1. Anto ray sarag ya gawaen nen Jehova pian nasumpal so gagala to?

SARAG nen Jehova so magmaliw ya antokaman a nakaukolan pian nasumpal so gagala to. Singa bilang, si Jehova et nagmaliw ya Managbangat, Managligliwa, tan Ebanghelisador. Pigara labat iraya ed dakel ya nagmaliwan to. (Isa. 48:17; 2 Cor. 7:6; Gal. 3:8) Anggaman ontan, uusaren to met iray totoo pian nasumpal iray gagala to. (Mat. 24:14; 28:19, 20; 2 Cor. 1:3, 4) Sarag itayon ikdan nen Jehova na karunongan tan biskeg pian magmaliw tayo ya antokaman a nakaukolan parad pakasumpal na gagala to. Kabiangan irayan amin ed kabaliksan na ngaran nen Jehova, base ed pakatalos na dakel ya iskolar.

2. (a) Akin ya no maminsan et panduaruwaan tayo no kasin uusaren itayo nen Jehova? (b) Anto ray aralen tayo ed sayan artikulo?

² Amin tayo et labay tayoy pausar ed si Jehova, balet nayarin panduaruwaan na arum no kasin uusaren ira nen Jehova. Akin? Nayarin say pakalikna ra et limitado so nagagawaan da lapud edad, situasyon, odino abilidad da. Wala ray arum balet ya say pakalikna ra et magenap la so gagawaen da tan agda la kaukolan so onaligwas. Diad sayan artikulo, aralen tayo no panon ya sarag ya iter nen Jehova no antoy nakaukolan tayo parad pakasumpal na gagala to. Insan tayo pantongtongan iray salaysay na Biblia no panon ya inikdan nen Jehova na panlabay tan pakayari ya onkiwas iray lingkor ton lalaki tan bibii. Aralen tayo met no antoy gawaen tayo pian usaren itayo nen Jehova.

3. Base ed Filipos 2:13, panon ya nayarin iter ed sikatayo nen Jehova so panlabay ya onkiwas?

³ Basaen so Filipos 2:13. * Sarag ya iter ed sikatayo nen Jehova so panlabay ya onkiwas. Panon ton gawaen itan? Singa bilang, naamtaan mo ya walay kaukolan ya gawaen ed kongregasyon. Odino walay imbasa na saray elder ya sulat manlapud sangan opisina ya mangibabagan walay pankaukolan diad arum a lugar. Nayarin isipen mo, ‘Panon ak kasin makatulong?’ Odino nayarin walay mairap ya kimey ya niyasain ed sika, balet panduaruwaan mo no kasin sarag mo itan. Odino nayarin walay abasam ed Salita na Dios ya lapud satan et naisip mo, ‘Panon ko kasin niyaplika iyan teksto pian natulongan koy arum?’ Ag-itayo puepuersaen nen Jehova ya manggawa na antokaman. Balet no nanengneng to ya iisipen tayo no antoy nagawaan tayo, sarag ton iter ed sikatayo so panlabay a gawaen imay inisip tayo.

4. Panon ya nayarin iter ed sikatayo nen Jehova so pakayari ya onkiwas?

⁴ Sarag met ya iter ed sikatayo nen Jehova so pakayari ya onkiwas. (Isa. 40:29) Sarag ton iter so masanton espiritu to pian onaligwas ni iray nisipor ya abilidad tayo. (Exo. 35:30-35) Nayarin usaren nen Jehova so organisasyon to pian ibangat itayo no panon ya gawaen so sakey a kimey. No agka segurado no panon mon gawaen so sakey ya asainmin, manpatulong ka. Ontan met, ipikasim ed maaron Ama tayo ed tawen ya ikdan to ka na ‘pakayari a mas mabiskeg nen say pakayari na too.’ (2 Cor. 4:7; Luc. 11:13) Dakel so nabasad Biblia ya salaysay no panon ya inikdan nen Jehova iray lalaki tan bibii na panlabay tan pakayari ya onkiwas. Legan tayon pantotongtongan iratan a salaysay, manisip ka na saray paraan no panon ka met ya nayarin usaren nen Jehova ya singa impangusar tod sikara.

5. Antoy naaralan tayo ed no kapigan inusar nen Jehova si Moises pian iliktar iray totoo To?

⁵ Pinagmaliw nen Jehova si Moises ya manangiliktar na saray Israelita. Balet kapigan inusar nen Jehova si Moises? Kasin sanen say pakalikna nen Moises et sarag to lan iliktar iray Israelita lapud sikatoy ‘nibangat ed amin a karunongan na saray Ehipsio’? (Gawa 7:22-25) Andi. Inusar nen Jehova si Moises sanen nibangat To la ya magmaliw a mapaabeba tan maulimek ya too. (Gawa 7:30, 34-36) Inikdan nen Jehova si Moises na pakpel ya mitongtong ed sankamakapanyarian ya manuley ed Ehipto. (Exo. 9:13-19) Antoy naaralan tayo ed no kapigan inusar nen Jehova si Moises? Usaren itayo labat nen Jehova no ipanengneng tayo iray kualidad ya makapaliket ed sikato tan manmatalek tayo ed biskeg ya iter to.​—Fil. 4:13.

6. Antoy naaralan tayo ed paraan na impangusar nen Jehova ed si Barzilai pian tulongan si Arin David?

⁶ Kalabas na nilasus a taon, inusar nen Jehova si Barzilai pian tulongan si Arin David. Si David tan saray kakaiba to et “naksawan . . . tan narasan tan napgaan” legan iran ontatakas ed anak ton si Absalom. Masiken lad saman si Barzilai, balet inrisga toy bilay to pian niiter iray pankaukolan nen David tan saray kakaiba to. Ag-inisip nen Barzilai ya sikatoy agla usaren nen Jehova ta masiken la. Imbes, mabulos ya inusar nen Barzilai iray kaykayarian to pian natulongan iray mankaukolan ya lingkor na Dios. (2 Sam. 17:27-29) Antoy naaralan tayo? Antokaman so edad tayo, sarag itayon usaren nen Jehova pian natulongan iray agagin mankaukolan, balanglan diad lugar tayo odino diad arum ya pasen. (Pro. 3:27, 28; 19:17) Anggano agtayo personal ya makaonla pian natulongan  ira, sarag tayoy mandonasyon parad sankamundoan ya kimey pian walay pundo ya nausar ed pangiter na saray relief ed saray mankaukolan ya agagi inerman so kawalaan da.​—2 Cor. 8:14, 15; 9:11.

7. Panon ya inusar nen Jehova si Simeon, tan akin ya makapaseseg itan ed sikatayo?

⁷ Insipan nen Jehova ed sakey a matoor ya maedad a laki diad Jerusalem ya manngaran na Simeon ya sikatoy agni ompatey anggad agto nanengneng so Mesias. Seguradon apaseseg ya maong si Simeon ed satan ya sipan, ta abayag to lan aalagaren so isabi na Mesias. Tinumangan nen Jehova so pananisia tan panagsungdo to. Sakey ya agew, “diad pakayari na espiritu” et sikatoy linmoob ed templo. Ditan et anengneng nen Simeon so ugaw nin Jesus, tan sikatoy inusar nen Jehova pian ibalikas so sakey a propesiya nipaakar ed sayan ugaw ya magmaliw a Kristo. (Luc. 2:25-35) Nayarin agla naimatonan nen Simeon so ministeryo nen Jesus, balet sikatoy misalsalamat ed samay pribilehyo ya inter nen Jehova ed sikato! Tan dakel ni ran maabig a bengatla so manatalaran ed sikato diad arapen. Diad balon mundo, nanengneng na sayan matoor a laki no panon ya nabendisyonan so amin a pamilya ed dalin lapud pananguley nen Jesus. (Gen. 22:18) Singa si Simeon, misalsalamat tayo met ed anggan anton pribilehyo ya iter nen Jehova ed sikatayo diad panlilingkor tayod sikato.

8. Panon itayon nayarin usaren nen Jehova a singa impangusar tod si Bernabe?

⁸ Nen inmunan siglo C.E., sakey a mabunlok a laki ya manngaran na Jose so mabulos a nampausar ed si Jehova. (Gawa 4:36, 37) Si Jose et tinawag na saray apostol ya Bernabe, a mankabaliksan na “Anak na Ligliwa,” nayarin lapud sikatoy talagan maong ya manligliwa ed arum. Singa bilang, nen nagmaliw ya mananisia si Saulo, dakel ya agagi so natatakot ed sikato lapud amta ra ya pinasegsegang toy kongregasyon. Balet sikatoy tinulongan nen Bernabe, tan seguradon naapresya itan a maong nen Saulo. (Gawa 9:21, 26-28) Ag-abayag, nampapaknaan na saray mamatatken ed Jerusalem ya kaukolan a pasesegen iray agagi ya manaayam ed Antioquia na Sirya. Siopay imbaki ra? Si Bernabe! Ag-ira alingo ed impanpili ra. Unong ed salaysay, “pinaseseg to ran amin a manmatoor ed Katawan a walaay impapuson determinasyon.” (Gawa 11:22-24) Ontan met natan, sarag itayon pagmaliwen nen Jehova ya “anak na ligliwa.” Singa bilang, ompan usaren to itayo pian ligliwaen iray inateyan na inad-aro. Odino nayarin pakiwasen to itayo ya pasyaren o tawagan so sakey ya mansasakit o nadi-depress pian pasesegen. Kasin mabulos kan pausar ed si Jehova a singa si Bernabe?—1 Tes. 5:14.

9. Antoy naaralan tayo ed no panon ya tinulongan nen Jehova so sakey a brother pian magmaliw a maong ya espiritual a managpastol?

⁹ Tinulongan nen Jehova so sakey a brother a manngaran na Vasily pian sikatoy magmaliw a maong ya espiritual a managpastol. Sanen aturo ya elder si Vasily, 26 ni labat so edad to tan natatakot ya ompan agni kualipikado ya ontulong ed saray agagi, lalo lad saramay mairap so situasyon da. Balet sikatoy impasal na saray eksperiensyadon elder tan dakel so naaralan to ed Kingdom Ministry School. Nansagpot si Vasily pian onaligwas. Singa bilang, inlista to ray angkekelag ya bengatla ya labay ton gawaen. Kada no walay nagawaan to ed saratan, kalkalnan naeekal so takot to. Oniay imbaga to natan: “Saramay pakakatakotan kon gawaen nensaman et panliliketan ko lan gawaen natan. Kada no tulongan ak nen Jehova ya makalmo na dugarugan teksto pian ligliwaen so sakey ya agi ed kongregasyon, naliliketan ak.” Sikayo ran agagin lalaki, no aligen yoy Vasily tan mabulos kayon pausar ed si Jehova, makaseguro kayon ikdan to kayo na abilidad pian  nasarag yon asikasoen iray kaaruman ya responsabilidad ed kongregasyon.

10. Antoy ginawa nen Abigail, tan antoy naaralan mo ed alimbawa to?

¹⁰ Si David tan saray kakaiba to et uusilan nen Arin Saul, tan kaukolan day tulong. Kanian imbaki nen David iray kakaiba ton lalaki ed mayaman ya Israelita a manngaran na Nabal pian onkerew na daiset a naakan, antokaman so mabulos ton iter. Inisip da ya sarag day onkerew lapud proprotektaan da iray karnero nen Nabal diad kalawakan. Balet masiblet si Nabal kanian agto ra inikdan na anggan anto. Ampetang so ulo nen David tan labay ton pateyen si Nabal tan amin ya lalaki ed sankaabungan to. (1 Sam. 25:3-13, 22) Balet makatebek so magangganan asawa nen Nabal ya si Abigail. Sikatoy makpel ya inmarap ed si David, dinmakmomo ed salian to, tan akikasi ya agkomon ituloy nen David so ibales tod si Nabal pian agmankasalanan ed dala. Diad marespeto tan maabig ya paraan et imbaga tod si David ya ipalima to la itan ed si Jehova. Atenyeg so puso nen David ed saray imbaga nen Abigail tan ed mapaabeba tan makabat ya inkiwas na sayan bii. Amoria to ya si Jehova so angibaki ed si Abigail. (1 Sam. 25:23-28, 32-34) Inusar nen Jehova si Abigail lapud walad sikato iray kualidad ya makapaliket ed Dios. Ontan met natan, usaren nen Jehova iray sister ya makatebek tan maabig so panagsalita ra pian pabiskegen iray kapamilya da tan arum ni ed kongregasyon.​—Pro. 24:3; Tito 2:3-5.

11. Antoy ginawa na saray ananak a bibii nen Salum, tan siopa ray mangaalig ed sikara natan?

¹¹ Kalabas na nilasus ya taon, saray ananak a bibii nen Salum et kaiba ed saray inusar nen Jehova pian ontulong ed pangapiger na saray padir na Jerusalem. (Neh. 2:20; 3:12) Anggano say ama ra et sakey a prinsipe, mabulos dan ginawa iyan mairap tan mapeligron kimey. (Neh. 4:15-18) Talagan midumaan ira ed saray prominentin lalaki ya Tekoita, ya agtinmulong ed kimey lapud “agda labay ya iyabebay inkasikara”! (Neh. 3:5) Isipen pa so liket na saray ananak a bibii nen Salum sanen asumpal so kimey ed 52 labat ya agew! (Neh. 6:15) Diad panaon tayo, wala ray sister ya mabulos tan malikeliket ya ontutulong ed espisyal ya klase na sagradon panaglingkor​—say panagpaalagey tan panagmintina na saray bilding ya nidedika ed si Jehova. Kakkaukolan ed sayan kimey so abilidad, inkaligsa, tan katooran na sarayan sister.

12. Panon itayon nayarin usaren nen Jehova a singa impangusar tod si Tabita?

¹² Pinakiwas nen Jehova si Tabita ya ‘manggawa na dakdakel a kaabigan tan mangiter na regalo lapud panangasi,’ lalo lad saray bibiin balo. (Gawa 9:36) Lapud agaylay inkamaiter tan kaabigan to, dakel so nanermen nen sikatoy inatey. Balet malikeliket ira nen pinaoli nen apostol Pedro si Tabita. (Gawa 9:39-41) Antoy naaralan tayo ed si Tabita? Balanglan sakey kan ugaw odino maedad, laki o bii, sarag moy manggawa na saray praktikal a bengatla pian natulongan iray agagi tayo.​—Heb. 13:16.

13. Panon ya inusar nen Jehova so sakey a mabaing ya sister a manngaran na Ruth, tan antoy imbaga to kalabas na ngalngali 80 taon ya pibibiang tod ministeryo?

¹³ Walay mabaing ya sister a manngaran na Ruth ya labay toy magmaliw ya misionero. Nen ugaw ni, maligligsan onla ed kaabungan pian mangibunog na tract. “Labalabay ko itan ya gawaen,” so kuan to. Balet lapud mabaing si Ruth, mairap parad sikato so onarap ed unabung tan itongtong so nipaakar ed Panarian na Dios. Anggaman ontan, sikatoy nampayunir nen 18 so edad to. Nen 1946, sikatoy nanaral ed Watchtower Bible School of Gilead tan niyasain ya manlingkor ed Hawaii tan Japan. Sikatoy inusar nen Jehova pian nipulong so maong a  balita ed saratan ya lugar. Kalabas na ngalngali 80 taon ya pibibiang nen Ruth ed ministeryo, oniay imbaga to: “Si Jehova so lanang ya mamapabiskeg ed siak. Tinulongan to ak pian nalabanan koy inkamabaing ko. Kombinsido ak ya sarag nen Jehova ya usaren so anggan siopa ya manmamatalek ed sikato.”

14. Base ed Colosas 1:29, antoy nepeg tayon gawaen pian usaren itayo nen Jehova?

¹⁴ Manlapu la nensaman, pagmamaliwen nen Jehova iray lingkor to ed antokaman a nakaukolan pian nausar to ra ed nanduruman paraan. Antoy labay nen Jehova ya pagmaliwan mo? Depende itan ed no kasin mabulos ka ya mansagpot. (Basaen so Colosas 1:29.) No lanang kan akaparaan ya pausar ed si Jehova, sarag to kan pagmaliwen ya maseseg ya ebanghelisador, marunong ya managbangat, maong ya managligliwa, maabilidad ya komikimey, matulong ya kaaro, odino antokaman a nakaukolan pian nasumpal so gagala to.

15. Base ed 1 Timoteo 4:12, 15, antoy nepeg ya ipikasi na saray kabataan ya brother ed si Jehova?

¹⁵ Kumusta kayo ran kabataan ya brother ya magano lan magmaliw ya adulto? Kakkaukolan iray lalaki ya wala nid kaksilan ya mitulongan ed saray responsabilidad ed kongregasyon bilang ministeryal a lingkor. Diad dakel a kongregasyon, mas dakel so elder nen saray ministeryal a lingkor. Sikayo ran kabataan ya brother, kasin labay yoy ontulong ed kongregasyon? No maminsan, oniay ibabaga na arum ya brother: “Kontento ak la ed panlilingkor ko bilang regular publisher.” No ontan so naliliknam, ipikasim ed si Jehova ya tulongan to ka ya nawalaan na panlabay ya onkualipika bilang ministeryal a lingkor tan ikdan to ka na pakayari ya gawaen so anggaay nayarian mo ed panaglingkor mod sikato. (Ecl. 12:1) Kaukolan mi tulong yo!—Basaen so 1 Timoteo 4:12, 15.

16. Antoy nepeg tayon kerewen ed si Jehova, tan akin?

¹⁶ Sarag kan pagmaliwen nen Jehova ed antokaman a nakaukolan parad pakasumpal na gagala to. Kanian ipikasim ed sikato ya ikdan to ka na panlabay ya gawaen so kimey to, insan kerew mod sikato ya ikdan to ka na pakayari ya nakaukolan mo. Balanglan sakey kan ugaw odino matatken, usar moy panaon, biskeg, abilidad, tan kaykayarian mo pian pagalangan si Jehova. (Ecl. 9:10) Agmon balot papalampasen so pankanawnawa ya palaknaben so panaglingkor mod si Jehova lapu labat ed takot mo odino liknaan mo ya aliwa kan kualipikado. Balbaleg so pribilehyo tayon amin ya gawaen so anggaay nayarian tayo pian niiter ed maaron Ama tayo so galang ya kanepegan to!