1. Anto so “espiritual a pankaukolan” tayo, tan antoy koneksion na satan ed pakalikna tayoy tuan liket?

 KASIN tua so liket ya naliliknam no balibali so liknaan mo natan, pero naani et andi la? Andi. Duma so tuan liket ta permanente itan. Oniay imbaga nen Jesus diad samay Sermon ed Palandey: “Maliket iray manonot ed espiritual a pankaukolan da.” (Mat. 5:3) Antoy tutukoyen nen Jesus ya “espiritual a pankaukolan” tayo? Atan may pankaukolan na totoo ya kabaten tan dayewen so Amalsa, si Jehova ya Dios. Ibabaga na Biblia ya si Jehova et “maliket a Dios,” kanian saramay mandadayew ed sikato et maliket met.—1 Tim. 1:11.

2-3. (a) Siopa ni ray imbaga nen Jesus ya maliket? (b) Antoy pantongtongan tayod sayan artikulo, tan akin et importante ya pantongtongan tayo itan?

² Kasin magmaliw tayo labat ya maliket no anggapoy problema tayo? Andi. Diad tua et imbaga nen Jesus ya “maliket iray maneermen”—saramay totoon dakdakel so subok ya aarapen dad bilay, o saramay nakokonsiensia ed agawaan dan kasalanan. Imbaga to met ya “maliket iray napapasegsegang lapud inkatunong,” tan maliket met iramay “balbalawen” na arum lapud disipulo ira nen Jesus. (Mat. 5:4, 10, 11) Akin et imbaga nen Jesus ya maliket iray ontan ya totoo anggano mairap so situasyon da?

³ Niay punto nen Jesus: Say tuan liket et ag-akadepende ed situasyon tayo. Akadepende itan ed no kasin kabkabat tayoy Dios tan no maapit so relasyon tayo ed Sikato. (Sant. 4:8) Pantongtongan tayo ed sayan artikulo so taloran nepeg tayon gawaen pian nalikna tayoy tuan liket.

4. Antoy unonan nepeg tayon gawaen pian nalikna tayoy tuan liket? (Salmo 1:1-3)

⁴ UNONA: Pian nalikna tayoy tuan liket, kaukolan tayoy mangan na espiritual ya naakan. Inkompara nen Jesus so Salita na Dios ed naakan. Sikatayo ran totoo tan anggan saray ayayep et kaukolan tayoy mangan pian tuloytuloy tayon manbilay. Pero sikatayo ran totoo labat so makapangan na espiritual ya naakan, say Salita na Dios. Diad tua, kakkaukolan tayon gawaen itan, ta oniay imbaga nen Jesus: “Aliwan tinapay labat so pambilay na too, noagta say amin a salitan manlalapud sangi nen Jehova.” (Mat. 4:4) Kanian agtayo komon papalampasen so anggan sakey labat ya agew ya agtayo makapanbasa na Biblia. Oniay imbaga na salmista: ‘Maliket so toon say panliliketan to et say ganggan nen Jehova tan babasaen to itan diad agew tan labi.’—Basaen so Salmo 1:1-3.

5-6. (a) Anto ray naaralan tayo ed Biblia? (b) Antoy epekto ed sikatayo no basaen tayoy Biblia?

⁵ Inar-aro itayo nen Jehova kanian inter tod sikatayo so Biblia. Ditan tayo nabasa no antoy gawaen tayo pian magmaliw tayon maliket. Nabasa tayo met ditan no anton bilay so labay to parad sikatayo. Naaralan tayo ditan no panon tayon makapikaaro ed sikato tan no antoy gawaen tayo pian naperdona iray kasalanan tayo. Naamtaan tayo met no anto ray balibalin gawaen to diad arapen. (Jer. 29:11) Nen naamtaan tayo irayan katuaan, nagmaliw ya maliket so bilay tayo.

⁶ Dakel met iray bilin ed Biblia ya mausar ed bilay tayo. No unoren tayo iratan, magmaliw  tayon maliket. Kanian no naproproblema ka tan onkakapuy so liknaan mo, maabig no aruman moy panaon mo ya basaen so Biblia tan dalepdep mo iray nababasam. Oniay imbaga nen Jesus: “Maliket iramay onderengel tan manusumpal ed salita na Dios!”—Luc. 11:28.

7. Antoy gawaen mo pian mas na-enjoy moy panagbasam na Biblia?

⁷ No manbabasa kay Biblia, agka manaapura pian na-enjoy moy babasaen mo. Bilang ilustrasyon, kasin asalim la ya walay angiparungo ed sika na paboritom ya panangan? Pero lapud manaapura ka ta sankanonot mo ni ray gawaen mo, basta insubom lan insubo ya anggad naupot la manaya. Kasumpal mo balet ya angan, a-realize mo ya tinantanan mo komon pian ananam moy kinan mo. Ompan ontan met so nagawa no manbabasa tayoy Biblia. No maminsan, mapmaples tayon manbasa tan agtayo la nai-enjoy no antoy ibabangat nen Jehova ed sikatayo. Dapat “nanamen” tayo so babasaen tayo. Maabig no imadyinen moy eksena, no antoy emosyon tan paraan na panagsalita na saray karakter, tan isip mo no anto ray naaralan mo ed binasam. No ontan so paraan na panagbasam na Biblia, mas naliketan ka.

8. Antoy prueba ya gagawaen na “matoor tan makabat ya aripen” so asainmin da? (Nengnengen met so paimanod leksab.)

⁸ Nampili si Jesus na “matoor tan makabat ya aripen” ya mangitarya na espiritual ya naakan ed dugan panaon. b (Mat. 24:45) Amayamay so itatarya dan espiritual ya naakan tayo. Amin ya ipaparaan na matoor ya aripen et akabase ed Biblia. (1 Tes. 2:13) Makatulong iratan ya espiritual ya naakan pian naamtaan tayoy panagnonot nen Jehova. Marakep sirin no lanang tayon basaen iray magasin ya Panag-bantayan tan Onliing!, pati saray artikulo ed jw.org. Manparaan tayon maong parad saray aral. Tan seguroen tayo ya nababantayan tayo so binulan ya programa na JW Broadcasting^®. No agtayo papaulyanan so mangan na espiritual ya naakan, agtayo nairapan ed sayay komadua ya nepeg tayon gawaen.

9. Antoy komaduan nepeg tayon gawaen pian nalikna tayoy tuan liket?

⁹ KOMADUA: Pian nalikna tayoy tuan liket, kaukolan tayon unoren so estandarte nen Jehova. Oniay insulat na salmista: “Maliket so balang sakey ya ontatakot ed si Jehova [tan] manaakar ed saray dalan To.” (Sal. 128:1) No walay takot tayod si Jehova, baleg so respeto tayod sikato tan agtayo labay ya nasakitan so liknaan to. (Pro. 16:6) Kanian gagawaen tayoy anggaay nayarian tayon unoren so estandarte na Dios ya nanaaralan tayo ed Biblia. (2 Cor. 7:1) No gagawaen tayo iray panlabayan nen Jehova tan iiwasan tayo ray kagagawa ya kabusol to, seguradon maliket so bilay tayo.—Sal. 37:27; 97:10; Roma 12:9.

10. Base ed Roma 12:2, antoy nepeg tayon gawaen?

¹⁰ Basaen so Roma 12:2. Ompan say sakey ya too et amta to met ya si Jehova so walaay autoridad ya mangibaga no antoy duga tan aliwa. Pero say tepet, kasin unoren to itan? Singa onia ’tan ay: Ompan say sakey et amta to met ya walay karapatan na gobierno ya mangibaga no panon kapeles so nayarin pampabatik na luluganan diad highway. Pero no agto labay ya unoren itan, manpabatik na labalabay to. Bilang Kristiano, nanengneng dapat ed kabibilay tayo ya talagan manisia tayo ya parad pankaabigan tayo so estandarte nen Jehova. (Pro. 12:28) Ontan so alikna nen David kanian nibaga tod si Jehova ya: “Impaamtam  ed siak so dalan na bilay. Diad arapan mo et walay baleg a gayaga; diad nikawanan mo et walay liket ya anggad angga.”—Sal. 16:11.

11-12. (a) No nanaaburido o naproproblema tayo, antoy nepeg tayon panalwaran? (b) Panon ya makatulong so Filipos 4:8 no manpipili tayoy libangan?

¹¹ No nanaaburido o naproproblema tayo, ompan walay naisip tayon gawaen pian na-relax tayo met. Tua, kaukolan tayoy man-relax, pero dapat manalwar tayo pian agtayo makagawa na aglabay nen Jehova.—Efe. 5:10-12, 15-17.

¹² Nen sinulatan nen apostol Pablo iray agagi ed Filipos, pinaseseg to ra ya itultuloy dan nodnonoten iray bengatlan “matunong, . . . malinis, . . . managyat na panangaro, . . . [tan] maong.” (Basaen so Filipos 4:8.) Anggano aliwan panag-relax so tutukoyen dia nen Pablo, makatulong iyan bilin to diad pampili tayo na libangan. Singa bilang, tepetan moy sarilim: ‘Kasin saray dedengelen kon kansion, babantayan kon pelikula, babasaen kon libro, tan gagalawen kon video games et matunong, malinis, managyat na panangaro, tan maong?’ Makatulong iya pian nibiig mo no anto ray labay tan aglabay na Dios. On, desidido tayo komon ya unoren so atagey ya estandarte nen Jehova. (Sal. 119:1-3) Diad ontan et malinis so konsiensia tayon gawaen iyay komatlon paraan pian nalikna tayoy tuan liket.—Gawa 23:1.

13. Antoy komatlon nepeg tayon gawaen pian nalikna tayoy tuan liket? (Juan 4:23, 24)

¹³ KOMATLO: Iyuna tayo ed bilay tayo so panagdayew ed si Jehova. Si Jehova so Amalsa, kanian sikato labat so karapat-dapat ya dayewen tayo. (Apo. 4:11; 14:6, 7) Say sankaimportantian sirin ed bilay tayo et say pandayew ed si Jehova diad paraan ya labay to—“diad espiritu tan katuaan.” (Basaen so Juan 4:23, 24.) Kaukolan tayoy manpaigiya ed masanton espiritu na Dios pian say panagdayew tayo et akabase ed saray katuaan ya walad Biblia. Agtayo dapat papaulyanan so panagdayew tayo ed si Jehova anggano manaayam tayo ed bansa ya imbawal o nilimitaan na gobierno so kimey tayo. Diad nanduruman bansa, masulok ya 100 ya agagi tayo so akapriso lapu labat ta sakey iran Tasi nen Jehova. c Pero malikeliket ni ran siansia ya mandadayew ed si Jehova. Ag-ira tinmundan manpipikasi, manpi-personal study, tan ipupulong da nin siansia so tungkol ed Dios tan ed Panarian to. Anggano balawen o pairapen itayo na arum, maliket tayo nin siansia ta amta tayon kaiba tayoy Jehova tan bendisyonan toy katooran tayo.—Sant. 1:12; 1 Ped. 4:14.

14. Antoy agawa ed sakey ya kabataan ya brother ed Tajikistan, tan akin?

¹⁴ Wala ray agagi tayo ya dinmalan ed mairap iran subok balet alikna da nin siansia so tuan liket lapud ginawa da may talora ya apantongtongan tayo. Say sakey ed sikara et si Brother Jovidon Bobojonov ya tagad Tajikistan. Nen 19 so taon to, agto labay so mansundalo ta agnaako na konsiensia to. Sikatoy biglaan labat ya inaresto ed abung da nen Oktubre 4, 2019. Pigaran bulan dan inkulong tan singa kriminal so impantrato dad sikato. Sayan ag-inkahustisya et nagmaliw ya balitado ed nanduruman bansa. Base ed report na media, sikatoy binugbog na saray sundalo pian nataktakot da ta labay dan isulong toy  unipormi na sundalo tan manpanata bilang sundalo. Talagan agto labay so mansundalo kanian asentensiaan ya napriso. Pero kalabas na siameran bulan, sikatoy imbulos la ta naikdan na presidential pardon. Anggano mair-irap so dinalan nen Jovidon, sikatoy nanmatoor tan ag-abalang so liket to. Akin ey? On, ta sankanonot ton lanang so espiritual ya pankaukolan to.

15. Akin et akapangan nin siansia si Jovidon na espiritual ya naakan anggano walad prisoan?

¹⁵ Nen walad prisoan si Jovidon, tuloytuloy ya angan na espiritual ya naakan anggano anggapoy Biblia to odino arum nin publikasyon tayo. Panon to itan ya agawaan? No sikatoy iyawitan na panangan na saray agagi, isusulat dad plastic na grocery so teksto ed saman ya agew. Kanian inagew-agew ya makakapambasa na Biblia tan dadalepdepen to iray teksto. Nen nibulos lad prisoan, oniay advice to ed saray agagi ya agda ni asali so dinmalan ed grabe iran subok: “Legan ya wala ni kalayaan yo, sambot yon basaen so Biblia tan saray publikasyon tayo pian mas nakabkabat yoy Jehova.”

16. Anto ray sankanonot nen Jovidon legan ya walad prisoan?

¹⁶ Imbes ya manggawa na aliwa si Jovidon  tan isipen to iray makalaman ya pilalek, inunor toy estandarte nen Jehova. Sankanonot toy Jehova tan no antoy makapaliket ed puso To. Iisipen to met iray balibalin palsa na Dios. Kada kabangon toy kabuasan, sankarengel toy uni tan kansion na saray siwit. Kada labi, ontangay ed tawen pian nanengneng toy bulan tan saray bitewen. Oniay imbaga to: “Regalo iraya nen Jehova ed siak. Labay to ak ya pasesegen tan paliketen.” No maapresya tayo ed saray espiritual tan materyal ya probisyon nen Jehova, nalikna tayoy liket diad puso tayo tan atan ya liket so mamabiskeg ed sikatayo pian naanosan tayo ray subok.

17. Base ed 1 Pedro 1:6, 7, antoy resulta no anosan tayo ray subok ya singa ginawa nen Jovidon?

¹⁷ Sineguro nen Jovidon ya manuna ed bilay to so panagdayew ed si Jehova. Agton balot nilingwanan ya kaukolan toy manmatoor ed tuan Dios. Sankanonot to imay imbaga nen Jesus ya: “Si Jehova a Dios mo so nepeg mon dayewen, tan sikato labat so nepeg mon panlingkoran.” (Luc. 4:8) Agtinundaan na saray komander tan sundalo si Jovidon ta labay dan onekal la bilang Tasi. Pero agew-labi ya manpipikasi tan kekerewen toy tulong nen Jehova pian ag-onsuko tan agto ibeneg so pananisia to. Anggano minaltrato si Jovidon, agton balot inikbanan so katooran to. Diad tua, walay walad sikato natan ya anggapod sikato antis ya inaresto, binugbog, tan impriso. Anto ’tan ey? Say asubok tan mas mabiskeg ya pananisia.—Basaen so 1 Pedro 1:6, 7.

18. Antoy gawaen tayo pian mansiansia tayon maliket?

¹⁸ Amta nen Jehova no anton talagay mamaliket ed sikatayo. No gawaen mo may taloran apantongtongan tayo, mansiansia kan maliket anggano ondadalan ka ed grabe iran subok. Kanian napruebaan mo met ya tua imay ibabaga na Biblia ya: “Maliket so totoo a say Dios da et si Jehova!”—Sal. 144:15.