1-2. Antoy agawa nen manaakar may duaran disipulo nen Jesus paonlad Emaus?

 NISAN 16, 33 C.E. so petsa ed saman. Maer-ermen tan natatakot iray disipulo nen Jesus. Duara ed sikara so nanakar ya paarap ed Emaus, sakey ya baryo ya manga 11 kilometro so kaarawi to ed Jerusalem. Makapkapuy so liknaan da ta si Jesus ya bibidbiren dan Mesias et inatey la. Anggapo la may toon iilaloan dan mangiter na inawa ed sikara. Say agda amta balet, walay makapalikliket ya nagawa ed sikara diad dalan.

² Legan iran mantotongtong, walay lakin inmasingger ed sikara tan binansagan to ran nanakar. Inistorya dad sayan laki imay agawad si Jesus. Antoy reaksion to may laki? Impaliwawa tod sikara iray propesiya “manlapud saray sulat nen Moises tan amin a Propeta” pian natalosan da no akin ya kaukolan ya manirap tan ompatey so Mesias. Seguradon mankelaw imay duaran disipulo ed imbaga to may laki. Kasabi dan talo ed Emaus, diman da alikas ya si Jesus iman ya pinaoli la na Dios! Seguradon malikeliket ira nen naamtaan dan mabilay so Mesias!—Luc. 24:​13-35.

3-4. (a) Panon ya tinulongan nen Jesus iray disipulo to, tan antoy epekto to ’tan ed sikara? (Gawa 1:3) (b) Antoy pantongtongan tayo ed sayan artikulo?

³ Aminpigapigan nampanengneng si Jesus ed saray disipulo to diad samay sampot ya 40 agew to diad dalin. (Basaen so Gawa 1:3.) Kanian amay ermen ya nalilikna na saray disipulo to et asalatan na liket. Tan no dati et natatakot ira, natan et makmakpel  la ra, tan akaparaan la ran ipulong tan ibangat so maong a balita na Panarian. a

⁴ Dakel so naaralan tayod ginawgawa nen Jesus diad sampot ya 40 agew to diad dalin. Pantongtongan tayod sayan artikulo no panon ya inusar nen Jesus itan ya panaon pian (1) pasesegen iray disipulo to, (2) tulongan iran mas natalosan so Kasulatan, tan (3) ipasal ira parad kaaruman ya responsabilidad. Diad satan ya talo, nengnengen tayo no panon tayon naalig si Jesus.

PASESEG MOY ARUM

5. Akin et kakkaukolan na saray disipulo nen Jesus so panamaseseg?

⁵ Kakkaukolan na saray disipulo nen Jesus so panamaseseg. Akin ey? Dakel so insakripisyo ra pian natumbok day Jesus. Say arum ed sikara et tinaynan day abung, pamilya, tan negosyo ra. (Mat. 19:27) Say arum ni ingen ed sikara et agla labay ya piulopan na saray kapara dan Judio nen nagmaliw iran disipulo nen Jesus. (Juan 9:22) Mabulos iran nansakripisyo ta manisia iran si Jesus so insipan ya Mesias. (Mat. 16:16) Kanian nen inatey si Jesus, pakalikna ra et singa asayang so amin ya sagpot da tan aminpinsan ya naandi so ilalo ra.

6. Antoy ginawa nen Jesus kayarin mismo na inkioli to?

⁶ Natatalosan nen Jesus no akin ya maer-ermen iray disipulo to. Agto inisip ya makapuy so espiritualidad da. Amta to ya normal labat ya ontan so nalikna ra ta inateyan iray kaaro. Kanian diad unonan agew ni labat na inkioli to, pinaseseg to lan tampol iray kakaaro to. Singa bilang, nen onaakis si Maria Magdalena diman ed angiponponan ed si Jesus, nampanengneng si Jesus ed sikato. (Juan 20:​11, 16) Nampanengneng met si Jesus ed samay duaran disipulo ya abitla ed gapo. Tan nampanengneng met ed si apostol Pedro. (Luc. 24:34) Antoy naaralan tayo ed sayan ginawa nen Jesus? Pian naebatan itan, pantongtongan tayo imay agawa nen nampanengneng si Jesus ed si Maria Magdalena.

7. Base ed Juan 20:​11-16, antoy anengneng nen Jesus ya gagawaen nen Maria nen kabkabuasan na Nisan 16, tan antoy ginawa nen Jesus pian napaseseg to? (Nengnengen met so litrato.)

⁷ Basaen so Juan 20:​11-16. Nen kabkabuasan na Nisan 16, wala ray bibiin disipulo nen  Jesus ya linma ed samay angiponponan ed sikato. (Luc. 24:​1, 10) Sakey ed sikara et si Maria Magdalena. Kasabi tod man, anggapo may bangkay nen Jesus. Kanian linman tampol ed si Pedro tan Juan, tan imbalita to ’tan ed sikara. Batik si Pedro tan Juan ed samay lubok, tan tinumbok ira nen Maria. Nen anengneng na duaran apostol ya anggapo may bangkay nen Jesus, sinmempet la ra. Pero si Maria, aga inmalis. Wadman ya akis lan akis. Say agto amta balet, batbantayan manaya nen Jesus. Atenyeg so puso nen Jesus nen anengneng ton matalareter so lua na sayan bii, kanian nampanengneng ed si Maria. Kinatongtong to tan inikdan to na importantin asainmin—imbaki toy Maria pian ibalita ed saray disipulo to ya inmoli la. (Juan 20:​17, 18) Seguradon apaseseg ya maong si Maria ed sayan ginawa nen Jesus!

8. Panon tayon naalig si Jesus?

⁸ Panon tayon naalig si Jesus? Apakiwas si Jesus ya pasesegen si Maria ta inobserbaan to. Kanian no obserbaan tayo met iray agagi tan amtaen tayoy dadalanen da, mas natalosan tayo ra tan napakiwas tayon pasesegen ira. Imano yoy eksperiensya nen Sister Jocelyn, ya say agi ton bii et inatey ed graben aksidente. “Pigaran bulan ya maer-ermen ak ya maong,” so kuan to. Pero walay sanasawan agi ya alikas dan mair-irap so dadalanen nen Jocelyn. Kanian iimbitaan dad abung da, dedengelen dan maong no ibabalikas toy nalilikna to, tan ipapaseguro dad sikato ya inar-aro nen Jehova. Oniay imbaga nen Jocelyn: “Diad saman, singa ak la nalelener ed ermen ko, pero inusar nen Jehova iyan sanasawa pian naagwat to ak. Tinulongan da ak pian ompawil so datin seseg ko ed panaglingkor.” On, no paulyan tayo labat iray agagi ya ibalikas day nalilikna ra tan dengelen tayo ra, seguradon napaseseg ira tan napakiwas iran mantultuloy ya manlingkor ed si Jehova.—Roma 12:15.

TULONGAN MOY ARUM PIAN NATALOSAN DAY SALITA NA DIOS

9. Antoy sakey ya subok ed saray disipulo nen Jesus, tan panon to ran tinulongan?

⁹ Manisia iray disipulo nen Jesus ed Salita na Dios tan ginawa ray anggaay nayarian dan unoren itan. (Juan 17:6) Pero nen inatey si Jesus bilang kriminal, agda itan natanggap anta akapropesiya lad Kasulatan ya nagawa itan. Anggano ontan so reaksion da, ag-ira hinusgaan nen Jesus. Amta to ya inar-aro day Jehova, atan labat balet, kulang ni pakatalos da ed Kasulatan. (Luc. 9:​44, 45; Juan 20:9) Kanian tinulongan ira nen Jesus pian natalosan da itan. Nengnengen tayo no panon to itan ya ginawa nen nampanengneng ed samay duaran disipulo to diad dalan ya paarap ed Emaus.

10. Panon ya tinulongan nen Jesus iray disipulo to pian natalosan da ya sikaton talagay Mesias? (Lucas 24:​18-27)

¹⁰ Basaen so Lucas 24:​18-27. No imanoen tayo, agnin tampol nampakabat si Jesus ed samay duaran disipulo to. Tinepetan to ni ra pian nibaga da no antoy iisipen tan nalilikna da. Kanian imbaga rad sikato ya si Jesus so iilaloan dan mangiliktar ed Israel, ta diad saman et sakop ira na Roma. Nen nibaga da lay walad puso ra, impaliwawa nen Jesus ed sikara iray propesiya ya walad Kasulatan nipaakar ed Mesias. b Tan diad saman lanlamang ya labi, nampanengneng met si Jesus ed arum nin disipulo to pian nipaliwawa to met ed sikara iraman ya propesiya. (Luc. 24:​33-48) Antoy naaralan tayod saya?

11-12. (a) Antoy naaralan tayo ed panagbangat nen Jesus? (Nengnengen met so litrato.) (b) Antoy ginawa na sakey ya brother pian natulongan toy iyaaralan to na Biblia?

¹¹ Panon tayon naalig si Jesus? No ibabangat mo iray iyaaralan moy Biblia, mataktikam iran  tepetan pian naamtaan moy walad nonot tan puso ra tan mas natalosan moy situasyon da. (Pro. 20:5) Insan mo ra natan ibangat no panon dan naalmo iray teksto ya makatulong ed sikara. Agmo ra didiktaan no antoy nepeg dan gawaen. Kayari yon manbasa na sakey o pigaran teksto, tepetan mo ra no antoy atalosan dad satan, tan no panon da itan ya niyaplika ed bilay da. Imanoen so eksperiensya na brother ed Ghana ya si Nortey.

¹² Nanaral na Biblia si Nortey nen 16 so taon to, pero kontran maong so pamilya to. Antoy akatulong ed sikato pian ag-ontundan manaral na Biblia? Antis nin kinmontra so pamilya to, impaliwawa la na brother ya mangiyaaral ed sikato imay nabasad Mateo kapitulo 10 pian natalosan nen Nortey ya saray tuan Kristiano et napasegsegang. Oniay imbaga nen Nortey: “Nen kokontraen la na pamilyak so panaaral koy Biblia, diman ko mas apatunayan ya nalmok lay katuaan.” Impaimano met na samay mangiyaaral ed sikato imay Mateo 10:16. Atalosan nen Nortey ed satan ya teksto ya kaukolan toy magmaliw ya malikas tan marespeto no ibaga tod pamilya to iray papanisiaan to. Nen abautismoan lay Nortey, labay toy manpayunir, pero iilaloan la nen tatay to ya mankolehyo. Imbes ya ibaga na samay mangiyaaral ed si Nortey no antoy gawaen to, impaimano to iray pigaran prinsipyo na Biblia. Tan angusar na saray tepet pian natulongay Nortey ya makapanisip ya maong tan makapandesisyon na duga. Antoy desisyon nen Nortey ey? Mas pinili toy manpayunir. Lapud satan ya desisyon to, pinalayas nen tatay to. Kasin pagbabawian toy desisyon to? Oniay inkuan to: “Amtak ya ginawak so duga.” On, no tulongan tayoy arum pian mas natalosan tan niyaplika da iray prinsipyo na Biblia, magmaliw ya malet so pananisia ra.—Efe. 3:​16-19.

IPASAL MOY ARUM PIAN MAGMALIW IRAN “REGALO A LALAKI”

13. Antoy ginawa nen Jesus pian seguradon mantultuloy so kimey ya ginapoan to? (Efeso 4:8)

¹³ Nen wadiad dalin si Jesus, ginawa to so amin ya impagawa ed sikato nen Ama to. (Juan 17:4) Pero agton balot inisip ya sikato labat so nayarin manggawa na linawa nen Jehova. Legan na talora tan kapalduan taon na ministeryo to, impasal to la iray disipulo to pian nituloy da so kimey ya ginapoan to. Say arum ed sarayan disipulo et masulok ya 20 ni labat so taon da. Pero inmatalek to lad sikara so pangasikaso  ed saray mabmablin karnero nen Jehova tan say pangidaulo ed kimey ya panagpulong tan panagbangat. (Basaen so Efeso 4:8.) Antis ya pinmawil si Jesus ed tawen, antoy ginawa to pian nipasal to ni irayan makukuli tan matoor ya disipulo, diad ontan et magmaliw iran “regalo a lalaki”?—Nengnengen so study note na Efeso 4:8 diad nwtsty-TG.

14. Panon ya tinulongan nen Jesus iray disipulo to ya ontatken ed espiritual diad samay sampot ya 40 agew to diad dalin? (Nengnengen met so litrato.)

¹⁴ Diretsaan ya impetek nen Jesus iray disipulo to, pero ginawa to itan diad maaron paraan. Singa bilang, nen manduaruwa so arum ed sikara ya sikatoy apaoli, sinimbawa to ra. (Luc. 24:​25-27; Juan 20:27) Binilin to met ira ya mas kaukolan dan iyuna so pangasikaso ed saray karnero nen Jehova nen say pananap na kuarta. (Juan 21:15) Impanonot to met ya agda nepeg ya ikomparay nagagawaan da ed nagagawaan na arum. (Juan 21:​20-22) Tan nen wala ray aliwan pakatalos da nipaakar ed Panarian, impetek to ra tan pinaseseg to ran manpokus ed kimey ya panagpulong. (Gawa 1:​6-8) Antoy naaralan na saray elder ed si Jesus?

15-16. (a) Panon ya naalig na saray elder si Jesus? (b) Antoy maong ya resulta nen sinimbawa na sakey ya elder si Patrick?

¹⁵ Panon ya naalig na saray elder si Jesus? Kaukolan dan ipasal tan tulongan iray brother ed kongregasyon da pian magmaliw iran kualipikado parad kaaruman ya responsabilidad, anggan saramay kabataan ni labat. c Nepeg dan tandaan ya saray brother ya ipapasal da et aliwan perpekto tan dakel ni kaukolan dan paaligwasen. Singa si Jesus, kaukolan ya diretsaan da ran ipetek pero diad maaron paraan. No ontan so gawaen na saray elder, natulongan da iray ipapasal da ya magmaliw a mapaabeba, napantiwalaan, tan mabulos ya manlingkor ed saray agagi.—1 Tim. 3:1; 2 Tim. 2:2; 1 Ped. 5:5.

¹⁶ Imanoen so eksperiensya nen Brother Patrick tan no panon ya akaaral ed impansimbawa ed sikato na sakey ya elder. Nen kabataan ni si Patrick, aliwliway panagsalita tan panagtrato to ed arum, anggan diad saray sister. Naimano  itan na sakey ya elder. Kanian diretsaan pero maaro ton sinimbawa si Patrick. “Maong labat ta sinimbawa da ak ta anengneng ko ray papaaligwasen ko,” kuan nen Patrick. “Ta diad tua, nadidismaya ak kada no wala ray brother ed kongregasyon mi ya makakaawat na pribilehyo ya labalabay ko met komon. Pero nen sinimbawa to ak may elder, anengneng ko ya kaukolan ko nin aralen so manpaabeba tan aroen iray agagi, imbes ya akapokus ak labat ed pribilehyo.” Lapud saman, inmaligwas ed espiritual si Patrick tan aturo ya elder nen 23 so taon to.—Pro. 27:9.

17. Panon ya impanengneng nen Jesus ya walay tiwala to ed saray disipulo to?

¹⁷ Aliwan panagpulong labat so ingganggan nen Jesus ya gawaen na saray disipulo to. Ingganggan to met ira ya bangatan da iray totoo. (Nengnengen so study note na Mateo 28:20 ya “itinuturo sa kanila” diad nwtsty-TG.) Ompan inisip na saray disipulo ya ag-ira kualipikado ed satan ya asainmin. Pero baleg so tiwala nen Jesus ya sarasarag da itan ya gawaen. Imbalikas to ingen so tiwala tod sikara, kuan to: “No panon ya imbaki ak na Ama, ibaki ta kayo met.”—Juan 20:21.

18. Panon ya naalig na saray elder si Jesus?

¹⁸ Panon ya naalig na saray elder si Jesus? Wala ray nanduruman responsabilidad ed kongregasyon ya imamatalek na saray elder ed saray agagi. (Fil. 2:​19-22) Singa bilang, anggan saray kabataan et ipapasal la na saray elder ed panaglinis tan panagmintina na Kingdom Hall. Antis dan ipagawa so sakey ya kimey, ibangat da ni ra no panon da itan ya gawaen. Tan no nibangat la na elder imay ipapasal to, kaukolan ton ipalikna ya walay tiwala tod sikato. Ontan so ginawa na saray elder ya kakongregasyon nen Matthew. Nen balobalo ni labat ya elder si Matthew, misatsalamat kuno ta impasal ya maong na saray abaybayag lan elder ed kongregasyon da no panon ton gawaen iray nanduruman responsabilidad to. Aliklikna to met kuno ya walay tiwala dad sikato. Kuan to: “Kada no nalingo ak, wadtan ira ya ontutulong pian makaaral ak ed saray lingok, tan ipapanengneng dad siak no panon ko nin napaaligwas so kimey ko.” d

19. Antoy determinadom ya gawaen?

¹⁹ Inusar nen Jesus so sampot ya 40 agew to diad dalin pian pasesegen, ibangat, tan ipasal so arum. Komon ta gawam so anggaay nayarian mo ya aligen so alimbawa to. (1 Ped. 2:21) Agka mapaga ta tulongan to ka, ta oniay impaseguro to: “Wala ak ed sikayo ed amin ya agew anggad kaunoran a parte na sistema na mundo.”—Mat. 28:20.