1. Akin ya say kimey a panagbangat et makapangiliktar na bilay?

SAY kimey ya panagbangat et makapangiliktar ed bilay na saray totoo. Akin ya nibaga tayon ontan? Sanen inter nen Jesus imay ganggan ya walad Mateo 28:19, 20, say kuanto: “Onla kayo . . . tan ibangat yo iray totoo . . . pian magmaliw iran disipulok, a bautismoan yo ra.” Akin et importante so bautismo? On ta kaukolan itan a gawaen na saramay labay day niliktar. Nepeg ya panisiaan na manpabautismo ya say kililiktar to et nagmaliw labat ya posible lapud imbagat nen Jesus so bilay to tan pinaoli na Dios. Atan so rason no akin ya oniay imbaga nen apostol Pedro ed saray Kristiano: ‘Say bautismo so mangililiktar natan ed sikayo diad panamegley na inkioli nen Jesu-Kristo.’ (1 Ped. 3:21) Kanian no say sakey et nampabautismo, walay ilalo ton niliktar tan manbilay na andi-anggaan.

2. Antoy ipapaseseg na 2 Timoteo 4:1, 2 ya gawaen na saray managbangat?

² Pian magmaliw ya disipulo nen Jesus iray iyaaralan tayo, importante so “dunong ed panagbangat.” (Basaen so 2 Timoteo 4:1, 2.) Akin? Ta oniay ingganggan nen Jesus: “Onla kayo . . . tan ibangat yo iray totoo . . . pian magmaliw iran disipulok.” Imbaga nen apostol Pablo ya kaukolan tayon “panseetan” itan ya kimey, ‘ta diad panggawa tayo ed satan et niliktar tayoy sarili tayo tan saramay ondedengel ed sikatayo.’ Duga labat sirin iyan bilin nen Pablo: “Imanom a naynay so . . . ibabangat mo.” (1 Tim. 4:16) Lapud kaukolan tayon ibangat iray totoo pian magmaliw iran disipulo, importante sirin ya marunong tayon manbangat.

3. Antoy pantongtongan tayo nipaakar ed panangiyaral na Biblia diad sayan artikulo?

 ³ Minilyon so iyaaralan tayo na Biblia. Balet singa inaral tayo ed apalabas ya artikulo, labay tayon mas dakel ni so natulongan tayo ed sikara ya magmaliw a bautismadon disipulo nen Kristo. Kanian diad sayan artikulo, pantongtongan tayo so limara nin importantin gawaen na mangiyaaral pian onaligwas iray iyaaralan to anggad manpabautismo ira.

4. Akin et agnepeg ya salita lan salita so mangiyaaral? (Nengnengen met so paimanod leksab.)

⁴ Inar-aro tayo iray katuaan ed Biblia ya ibabangat tayo. Kanian no maminsan et ompan nasamitan tayon mansalita lan mansalita no mangiyaaral tayoy Biblia. Balet balanglan mangikokondukta tayo na Panagaral na Panag-bantayan, Panagaral na Kongregasyon ed Biblia, odino mangiyaaral tayo, agnepeg ya sikatayo so salita lan salita. Labay tayon say Biblia a mismo so mangibangat ed iyaaralan tayo, kanian kaukolan tayon pigilan so sarili tayo tan agtayo ipapaliwawa so amin ya amta tayo nipaakar ed sakey a tema o teksto ed Biblia. * (Juan 16:12) Isip mo pay karakel na antam ed Biblia nen nampabautismo ka tan ikomparam ed karakel na antam natan. Seguro saray manunan bangat na Biblia labat so antam. (Heb. 6:1) Dinmakel so kakabatan mo diad inlabas na saray taon. Kanian agmo sasalien ya ibangat ed iyaaralan mo so amin ya antam nipaakar ed Biblia.

5. (a) Base ed 1 Tesalonica 2:13, antoy labay tayon natalosan na iyaaralan tayo? b) Panon mon naamtaan no antoy nalilikna na iyaaralan mo ed saray katuaan ya aaralen yo?

⁵ Labay tayon natalosan na iyaaralan tayo ya saray nanaaralan to et manlalapu ya amin ed Salita na Dios. (Basaen so 1 Tesalonica 2:13.) Panon tayon nagawaan itan? Legan na panaaral yo, paseseg mon ibaga to no antoy natatalosan to ed topic ya aaralen yo. Imbes ya sikan lanang so mangipaliwawa ed saray teksto ed Biblia, mas maong no paipaliwawam ed sikato so arum ya teksto. Nepeg ya natalosan na iyaaralan mo ya baleg so nitulong ed sikato na Salita na Dios. Mangusar ka na saray tepet pian naamtaan mo no antoy natatalosan tan nalilikna to ed saray tekston aaralen yo. (Luc. 10:25-28) Singa bilang, tepetan mo: “Anton ugali o kualidad nen Jehova so naaralan mo ed sayan teksto?” “Antoy nitulong ed sika na sayan katuaan ed Biblia?” “Antoy nibagam ed sayan inaral tayo?” (Pro. 20:5) Aliwan say karakel labat na amta na iyaaralan mo so importante, noagta no kasin onsasabi iratan ed puso to tan amta ton iyaplika ed bilay to.

6. Akin et maabig no mangitagar kay eksperiensyadon agi no mangiyaaral ka?

⁶ No mangiyaaral ka na Biblia, kasin mangitatagar ka na saray eksperiensyadon agagi? No  gagawaen mo la itan, balibali no diad onsublay et tepetan mo ra no antoy nibaga da ed pangiyaaral mo tan no kasin duga so panguusar mod Biblia diad pambabangat mo. No walay ibaga ran papaaligwasen mo, mapaabebam ya awaten itan pian mas onaligwas so dunong mon manbangat. (Ikompara so Gawa 18:24-26.) Insan sarag mon tepetan imay eksperiensyadon agi no base ed obserbasyon to et natatalosan na samay iyaaralan mo iray aaralen yo. Tan no bilang anggapo ka na sakey o pigaran simba, sarag mon kerewen ya sikatoy mangiyaral. Diad ontan et natalosan na iyaaralan mo ya importante so regular ya panaral na Biblia. Agmo iisipen ya lapud “sika” so mangiyaaral et agla nayarin iyaralan na arum. Labay mo ya onaligwas so iyaaralan mo kanian labay mon seguroen ya tuloytuloy so panaaral to ed katuaan.

7. Antoy nepeg ya nanengneng ed sika na iyaaralan mo pian eksayted ya manaral?

⁷ Nepeg ya nanengneng na iyaaralan mo ya talagan inar-aro tan papanisiaan moy katuaan ya walad Biblia. (1 Tes. 1:5) No sankanengneng to itan ed sika, seguradon eksayted ed kada panaral yo. Kanian no matukoy, sarag mon istoryaen ed sikato no panon kan atulongan na saray prinsipyo ed Biblia. Diad ontan et natalosan to ya kaukolan to met ya unoren iray prinsipyo na Biblia lapud parad pankaabigan to itan.

8. Anto ni nagawaan mo pian natulongan moy iyaaralan mo ya onaligwas, tan akin ya importante itan?

⁸ Diad panaaral yo, sarag mon istoryaen ed iyaaralan mo iray eksperiensya na saray agagi ya dinmalan met ed subok ya dadalanen to natan tan no panon dan asarag iratan. Sarag mo met so mangitagar na agi ed kongregasyon yo ya nayarin makatulong so alimbawa to ed iyaaralan mo. Odino mananap kay makapaseseg iran artikulo tan video ed jw.org diad serye ya “Uumanen na Biblia so Bilay.” * Nanengneng ditan na iyaaralan mo ya talagan makatulong ed sikato so pangiyaplika ed saray prinsipyo na Biblia.

9. Antoy gawaen mo pian napaseseg moy iyaaralan mo ya ibaga to ed saray kapamilya tan kakaaro to iray nanaaralan to?

⁹ No walay asawa na iyaaralan mo, kasin manaaral met la na Biblia? No andi ni, sarag mon ibaga ya salien toy mila ed panaaral yo. Paseseg moy iyaaralan mo ya ibaga tod saray kapamilya odino kakaaro to iray nanaaralan to. (Juan 1:40-45) Panon? Sarag mon itepet ed iyaaralan mo: “Antoy gawaen mo pian nipaamtam iyan katuaan ed saray kapamilyam?” odino “Anton teksto so usaren mo pian napruebaan mod kaarom ya tua iya?” No ontan so gawaen  mo, ipapasal mo la so iyaaralan mo ya magmaliw met a managbangat. Tan no kualipikado la, makapibiang la ed kimey ya panagpulong bilang agbautismadon manangipalapag. Sarag mo ya tepetan so iyaaralan mo no wala ray kabat ton labay da met so manpaiyaral na Biblia. No wala, kontak mon tampol imay toon imbaga to pian nipanengneng mo no panon so panaral na Biblia. Sarag mon ipabantay imay video ya Antoy Gagawaen Sano Manaaral na Biblia? *

10. Base ed 1 Tesalonica 2:7, 8, antoy gawaen na mangiyaaral pian naalig toy alimbawa nen apostol Pablo?

¹⁰ Ipaliknam ed iyaaralan mo ya walay malasakit mod sikato tan iisipen moy pankaabigan to. Isip mo ya diad arapen et magmaliw ya agim ed espiritual. (Basaen so 1 Tesalonica 2:7, 8.) Siempre, wala ray datin kakaaro na iyaaralan mo tan aliwan mainomay parad sikato ya pultoten so pikakaaro tod sikara tan kaukolan to met ya umanen iray datin kagagawa to pian makapanlingkor ed si Jehova. Pian nagawaan to itan, importante ya tulongan tayon makapikaaro ed saray agagi. Sikan mismo so unonan mikaaro ed sikato. Sarag moy miulop tan miistoryaan ed sikato aliwa labat ya no manaaral kayoy Biblia. Tawagan mo, i-text mo, odino pasyar mon magano pian nalikna to ya talagan walay malasakit mod sikato.

11. Antoy labay tayon nalikna na iyaaralan tayo, tan akin?

¹¹ Walay onian kasabihan ed Africa: “Makatulong so interon baryo ed ibaleg na ugaw.” Dia ed kimey tayon panagbangat et sarag tayo met ya ibagan: “Makatulong so interon kongregasyon pian magmaliw ya disipulo so sakey a too.” Maabig sirin no ikabat tayo ray iyaaralan tayo ed saray agagi ya makatulong ed sikaran onaligwas ed espiritual. No ontan so gawaen mo, nalikna na saray iyaaralan mo ya maliket so miulop ed saray totoo na Dios tan wala ray kakaaro da ya makatulong ed sikara no walay problema da. Labay tayon nalikna na saray iyaaralan tayo ya kabiangan ira na kongregasyon tan ituturing tayo la ran kapamilya tayo. Labay tayon nalikna day aroan tayo bilang sanaagi. Bilang resulta, mas mainomay da lan taynan iray datin kakaaro da ya mauges so impluensya ra. (Pro. 13:20) No bilang ta iwasan ira na saray datin kakaaro da, ayos labat ta amta ra ya amayamay so tuan kakaaro da ed organisasyon nen Jehova.​—Mar. 10:29, 30; 1 Ped. 4:4.

12. Akin et agtayo nababaingan ya ibagad iyaaralan tayo so nipaakar ed dedikasyon tan bautismo?

¹² Agka nababaingan ya mangibaga ed iyaaralan mo ya importante so pangidedika na sarili ed Dios tan pampabautismo. Diad tua, say gagala tayo no akin ya mangiyaaral tayo na Biblia  et pian tulongan tayo ray interesado ya magmaliw a bautismadon disipulo nen Kristo. No pigaran bulan mo lan iyaaralan tan lalo la no onaatendi met lad Kingdom Hall, kaukolan ton natalosan ya say rason no akin ya iyaaralan mo et pian natulongan mo ya manlingkor met ed si Jehova tan magmaliw ya Tasi To.

13. Anto ray kaukolan ya gawaen na iyaaralan pian onkualipikan manpabautismo?

¹³ No say sakey et seryoso ed panaaral toy Biblia, sikatoy mansagpot pian onkualipika ed bautismo. Unona, kaukolan ton kabaten tan aroen si Jehova tan ipanengneng toy pananisia ed Sikato. (Juan 3:16; 17:3) Insan mansagpot pian nakaaro toy Jehova tan saray agagi ed kongregasyon. (Heb. 10:24, 25; Sant. 4:8) Diad ilabas na panaon et itunda to la iray makapuy ya kagagawa to tan pagbabawian to la iray kasalanan to. (Gawa 3:19) No mabiskeg lay pananisia to, napakiwas met ya ibagad arum iray nanaaralan ton katuaan. (2 Cor. 4:13) Insan to idedika so sarili to ed si Jehova tan manpabautismo. (1 Ped. 3:21; 4:2) Seguradon malikeliket so amin diad agew na pampabautismo to! No nanenengneng mon gagawaen la iraya na iyaaralan mo lapud labay toy onkualipika ed bautismo, komendaan mo tan paseseg mon itultuloy ton gawaen iratan.

14. Panon ya naamtaan na mangiyaaral no talagan onaaligwas so iyaaralan to?

¹⁴ Tua ya kaukolan tayoy mananos legan tayon tutulongan so iyaaralan tayo ya onaligwas ed espiritual anggad idedika toy sarili tod Dios tan manpabautismo. Balet siempre, kaukolan tayon amtaen no talagan labay toy manlingkor ed si Aman Jehova. Kasin nanenengneng mon uunoren na iyaaralan mo iray ganggan nen Jesus? Odino labay to labat ya aruman so amta to ed Biblia?

15. Anto ray pakapatnagan ya onaaligwas so iyaaralan mo?

¹⁵ Regular mon usisaen so iyaaligwas na iyaaralan mo. Singa bilang, kasin narerengel mon ibabalikas toy pisasalamat tan panangaro to ed si Jehova? Kasin sikatoy manpipikasi ed si Jehova? (Sal. 116:1, 2) Kasin labalabay toy manbasa na Biblia? (Sal. 119:97) Kasin regular ya mimiaral? (Sal. 22:22) Kasin nanengneng ed kabibilay to ya iyaaplika to la iray nanaaralan to? (Sal. 119:112) Kasin ipapaamta to la ed kapamilya tan kakaaro to iray nanaaralan to? (Sal. 9:1) Tan say sankaimportantian, talaga kasin labay toy magmaliw a Tasi nen Jehova? (Sal. 40:8) No say iyaaralan mo et anggapoy anggan sakey ya nagagawaan to ed  saraya, mataktikam ya amtaen no akin tan maaro tan prangkam ya katongtongen nipaakar ed satan. *

16. Anto ray pakapatnagan ya kaukolan mo lan itunda so pangiyaaral mod sakey a too?

¹⁶ Regular mon usisaen no kasin ituloy mo nin iyaralan so sakey a too. Itepet mo iraya ed sarilim: ‘Kasin lanang lan ag-akaparaan ed panaral mi? Kasin agto labay so miaral? Kasin agto ni intunda iray mauges ya kagagawa tan bisyo to? Kasin agni inmekal ed palson relihyon?’ No say ebat ed saratan et on, singam babangatan ya onlangoy so sakey a too anta agto labay so nabasa! No agmet lanlamang papablien na iyaaralan mo iray katuaan ya nanaaralan to tan agto labay so manguman, wala ta ni gunggona no ituloy mon iyaralan?

17. Base ed 1 Timoteo 4:16, antoy nepeg a gawaen na saray mangiyaaral na Biblia?

¹⁷ Talagan seseryosoen tayo so responsabilidad tayon ibangat iray totoo pian magmaliw iran disipulo nen Kristo. Tan labay tayon tulongan iray iyaaralan tayo pian onaligwas irad espiritual anggad manpabautismo ira. Satan so rason no akin ya kaukolan tayon lanang ya usaren so Biblia no mangiyaaral tayo, tan ipanengneng tayon inar-aro tan papanisiaan tayoy katuaan ya ibabangat tayo. Pasesegen tayo ray iyaaralan tayo ya mikaaro rad saray agagi ed kongregasyon. Ipurek tayo met so kaimportantian na dedikasyon tan bautismo, tan regular tayon usisaen no kasin onaaligwas so iyaaralan tayo. (Nengnengen so kahon ya “ Saray Nepeg ya Gawaen na Mangiyaaral.”) Malikeliket tayo ed pribilehyo tayon mibiang ed sayan kimey ya mangiliktar na bilay! Komon ta gawaen tayoy anggaay nayarian tayon tulongan iray iyaaralan tayo na Biblia ya onaligwas ed espiritual ya anggad manpabautismo ira.