1. Anton ilalo so inter nen Jehova ed sikatayo?

 INIKDAN itayo nen Jehova na balibalin ilalo o pag-asa ya manbilay na andi-anggaan. Say ilalo na arum et manbilay dia ed tawen bilang imortal ya espiritu. (1 Cor. 15:50, 53) Say ilalo na karaklan balet et manbilay na andi-anggaan diad dalin ya agla ra manermen tan mansakit. (Apo. 21:3, 4) Balanglan say ilalo tayo et manbilay na andi-anggaan diad tawen o diad dalin, importante tan espisyal ya maong so ilalo tayo.

2. Akin et segurado tayo ya nagawan nagawa so iilaloan tayon bilay ya andi-anggaan?

² Diad Biblia, say labay ya ibaga na salitan “ilalo” et say “pantalaran ed saray balibalin nagawa diad arapen.” Segurado tayo ya nagawan nagawa so bilay ya andi-anggaan ta si Aman Jehova ya mismo so angisipan. (Roma 15:13) Impaamta tod sikatayo iray gawaen to diad arapen, tan matalek tayo ya no antoy insipan to, tooren ton tooren. (Num. 23:19) Labalabay tan sarasarag nen Jehova iratan ya gawaen, kanian sayan ilalo tayo et aliwan “drowing” o pangarap labat. Seguradon nagawa itan.

3. Antoy pantongtongan tayo ed sayan artikulo? (Salmo 27:14)

³ Inar-aro itayo na Ama tayo ed tawen, tan labay ton mantiwala tayo ed sikato. (Basaen so Salmo 27:14.) No manilalo tan mantiwala tayod si Jehova, mabiskeg so liknaan tayo tan mansiansia so liket tayo anggan anto ni tay onsabin subok. Pantongtongan tayo no akin ya proteksion ed sikatayo so ilalon inter nen Jehova. Pian natalosan tayo itan, amtaen tayo nin unona no akin ya inkompara na Biblia so ilalo ed angkla tan hilmit. Insan tayo pantongtongan no panon tayon napabiskeg so ilalo tayo.

4. Akin et singa angkla so ilalo tayo? (Hebreo 6:19)

⁴ Diad sulat nen apostol Pablo ed saray Hebreon Kristiano, inkompara toy ilalo tayo ed angkla. (Basaen so Hebreo 6:19.)  Mabetbet ya onlulugan ed barko si Pablo, kanian amta to ya say angkla et uusaren pian agniyanor so barko. Aminsan nen manbiabiahe ed dayat, walay sinmabin maksil ya bagyo, kanian angipelag na angkla iray marino pian ag-ombasig ed kabatoan imay barko. (Gawa 27:29, 39-41) Say ilalo tayo so pinagka-angkla tayo, ta ontulong itan pian ag-itayo niyanor paarawi ed si Jehova no onsabi ray singa bagyon problema. Kalmado tayo labat ta amta tayon walay mas marakep ya bilay ya manatalaran ed sikatayo diad arapen. Singa bilang, imbaga nen Jesus ya amin tayon Kristiano et napairap o napasegsegang. (Juan 15:20) Pero no dalepdepen tayoy ilalo tayo, makapanmatoor tayo ed si Jehova anggano mair-irap so situasyon tayo.

5. Panon ya akatulong ed si Jesus so ilalo anggano amta ton ansakisakit so ipatey to?

⁵ Isipen pa no panon ya akatulong ed si Jesus so ilalo pian mansiansian matoor anggano amta ton ansakisakit so ipatey to. Nen Pentecostes 33 C.E., walay imbaga nen apostol Pedro ya base ed propesiya ya walad libro na Salmo. Idedeskribe na sayan propesiya so inkakalmado tan inkakpel nen Jesus: “Manbilay ak a walaay ilalo; ta agmo ak itilak ed Lubok, tan samay matoor ed sika et agmo abuloyan a nanengneng toy kabubulok. . . . Panoen mo ak na gayaga diad arapan mo.” (Gawa 2:25-28; Sal. 16:8-11) On, kombinsido si Jesus ya sikatoy bilayen lanlamang na Dios anggano ompatey, tan segurado ya nakaiba to lamet so Ama to ed tawen.—Heb. 12:2, 3.

6. Antoy imbaga na sakey ya brother tungkol ed ilalo?

⁶ Say ilalo tayo ed arapen so akatulong ed dakdakel ya agagi tayo pian naanosan day nanduruman subok. Imanoen so eksperiensya nen Brother Leonard Chinn ya taga England. Nen World War I, sikatoy impriso na gobierno ta agto labay so mansundalo. Imbartolina da diad loob na duaran bulan, insan da pinantrabaho na ambelbelat. Oniay insulat to: “Lapud saraman ya dinadalan ko, apatunayan ko ya kaukolan tayon talagay ilalo pian naanosan tayoy anggan anton subok. Maong labat ta wadtan so alimbawa nen Jesus, saray apostol, tan saray propeta, tan amta tayo iray balibalin sipan na Dios ed Biblia. Makatulong iraya pian mansiansian mabiskeg so ilalo tayo tan agtayo onsuko.” On, say ilalo so nagmaliw ya pinagka-angkla nen Leonard, tan ontan met komon ed sikatayo.

7. Akin et lalon ombiskeg so ilalo tayo no nasusubok tayo? (Roma 5:3-5; Santiago 1:12)

⁷ Diad tua, mas ombibiskeg so ilalo tayo no ondadalan tayod subok. Akin ey? On ta no diman tayo nasusubok, diman tayo mas naliliknay tulong tan panangaro nen Jehova. (Basaen so Roma 5:3-5; Santiago 1:12.) Kanian no alampasan tayoy sakey ya subok, mas matibay lay ilalo tayo kompara nen agano tayo ni labat ed katuaan. Say labay nen Satanas et onsuko tayo la no nantatabonan lay problema, pero tandaan tayo ya diad tulong nen Jehova, nasarag tayo iratan ya amin.

8. Akin et singa hilmit so ilalo tayo? (1 Tesalonica 5:8)

⁸ Ibabaga met na Biblia ya say ilalo tayo et singa hilmit. (Basaen so 1 Tesalonica 5:8.) Say sakey ya sundalo et aka-hilmit pian protektado so ulo to legan na laban. Diad espiritual ya pilalaban tayo, kaukolan tayon protektaan so isip tayo ta atan so pupuntiryaen nen Satanas. Nanduruman ideya tan tukso so uusaren to pian nasamalan toy nonot tayo. No panon ya importantin aka-hilmit ya lanang so sakey ya sundalo pian agnapuroan so ulo to tan ag-ompatey, importante ya sankanonot tayon lanang so ilalo tayo pian ag-onkapuy so katooran tayod si Jehova tan ag-itayo ompatey ed espiritual.

9. Antoy resulta no say sakey et agmanisia ed saray sipan na Dios?

 ⁹ No sankanonot tayoy ilalo tayon bilay ya andi-anggaan, seguradoen tayo ya saray desisyon tayo et base ed panlabayan nen Jehova. Pero no pandudaan tayoy sipan nen Jehova, ompan sarili tayo labat lay sankanonot tayo. Ontan so agawa ed arum ya Kristiano ed Corinto nensaman. Nandudaan day sipan na Dios ya bilayen to iray inaatey. (1 Cor. 15:12) Kanian sinulatan ira nen Pablo pian panonotan ira. Imbaga to ya no say sakey et agmanisia ya bilayen na Dios iray inaatey, gawaen to lay labalabay to. (1 Cor. 15:32) Ontan so kabibilay na dakel ya totoo natan. Lapud ag-ira manisia ed saray sipan na Dios, gagawaen day labalabay da ta maminpinsan met labat kunoy bilay. Pero duma tayo ed sikara ta baleg so tiwala tayo ya tooren na Dios so amin ya insipan to. On, no sankanonot tayon lanang so ilalo tayo, agtayo natukson aligen so kabibilay na saray makasarilin totoo, ta agtayo labay ya naderal so relasyon tayod si Jehova.—1 Cor. 15:33, 34.

10. Panon ya makatulong so ilalo pian naprotektaan itayo ed makasamal ya ideya nen Satanas?

¹⁰ Makatulong so ilalo pian nalabanan tayo so sakey nin uusaren nen Satanas pian nasamalan so nonot tayo—say ideya ya anggan antoy gawaen tayo et agtayo napaliket si Jehova. Singa bilang, ompan isipen na sakey a lingkor na Dios: ‘No Armagedon, agto ak lanlamang iliktar nen Jehova, ta dakdakel so nagagawaan kon aliwa.’ Ontan ya ontan imay imbaga nen Elifaz ed si Job. Kuan to: “Panon a say sakey a too et magmaliw a malinis?” Singa to ibabagan, ‘Anggapo tay too ya malinis ed pakanengneng na Dios.’ Onia ni ingey imbaga to: “Anggapoy talek [na Dios ed] saray anghel to, tan anggan say tawen et aliwan malinis ed pakanengneng to.” (Job 15:14, 15) Katilaan iratan ya amin! No bilang ta onsagi itan ed isip mo, tandaan mo ya si Satanas so nanlapuan na satan ya tila. Amta to ya no ontan so sankanonot mo, sukoan mo lay sarilim tan isipen mo ya agka makanepegan ya manbilay na andi-anggaan. Gawam so anggaay nayarian mo ya ekalen itan ed nonot mo tan manpokus ka ed saray sipan nen Jehova. Agmon balot pandududaan ya labay nen Jehova ya manbilay kay andi-anggaan, tan tulongan to kan makapanmatoor pian naawat mo itan ya premyo.—1 Tim. 2:3, 4.

11. Antoy nepeg tayon tandaan pian maan-anos tayon alagaren iray sipan na Dios?

¹¹ Ompan abaybayag tayo lan aalagaren so pakagawa na saray sipan na Dios, kanian no maminsan et singa nabuburagas lay ilalo tayo. Pero tandaan tayo imay ibabaga na Biblia ya “say sanlibon taon et sakey agew” labat ed si Jehova. Ompan isipen tayo ya “matantan” si Jehova ya onkiwas ta singa abaybayag tayo lan manaalagar, pero andi manaya. (2 Ped. 3:8, 9) Kanian no bilang ta singa nababayagan tayo, tandaan tayo ya tooren ton tooren so sipan to diad eksakton panaon ya inyeskedyul to. Antoy makatulong pian mansiansian mabiskeg so ilalo tayo legan tayon maan-anos ya aalagaren so pakagawa na saray sipan na Dios?—Sant. 5:7, 8.

12. Base ed Hebreo 11:1, 6, antoy koneksion na ilalo tan pananisia?

¹² Mansiansian mabiskeg so ilalo tayo no maapit tayo ed si Jehova. Akin ey? On ta sikato so manggawa ed amin ya iilaloan tayo. Diad tua, ibabaga na Biblia ya mankonektaan so ilalo tan pananisia. Pian tudtua ed sikatayo so ilalo tayo, dapat mabiskeg so pananisia tayo ya talagan ‘wala si Jehova,’ tan ikdan toy premyo “iramay masimoon a manaanap ed sikato.” (Basaen so Hebreo 11:1, 6.) No kabkabat tan  maapit tayod si Jehova, agtayo pandudaan ya tooren ton amin so sipan to. Pantongtongan tayo natan no anto ray nepeg tayon gawaen pian mas onapit tayo ed sikato tan mas ombiskeg so ilalo tayo.

13. Antoy gawaen tayo pian mas onapit tayo ed Dios?

¹³ Manpikasi ed si Jehova, tan basaen so Salita to. Anggano agtayo nanengneng si Jehova, sarag tayoy onapit ed sikato. Labalabay to ya mitongtong tayo ed sikato diad pikakasi, tan ipapaseguro to ya dengelen to tayo. (Jer. 29:11, 12) Mitotongtong si Jehova ed sikatayo panamegley na Biblia. Kanian singa tayo ondedengel ed sikato no babasaen tan dadalepdepen tayo itan. Ombibiskeg so ilalo tayo kada no nababasa tayo no panon ya inasikaso nen Jehova iray matoor ya lingkor to. Tandaan tayo ya amin ya walad Biblia et makatulong pian makapan-anos tan ombiskeg tayo. Impaisulat itan nen Jehova pian “nawalaan itayo na ilalo.”—Roma 15:4.

14. Akin et maabig no dalepdepen tayo no anto la ray ginawa nen Jehova parad saray lingkor to?

¹⁴ Dalepdep mo no panon ya tinoor nen Jehova iray sipan to. Singa bilang, isip mo pay sipan to ed si Abraham tan Sara ya nawalaan iray anak. Masiken tan akulaw la rad saman kanian singa imposible la. (Gen. 18:10) Pero antoy reaksion nen Abraham? Ibabaga na Biblia ya si Abraham et “walaan na pananisia a sikatoy magmaliw ya ama na dakel a nasyon.” (Roma 4:18) Diad pakanengneng na too, singa anggapo lay ilalo ran nawalaan na anak. Pero agan balot nanduaruwa si Abraham. Sulit so impanalagar to ta tinoor nen Jehova so sipan To. (Roma 4:19-21) Antoy naaralan tayod saya? Anggapoy imposible ed si Aman Jehova. No antoy insipan to, nagawan nagawa.

15. Akin et importante ya isipen mo no anto la ray ginawa nen Jehova parad sika?

¹⁵ Isip mo no anto la ray ginawa nen Jehova  parad sika. Dalepdep mo no panon ya tinmua ed bilay mo iray sipan ya walad Biblia. Singa bilang, insipan nen Jesus ya itarya na Ama to iray pankaukolan mo. (Mat. 6:32, 33) Impaseguro met nen Jesus ya ikdan ka nen Jehova na masanton espiritu no kerewen mo itan. (Luc. 11:13) Di ba, totooren iratan nen Jehova? Ompan wala ni ray naisip mon arum ya sipan ed Biblia ya apatunayan mo ya talagan totooren nen Jehova. Singa bilang, insipan na Dios ya perdonaen, ligliwaen, tan pakanen to ka ed espiritual. (Mat. 6:14; 24:45; 2 Cor. 1:3) No dalepdepen mo iray ginawa la nen Jehova parad sika, mas ombiskeg so ilalom ed saray gawaen to ni diad arapen.

16. Akin et mabmablin regalo so ilalo tayo?

¹⁶ Say ilalo tayon manbilay na andi-anggaan et marakdakep tan mabmabli ya regalo nen Jehova. Labalabay tayo la itan ya nagawa, tan segurado tayo ya ontua itan. Atan so pinagka-angkla tayo, kanian agnabuyak so katooran tayo anggano ondalan tayo ed saray subok, panamairap, tan anggan ipapatey ni ingen. Singa met itan hilmit. Protektaan toy nonot tayo pian ag-itan nasamalan na saray katilaan nen Satanas, tan ag-itayo natukson manggawa na aliwa. Say ilalo tayon manbilay na andi-anggaan et patunay ya inar-aro itayo na Dios. No dalepdepen tayo itan, lalon onapit so liknaan tayod sikato. Agtayo sirin aabuloyan ya onkapuy so ilalo tayo.

17. Akin et maliket tayo ed ilalo tayo?

¹⁷ “Manliket kayod ilalo,” so imbaga nen apostol Pablo ed saray Kristiano ed Roma nen sinulatan to ra. (Roma 12:12) Maliket si Pablo anggano dakel ya irap so dinalan to lapud amta to ya no manmatoor, seguradon awaten toy andi-anggaan ya bilay diad tawen. Segurado tayo met ya tooren nen Jehova so amin ya sipan to. On, maliket tayo ta walay ilalo tayo! Oniay insulat na salmista: “Maliket so too . . . a say ilalo to et walad si Jehova, [say Dios ya] lawas a mansiasiansian matoor.”—Sal. 146:5, 6.