Lapud sayan paknaan et niletneg so sakey a balon organisasyon a tinawag ya League of Nations. Say gagala na satan et “pian niwala so internasyonal ya pantutulongan tan niwala so internasyonal ya kareenan tan kaligenan.” Dakel ya relihyon na Kakristianoan so sinmuporta ed satan ya organisasyon. Imbaga ni ingen na Federal Council of the Churches of Christ in America ya satan so “politikal ya representanti na Panarian na Dios diad dalin.” Sinuportaan na sayan council so League of Nations diad impangibaki to na saray delegado ed Paris Peace Conference. Imbaga na sakey ed saraman ya delegado ya lapud satan a conference et “ginmapo so balon panaon diad history na mundo.”

Tua ya walay balon panaon ya ginmapo nen 1919, balet aliwan resulta na saman ya conference. Ginmapo itan ya panaon sanen pinabiskeg nen Jehova iray totoo to ya mamasya parad panagpulong a kimey ya mas ni nen say ginawa ra ed apalabas. Balet antis na saya, kaukolan ya nagawa so baleg ya pananguman ed situasyon na Saray Estudyante na Biblia.

Say tinaon ya eleksion na saray director na Watch Tower Bible and Tract Society et akaeskedyul ed Sabado, Enero 4, 1919. Diad saman, si Joseph F. Rutherford, a mangidadaulo ed saray totoo nen Jehova, et impriso ed Atlanta, Georgia, U.S.A., kaiba so pitora nin brother. Kanian say tepet, Kasin sarayan impriso ya brother et nepeg ya pansiansiaen ed posisyon da bilang officer, odino kaukolan la ran salatan?

Diad prisoan, mapagpaga si Brother Rutherford ed no anto lay nagawa ed organisasyon. Amta to ya iisipen na arum a brother ya mas maabig no manpili la ra na balon presidente. Kanian sikatoy nanggawa na sulat parad saramay nantitipon ed eleksion, ya inrekomenda to si Evander J. Coward a magmaliw ya presidente. Indeskribe nen Rutherford si Coward ya “kalmado,” “makabat,” tan “matoor ed Katawan.” Balet insuheri na dakel a brother ya no nayari et palabasen ni anemiran bulan insan gawaen so eleksion. Inmabobon iray abogado ya angidepensa ed saray  brother ya akapriso. Legan dan pantotongtongan no antoy gawaen da, asyodotan so arum ya brother.

Insan walay agawa ya unong ed si Richard H. Barber et nanresulta ed impakaresolbe na saman ya mairap a situasyon. Walay sakey a brother ya nansalita, ya inkuan to: “Aliwa ak ya eksperto ed ley, balet amtak no antoy kaukolan ed pagmaliw a matoor. Katooran so kekerewen na Dios. Tan say naisip kon sankaabigan ya paraan a nipanengneng tayoy katooran tayo ed Dios et say pangituloy tayo ed eleksion, tan pilien tayo lamet si Brother Rutherford bilang presidente.”​—Sal. 18:25.

Nanonotan ni nen A. H. Macmillan, sakey ed saramay apriso, imay agawa diad onsublay ya agew sanen tinmoktok si Brother Rutherford ed padir na prisoan ya kawalaan to tan imbaga nen Brother Rutherford, “Ipaway moy limam.” Insan walay inderew nen Brother Rutherford ya telegrama. Binasa nen Macmillan so antikey ya mensahe tan atalosan ton tampol so labay ya ibaga na satan. Oniay mensahe: “RUTHERFORD WISE VAN BARBER ANDERSON BULLY TAN SPILL DIRECTOR UNONAN TALORA OFFICER IPAWIT MI PANANGARO.” Labay ya ibaga na saya ya amin a director et nansiansia ed posisyon da, tan si Joseph Rutherford tan William Van Amburgh et nansiansia bilang officer. Kanian si Brother Rutherford nin siansia so presidente.

Legan ya walad prisoan so waloran brother, saray matoor ya Estudyante na Biblia et nampapirma ed saray totoo na sakey a petisyon parad kibulos na sarayan brother. Masulok ya 700,000 ya pirma so nala na sarayan makpel ya agagi. Nen Mierkoles, Marso 26, 1919, antis nin nipasa so petisyon, nibulos la si Brother Rutherford tan saray kaiba ton brother.

Oniay imbaga nen Brother Rutherford ed saramay nan-welcome ed sikato: “Kombinsido ak ya say gagala na amin ya naeksperiensya mi et pian niparaan kami parad mas mairap ya kipapasen. . . . Say impilaban yo et aliwa labat ya pian nibulos iray agagi yo ed prisoan. Aliwan satan so manunan gagala na sayan amin. . . . Say gagala na impilaban yo et pian tasian so Katuaan, tan saramay nanggawa ed satan et akaawat na alay abig ya bendisyon.”

Saray kipapasen nen agawa so panaglitis ed saray agagi tayo et pakapatnagan na panangigiya nen Jehova. Nen Mayo 14, 1919, oniay desisyon na korte na apela: “Saray akusado ed sayan kaso et . . . ag-ira naikdan na patas ya panaglitis ya kanepegan da komon, kanian nandesisyon iyan korte ya baliktaren so desisyon na unonan korte.” Seryoson krimen so inyakusa ed sarayan agagi. No pinerdona labat ira na gobierno odino binawasan labat so sentensia ra, wala nin siansia ed rekord da ya akagawa ira na krimen. Balet lapud abaliktad so desisyon tan anggapo lay arum a kaso ya insegep, inekal la iratan ed rekord da. Kanian apansiansia nen Judge Rutherford so  legal ya kualipikasyon to ya idepensa so totoo nen Jehova diad Supreme Court na United States, tan aminpiga ton ginawa itan kayari na inkibulos to.

“Agkami nayarin onyurong tan manalagar labat anggad pangala na Katawan ed sikami ya onlad tawen,” so kuan nen Brother Macmillan. “Atalosan mi ya kaukolan mi onkiwas pian naamtaan mi no anton talaga so linawa na Katawan.”

Balet agbastabasta nituloy na saray agagi ed headquarters so kimey ya pigaran taon da lan gagawaen. Akin? Lapud legan na impakapriso ra, saray kagawaan ed panag-imprinta na saray literatura et dineral na saray onsusumpa. Makapadismaya itan, tan inisip na arum ya agagi no kasin asumpal la so panagpulong a kimey.

Wala ni kasi interesado ed mensahe na Panarian ya impulong na Saray Estudyante na Biblia? Pian naebatan itan, nandesisyon si Brother Rutherford ya mangiter na publikon paliwawa. Imbitado so amin. “No anggapoy onla ed satan,” kuan nen Brother Macmillan, “labay ton ibaga, asumpal lay panagpulong a kimey.”

Kanian nen Simba, Mayo 4, 1919, anggano mansasakit si Brother Rutherford, impaliwawa to so teman “Say Ilalo Parad Nagogonigon a Katooan” diad Los Angeles, California. Manga 3,500 so inmatendi, tan nilasus ni so agla pinaloob ta agla ra onduga. Diad tinmumbok ya agew, 1,500 lamet so inmatendi. Amta la na saray brother so ebat—wala ni iray interesadon totoo!

Say sinmublay ya ginawa na saray agagi et akaapekto ed panagpulong a kimey na Saray Tasi nen Jehova anggad sayan panaon.

Diad The Watch Tower ya Agosto 1, 1919, inyanunsio ya diad bandad gapo na Setyembre et walay nagawan kombension diad Cedar Point, Ohio. “Labay min amin so onla,” so kuan nen Clarence  B. Beaty, sakey a kabataan ya Estudyante na Biblia ya tagad Missouri. Masulok ya 6,000 ya agagi so inmatendi, mas dakel nen say iilaloan ya onla. Tan mas nagmaliw ya makapaliket iyan okasyon lapud walay masulok ya 200 ya nampabautismo diad asingger ya Lake Erie.

Nen Setyembre 5, 1919, diad komaliman agew na kombension, impaliwawa nen Brother Rutherford so teman “Parad Saray Kaiban Komikimey,” tan inyanunsio to so pangi-publish ed balon magasin ya The Golden Age. * Nabasa ditan “iray agano ni ya importantin balita, tan no antoy ibabaga na Kasulatan ya rason no akin ya nagagawa iratan.”

Amin ya Estudyante na Biblia et pinaseseg ya makpel a manpulong ya usaren da iyan balon publikasyon. Oniay nabasa ed kabiangan na sulat ya mangidedeskribe no panon ya gawaen so kimey: “Nepeg ya nonoten na amin a bautismado ya baleg a pribilehyo so manlingkor, tan komon et anamoten da so pankanawnawa natan ya mibiang ed pangiter na baleg a pantasi ed mundo.” Dakel so kinmiwas! Kasabi Disyembre, masulok ya 50,000 a subscription na sayan balon magasin so niyopresi na saray maseseg ya manangipalapag na Panarian.

Nen bandad sampot na 1919, naorganisa tan binmiskeg lamet iray totoo nen Jehova. Ontan met, asumpal so pigaran importante ya propesiya nipaakar ed kaunoran iran agew. Asumpal so subok tan panagpino ed saray totoo na Dios a singa nipasakbay diad Malaquias 3:1-4. Nibulos iray totoo nen Jehova manlapud impakaaripen da ed “Makapanyarin Babilonia,” tan tinuro nen Jesus so “matoor tan makabat ya aripen.” * (Apo. 18:2, 4; Mat. 24:45) Akaparaan la natan iray Estudyante na Biblia parad kimey ya ipapagawa nen Jehova ed sikara.