1. Anto so sankaabigan ya desisyon ya gawaen tayo?

SARAY gagawaen tan desisyon na atateng et walay epekto tod ananak da anggad ibaleg da. No aliwan maabig iray desisyon na atateng, ompan aliway pansumpalan na ananak da. Balet no duga iray desisyon da, maong so pansumpalan da tan maliket so bilay da. Siempre, kaukolan met ya mandesisyon iray ananak no antoy gawaen dad bilay da. Say sankaabigan ya desisyon ya gawaen na anggan siopa et say matoor ya panlingkor ed maar-aron Ama tayo ed tawen, si Jehova.​—Sal. 73:28.

2. Anto ray maabig ya desisyon nen Jesus tan saray atateng to?

² Saray atateng nen Jesus ya si Jose tan Maria et ginawa day anggaay nayarian da pian natulongan da ray ananak da ya manlingkor ed si Jehova. Sankanengneng itan ed saray desisyon tan gagawaen da legan iran manpapamilya. (Luc. 2:40, 41, 52) Si Jesus et duga met iray desisyon tod bilay kanian agawaan to iray ipapagawa nen Jehova ed sikato. (Mat. 4:1-10) Sikatoy binmaleg ya maar-aro, matoor, tan makpel. Anggan siopan ateng ya matakot ed Dios et seguradon malikeliket no ontan so pagmaliwan na anak to.

3. Anto ran tepet so ebatan tayo ed sayan artikulo?

³ Diad sayan artikulo et ebatan tayo irayan tepet: Anto ray naaralan tayo ed saray desisyon nen Jehova nen imbaki tod dalin si Jesus? Antoy naaralan na saray atateng ed saray desisyon nen Jose tan Maria? Tan antoy naaralan na saray ananak ed saray desisyon nen Jesus?

4. Anton desisyon so ginawa nen Jehova antis ya onlad dalin si Jesus?

⁴ Maalwar ya pinili nen Jehova no siopay magmaliw ya atateng nen Jesus. (Mat. 1:18-23; Luc. 1:26-38) Say pinili ton magmaliw  ya ina nen Jesus ya si Maria et talagan inar-aro toy Jehova tan say Salita To. Napatnagan tayo itan ed saramay imbalikas to ya akarekord ed Biblia. (Luc. 1:46-55) Say pinili nen Jehova ya magmaliw ya pinagka-ama nen Jesus ya si Jose et maunor tan matakot ed Dios. Nibaga tayo itan ta inunor toy amin ya ganggan nen Jehova ed sikato.​—Mat. 1:24.

5-6. Anto ray inyabuloy nen Jehova ya nasali na Anak to?

⁵ Aliwan mayayaman so pinili nen Jehova ya magmaliw ya atateng nen Jesus. Nanengneng tayod samay inyapay nen Jose tan Maria kayari na inkiyanak nen Jesus ya mairap so bilay da. (Luc. 2:24) Karpentero si Jose tan nayarin walay melag ya puesto to ed abay na abung da diad Nazaret. Kanian simpli labat so bilay da, lalo la ta ag-onkulang ed pitora so nagmaliw ya anak da.​—Mat. 13:55, 56.

⁶ Prinotektaan nen Jehova si Jesus diad saray posiblin mameligro ed bilay to, balet agto impaliis ed amin ya subok tan irap ed bilay. (Mat. 2:13-15) Singa bilang, asubok si Jesus nen agmanisia ed sikato iray kakanayon to. Isip mo pay alikna nen Jesus nen diad gapo et agpanisiaan na saray mismon kapamilya to ya sikato so Mesias. (Mar. 3:21; Juan 7:5) Posible met ya asakbay ya inatey so pinagka-ama ton si Jose, tan ansakisakit itan ed si Jesus. Lapud sikato so panguloan, seguradon sikato so angituloy ed anapan nen Jose. (Mar. 6:3) Maong labat ta makalakal tan responsable si Jesus. Anggano kabataan ni et sankanonot toy pamilya to. Makulikulin nankimey pian walay pambilay na pamilya ra. Kanian amta toy liknaan na nabanalan kayari na sanagew ya trabaho.

7. (a) Anto ran tepet so makatulong ed saray sanasawa diad pamabaleg da ed ananak da? (b) Base ed Proverbio 2:1-6, antoy gawaen na atateng pian nibangat da ray ananak da?

⁷ No walay asawam tan labay yoy nawalaan na ananak, tepetan moy sarilim: ‘Kasin singa kami si Jose tan Maria, ya imatalek nen Jehova ed sikami so pangasikaso na mablin bilay lapud mapaabeba tan maespiritual kami?’ (Sal. 127:3, 4) No wala lay anak mo, tepetan moy sarilim: ‘Kasin ibabangat ko ray ananak ko ya makulin mankimey?’ (Ecl. 3:12, 13) ‘Kasin gagawaen koy anggaay nayarian ko ya protektaan iray ananak ko pian ag-ira naimpluensyaan na mundo nen Satanas?’ (Pro. 22:3) Agmo nipaliis iray ananak mo ed amin ya subok tan irap  ed bilay. Imposible itan. Balet sarag mo ran iparaan ed saray posiblin nagawa ed bilay da​—ibangat mo ra ya manpaigiyan lanang ed Salita na Dios. (Basaen so Proverbio 2:1-6.) Singa bilang, no walay kanayon yon tinaynan toy katuaan, ipanengneng mod ananak moy ibabaga na Biblia ya importantin manmatoor tayo ed si Jehova. (Sal. 31:23) Odino no walay inatey ya kanayon yo, ipanengneng mod ananak mo iray bersikulo ed Biblia ya makatulong ed sikaran nasarag so ermen da tan onkalma so liknaan da.​—2 Cor. 1:3, 4; 2 Tim. 3:16.

8. Anton ganggan ya nabasad Deuteronomio 6:6, 7 so inunor nen Jose tan Maria?

⁸ Pinabaleg nen Jose tan Maria si Jesus ya matakot ed Dios. Agawaan da itan lapud inunor da imay ganggan nen Jehova ed saray atateng. (Basaen so Deuteronomio 6:6, 7.) Inar-aro nen Jose tan Maria si Aman Jehova, tan ginawa day anggaay nayarian da pian sikatoy aroen met na ananak da.

9. Antoy ginawa nen Jose tan Maria pian mansiansian mabiskeg ed espiritual so pamilya da?

⁹ Walan talagay eskedyul nen Jose tan Maria pian pabiskegen ed espiritual so pamilya da. Oonla ra ed sinimban pantitipon ed sinagoga diad Nazaret, tan tinaon iran oonla ed Jerusalem parad Paskua. (Luc. 2:41; 4:16) Nayarin legan na pambibiahe ran pamilya paonlad Jerusalem et ibabangat dad si Jesus tan ed saray agagi to so impangasikaso nen Jehova ed saray totoo To nensaman. Seguro, onsasamar ira ed saray lugar ya abitla ed Kasulatan. Nen ondadakel lay anak nen Jose tan Maria, ompan nairapan met ira ya gawaen iratan ya amin. Balet isip mo pay resulta na satan ya impansagpot da! Lapud inyuna day Jehova ed bilay da, niiter day espiritual ya pankaukolan na ananak da.

10. Antoy naaralan na atateng ed si Jose tan Maria?

¹⁰ Antoy naaralan na atateng ed si Jose tan Maria? Importante ya diad saray ibabaga tan gagawaen yo et nanengneng na ananak yo ya talagan inar-aro yoy Jehova. Tandaan yo ya say sankamablian ya niregalo yod sikara et say pangibangat yo ya aroen day Jehova. Tan importantin nipasal yo ra ya nawalaan na eskedyul parad panagaral na Biblia, panagpikasi, pipiaral, tan panagpulong pian tuloytuloy iran ombiskeg ed espiritual. (1 Tim. 6:6) Siempre, lapud sikayo so ateng, responsabilidad yon iter so materyal ya pankaukolan na  ananak yo. (1 Tim. 5:8) Balet tandaan yo ya aliwan say materyal ya kaykayarian so makatulong pian niliktar iray ananak yo ed sayan mauges a mundo tan makaloob ira ed balon mundo, noagta say maapit ya relasyon da ed si Jehova. *​—Eze. 7:19; 1 Tim. 4:8.

11. (a) Anto ran bilin ed 1 Timoteo 6:17-19 so makatulong ed atateng diad pamapabaleg dad ananak da? (b) Anto ray sarag yon gawaen a goal na pamilya yo, tan anto ray bendisyon no gawaen yo itan? (Nengnengen so kahon ya “Anto ray Goal na Pamilya Yo?”)

¹¹ Makapalikliket ya nanengneng so dakdakel ya Kristianon atateng ya gagawaen day anggaay nayarian dan pabiskegen so espiritualidad na interon pamilya ra! Saniiba ran mandadayew ed Dios. Regular iran mimiaral tan onaatendi ed saray kombension. Tan makulikuli ran mibibiang ed panagpulong. Saray arum ya pamilya et manboboluntaryo ed saray teritorya ya matalag a napulongan. Wala ray pamilya ya iyi-eskedyul day man-tour ed Bethel odino manboluntaryo ed saray proyekto na organisasyon. Siempre kaukolan day manggastos tan mansakripisyo pian nagawaan da iratan. Balet bebendisyonan ira nen Aman Jehova kanian mayaman ira ed espiritual. (Basaen so 1 Timoteo 6:17-19.) Saray ananak ya ontan so impamabaleg na atateng da ed sikara et awi-awit da itan ya panangipasal anggad ibaleg da, tan misalsalamat ira ed satan! *​—Pro. 10:22.

12. Antoy nepeg ya gawaen nen Jesus nen baleg la?

¹² Lanang ya duga so desisyon na Ama nen Jesus ed tawen, tan saray pinagka-ateng to diad dalin et maabig met iray desisyon da. Balet nen baleg lay Jesus, sikato lay mandesisyon parad sarili to. (Gal. 6:5) Walay kanepegan nen Jesus ya mandesisyon parad sarili to, ya singa sikatayon amin. Kanian sarag to pan gawaen no antoy labay to tan agto la unoren so ibabaga na Dios. Balet aliwan ontan so ginawa to. Diad amin a desisyon to et sankanonot to no antoy mamaliket ed Ama to. (Juan 8:29) Antoy naaralan na saray kabataan ed alimbawa to?

13. Antoy ginawa nen Jesus nen wala nid pudir na atateng to?

¹³ Manlapud inkaugaw nen Jesus et matulok lad saray atateng to. Agto imbaliwala iray bilin da, tan agto inisip ya mas marunong nen say sikara. Ibabaga na Biblia ya sikatoy “nantultuloy a nampasakop ed sikara.” (Luc. 2:51) Ginawa to met so responsabilidad to bilang panguloan ya anak. Seguradon inaral ton maong so mankarpentero nen ibabangat nen Jose ta pian makatulong ed pananap na pambilay dan pamilya.

14. Akin et nibaga tayon maseet ya inaral nen Jesus so Salita na Dios?

¹⁴ Seguradon inistorya nen Jose tan Maria ed si Jesus so nipaakar ed mamilagron inkiyanak to tan no antoy imbaga na saray mensahero  na Dios nipaakar ed sikato. (Luc. 2:8-19, 25-38) Balet agnandepende si Jesus ed saratan ya istorya; inaral ton mismo so Kasulatan. Akin et nibaga tayon maseet ya inaral nen Jesus so Salita na Dios? On ta nen ugaw ni, saray managbangat ed Jerusalem et “mankelkelaw ed pakatalos to tan ed saray ebat to.” (Luc. 2:46, 47) Tan anggano 12 to ni labat, atalosan to la ed impanaral toy Kasulatan ya si Jehova so Ama to.​—Luc. 2:42, 43, 49.

15. Panon ya impanengneng nen Jesus ya say manuna ed bilay to et say panggawa ed linawa nen Ama to?

¹⁵ Nen naamtaan nen Jesus so labay ya ipagawa ed sikato nen Jehova, inawat to itan ya asainmin. (Juan 6:38) Amta to ya sikatoy busolen na dakel a totoo, tan segurado ya apagaan ed satan. Balet pinili to nin siansia ya unoren si Jehova. Sanen nampabautismo si Jesus nen 29 C.E., impanengneng to ya say manuna la ed bilay to et say panggawa ed linawa nen Jehova. (Heb. 10:5-7) Anggan nen sikatoy manpapanabos la ed panamairapan ya poste, sankanonot to nin siansia so panggawa ed linawa nen Ama to.​—Juan 19:30.

16. Anto so sakey a naaralan na saray ananak ed si Jesus?

¹⁶ Unor mo ray atateng mo. Singa si Jose tan Maria, aliwa met ya perpekto iray atateng mo. Balet saray atateng mo so inikdan nen Jehova na responsabilidad ya manprotekta, mangipasal, tan manbilin ed sika. No dengelen mo ra tan respetoen moy autoridad da, “maabig so pansumpalan mo.”​—Efe. 6:1-4.

17. Base ed Josue 24:15, antoy nepeg a desisyonan na saray kabataan?

¹⁷ Sika so mandesisyon no siopa so panlingkoran mo. Nepeg ya aralen mon mismo no siopa si Jehova, no antoy gagala to, tan no antoy koneksion na satan ed bilay mo. (Roma 12:2) Kaukolan mo itan ya gawaen pian makapandesisyon ka no kasin manlingkor ka ed si Jehova. Tandaan mo, atan so sankaimportantian ya desisyonan mo ed bilay mo. (Basaen so Josue 24:15; Ecl. 12:1) No walay regular ya eskedyul mo pian basaen tan aralen so Biblia, segurado ya onaralem so panangarom ed si Jehova tan ombiskeg so pananisiam ed sikato.

18. Antoy nepeg ya iyuna na saray kabataan, tan antoy resulta na satan?

¹⁸ Iyunam ed bilay mo so linawa nen Jehova. Labay na mundo nen Satanas ya isipen mon magmaliw kan maliket no usaren mo ray abilidad mo pian iyuna iray ambisyon mo. Balet  diad tua, no say sakey et puro materyal so iyuuna tod bilay to, singa to ‘sasaksaken so sarili to na dakel a pakasakitan.’ (1 Tim. 6:9, 10) Balet no dengelen moy Jehova tan mandesisyon kan iyuna ed bilay mo so linawa to, maong so pansumpalan mo tan “onkiwas kan walaay karunongan.”​—Jos. 1:8.

19. Antoy nepeg ya tandaan na saray atateng?

¹⁹ Atateng, gawa yoy anggaay nayarian yon tulongan iray ananak yo ya manlingkor ed si Jehova. Manmatalek kayod sikato tan ilaloan yo ya tulongan to kayon makapanggawa na duga iran desisyon. (Pro. 3:5, 6) Tandaan yo ya mas makaaral iray ananak yo ed alimbawa yo nen say diad ibabaga yo. Kanian komon ta diad saray desisyon tan gagawaen yo et seguradoen yo ya natutulongan yo ray ananak yon mikaaro ed si Jehova.

20. Anto ray bendisyon ya awaten na ananak no mandesisyon iran manlingkor ed si Jehova?

²⁰ Sikayo ran ananak, natulongan kayo na saray atateng yo ya manggawa na dugan desisyon. Balet sikayo nin siansia so mandesisyon no kasin manlingkor kayo ed si Jehova. Kanian alig yo komon si Jesus, usar yoy bilay yo diad panlingkor ed maar-aron Ama tayo ed tawen. No ontan so gawaen yo, natan ni labat et dakel lay makapaliket tan eksayting ya nagawaan yo ed bilay yo. (1 Tim. 4:16) Tan diad arapen, agyo pagbabawian so desisyon yo ta iter ed sikayo na Dios so sankaliketan ya bilay!