Nen 1923, wala ray pananguman ed organisasyon ya lalon amabiskeg ed pankakasakey na saray Estudyante na Biblia. Manlapud satan ya taon, nabasa la ed The Watch Tower so eksplinasyon na teksto ya tinalakay da ed sinimban aral da, ya tatawagen ya “Prayer, Praise, and Testimony Meeting.” Angimprinta met ira na kalendaryo. Nanengneng ditan so teksto ya talakayen da diad sinimban aral. Kada agew et walay akasulat ya kansion ya sarag dan kansionen diad personal o family study da.

Diad aral na saray Estudyante na Biblia, sarag day mangibaga na “testimony” da. Nayarin mangi-share ira na eksperiensya da ed ministeryo, saray labay dan pisalamatan ed si Jehova, tan sarag day mangansion o manpikasi ni ingen. Oniay nanonotan nen Sister Eva Barney, ya abautismoan nen 1923, nen 15 so taon to: “No labay moy man-testimony, onalagey ka tan nayarin say introduksion mo et ‘Misatsalamat ak ed Katawan ed amin ya kamaongan tod siak.’” Wala ray agagi ya labalabay day man-testimony. Intuloy nen Sister Barney: “Wala tay masiken ya brother, si Brother Godwin, ya mabaybayag ya mansalita lapud dakdakel so labay ton pisalamatan ed Katawan. Pero no nalikas na asawa to ya aburido la may mangikokondukta na aral, guyoren toy amerikana nen Brother Godwin, kanian ontunda lan mansalita tan onyurong la.”

Maminsan ed kada bulan, walay nagagawan espisyal ya Prayer, Praise and Testimony Meeting ed kada kongregasyon. Oniay imbaga na The Watch Tower ya Abril 1, 1923: “Kapaldua ed sayan aral et parad saray testimony tungkol ed eksperiensya ed ministeryo ya makapaseseg ed agagi. . . . Seguradon onelet so pankakaaro tayo lapud sarayan aral.”

Sakey ed saray apaseseg ya maong ed sarayan aral et si Charles Martin, ya publisher ed Vancouver, Canada, ya diad saman et 19 so taon to. Oniay nanonotan to: “Dia’k naaralan no antoy ibagak no manpulong ak ed kaabungan. Dakel so narerengel kon eksperiensya na saray agagi diad panagpulong, kanian wala lay ideyak no antoy ibagak tan no antoy iyebat ko no wala ray onkontra.”

Lalon inmelet so pankakasakey na agagi lapud panagpulong. Oniay inyanunsio na The Watch Tower ya Abril 1, 1923: “Pian mankakasakey tayon  amin diad kimey tayo, apili so agew na Martes, Mayo 1, 1923 ya agew na pampulong tayon amin. Tan diad ontumbok iran bulan, say unonan Martes et agew na panagpulong. . . . Komon ta seguroen na amin ya agagi ed kongregasyon ya makapibiang ira ed sayan kimey.”

Anggan saray kabataan ya Estudyante na Biblia et akila met lan nampulong. Oniay nanonotan nen Hazel Burford ya 16 to ni labat ed saman: “Wala ray presentasyon ya nabasa ed Bulletin a ya in-memorize mi. Makulikuli ak ya manpulong kaibak si Lakik.” Pero abigla si Sister Burford ta walay kinmontra ed pampupulong to. Kuan to: “Wala tay sakey ya brother ya imbaga ton agak ni dapat mitongtong ed saray totoo. Diad saman et wala ray Estudyante na Biblia ya agda ni natatalosan ya anggan say ‘kalangweran a lalaki tan kalangweran a bibii’ et nirayew day Makapadinayew ya Manamalsa tayo.” (Sal. 148:12, 13) Pero agnampaapekto si Sister Burford. Sikatoy naimbitaan ya manaral ed komaduan klase na Gilead School tan niyasain ya missionary ed Panama. Diad inlabas na panaon, atalosan lanlamang na saray agagi ya nayari lan manpulong iray kabataan.

Akatulong met iray kombension pian lalon mankakasakey iray agagi. Diad maslak ya kombension, walay uksoyan ya panagpulong. Singa bilang, diad sakey ya kombension ed Winnipeg, Canada, amin ya inmatendi et nampulong nen Marso 31. Dakel so napupulongan lapud satan ya uksoyan. Nen Agosto 5, manga 7,000 so inmatendi ed sakey nin kombension diad Winnipeg. Atan la so sankarakelan ya attendance diad saman ya panaon ed Canada.

Say agbalot nalingwanan ya kombension na saray Estudyante na Biblia nen 1923 et agawa ed Los Angeles, California nen Agosto 18-26. Pigaran simba antis na kombension, in-advertise itan diad saray dyaryo, tan masulok ya 500,000 ya imbitasyon so imbunog na saray Estudyante na Biblia. Wala met iray impeket ya banner diad saray luluganan.

 Nen Sabado, Agosto 25, impaliwawa nen Brother Rutherford so tema ya “Saray Karnero tan Kanding.” Impaliwawa to ya “saray karnero” et ontutukoy ed saray totoon walaan na dugan kipapasen na puso ya manbilay diad paraison dalin. Binasa to met so sakey ya resolusyon ya tinawag ya “Sakey ya Warning.” Impaamta na sayan resolusyon iray aliwliwan kagagawa na Kakristianoan, tan pinaseseg to ray mapaabeban totoo ya ompaway la rad “Makapanyarin Babilonia.” (Apo. 18:2, 4) Ag-abayag, minilyon ya kopya na sayan resolusyon so imbunog na saray Estudyante na Biblia diad interon mundo.

Diad sampot ya agew na kombension, masulok ya 30,000 so akarengel ed paliwawa nen Brother Rutherford ya say tema to et “Paarap La ed Armagedon so Amin ya Nasyon, Pero Minilyon a Mabilay Natan et Aglan Balot Ompatey.” Inilaloan la na saray Estudyante na Biblia ya dakel so onatendi kanian nirentaan da so Los Angeles Coliseum, ya balon paalagey ni ed saman. Pian seguradon narengel na amin so paliwawa, inusar na agagi imay loudspeaker system na stadium. Diad saman et balo ni labat iman ya teknolohiya. Dakel met so dinmengel ed satan ya paliwawa diad radyo.

Nen 1923, inmaligwas so panagpulong ya kimey diad Africa, Europe, India, tan South America. Diad India, si Brother A. J. Joseph so angasikaso ed pam-publish na saray literatura tayo ed Hindi, Tamil, Telugu, tan Urdu. Ginawa to itan legan ton lelegpeten so asawa to tan anemiran anak to.

Diad Sierra Leone, si Brother Alfred Joseph tan Leonard Blackman et nansulat ed world headquarters diad Brooklyn, New York pian onkerew na tulong. Nen Abril 14, 1923, naebatan so kerew da. Oniay inistorya nen Alfred: “Aminsan ya Sabado ya lablabi lan maong, walay tinmawag ed telepono.” Malungog kuno may boses to may tinmawag. Kuan to: “Sika may sinmulat ed Watch Tower Society ta onkekerew kayoy tulong diad panagpulong?” “On, siak man,” so kuan nen Alfred. “E, siak so imbaki ra.” Amay tinmawag et si William R. Brown. Sikatoy nanlapud Caribbean tan kakkasabi tod Sierra Leone ed saman ya agew. Kaiba toy asawa ton si Antonia, tan saray angkelag nin ananak dan bibii, si Louise tan Lucy. Sa wakas, wala lay sinmabi ya ontulong!

Oniay intuloy nen Alfred: “Kaimbuasan to, nen manaaral kami na Biblia nen Leonard, walay  balbaleg ya too ya sinmabi ed puerta, si Brother Brown. Mangapoy-apoy so seseg to ed katuaan kanian labay to la kunoy man-public talk diad ontumbok ya agew.” Anggapo ni sakey bulan, nipalima la nen Brother Brown so amin ya literaturan awit to kanian impawitan da lamet na 5,000 ya libro. Pero aganggano met ya naupot. Kasin lapud satan et akabkabat si Brother Brown ya managlako na libro? Andi. Diad abayag ya impanlingkor to ed si Jehova, sikatoy akabkabat ed tawag ya Bible Brown, ta diad saray paliwawa to et lanang ton bibitlaen no antoy ibabaga na Biblia.

Diad Germany balet, nandesisyon iray agagi ya iyalis so branch office ta melmelag la may opisina diad syudad na Barmen. Tan sakey ni, abalitaan da ya asingger lan lusoben na saray sundalo na France itan ya syudad. Akaromog iray agagi na bilding diad Magdeburg ya balibalin pan-imprintaan. Nen Hunyo 19, inyalis na saray brother diad balon Bethel ed Magdeburg so amin ya kagawaan parad panag-imprinta tan arum ni ran gamit. Diad samay agew ya naamtaan na world headquarters ya akaalis la ra, nibalita ed saray dyaryo ya asakop la na France so syudad na Barmen. Aliklikna na agagi ya tinulongan tan prinotektaan ira nen Jehova.

Diad Brazil, si George Young, ya nampulong lad nanduruman bansa, et angorganisa na branch office tan inggapo ton im-publish so The Watch Tower diad lenguahen Portuguese. Kalabas labat na pigaran bulan, masulok ya 7,000 ya literatura so nipalima to. Say sakey ya akontak to ed Brazil et si Sarah Ferguson. Babasaen to la so The Watch Tower manlapu la nen 1899. Agni balet abautismoan anggano indedika to lay sarili to ed si Jehova. Kayari pigaran bulan, nampabautismo si Sister Ferguson tan say apatiran anak to.

Nen manampot la so taon 1923, oniay imbaga na The Watch Tower ya Disyembre 15, 1923 tungkol ed epekto na nankakasakey ya panagdayew na saray Estudyante na Biblia: “Mapatpatnag ya binmiskeg iray kongregasyon. Iparaan tayo so sarili tayo ed dakel nin kimey. Itultuloy tayoy maseseg tan maliket ya panlilingkor tayo ed Dios diad ontumbok ya taon.”

Eksayting met so taon 1924. Pigaran bulan la ya ipapaalagey na saray Bethelite so sakey ya pasilidad diad Staten Island, ya asingger labat ed headquarters diad Brooklyn. Asumpal itan ya pasilidad nen bandad gapo na 1924, tan akatulong itan diad pankakasakey na saray Estudyante na Biblia tan diad pangipulong na maong a balita.