Talagan pinabiskeg nen Jehova iraman ya makukulin lingkor to. Diad saman ya taon, dinmakel iray colporteur odino payunir. Amay datin 225 et nagmaliw ya 350. Tan first time ya masulok ya 8,000 ya publisher so nanreport ed headquarters. Benendisyonan nen Jehova so sagpot da.

Nen Marso 21, 1920, impaliwawa nen Joseph F. Rutherford, say mangidadaulo ed Saray Estudyante na Biblia, so teman “Minilyon a Mabilay Natan et Aglan Balot Ompatey.” Amasya iray Estudyante na Biblia ed impangimbita da ed saray interesado. Nirentaan day sakey ed saray sankabalegan ya teatro ed New York City tan manga 320,000 so imbunog dan imbitasyon.

Agaylay karakel na inmatendi. Lapud 5,000 labat so nakarga na teatro, agla pinaloob so 7,000 ya totoo. Imbaga na magasin ya The Watch Tower ya “atan so sakey ed saray sankabalegan tan sankarakepan ya pantitipon na saray International Bible Students.”

Akabkabat iray Estudyante na Biblia ed pangipupulong da ya “minilyon a mabilay natan et aglan balot ompatey.” Diad saman et agda ni natatalosan ya dakel ni kaukolan dan pulongan. Balet, talagan agaylay seseg da. Oniay nanonotan nen Ida Olmstead ya ginmapon akiaral nen 1902: “Amta mi ya amayamay so bendisyon ya manatalaran ed amin ya totoo, kanian ginawa mi anggaay nayarian min ipaamta so maong a balita ed saray nakakatongtong mi ed ministeryo.”

Pian seguradon tuloytuloy so suplay na espiritual ya naakan, inggapo na saray brother ed Bethel so man-imprinta na arum ya publikasyon. Angaliw ira na makina tan impuesto da ed rerentaan dan bilding diad 35 Myrtle Avenue, Brooklyn, New York, ya pigaran kanto labat so kaarawi to ed Bethel.

Nan-report ed Bethel si Leo Pelle tan Walter Kessler nen Enero 1920. “Kasabi mi,” kuan nen Walter, “ninengneng kami na overseer na printery tan say kuan to, ‘Wala ni sakey tan kapalduan oras antis na panangugto.’ Impan-alsa to kami na karton ya nankargay libro manlapud basement.”

Oniay nanonotan nen Leo ya ginawa ra diad sinmublay ya agew: “Nilinisan mi dingding na first floor na bilding. Atan so sankarutakan ya trabahon  asalik. Balet maliket kami ta para itan ed Katawan.”

Kayari labat na pigaran simba, inggapo la na saray maseseg ya boluntaryo so nan-imprinta na The Watch Tower diad second floor. Inimprinta ditan so 60,000 ya kopya na Pebrero 1, 1920 ya isyu na The Watch Tower. Dia balet ed basement et impuesto na saray brother so panag-imprintaan ya tinawag dan Battleship. Ditan inimprinta so The Golden Age manlapud Abril 14, 1920 ya isyu. Mapatpatnag ya benendisyonan nen Jehova iraman ya makukulin agagi.

Malikeliket iray matoor ya totoo nen Jehova ta nagagawaan da lamet so kimey da tan makapandayew la ran saniba. Balet wala ray Estudyante na Biblia ya tinaynan da so organisasyon nen mairap so kipapasen manlapud 1917 anggad 1919. Antoy akatulong ed sikaran makapawil?

Diad The Watch Tower ya Abril 1, 1920 et walay artikulon “Mankakasakey Tayo.” Nabasa ditan iyan maaron panamaseseg: “Segurado kami ya amin a malabay ya mangunor ed si Jehova et lingwanan da la ray lingo da tan mikasakey ira ed saray totoo na Dios pian nasumpal so kimey To.”

Dakel so apakiwas ed satan. Walay sanasawa ya oniay insulat da: “Atalosan mi ya alingo kami ed apalabas iran taon ta tinmunda kamin nampulong anta say arum et agtinmunda. . . . Komon ta agmi la naulit itan ya lingo mi.” Nagmaliw ya aktibo lamet irayan agagi tan dakdakel ni so kimey ya manatalaran ed sikara.

Nen Hunyo 21, 1920, inggapo na Saray Estudyante na Biblia so baleg a kampanya na pangibunog ed “ZG,” edisyon na The Finished Mystery * ya makulaney so apis to. Dakel so nisinop ed satan ya libro nen insebel itan nen 1918.

Aliwan saray colportuer labat so naimbitaan ya mangibunog, noagta amin ya publisher. “Amin  ya bautismado ed kada kongregasyon et nepeg ya mibiang no iyabuloy na kipapasen da. Komon ta onia so nonoten na kada sakey: ‘Aya so gawaen ko’​—ibunog so ZG.” Nanonotan nen Edmund Hooper ya sayan kampanya so sankaunaan ya impibiang da ed panagpulong ed kaabungan. Imbaga to: “Diman mi atalosan ya talagan onlaknab ni iyan kimey, ya mas ni nen say nononoten mi.”

Lapud mairap so komunikasyon ed Saray Estudyante na Biblia ed arum ya bansa nen World War I, labay nen Brother Rutherford ya pasesegen irayan agagi tan organisaen lamet so kimey ya panagpulong ditan. Kanian nen Agosto 12, 1920, sikatoy linma ed Britain, Continental Europe, tan Middle East kaiba so apatiran brother.

Nen linmay Brother Rutherford ed Britain, walay inyuksoy na Saray Estudyante na Biblia ya taloran kombension tan 12 publikon paliwawa. Say inmatendi ed ami-amin et manga 50,000. Oniay imbaga na The Watch Tower: “Aligliwa tan apabiskeg iray agagi. Malikeliket ira ta akaiba ray sakey tan sakey tan saniiba iran nankimey.” Diad Paris, impaliwawa lamet nen Brother Rutherford so teman “Minilyon a Mabilay Natan et Aglan Balot Ompatey.” Napno imay pasen ya nampaliwawaan to. Talon lasus ya interesado so nan-request na kaaruman ya impormasyon.

Diad tinmumbok iran simba, si Brother Rutherford tan saray kakaiba to et linma ed Athens, Cairo, tan Jerusalem. Pian nasubaybayan iray interesado ya tagad saratan ya lugar, angiletneg si Brother Rutherford na bodega parad saray publikasyon diad baley na Ramallah ya asingger ed Jerusalem. Insan la pinmawil ed Europe si Brother Rutherford tan inletneg to so Central European Office tan implano to ya niimprinta iray publikasyon ditan.

Nen Setyembre 1920, im-publish na Saray Estudyante na Biblia so No. 27 na The Golden Age. Espisyal itan ya isyu ya angipaamta ed publiko nipaakar ed impamairap ed Saray Estudyante na Biblia nen 1918. Say Battleship ya abitla niman et agew labi ya manandar pian maka-imprinta na masulok ya apatiran milyon ya kopya na sayan magasin.

 Abasa ditan na totoo so agawad si Emma Martin, sakey a colporteur ya tagad San Bernardino, California. Nen Marso 17, 1918, inmatendi yan sister kaiba toy taloran brother ya si E. Hamm, E. J. Sonnenburg, tan E. A. Stevens, ed melag ya pantitipon na Saray Estudyante na Biblia.

Walay sakey ya lakin inmatendi ya aliwan manaral na Biblia so gagala to. “Linma ak ed saman ya pantitipon . . . ta ingganggan ak na abogado na gobierno,” so kuan to diad korte. “Linma ak diman pian makaala ak na ebidensya.” Tan tua met ya akaala na “ebidensya”​—say libron The Finished Mystery. Kayari na pigaran agew, inaresto si Sister Martin tan say taloran brother ta agda kuno inunor so batas na gobierno ya mangisesebel ed pangibunog na saman ya libro.

Asentensiaan irayan agagi na taloy taon ya pakapriso. Aminpiga iran inmapela, balet siansian agnauman so desisyon na korte, kanian nen Mayo 17, 1920 et apriso ira. Balet walay balibalin agawa.

Nen Hunyo 20, 1920, insalaysay nen Brother Rutherford so eksperiensya na sarayan agagi diad kombension ed San Francisco. Asyodotan iray inmatendi nen naamtaan day aliwliwan impantrato ed sarayan Kristiano, kanian nan-telegrama irad presidente na Amerika. Insulat da: “Say sentensia . . . nen Mrs. Martin . . . lapud agto impangunor ed Espionage law et agmakatunongan . . . Say ginawa na saray opisyal na gobierno pian . . . patitan . . . si Mrs. Martin . . . tan pian walay baraan dan kasoan tan ikulong et . . . agmin balot naawat.”

Diad sinmublay ya agew, tampol ya impaibulos nen President Woodrow Wilson si Sister Martin tan Brother Hamm, Sonnenburg, tan Stevens. Naabsuelto la ra.

Nen asingger lan manampot so 1920, dakdakel so nanliketan na Saray Estudyante na Biblia. Tuloytuloy ya linmaknab so kimey ed headquarters, tan lalo iran amasya ed pangipulong ed Panarian na Dios​—say solusyon ed amin ya problema na too. (Mat. 24:14) Insan diad sinmublay ya taon, mas akaparaan la ran mangiyabawag ed Panarian.