NINMENGNENG so weather forecaster ed radar tan anengneng to ya walay maksil ya bagyo ya onsasabi ed lugar ya dakel so manaayam. Lapud sankanonot toy bilay na saray totoo, ginawa toy anggaay nayarian to ya pasakbayan ira anggad wala ni panaon.

Mipadpara, papasakbayan met nen Jehova iray manaayam diad dalin ed onsasabin “bagyo” ya mas maksil nen say antokaman ya nayarin ibalita na saray weather forecaster. Panon ton gagawaen itan? Tan akin ya makaseguro tayo ya magenap a panaon so iiter tod totoo pian onkiwas ira? Pian naamtaan tayoy ebat, konsideraen tayon unona iray pigaran pasakbay ya inter nen Jehova nensaman.

Diad panaon na Biblia, impasakbay nen Jehova so nanduruman singa bagyo a panangukom to ya indapo to ed saramay ginagala day ag-ontulok ed saray ganggan to. (Pro. 10:25; Jer. 30:23) Mabayag ni antis ton idapo so panangukom, papasakbayan to la iray totoo tan ibabaga tod sikara no anto ray pananguman ya nepeg dan gawaen. (2 Ara. 17:12-15; Neh. 9:29, 30) Pian napakiwas iray totoo ya manguman, mabetbet ya uusaren to iray matoor ya lingkor to pian ipakabat so panangukom to tan tulongan iray totoo ya natalosan ya kaukolan day onkiwas a tampol.​—Amos 3:7.

Si Noe so sakey ed saratan ya matoor a lingkor. Diad dakel a taon, makpel ton pinasakbayan iray imoral tan maruksan totoo ya walay onsabin sankamundoan a Delap. (Gen. 6:9-13, 17) Imbaga to met ed sikara no antoy kaukolan dan gawaen pian nisalba ira. Lapud satan et sikatoy tinawag ya “managpulong na inkatunong.”​—2 Ped. 2:5.

Anggano ginawa nen Noe so anggaay nayarian to, agdinengel na saray totoo so mensahe ya inter na Dios. Anggapon balot so pananisia ra. Kanian inatey ira nen “sinmabi so Delap tan niyanor iran amin.” (Mat. 24:39; Heb. 11:7) Agda nibaraan ya ag-ira pinasakbayan na Dios.

Wala ray panaon ya angiter na pasakbay si Jehova sanen magano lan onggapo so panangukom to. Balet sineguro to ya naikdan na magenap a panaon ya onkiwas iramay naapektoan no onsabi itan. Singa bilang, sikatoy angiter na saray pasakbay nen indapo to so Samploran Salot diad Ehipto nensaman. Diad samay komapiton salot ya uran a kristal, imbaki nen Jehova si Moises tan Aaron pian pasakbayan so Faraon tan saray lingkor to. Lapud nagawa itan diad onsublay ya agew, nibaga kasi ya magenap a panaon so inter na Dios pian makaromog ira na siroman? Ibabaga na Biblia: “Saramay lingkor na Faraon a tinmakot ed salita nen Jehova et inloob dan tampol iray lingkor da tan ayayep da diad saray kaabungan, balet saramay ag-angipapuso ed salita nen Jehova et pinaulyanan dad uma iray lingkor da tan ayayep da.” (Exo. 9:18-21) Malinew ya magenap a panaon so inter nen Jehova, kanian saramay kinmiwas a tampol et agtanton naapektoan na salot kompara ed arum.

Apasakbayan met so Faraon tan saray lingkor to antis na komasamplon salot. Balet agda dinengel so pasakbay. (Exo. 4:22, 23) Kanian inatey iray panguloan ya anak da. Talagan makapaermen! (Exo. 11:4-10; 12:29) Kasin magenap a panaon so inter nen Jehova ed sikara? On! Tampol ya pinasakbayan nen Moises iray Israelita ed satan ya onsabin salot tan imbaga tod sikara no antoy gawaen da pian nisalba so pamilya ra. (Exo. 12:21-28) Pigara so kinmiwas ed satan a pasakbay? Base ed kalkulasyon na arum, taloran milyon odino onsulok ni ya totoo so niliktar tan pinmaway ed Ehipto. Tugyopen na satan  iray Israelita kaiba so “baleg ya ulop na nanlalaok a totoo,” ya ontutukoy ed saray aliwan Israelita tan arum ya Ehipsio.​—Exo. 12:38; paimanod leksab.

Singa nanengneng tayod sarayan alimbawa, naynay a seseguroen nen Jehova ya naikdan iray totoo na magenap a panaon pian onkiwas ira ed saray pasakbay to. (Deu. 32:4) Akin ya gagawaen itan na Dios? Imbaga nen apostol Pedro ya si Jehova et “agto labay a walay siopaman a naderal noagta labay to ya amin et naikday pankanawnawan magbabawi.” (2 Ped. 3:9) On, iyaansakit na Dios iray totoo. Labay to ya magbabawi tan manguman ira antis ya onsabi so panangukom to.​—Isa. 48:17, 18; Roma 2:4.

Diad panaon tayo, amin ya totoo et nepeg ya onkiwas ed sakey ya importantin pasakbay ya ipapakabat ed interon mundo. Nen wadiad dalin si Jesus, impasakbay to ya naderal iyan sistema na mundo diad “baleg a kairapan.” (Mat. 24:21) Sikatoy angiter na detalyadon propesiya nipaakar ed no anto ray nanengneng tan naeksperiensya na saray papatumbok to legan ya manasingger itan a panaon. Indeskribe nen Jesus iray importantin ebento ya nanenengneng tayon nagagawa la natan ed interon mundo.​—Mat. 24:3-12; Luc. 21:10-13.

Lapud satan, ipapaamta nen Jehova ed amin a totoo ya kaukolan da lay manpasakop ed maaron pananguley To. Labay to ya amin a matulok a totoo et panliketan day bilay natan tan saray bendisyon ed matunong a balon mundo diad arapen. (2 Ped. 3:13) Pian napakiwas iray totoo ya nawalaan na pananisia ed saray sipan to, sikatoy angiter na mensahe ya makapangiliktar ed sikara. Satan a mensahe et say “maong a balita na Panarian” tan impropesiya nen Jesus ya satan et “nipulong ed interon dalin bilang pantasi ed amin a nasyon.” (Mat. 24:14) Inorganisa na Dios iray tuan mandadayew ed sikato pian ‘mantasi’ odino ipulong itan a mensahe diad manga 240 a bansa. Labay nen Jehova ya dakel a totoo anggad posible so onkiwas ed satan a pasakbay pian makaliktar ira ed onsasabin singa bagyo ya matunong a panangukom to.​—Sof. 1:14, 15; 2:2, 3.

Kanian say importantin tepet et aliwan no kasin magenap a panaon so iiter nen Jehova pian onkiwas iray totoo ed saray pasakbay to. Ipapanengneng na saray ebidensya ya naynay ya ontan so gagawaen to. Say importantin tepet sirin et: Kasin onkiwas iray totoo ed pasakbay na Dios legan ya wala ni panaon? Komon ta sikatayo ran mensahero na Dios et tuloytuloy tayon tulongan so dakel nin totoo anggad posible pian makaliktar ira ed anggaan na sayan sistema na mundo.