AARALEN YA ARTIKULO 42
Seguroen ya Kombinsido Ka ed Katuaan
“Seguroen yo so amin a bengatla; itultuloy yon gawaen so maabig.”—1 TES. 5:21.
KANSION 142 Bembenan ya Malet so Ilalo Tayo
DIAD SAYAN ARTIKULO *
1. Akin et dakdakel natan so agda la amtay panisiaan da?
NILIBON relihyon natan so mangibabaga ya Kristiano ira tan naliliketan kuno so Dios ed panagdayew da, kanian agla laingen amta na totoo no antoy panisiaan da. Napapaisip ira, “Wala kasi saksakey ya tuan relihyon, odino ayos labat anggan antoy relihyon mo basta manisia kad Dios?” Sika ey? Kasin kombinsido ka ya tuan amin so ibabangat na Saray Tasi nen Jehova tan sikatayo labat so mandadayew ed Dios diad dugan paraan? Panon kan makaseguro? Nengnengen tayo iray ebidensya.
2. Akin et kombinsido si apostol Pablo ya tua so amin ya papanisiaan to? (1 Tesalonica 1:5)
2 Si apostol Pablo et kombinsido ya tua so amin ya papanisiaan to. (Basaen so 1 Tesalonica 1:5.) Kasin akabase labat itan ed emosyon to? Andi. Inaral ya maong nen Pablo so Salita na Dios. Panisiaan to ya “say interon Kasulatan et impuyan na Dios.” (2 Tim. 3:16) Diad impanaral nen Pablo ed Kasulatan, dakel so anengneng ton prueba ya si Jesus so insipan ya Mesias. Amta pa met itan na saray lider na relihyon na saray Judio, pero ginagala dan iyamot ed totoo. Ibabaga ra ya katuaan so ibabangat da, pero mauges iray kagagawa ra. (Tito 1:16) Pinili da labat no antoy labay dan panisiaan ed Kasulatan. Duma balet si Pablo ta imbangat tan inunor to so “amin a simbawa na Dios.”—Gawa 20:27.
3. Kasin kaukolan ya naebatan so amin ya tepet tayo pian nakombinsi tayo ya tua so papanisiaan tayo? (Nengnengen met so kahon ya “ Saray Kimey tan Nononoten nen Jehova—‘Agnisalaysay ya Amin Lapud Karakel Da’!”)
3 Pero, wala ray mangibabaga ya say tuan relihyon kuno et sarag ton ebatan so amin ya tepet, anggan saramay tepet ya anggapod Biblia so ebat. Duga kasi itan ya ibabaga ra? Imanoen tayoy alimbawa nen apostol Pablo. Pinaseseg to ray kapara ton Kristiano ya “seguroen [da] so amin a bengatla,” pero inamin to ya sikaton mismo et dakel ni ray agto natatalosan. (1 Tes. 5:21) Imbaga to ya “aliwan nagnap so kakabatan tayo” tan “aliwan malinew so nanenengneng tayo ed panamegley na metal ya espiho.” (1 Cor. 13:9, 12) Anggano wala ray agnatatalosan nen Pablo, ya singa sikatayo met natan, atalosan to iray manunan katuaan tungkol ed si Jehova tan say gagala To. Susto la iman pian magmaliw ya kombinsido ya duga so papanisiaan to.
4. Antoy gawaen tayo pian mas kombinsido tayo ya tua so amin ya papanisiaan tayo, tan antoy aralen tayo tungkol ed saray tuan Kristiano?
4 Say sakey ya paraan pian mas kombinsido tayo ya tua so amin ya papanisiaan tayo et no aralen tayo so imbangat nen Jesus ya dugan paraan na panagdayew tan ikompara tayo itan ed gagawaen na Saray Tasi nen Jehova natan. Diad sayan artikulo, nanengneng tayo ya saray tuan Kristiano et (1) agmandadayew ed saray imahen o idolo, (2) rerespetoen day ngaran nen Jehova, (3) inaro day katuaan, tan (4) inaro day sakey tan sakey.
AG-ITAYO MANDADAYEW ED SARAY IMAHEN O IDOLO
5. Antoy naaralan tayo ed si Jesus tungkol ed dugan paraan na pandayew ed Dios, tan panon tayon natumbok itan?
5 Inar-aron maong nen Jesus si Jehova ya Dios, kanian Sikato labat so dinayew to nen linma diad dalin tan anggan sanen walad tawen. (Luc. 4:8) Imbangat to met iray disipulo to ya si Jehova labat so dayewen da. Si Jesus tan saray disipulo to et agbalot angusar na saray imahen diad impandayew dad Dios. Ibabaga na Biblia ya agtayo nanengneng so Dios ta sakey ya Espiritu. Kanian imposible ya makapanggawa so too na imahen ya kaparpara na Dios! (Isa. 46:5) Panon to balet iramay manggagawa o mandadasal ed imahen na saray “santo”? Diad samay komadua ed Samploran Ganggan, oniay imbaga nen Jehova: “Agka manggagawa na imahen mo odino sakey a bengatlan kaparpara na antokaman a walad tawen odino ed dalin . . . Agka ondadakmomo . . . ed saratan. (Exo. 20:4, 5) Malinlinew ya aglabay na Dios ya mandayew tayo ed saray imahen o idolo.
6. Anton paraan na panagdayew so aaligen na Saray Tasi nen Jehova natan?
6 Anggan saray historian et amta ra ya nandayew labat ed saksakey ya Dios iray inmuunan Kristiano. Singa bilang, nabasa ed libron History of the Christian Church ya “seguradon nabigla tan ombegas so bago” na saray inmuunan Kristiano no bilang ta makanengneng iray imahen diad pasen ya pandadayewan ed Dios. Aaligen na Saray Tasi nen Jehova natan so paraan na panagdayew na saray inmuunan Kristiano. Agtayo mandadasal ed imahen na saray “santo” o anghel, tan agtayo ingen manpipikasi ed si Jesus. Agtayo met onsasaludo ed bandira odino ed antokaman ya simbolo na gobierno o bansa. Kanian anggan antoy nagawa, determinado so kada sakey ed sikatayo ya unoren iyan imbaga nen Jesus: “Si Jehova a Dios mo so nepeg mon dayewen.”—Mat. 4:10.
7. Akin et duman maong iray Tasi nen Jehova ed arum ya relihyon?
7 Dakel natan so mangiidolo ed saray pari, pastor, tan arum ni ran lider na relihyon. Atagtagey so pakanengneng dad sarayan lider da, ya singa da la ra diodiosen. Ondadayo ira ed saray oorganisaen dan pantitipon, sasaliwen da iray insulat dan libro, tan angkakabaleg so idodonasyon da ed saray organisasyon ya susuportaan na sarayan lider. Papanisiaan na totoo so amin ya ibabaga ra! No bilang ta wadia nid dalin si Jesus, seguro agda pansinen ta mas bilib irad lider na relihyon da. Duma balet iray Tasi nen Jehova, ta aliwan too so lider tayo. Tua, rerespetoen tayo iray mangidadaulo ed organisasyon tayo, pero anggapoy ipapasen tayon mas atagey ta imbaga nen Jesus ya “amin [tayo] et sanaagi.” (Mat. 23:8-10) Anggapoy iidoloen tayon lider na relihyon o politiko, tan agtayo susuportaan iray gagawaen da. Agtayo kabiangan na sayan mundo, kanian anggapoy papanigan tayo. Agla pankelawan sirin ya duma tayon maong ed arum ya relihyon.—Juan 18:36.
RERESPETOEN TAYOY NGARAN NEN JEHOVA
Proud iray tuan Kristiano ya ipakabat so ngaran nen Jehova ed amin ya totoo! (Nengnengen so parapo 8-10) *
8. Panon tayon amta ya labay nen Jehova ya nigloria so ngaran to tan nipakabat itan ed amin?
8 Aminsan, oniay impikasi nen Jesus: “Ama, igloriam so ngaran mo.” Bilang ebat ed satan ya pikakasi, nansalita si Jehova diad tawen tan imbaga ton: “Inggloriak itan tan igloriak lamet.” (Juan 12:28) Nen wadiad dalin si Jesus, inggloria to so ngaran nen Ama to. (Juan 17:26) Kanian saray tuan Kristiano et uusaren da so ngaran na Dios tan proud iran ipakabat itan ed arum.
9. Panon ya impanengneng na saray inmuunan Kristiano ya rerespetoen day ngaran na Dios?
9 Ag-abayag manlapu nen abuo so Kristianon kongregasyon, inawat la nen Jehova iray aliwan Judio “pian manpili ed sikara na totoon parad ngaran to.” (Gawa 15:14) Sarayan inmuunan Kristiano et inusar day ngaran na Dios, tan impakabat da itan ed arum. Lanang dan uusaren so ngaran nen Jehova diad impanpulong da, tan inusar da met itan nen insulat da iray libro na Biblia. * Impanengneng dad kabibilay da ya sikara so totoon pinili na Dios “parad ngaran to.”—Gawa 2:14, 21.
10. Anto ray ebidensya ya Saray Tasi nen Jehova labat so mangipapakabat tan mangirerepresenta ed ngaran nen Jehova?
10 Kasin Saray Tasi nen Jehova labat natan so mangipapakabat tan mangirerepresenta ed ngaran nen Jehova? Imanoen iray ebidensya. Inyamot na dakel ya lider na relihyon ya walay ngaran na Dios. Singa bilang, inekal da itan ed saray patalos da na Biblia, tan imbawal da ni ingen so pambitla ed ngaran na Dios diad saray misa o pantitipon da! * On, Saray Tasi nen Jehova labat so relihyon ya baleg so respeto da ed ngaran nen Jehova. Sikatayo labat so relihyon ya talagan mangipapakabat ed ngaran na Dios. Ipapanengneng tayo sirin ya talagan dugaruga so ngaran tayon, Saray Tasi nen Jehova! (Isa. 43:10-12) Masulok lan 240 milyon so im-publish tayon kopya na Balon Mundo a Patalos na Masanton Kasulatan. Impawil na sayan patalos so ngaran nen Jehova diad saray bersikulo ya inekal na arum ya translator na Biblia itan ya ngaran. Tan mangipa-publish tayo met na saray publikasyon ya base ed Biblia ya mangipapakabat ed ngaran nen Jehova tan available iratan ed masulok ya 1,000 ya lenguahe!
INARO TAYO SO KATUAAN
11. Akin et nibaga tayon inaro na saray inmuunan Kristiano so katuaan?
11 Inaro nen Jesus so katuaan—say katuaan tungkol ed Dios tan saray gawaen To diad arapen. Nen wadiad dalin si Jesus, impanengneng tod kabibilay to ya talagan papanisiaan to itan, tan impaamta to met itan ed arum. (Juan 18:37) Inaro met na saray papatumbok nen Jesus so katuaan. (Juan 4:23, 24) Kanian agda inawat iray doktrina, tradisyon, tan pilosopiya ya kontra ed satan. (Col. 2:8) Impanengneng dad kabibilay da ya talagan papanisiaan da so katuaan. Diad tua, say pananisia na saray Kristiano et tinawag nen apostol Pedro ya “dalan na katuaan.” (2 Ped. 2:2) Ontan met so gagawaen na Saray Tasi nen Jehova natan. Ibabase tayoy papanisiaan tan gagawaen tayo ed Salita nen Jehova pian ‘tuloytuloy tayon makapanakar ed katuaan.’—3 Juan 3, 4.
12. Antoy gagawaen na Mananguley ya Ulop no nanengneng dan walay kaukolan ya umanen ed pakatalos tayo, tan akin et gagawaen da itan?
12 Ag-ibabaga na Saray Tasi nen Jehova ya natatalosan dan amin so walad Biblia. Wala met iray bangat ed Biblia ya aliway pakatalos da nensaman, tan wala met iray inuman da ed paraan na pangoorganisa da ed saray kongregasyon. Pero agtayo la pankelawan itan. Ibabaga na Biblia ya diad ilabas na panaon et ‘naaruman so suston kakabatan tayo.’ (Col. 1:9, 10) Kalkalna so pangipapaamta nen Jehova na katuaan, kanian maan-anos tayon aaralen so Biblia pian lalon onlinew so pakatalos tayo. (Pro. 4:18) No nanengneng na Mananguley ya Ulop ya kaukolan tayon umanen so pakatalos tayo ed sakey ya bangat, ag-ira manaalangan ya umanen itan. Say arum ya relihyon et uumanen day bangat da pian naunor so labay na saray membro ra odino pian naala day pabor na totoo. Duma balet iray Tasi nen Jehova, ta say rason no akin ya walay gagawaen tayon pananguman ed organisasyon tan ed pakatalos tayo et lapud labay tayon naala so pabor na Dios tan labay tayon tumboken so paraan na panagdayew ya imbangat nen Jesus. (Sant. 4:4) Gagawaen tayo itan, aliwan lapud labay tayoy misabayan ed no antoy uso, noagta lapud lalon onlilinew so pakatalos tayod Biblia. On, talagan inaro tayoy katuaan!—1 Tes. 2:3, 4.
INARO TAYOY SAKEY TAN SAKEY
13. Anton kualidad so impanengneng na saray inmuunan Kristiano, tan panon met itan ya ipapanengneng na Saray Tasi nen Jehova natan?
13 Akabkabat iray inmuunan Kristiano lapud panangaro da ed sakey tan sakey. Imbaga nen Jesus: “Diad saya et naamtaan na amin a sikayo iray disipulok—no manaaroan kayo.” (Juan 13:34, 35) Kabkabat met iray Tasi nen Jehova natan diad interon mundo lapud aroan tan pankakasakey da. Duma tayo ed arum ya relihyon ta pamilya so turing tayod sakey tan sakey, anggano nandurumay bansa tan kultura tayo, balanglan mayaman o mairap tayo. Talagan sankanengneng so tuan aroan tayo diad saray aral, asemblea, tan kombension tayo. Sakey itan ed saray rason no akin ya kombinsido tayo ya duga so paraan na panagdayew tayo.
14. Base ed Colosas 3:12-14, panon tayon nipanengneng so aralem ya panangaro ed sakey tan sakey?
14 Bibilinen itayo na Biblia ya “nawalaan [tayo] komon na aralem a panangaro ed sakey tan sakey.” (1 Ped. 4:8) Nibagan aralem so panangaro tayo no manpeperdonaan tayo tan itepel tayoy sakey tan sakey. Nipanengneng tayo met itan no maiter tayo ed amin ya agagi tan sangkailien tayo ra. Anggapoy ipupuera tayo, anggan saramay akasakit ed sikatayo. (Basaen so Colosas 3:12-14.) No ontan so panangaron ipapanengneng tayo, papaneknekan tayo ya tuan Kristiano tayo.
“SAKEY A PANANISIA”
15. Anto ni ray pamparehoan tayo ed saray inmuunan Kristiano?
15 Wala ni ray pamparehoan tayo ed saray inmuunan Kristiano. Singa bilang, say uksoyan ya ginawa na saray apostol ya wala ray ombiabiahen manangasikaso, mamatatken, tan ministeryal iran lingkor et pareho ed uksoyan ya tutumboken tayo natan. (Fil. 1:1; Tito 1:5) Tan singa saray inmuunan Kristiano, rerespetoen tayoy estandarte nen Jehova ed sekso tan panangasawa. Ipapasen tayon sagrado so dala. Tan agtayo kokonsintien iray agmagbabawin nankasalanan kanian eekalen tayo ra ed kongregasyon.—Gawa 15:28, 29; 1 Cor. 5:11-13; 6:9, 10; Heb. 13:4.
16. Antoy naaralan tayo ed samay nabasa ed Efeso 4:4-6?
16 Impasakbay nen Jesus ya dakel so mangibaga ya papatumbok to kuno ra, pero diad tua, ag-ira tuan Kristiano. (Mat. 7:21-23) Tan impasakbay met na Biblia ya diad kaunoran iran agew, dakel so totoo ya ‘singano walay takot da ed Dios balet ag-itan napatnagan ed kabibilay da.’ (2 Tim. 3:1, 5) Pero malinlinew so ibabaga na Biblia ya “sakey a pananisia” labat so aawaten na Dios.—Basaen so Efeso 4:4-6.
17. Siopa ray tuan papatumbok nen Jesus natan ya mangipapanengneng na tuan pananisia?
17 Siopa natan so mangipapanengneng na sayan tuan pananisia? Natan ya anengneng tayo la iray ebidensya tan inaral tayoy paraan na panagdayew ya imbangat nen Jesus tan tinumbok na saray inmuunan Kristiano, malinlinew so ebat—Saray Tasi nen Jehova labat! Talagan balbaleg ya pribilehyo ya sakey tayo ed saray lingkor nen Jehova tan amta tayo so katuaan tungkol ed sikato tan saray gawaen to diad arapen. Komon ta tuloytuloy tayon bembenan ya malmalet so katuaan tan agtayon balot itan iikbanan!
KANSION 3 Sika so Ilalo, Biskeg, tan Kompiyansa Mi
^ par. 5 Pantongtongan tayo so imbangat nen Jesus ya dugan paraan na pandayew ed Dios tan no panon itan ya tinumbok na saray inmuunan Kristiano. Insan tayo pantongtongan iray ebidensya ya tutumboken met itan na Saray Tasi nen Jehova natan.
^ par. 9 Nengnengen so kahon ya “Inusar Kasi na Inmuunan Kristiano so Ngaran na Dios?” diad Say Panag-bantayan ya Hulyo 1, 2010, p. 6.
^ par. 10 Singa bilang, nen 2008, ingganggan nen Pope Benedict XVI ya say ngaran na Dios et “agnepeg ya usaren odino bitlaen” diad misa, kansion, tan dasal na saray Katoliko.
^ par. 63 DESKRIPSION NA LITRATO: Im-publish na Saray Tasi nen Jehova so Balon Mundo a Patalos diad masulok ya 200 ya lenguahe. Kanian nabasa na totoo so Biblia ed mismon lenguahe da, tan nabasa da ditan so ngaran na Dios.
