon naamtaan no siopa ray “walaan na dugan kipapasen na puso parad bilay ya andi-anggaan,” tan panon tayo ran naromog?

⁴ Panon tayon naamtaan no siopa ray “walaan na dugan kipapasen na puso parad bilay ya andi-anggaan”? Singa nen inmunan siglo, naromog labat iratan ya totoo diad panamegley na pampulong. Kaukolan tayon unoren sirin so imbilin nen Jesus: “Inerman a syudad odino baryo so looban yo, anap yo no siopa ditan so makanepegan.” (Mat. 10:11) Siempre, agtayo iilaloan ya ondengel ed maong a balita iray totoon ag-interesado, mapaatagey, odino agmanisia ed Dios. Say anapen tayo et saramay totoon matua, mapaabeba, tan narasan ed katuaan. Nikompara tayo iya ed samay nayarin ginawa nen Jesus bilang karpentero ya nananap na dugarugan tabla pian manggaway yurongan o lamisaan, kapot, pako, o arum ni. No akalmo la na dugarugan tabla, alaen to la ray gamit to, usaren toy dunong to, tan gapoan to lay mankimey. Ontan met so nepeg tayon gawaen legan tayon panseseetan ya ibangat iray matua tan mapaabeban totoo pian magmaliw iran disipulo.​—Mat. 28:19, 20.

5. Antoy kaukolan tayon amtaen ed saramay walad Uusaren ed Panagbangat tayo? Iyilustra. (Nengnengen so litratod gapo na artikulo.)

⁵ Diad sakey ya toolbox, walay usar na kada kagawaan. Singa bilang, isipen pa iray inusar nen Jesus ya gamit tod panagkarpentero. * Kaukolan toy kagawaan parad pansukat tan panmarka ed tabla; parad pamputot, pan-abot, tan pankurti; tan kagawaan ya usaren to pian magmaliw ya pantay, maptek, tan malet so antokaman ya gawaen to. Mipadpara, wala met so usar na kada sakey ya walad Uusaren ed Panagbangat tayo. Kanian lukasan tayo sirin so toolbox tayo tan nengnengen no panon tayon usaren irayan importantin kagawaan ya inter ed sikatayo.

6, 7. (a) Panon mo lan nausar iray contact card? (b) Antoy duaran usar na iiter tayon imbitasyon ed saray aral na kongregasyon?

⁶ Saray Contact Card. Angkelag labat iraya balet epektibon usaren pian nakabat na totoo no siopa itayo tan pian naamtaan da so website tayo, ya ditan et dakel ni naamtaan da nipaakar ed sikatayo tan sarag da ni ingen so man-request na panagaral na Biblia. Natan et wala lay masulok ya 400,000 ya nan-request na panagaral na Biblia diad jw.org, tan nilasus ni so manre-request kada agew! Ompan sarag moy mangawit na pigaran contact card iner man so laen mo pian makapanpulong ka no walay pankanawnawam.

⁷ Saray Imbitasyon. Duaray usar na iiter tayon imbitasyon ed saray aral na kongregasyon. Oniay nabasad satan: “Imbitado ka a manaral  na Biblia kaiba iray Tasi nen Jehova.” Insan no labay to, walay pampilian to balanglan “diad saray aral mi” “odino personal a manpabangat.” Kanian panamegley na sayan kagawaan, ag-itayo labat nakabat na arum noagta naimbitaan tayo met iramay “manonot ed espiritual a pankaukolan da” ya manaral na Biblia kaiba tayo. (Mat. 5:3) Siempre, imbitado so amin ya onatendi ed saray aral tayo, awaten da man odino andi so panagaral na Biblia. No onatendi ira, nanengneng da ya talagan dakel so naaralan da nipaakar ed Biblia.

8. Akin et importante ya imbitaan tayon onatendi ed aral tayo iray totoo anggan maminsan labat? Mangiter na alimbawa.

⁸ Importantin itultuloy tayon imbitaan iray totoo ya onatendi ed saray aral tayo anggan maminsan labat. Akin? Nanengneng da so baleg ya pidumaan na saray aral tayo ya dakdakel so espiritual ya naakan ed say pakaskasin kipapasen ed espiritual na Makapanyarin Babilonia. (Isa. 65:13) Naimano itan nen Ray tan Linda ya sanasawan taga United States pigay taon lay apalabas. Nandesisyon ira ya kaukolan da lay onggapo ya onlad simbaan. Manisia ira ed Dios tan aanapen day katuaan, kanian sinali day onloob ed amin ya simbaan diad syudad da. Dakel ditan so simbaan tan nanduruman sekta. Balet antis dan gawaen itan, nandesisyon so sanasawa ya mimembro irad sakey ya relihyon diad duaran kondisyon. Unona, kaukolan ya walay naaralan da diad iyatendi da, tan komadua, kaukolan ya napatnagan ed itsura na saray membro na satan ya relihyon ya sikaray totoo ya mangirerepresenta ed Dios. Kalabas na pigaran taon, asali day inmatendi ed amin ya simbaan diad lugar da, balet ta adismaya labat ira. Anggapoy naaralan da, tan saray onaatendi ed saratan et aliwan desente so itsura ra. Kayari ran inmatendi ed sampot ya simbaan ya walad listaan da, linmoob lad trabaho si Linda tan sinmempet lay Ray. Diad dalan, walay naimano nen Ray ya Kingdom Hall tan inisip to, ‘Salien ko pay onloob tan nengnengen ko no antoy gagawaen da.’ Agton balot nalingwanan iman ya inyatendi to! Amin ya walad Kingdom Hall et malikeliket, makaaro, tan desente so kawes da. Yinmurong ed arap si Ray tan agusgustoan toy naaralan to! Singa sikato imay toon tutukoyen nen apostol Pablo ya kayari na unonan inyatendi tod Kristianon pantitipon et imbaga to: “Say Dios so peteg a walad limog yo.” (1 Cor. 14:23-25) Kayari to man, si Ray et onaatendi la kada Simba; insan to met la inatendian so kada aral ed midweek. Ginapoan met nen Linda so onatendi. Anggano masulok lan 70 so edad da, nampaiyaral ira na Biblia tan nampabautismo ira.

9, 10. (a) Akin ya mainomay ya usaren iray tract? (b) Ipaliwawa no panon ya usaren so tract ya Anto so Panarian na Dios?

⁹ Saray Tract. Walay waloran tract tayo ya mainomay ya usaren tan epektibo ed pangigapo na tongtongan. Manlapu la nen in-release irayan tract nen 2013, manga limaran bilyon lan kopya so niimprinta! Say marakep ed sarayan tract et no naaralan mon usaren so sakey, antam lan usaren iratan ya amin lapud parepareho so format da. Panon mon nausar so sakey a tract pian makapangigapo ka na tongtongan?

¹⁰ Singa bilang, sarag mon usaren so tract ya Anto so Panarian na Dios? Ipanengneng ed katongtong mo so tepet diad arap tan itepet mo: “Naisip mo ta la no anto so Panarian na Dios? Kasin saya et . . . ?” Insan mo pampilien ed taloran ebat. Imbes ya ibaga no kasin duga o aliwa so pinili to, ipanengneng so walad dalem ya “Say Ibabaga na Biblia,” tan ibasa iray wadtan ya teksto, say Daniel 2:44 tan Isaias 9:6. No posible, ituloy labat so tongtongan. Diad sampot, ipaimano so tepet ya walad beneg diad heading ya “Isipen Pa”: “Anto kasi kipapasen na bilay no manuley lay Panarian na Dios?” Atan so magmaliw ya basiyan na pitongtong mo diad ipawil mo. Sano nakatongtong mo  lamet, sarag mon ipanengneng so leksion 7 na brosyur ya Maong a Balita ya Nanlapud Dios!, ya sakey ed saray uusaren tayo pian nigapo so panagaral na Biblia.

11. Antoy gagala na saray magasin tayo, balet antoy nepeg tayon amtaen nipaakar ed saratan?

¹¹ Saray Magasin. Say Panag-bantayan tan Onliing! so sankarakelan ya nipa-publish tan nipapatalos ya magasin diad interon mundo! Lapud nibubunog iratan ed dakdakel a bansa, saray tema na saratan et denesinyo ya makapainteres ed totoo diad nanduruman lugar. Kaukolan ya usaren tayo iratan pian liingen so interes na sakey ed no anton talagay importante ed bilay natan. Balet pian nipalima tayo irayan magasin diad dugan totoo, kaukolan tayon amtaen no parad siopa so tema na kada magasin.

12. (a) Parad siopa so Onliing!, tan antoy gagala na satan? (b) Anto ray maabig ya resulta na impangusar mod sayan kagawaan diad agano ni?

¹² Say Onliing! et denesinyo parad saray manbabasa ya daiset labat o anggapoy amta ra ed Biblia. Nayarin agda amta iray bangat na Kristiano, ompan anggapoy tiwala da ed relihyon, odino nayarin agda amta ya makatulong ed bilay da so Biblia. Say manunan gagala na Onliing! et kombinsien iray manbabasa ya walay Dios. (Roma 1:20; Heb. 11:6) Tulongan to met iray manbabasa ya nawalaan na pananisia ya say Biblia et “salita na Dios, a saya so katuaan.” (1 Tes. 2:13) Say tema na taloran isyu ed taon 2018 et: “Say Dalan na Maliket ya Kabibilay,” “12 Sekreto na Maliket ya Pamilya,” tan “Tulong Parad Saray Inateyan.”

13. (a) Parad siopa so publikon edisyon na Say Panag-bantayan? (b) Anto ray maabig ya resulta na impangusar mod sayan kagawaan diad agano ni?

¹³ Say Panag-bantayan ya publikon edisyon et akapokus ed espiritual iran topic parad saramay walaan na respeto ed Dios tan ed Salita to. Anggaman wala lay amta ra ed Biblia, nayarin aliwan susto so pakatalos da ed ibabangat na satan. (Roma 10:2; 1 Tim. 2:3, 4) Say taloran isyu ed taon 2018 et mangeebat ed sarayan tepet: “Siansia ni Kasin Mausar so Biblia Natan?,” “Antoy Nagawa ed Arapen?,” tan “Kasin Walay Malasakit ed Sika na Dios?”

14. (a) Antoy gagala na apatiran video ya walad Uusaren ed Panagbangat tayo? (b) Anto ray maabig ya resulta na impangusar mod sarayan video?

¹⁴ Saray Video. Diad panaon nen Jesus, saray gamit na karpentero et manu-mano. Balet natan, saray karpentero et manguusar la na de-koryentin kagawaan, singa say lagari, barina, sursor, nailer, tan arum ni ra. Likud ed saray inimprintan publikasyon, wala la natan iray mararakep ya video ya sarag tayon ipabantay ed totoo. Say apatira ed saratan et walad toolbox tayo: Akin ya Aralen so Biblia?, Antoy Gagawaen Sano Manaaral na Biblia?, Antoy Gagawaen Diad Kingdom Hall?, tan Saray Tasi nen Jehova​—Siopa Kami? Saray video ya kulang ya duaran minuto so karukey to et epektibo diad unonan pitongtong. Saray mas andukey ya video et nayarin usaren diad panagpawil tan parad saramay dakel so panaon da. Sarayan balibalin uusaren et nayarin mamakiwas ed saray totoo ya manaral na Biblia tan onatendi ed saray aral tayo.

15. Iyilustra no antoy epekto ed totoo no nabantayan da so sakey ed saray video tayo diad mismon lenguahe ra.

¹⁵ Pian iyilustra, nen akabat na sister so sakey a biin nanlapud Micronesia ya say manunan lenguahe to et Yapese, impabantay na sister so video ya Akin ya Aralen so Biblia? diad lenguahe to. Nen babantayan to la so video, oniay imbaga to: “Lenguahek iya. Agak makapanisia! Nibagak diad paraan na panagsalita to ya sikatoy nanlapud isla mi. Amta toy lenguahek!” Kayari na satan, imbaga na bii ya basaen tan bantayan to so amin ya walad jw.org diad lenguahe to. (Ikompara so Gawa 2:8, 11.) Nia ni sakey ya eksperiensya. Sakey a  sister ya taga United States so angipawit na link na parehon video ed kaanakan ton walad arum a bansa diad lenguahe to. Binantayan to itan tan nan-email ed sikato, a kuan to: “Nainteresan ak ed samay parte na video ya kokontrolen na mauges so mundo. Nan-request ak na panagaral na Biblia.” Sikatoy manaayam ed bansa ya pepegetan so kimey tayo!

16. Ipaliwawa so espisipikon usar na kada brosyur: (a) Ondengel ed Dios Pian Manbilay ya Andi-angga. (b) Maong a Balita ya Nanlapud Dios! (c) Siopa ray Manggagawa na Linawa nen Jehova Natan?

¹⁶ Saray Brosyur. Panon mon ibangat so katuaan ed sakey ya nairapan ya manbasa odino anggapo ni literatura tayo diad lenguahe to? Walay dugarugan nausar tayo parad satan​—say brosyur ya Ondengel ed Dios Pian Manbilay ya Andi-angga. * Say balibalin usaren pian igapoy panangiyaral na Biblia et say brosyur ya Maong a Balita ya Nanlapud Dios! Sarag mon ipanengneng ed katongtong mo so 14 ya topic diad beneg ya apis na sayan brosyur tan pampilim no antoy labalabay to. Insan ditan yo igapo so panaral. Kasin asalim la itan ya paraan nen walay pinawil mo? Say komatlo ya walad Uusaren ed Panagbangat tayo et say brosyur ya Siopa ray Manggagawa na Linawa nen Jehova Natan? Denesinyo iya pian naamtaan na saray iyaaralan so nipaakar ed organisasyon tayo. Pian naaralan mo no panon iyan usaren kada mangiyaral ka na Biblia, nengnengen so Marso 2017 ya isyu na Ministeryo tan Bilay na Kristiano​​—Workbook ed Aral.

17. (a) Antoy espisipikon usar na kada libro ed panagaral na Biblia? (b) Antoy kakaukolanen ed amin ya onaaligwas parad bautismo, tan akin?

¹⁷ Saray Libro. No nigapo yo lay panagaral diad brosyur, sarag mon iyalis no matukoy diad libron Antoy Ibabangat na Biblia? Ontulong iyan libro pian mas onlaknab so kakabatan na iyaaralan nipaakar ed saray manunan bangat na Biblia. No nasumpal yo lan aralen itan ya libro tan no onaaligwas ed espiritual so iyaaralan mo, ituloy yoy panaral diad libron No Panon a Mansiansia ed Panangaro na Dios. * Makatulong iya ed iyaaralan no panon ton iyaplika iray prinsipyo na Biblia diad inagew-agew ya panagbilay to. Tandaan ya anggano abautismoan la so iyaaralan, kaukolan da nin ituloy so panagaral ya anggad nasumpal dan aralen iyan duaran libro. Ontulong iya pian nawalaan ira na malet a pundasyon ed katuaan.​—Basaen so Colosas 2:6, 7.

18. (a) Anto so ipapaseseg na 1 Timoteo 4:16 ya gawaen tayo bilang managbangat na katuaan, tan antoy resulta? (b) Antoy nepeg ya gagala tayo diad pangusar na saray walad Uusaren ed Panagbangat tayo?

¹⁸ Bilang Tasi nen Jehova, nimatalek ed sikatayo so “mensahe na katuaan nipaakar ed maong a balita” ya makatulong ed totoo pian nawalaan iray bilay ya andi-anggaan. (Col. 1:5; basaen so 1 Timoteo 4:16.) Pian nagawaan tayo itan, walay intarya parad sikatayo ya Uusaren ed Panagbangat ya wadtan lan amin so kaukolan tayo. (Nengnengen so “ Uusaren ed Panagbangat.”) Komon ta usaren tayon epektibo irayan kagawaan. Sarag ya pilien na kada manangipalapag no dinan ya literatura so usaren to ed sakey ya interesado tan no kapigan to itan usaren. Balet say gagala tayo et aliwan pian manbunog labat na literatura; tan agtayo mangitilak na literatura ed saramay ag-interesado ed mensahe tayo. Say gagala tayo et tulongan ya magmaliw a disipulo iray totoon matua, mapaabeba, tan narasan ed espiritual​—saramay “walaan na dugan kipapasen na puso parad bilay ya andi-anggaan.”​—Gawa 13:48; Mat. 28:19, 20.