1. Antoy ibabaga na sakey ya anghel, tan antoy epekto to itan ed sikatayo?

 NO WALAY anghel ya mitongtong ed sika, kasin dengelen moy ibaga to? Diad tua, walay anghel ya mitotongtong natan “diad kada nasyon tan tribu tan lenguahe tan rasa.” Antoy ibabaga to? Nia so mensahe to: “Takotan yoy Dios tan igloria yo . . . Mandayew kayo ed samay nanggawa ed tawen tan dalin.” (Apo. 14:6, 7) On, si Jehova labat so tuan Dios kanian sikato labat so nepeg tayon dayewen. Balbaleg ya kagalangan ya inikdan itayo nen Jehova na tsansa ya mandayew ed sikato diad espiritual ya templo to!

2. Anto tay espiritual ya templo nen Jehova? (Nengnengen met so kahon ya “ Duma Itan ed . . . ”)

² Anto tay espiritual ya templo? Say espiritual ya templo et aliwan literal ya bilding. Atan imay uksoyan nen Jehova parad dugan panagdayew ya akabase ed dondon bagat nen Jesus. Iner tayo nabasa iray detalye tungkol ed satan ya templo? In-explain itan nen apostol Pablo nen sinulatan to ray Hebreon Kristiano ya taga Judea nen inmunan siglo. b

3-4. Akin et mapaga si Pablo ed saray Hebreon Kristiano diad Judea, tan panon to ran tinulongan?

³ Akin et sinulatan nen Pablo iray Hebreon Kristiano ya taga Judea? Walay duara ya posiblin rason. Unona, labay to ran  pasesegen. Maslak ed sikara et Judaismo so abangonan dan relihyon. Kanian nen nagmaliw iran Kristiano, seguro babalawen ira na saray lider na Judaismo. Akin ey? On ta diad Judaismo et walay balibalin templo ya pandadayewan da, walay nanenengneng dan altar ya pambabagatan na ayayep, tan wala ray saserdote da. Anggapo iratan ya amin ed saray Kristiano. Kanian ompan makakaibeg ira, tan atan so rason ya kinmapuy so pananisia ra. (Heb. 2:1; 3:12, 14) Ompan say arum ed sikara ingen et natutukso lan ompawil ed Judaismo.

⁴ Komadua, impa-realize nen Pablo ed saray Hebreon Kristiano ya singa ni ra ugaw ed espiritual. Kaukolan dan talosan iray balo tan aralem ya katuaan​—say “anawet a naakan” ya walad Salita na Dios. (Heb. 5:11-14) Mapatnag ya say Mosaikon Ganggan ni so tutumboken na arum ed sikara. In-explain balet ed sikara nen Pablo ya anggano mangiyapay iray ayayep ta atan so ibabaga na Mosaikon Ganggan, ag-itan sapat pian naperdona so kasalanan da. Atan so rason no akin ya “pinaandi” la so Mosaikon Ganggan. Insan to ra tinulongan pian natalosan da iray aralem ya katuaan. Impanonot tod sikara ya “mas maabig ya ilalo” so naawat da lapud dondon bagat nen Jesus ta atan so ontulong ed sikara ya onapit ed Dios.​—Heb. 7:18, 19.

5. Antoy nepeg tayon talosan diad libron Hebreo, tan akin et importante ya natatalosan tayo itan?

⁵ Imbaga nen Pablo ed saray Hebreon Kristiano so rason no akin ya mas maong ya aminpigapiga so panagdayew da no ikompara ed Judaismo. Say panagdayew na saray Judio et “anino [labat] na saray bengatlan onsabi, balet say tudtua et say Kristo.” (Col. 2:17) No imbagan anino, say nanengneng mo labat et amay hugis to may sakey ya bagay. Aliwan satan imay aktual ya bagay. Amay panagdayew na saray Judio et singa labat anino ta isisimbolo toy mas maabig ya uksoyan na panagdayew ya isalat nen Jehova. Kaukolan tayon talosan itan ya uksoyan ta atan so paraan pian naperdona iray kasalanan tayo tan awaten nen Jehova so panagdayew tayo. Pantongtongan tayo sirin iray detalye ed libron Hebreo. Tan pankomparaen tayo so “anino” (say panagdayew na saray Judio nensaman) tan no antoy isisimbolo to (say panagdayew na saray Kristiano). Importante ya amta tayo itan pian natalosan tayo no anto tay espiritual ya templo, tan no antoy papel tayo ditan.

6. Antoy usar na tabernakulo nensaman?

⁶ Say anino. Say eksplinasyon nen Pablo et tinmelek ed samay tabernakulo ya impaalagey nen Moises nen 1512 B.C.E. (Nengnengen so tsart ya “Say Anino tan say Isisimbolo To.”) Say tabernakulo et tolda ya nayarin tuopen tan baklasen. Nensaman, no onalis na kampo iray Israelita, iyalis da met itan. Manga 500 ya taon dan inusar itan ya anggad nipaalagey so permanentin templo diad Jerusalem. (Exo. 25:8, 9; Num. 9:22) Oonla iray Israelita ed sayan “tolda a pantitiponan” pian mandayew ed Dios tan mangiyapay na saray bagat. (Exo. 29:43-46) Pero walay mas marakep ya isisimbolo na tabernakulo.

7. Kapigan inletneg so espiritual ya templo?

⁷ Say isisimbolo to. Say tabernakulo nensaman so “mangiyaanino ed saray bengatlan walad tawen.” Tan isisimbolo toy baleg ya espiritual a templo nen Jehova. Imbaga nen Pablo ya “sayan tabernakulo et sakey a simbolo nipaakar ed kaplesan a panaon.” (Heb. 8:5; 9:9) Labay ton ibaga sirin, nen sinulatan to iray Hebreon Kristiano, wala la so espiritual ya templo. Niletneg itan nen 29 C.E. Diad satan ya taon et abautismoan si Jesus, sikatoy alanaan na masanton espiritu tan ginmapon nanlingkor bilang “sankaabigan ya atagey a saserdote” nen Jehova diad espiritual ya templo To. c​—Heb. 4:14; Gawa 10:37, 38.

8-9. Base ed Hebreo 7:23-27, antoy pidumaan na saray atagey ya saserdote ed Israel no ikomparad si Jesu-Kristo, say sankaabigan ya Atagey a Saserdote?

⁸ Say anino. Say atagey a saserdote so angirepresenta ed saray Israelita pian makaasingger ira ed Dios. Say sankaunaan ya atagey a saserdote ed Israel et si Aaron. Sikatoy tinuro nen Jehova nen indedika so tabernakulo. Pero imbaga nen Pablo ya “dakel so kaukolan ya onsalat a saserdote ta ag-ira makapantultuloy a saserdote lapud ipapatey.” d (Basaen so Hebreo 7:23-27.) Sakey ni, saray nagmaliw ya atagey ya saserdote ed Israel et aliwan perpekto, kanian kaukolan da met so mangiyapay na bagat parad kasalanan da. Pero duma si Jesu-Kristo, say sankaabigan ya Atagey a Saserdote.

⁹ Say isisimbolo to. Bilang Atagey ya Saserdote, si Jesu-Kristo et “sakey a lingkor . . . diad tuan tabernakulo, a si Jehova so angipaalagey, aliwan say too.” (Heb. 8:1, 2) Imbaga nen Pablo ya si Jesus et “manbilay ya anggad angga” kanian “anggapoy kaukolan ya onsalat ed sikato bilang saserdote.” Imbaga to met ya si Jesus et “ag-arutakan, [tan] biig ed saray makasalanan.” Aliwan singa saramay atagey a saserdote ed Israel, “agto kaukolan so mangiyapay na saray bagat ya inagew-agew” parad kasalanan to. Amay altar tan saray bagat ey, anto met kasi isisimbolo da?

10. Antoy isisimbolo na saray bagat ya iyaapay diad altar?

¹⁰ Say anino. Diad paway na lolooban na tabernakulo et wadtan so altar ya pangibabagatan na saray ayayep ya iyapay parad si Jehova. (Exo. 27:1, 2; 40:29) Pero aliwan sapat irayan bagat pian talagan naperdona so amin ya kasalanan na totoo. (Heb. 10:1-4) Isisimbolo da so alenleneg ya bagat ya dondonen toy amin ya kasalanan na totoo.

11. Diad anton altar inyapay nen Jesus so sarili to bilang bagat? (Hebreo 10:5-7, 10)

 ¹¹ Say isisimbolo to. Amta nen Jesus ya say rason no akin ya sikatoy imbaki nen Jehova diad dalin et iyapay toy bilay to pian nadondon iray totoo. (Mat. 20:28) Kanian nen nampabautismo, tanda iman ya sikatoy akaparaan la ya gawaen so panlabayan nen Jehova. (Juan 6:38; Gal. 1:4) Say simbolikon altar ya angiyapayan nen Jesus na sarili to et isisimbolo toy “linawa” o panlabayan nen Jehova. Say linawa nen Jehova et iyapay na Anak to so perpekton bilay to. Inyapay itan nen Jesus ya “pinsanan” pian permanente lan nasakbongan o nasakoban so kasalanan na amin ya mangipanengneng na pananisia ed sikato. (Basaen so Hebreo 10:5-7, 10.) Aramay walad dalem na tabernakulo ey, antoy isisimbolo da?

12. Siopa labat so nayarin onloob ed samay duaran kuarto diad tabernakulo?

¹² Say anino. Amay tabernakulo tan samay templo ed Jerusalem et pareho so inkadesinyo da. Diad loob et walay duaran kuarto​—say “Masanton Pasen” tan say “Sankasantosan.” Walay aburdaan ya kurtina ya pinagka-divider o mangibibiig ed satan ya duaran kuarto. (Heb. 9:2-5; Exo. 26:31-33) Diad loob na Masanto et wadtan so kandelero ya gawad gold, say altar ya pampopoolan na insenso, tan say lamisaan na iyaapay ya tinapay. Saray alanaan a saserdote labat so nayarin onloob ed Masanto pian gawaen iray sagradon kimey da. (Num. 3:3, 7, 10) Diad loob na Sankasantosan so kulaan na kaban na sipanan ya gawa met ed gold. Isisimbolo toy presensia nen Jehova.  (Exo. 25:21, 22) Say atagey a saserdote labat no nayarin onloob ed Sankasantosan diad tinaon ya Agew na Pananakbong. (Lev. 16:2, 17) Kada taon, sikatoy onloob ditan ya walay awit ton dala na ayayep ya mansakbong ed mismon kasalanan to tan say kasalanan na interon Israel. Kayari na dakel ya taon, inusar nen Jehova so masanton espiritu to pian ipaamta so isisimbolo na sarayan parte na tabernakulo.​—Heb. 9:6-8. e

13. Antoy isisimbolo na Masanto tan Sankasantosan?

¹³ Say isisimbolo to. Imbaga na Biblia ya walay 144,000 ya disipulo nen Jesus ya nilanaan na masanton espiritu tan espisyal so relasyon da ed si Jehova. Sikaray manlingkor ya saserdote diad tawen kaibay Jesus. (Apo. 1:6; 14:1) Diad tabernakulo, say Masanto et isisimbolo toy kipapasen da diad dalin bilang alanaan ya “ananak na Dios.” (Roma 8:15-17) Isisimbolo na Sankasantosan so tawen ya panaayaman nen Jehova. Say “kurtina” ya mangibibiig ed Masanto tan Sankasantosan et isisimbolo toy laman nen Jesus bilang too. Anggad agto ni nilakseb itan, agmakaloob diad tawen bilang Atagey a Saserdote na espiritual ya templo. Nen inyapay nen Jesus so laman to bilang dondon parad totoo, naikdan na pribilehyon manbilay ed tawen so amin ya alanaan ya Kristiano. Kaukolan da met ya lakseben so laman da pian makaloob irad tawen. (Heb. 10:19, 20; 1 Cor. 15:50) Kayari na inkioli nen Jesus, sikatoy linmoob ed Sankasantosan na espiritual ya templo. Tan diad ilabas na panaon et diman met so laen na amin ya alanaan ya Kristiano.

14. Base ed Hebreo 9:12, 24-26, akin et mas maong ya aminpigapiga so uksoyan na panagdayew ed si Jehova diad espiritual a templo?

¹⁴ On, mas maong ya aminpigapiga so uksoyan na panagdayew ed si Jehova ya akabase ed dondon bagat tan inkasaserdote nen Jesu-Kristo. Say Sankasantosan ya nilooban na atagey a saserdote ed Israel nensaman et ginawa labat na too tan say awit to et dala na ayayep. Pero si Jesus et “linmoob diad mismon tawen,” diad mismon arapan nen Jehova. Atan la so sankasantosan ed amin ya pasen! Ditan to impresenta so bili na perpekton bilay to bilang too ta “pian ekalen toy kasalanan [tayo] diad impangibagat to ed inkasikato.” (Basaen so Hebreo 9:12, 24-26.) On, say bagat labat nen Jesus so makasakbong o makaekal ed kasalanan tayo diad andi-anggaan. Balanglan say ilalo tayo et manbilay diad tawen o diad dalin, amin tayo et makapandayew ed si Jehova diad espiritual ya templo to. Atan so onsublay ya pantongtongan tayo.

15. Siopa ray mankikimey diad sular na tabernakulo?

¹⁵ Say anino. Walay sular to may tabernakulo. Naalar tan maawa-awang itan ya sular. Ditan gagawaen na saray saserdote iray nanduruman kimey da. Anto ray walad sular na tabernakulo? Wadtan so balbaleg ya altar parad apay a popoolan. Wadtan met so balbaleg ya palanggana ya nankargay danum ya uusaren na saray saserdote pian linisan so sarili da antis dan gawaen so sagradon kimey da. Say altar tan palanggana et parehon gawa ed gansa o copper. (Exo. 30:17-20; 40:6-8) Nen wala lay templo, wala met so tatawagen ya paway a sular. Anggan saray aliwan saserdote et nayarin onla ditan pian mandayew ed Dios.

16. Siopa ray manlilingkor ed loob tan paway ya sular na espiritual ya templo?

¹⁶ Say isisimbolo to. Saray alanaan ya agagi nen Jesus et kaiba ton manlingkor diad tawen bilang saserdote. Pero legan ya wadia ni rad dalin, matoor iran manlilingkor diad loob ya  sular na espiritual ya templo. Say balbaleg ya palanggana ya nankargay danum so mangipapanonot ed sarayan alanaan tan ed amin ya Kristiano ya kaukolan tayoy mansiansian malinis ed moral tan espiritual. Iner balet so kawalaan na “baleg ya ulop” ya matoor ya onsusuporta ed saray alanaan ya agagi nen Kristo? Anengneng nen apostol Juan ya wala rad “arap na trono na Dios” tan “agew-labi iran manlilingkor ed sikato diad templo to.” Singa ra walad paway ya sular na espiritual ya templo nen Jehova. (Apo. 7:9, 13-15) Balbaleg ya kagalangan ya inikdan itayo nen Jehova na tsansa ya mandayew ed sikato diad espiritual ya templo to!

17. Anto ran bagat so iiter tayod si Jehova natan?

¹⁷ Sikatayo ran Kristiano natan et singa tayo mangibabagat ed si Aman Jehova kada no uusaren tayoy panaon, biskeg, tan amin ya walad sikatayo parad Panarian. Balbaleg itan ya pribilehyo! Singa impaseseg nen apostol Pablo ed saray Hebreon Kristiano, naynay tayon “mangiyapay ed Dios na bagat a panangidayew, . . . say bunga na saray bibil tayo a mangiyaabawag ed ngaran to diad publiko.” (Heb. 13:15) Naipanengneng tayod si Jehova ya papablien tayoy pribilehyo tayon mandayew ed sikato no iter tayoy ‘the best’ tayo ed panaglingkor.

18. Base ed Hebreo 10:22-25, anto ray agtayo dapat papaulyanan tan agtayon balot lilingwanan?

¹⁸ Basaen so Hebreo 10:22-25. Diad bandad sampot na sulat nen Pablo ed saray Hebreon Kristiano, binitla to so nanduruman kabiangan na panagdayew tayo ya agtayo dapat papaulyanan. Imbaga to ya masimoon tayon manpikasi, iyabawag tayo ed publiko so ilalo tayo, pablien tayo iray pantitipon na kongregasyon, tan manpapasesegan itayo, “nagkalalo la ta nanenengneng tayon manasingger lay agew” nen Jehova. Diad bandad sampot na Apocalipsis, oniay amidua ya imbaga na anghel nen Jehova: “Mandayew kad Dios.” (Apo. 19:10; 22:9) Komon ta agtayo lilingwanan so aralem ya katuaan tungkol ed baleg ya espiritual ya templo nen Jehova, tan lanang tayon pablien so balbaleg ya kagalangan tayo ya mandayew ed Makapanyarin-amin a Dios tayo!