1. Antoy labalabay ya gawaen nen Jehova parad saray lingkor to?

 AMTA nen Jehova so amin ya nagagawa ed kada lingkor to. Amta to no maliket tayo tan amta to met no maermen tayo. (Sal. 37:18) No nanenengneng to ya gagawaen moy anggaay nayarian mo ya manlingkor ed sikato anggano walay ansakisakit ya dadalanen mo, napapaliket moy puso to. Diad tua, akaparaan si Jehova ya ontulong ed sika, tan labalabay ton tambalen so sakit ya naliliknam.

2. Antoy gagawaen nen Jehova parad saramay asakitan so puso ra, tan antoy gawaen tayo pian naasikaso tan napaabig to tayo?

² Ibabaga na Salmo 147:3 ya ‘bebedberan nen Jehova iray sugat’ na saramay asakitan so puso ra. Antoy naiimadyin mod sayan teksto? No say sakey ya lingkor nen Jehova et asakitan o asugatan so puso to, wadtan si Jehova ya mangasikaso tan mamaabig ed sikato. Pero anto dapat so gawaen mo pian naasikaso to ka nen Jehova? Isipen pa iyan ilustrasyon: No grabe tan araldalem so sugat mo, seguradon manpa-doktor ka ta antam ya napaabig to ka. Pero ta pian onabig ka, kaukolan mon unoren so amin ya ibaga to may doktor. Aralen tayod sayan artikulo no anto ray ibabaga nen Jehova ed saray lingkor to ya asugatay puso ra tan no panon tayon niyaplika iray bilin to.

IPAPASEGURO NEN JEHOVA YA MABMABLI TAYOD SIKATO

3. Akin ya say pakalikna na arum et anggapoy kana ra?

³ Manbibilay tayod mundo ya maslak ya totoo et anggapoy panangaro ra ed kapara dan too, tan abebbebay pakanengneng dad arum. Oniay imbaga nen Sister Helen a: “Agkon balot aliknay panangaro  na atateng ko. Masibeg si tatay ko tan lanang ton ibabaga ya anggapoy kanak.” Ompan parehoy situasyon yo nen Helen. Kasin nen ugaw ka et aliwliway panagtrato na arum ed sika, lanang da kan iinsultoen, tan impalikna dan anggapoy kanam? No ontan, ompan mairap mon panisiaan ya walan talagay mangaaro ed sika.

4. Base ed Salmo 34:​18, antoy ipapaseguro nen Jehova ed sikatayo?

⁴ Anggano aliwliway impantrato ed sika na arum, makapantiwala ka ya inar-aro ka nen Jehova tan papablien to ka. Ibabaga na Biblia ya “si Jehova et asingger ed samay asugatay puso to.” (Basaen so Salmo 34:18.) No nadidismaya ka ed sarilim o pakaliknam et anggapoy kanam, tandaan mo ya walay anengneng nen Jehova ya kaabigan diad pusom kanian inyasingger to ka ed sikato. (Juan 6:44) Labalabay to kan tulongan ta inar-aro to ka.

5. Antoy naaralan tayo ed impantrato nen Jesus ed saray totoon abebbebay pakanengneng na arum ed sikara?

⁵ Makala tayoy ideya ed nalilikna nen Jehova ed sikatayo no aralen tayoy alimbawa nen Jesus. Nen wadiad dalin si Jesus, maomaong so impantrato to ed saramay totoon abebbebay pakanengneng na arum ed sikara. (Mat. 9:​9-12) Singa bilang, nen walay manpaparala ya bii ya aniwit ed kawes to ta labay toy onabig, agnampasnokan nen Jesus. Pinakalma to ni ingen so liknaan na sayan bii tan kinomendaan to lapud mabiskeg so pananisia to. (Mar. 5:​25-34) Amin ya ugali nen Jesus et naalig to ed si Aman Jehova. (Juan 14:9) Kanian no maomaong tan maar-aroy Jesus, di mas laloy Ama to! On, tandaan mo ya mabmabli kad si Jehova tan iimanoen to iray balibalin nagagawaan mo, pati say panangarom tan pananisiam ed sikato.

6. Antoy gawaen mo no abebbebay pakanengneng mod sarilim?

⁶ Panon to no abebbeba so pakanengneng mod sarilim, odino alabanan mo la itan ya  liknaan pero pawilpawil nin siansia? Makatulong no basaen mo iray bersikulo ed Biblia ya mangipapaseguron inar-aro ka nen Jehova, tan dalepdep mo iratan. b (Sal. 94:19) No walay goal mo ya agmo nabet odino walay nagagawaan na arum ya agmo nagagawaan, agmo komon iisipen ya agto ka inaro nen Jehova. Amta nen Jehova ya walay limitasyon na kada sakey ed sikatayo. Kanian agto iilaloan ya gawaen mo so sakey ya bagay ya agmo sarag. (Sal. 103:​13, 14) No asalim so naabuso o amaltrato, agmo teteteley sarilim. Amta nen Jehova ya biktima ka labat tan agmo kasalanan so agawad sika. Tandaan mo ya amay nan-abuso o nanmaltrato ed sika so walaay eebatan ed si Jehova. (1 Ped. 3:12) Oniay imbaga nen Sandra ya minaltrato na atateng to nen ugaw ni: “Abebbebay pakanengneng kod sarilik, kanian lanang kon ipipikasi ed si Jehova ya tulongan to ak pian nanengneng ko iray balibalin ugalik ya nanenengneng tod siak.”

7. Panon to tayon usaren nen Jehova anggano wala ray aliwliwan dinalan tayod bilay?

⁷ Anggano wala ray aliwliwan agawad bilay mo, tandaan mo ya sarag to kan usaren nen Jehova pian tulongan so arum. Singa bilang, balbaleg so inter tod sikan pribilehyo ya ipulong so maong a balita. Ituturing to kan kakimeyan to. (1 Cor. 3:9) Ontan met, lapud saray dinadalan mo, mas natalosan moy nalilikna na saray agagin asugatan met so puso ra. Kanian ompan sika so usaren nen Jehova pian natulongan to ra. Ontan so agawad si Helen ya abitla nen niman. Inawat toy tulong nen Jehova tan na saray agagi, tan natan et sikato met lay ontutulong ed arum. Kuan to: “Dati, say pakaliknak et anggapoy kanak, balet impalikna nen Jehova ed siak ya inar-aro to ak tan mausa-usar ak ed sikato.” Natan et malikeliket si Helen ya manlilingkor bilang regular payunir.

LABAY NEN JEHOVA YA AWATEN TAYOY PANAMERDONA TO

8. Antoy ipapaseguro nen Jehova ed sikatayo diad Isaias 1:18?

⁸ Wala ray agagi ya nakokonsiensia ni anggad natan kada no nanonotan day agawaan dan kasalanan, balanglan nen antis iran man-Tasi odino nen bautismado la ra. Balet tandaan tayo ya intarya nen Jehova so dondon pian naperdona iray kasalanan tayo. Inter to itan ya regalo ta inar-aro to tayo. Labay nen Jehova ya awaten mo itan ya regalo tod sika. No impetek mo la ray ‘kaukolan mon ipetek’ c ed baetan yo nen Jehova, ipapaseguro to ya agto lan balot ungkaten iray kasalanan mo. (Basaen so Isaias 1:18.) On, maar-aroy Jehova. Lingwanan to la iray agawaan tayon kasalanan nensaman. Pero say makapalikliket, agto lingwanan iray kaabigan ya agawaan tayo.—Sal. 103:​9, 12; Heb. 6:10.

9. Akin et agtayo dapat manpopokus ed apalabas?

⁹ No nakokonsiensia ka ni ed saray agawaan mo nensaman, mas maabig no say pampokusan mo et saray nagagawaan mo natan parad si Jehova, tan no anto ray sarag mo nin gawaen diad arapen. Ontan so ginawa nen apostol Pablo. Pagbabawian toy impamairap tod saray Kristiano, pero amta to ya pinerdona la nen Jehova. (1 Tim. 1:​12-15) Kanian nilingwanan to la iramay agawaan ton kasalanan, no panon ya nilingwanan to met la so datin kabibilay to bilang respetadon Fariseo. (Fil. 3:​4-8, 13-15) Imbes ya pawil-pawilen toy apalabas, inyupot to lay biskeg to ed ministeryo to tan nampokus la ed ilalo tod arapen. Singa si Pablo, agmo la sarag ya umanen so apalabas. Pero sarag mon iter ed si Jehova so anggaay nayarian mo natan, tan  manpokus ka ed balibalin bilay ya iter tod sika diad arapen.

10. Antoy gawaen mo no wala ray asakitan mo lapud saray ginawam nensaman?

¹⁰ Seguro say sakey ya rason no akin ya nakokonsiensia ka ni et antam ya wala ray asakitan mo lapud saray ginawam nensaman. No ontan so situasyon, antoy gawaen mo? Miperdonaan ka. Ipanengneng mo ya talagan pagbabawian mo may ginawam, tan gawam so anggaay nayarian mon ayosen so relasyon yo. (2 Cor. 7:11) Ipikasim ed si Jehova ya tulongan tan ligliwaen to iramay asakitan mo. Si Jehova so makatulong ed sika tan ed saramay asakitan mo pian ondeen so nonot yo tan makapanmatoor kayo ed sikato.

11. Antoy naaralan tayo ed si propetan Jonas? (Nengnengen met so litrato.)

¹¹ Komon ta makaaral ka ed saray agawaan mon lingo nensaman tan manpausar ka nin siansia ed si Jehova. Awat moy antokaman ya asainmin ya iter tod sika. Seguro nanonotan mo may agawad si propetan Jonas. Ingganggan na Dios ya onlad Ninive, pero imbatikan to ’tan ya asainmin to. Duman direksion so nila to! Dinisiplina nen Jehova si Jonas tan akaaral ed lingo to. (Jon. 1:​1-4, 15-17; 2:​7-10) Aga sinukoan nen Jehova si Jonas. Imbaki to lamet ed Ninive, tan diad sayan pankanawnawa et inmunor ya tampol. Agto la sinayang so komaduan tsansa ya inter nen Jehova ed sikato. Anggano akonsiensia si Jonas ed agawaan ton lingo, agnampatalo ed saman ya nalilikna to, tan nampausar nin siansia ed si Jehova.—Jon. 3:​1-3.

UUSAREN NEN JEHOVA SO MASANTON ESPIRITU TO PIAN NALIGLIWA TO TAYO

12. Panon itayon ikdan nen Jehova na kareenan no walay makapa-trauma ya agawad bilay tayo odino inateyan tayo? (Filipos 4:​6, 7)

¹² No walay makapa-trauma ya agawad bilay mo odino inateyan ka, usaren nen Jehova so masanton espiritu to pian naligliwa to ka. Imanoen so eksperiensya nen Ron tan Carol. Makapaermen so agawad sikara ta nambikkel so anak dan laki. Say kuan da: “Dakdakel lay mairap ya dinadalan mi, pero aya so sankagrabian tan sankasakitan. Mabetbet ya agkami makakaugip kanian pikasi kami lan pikasi ed si Aman Jehova. Aliklikna mi may deen ya nabasad Filipos 4:​6, 7.” (Basaen.) No walay mair-irap tan ansakisakit ya dadalanen mo, ibagam labat ed si Jehova so amin ya naliliknam. Labalabay toy ondengel ed sika anggano paulit-ulit ka nin manpikasi, tan ag-onsawan ondengel anggan panon karukey so ibagam. (Sal. 86:3; 88:1) Lanang kan onkerew ed sikato na masanton espiritu to tan seguradon iter to ’tan ed sika.—Luc. 11:​9-13.

13. Antoy nitulong ed sikatayo na masanton espiritu pian tuloytuloy tayon makapandayew ed si Jehova? (Efeso 3:16)

¹³ Kasin kinmapkapuy ka lapud walay mairap ya subok ya dadalanen mo tan labay mo lay onsuko? Natulongan ka na masanton espiritu pian ombiskeg so liknaan mo tan tuloytuloy kan makapandayew ed si Jehova. (Basaen so Efeso 3:16.) Imanoen so eksperiensya nen Sister Flora. Nen manlilingkor iran sanasawa bilang misionero, akagaway seksual ya imoralidad so asawa to kanian nandiborsyo ra. Oniay kuan nen Flora: “Asakisakitan ak ya maong ed ginawa to tan aman ya lanang so sankanonot ko. Kinerew kod si Aman Jehova ya ikdan to ak na masanton espiritu to pian nasarag ko man ya agawa. Tinulongan to ak pian onabig so sugat ed pusok. Diad gapo, ngalngali ak la onsuko, pero pinabiskeg nen Jehova so liknaan ko kanian asarag ko.” Apatunayan nen Sister Flora ya basta manmatalek kuno ed si Jehova, anggapo tay subok ya agto nalampasan. Onia ni imbaga to: “Tudtua ed siak may walad Salmo 119:32: ‘Labalabay kon tumboken so dalan na saray ganggan mo lapud ginawam a walaay kompiyansa so pusok.’”—Sal. 119:​32, paimanod leksab.

14. Antoy nepeg tayon gawaen pian niwalad sikatayo so masanton espiritu nen Jehova?

 ¹⁴ No impikasim lad si Jehova ya ikdan to kay masanton espiritu to, antoy nepeg mon gawaen pian niwala itan ed sika? Agmo papaulyanan so pipiaral tan panagpulong ta wadtan so espiritu to. Inagew-agew kan manbasa na Biblia tan dalepdep moy nababasam pian naalig moy panagnonot nen Jehova. (Fil. 4:​8, 9) Imanom iray karakter ed Biblia ya dinmadalan met ed subok tan dalepdep mo no panon iran tinulongan nen Jehova. Ontan so ginawa nen Sandra ya abitla nen niman. Nen nantutumbokan so problema ed bilay to, inaral toy alimbawa nen Jose. Oniay imbaga to: “Apabiskeg ak ya maong ed alimbawa nen Jose. Anggano mair-irap iray dinadalan to tan aliwliway impantrato da ed sikato, aga pinmayag ya naapektoay relasyon to ed si Jehova.”—Gen. 39:​21-23.

UUSAREN NEN JEHOVA IRAY AGAGI PIAN NALIGLIWA TO TAYO

15. Siopa ray uusaren nen Jehova pian naligliwa to tayo, tan panon da tayon tutulongan? (Nengnengen met so litrato.)

¹⁵ No naiirapan tayo, balbaleg so nitulong na saray agagi pian naligliwa tayo. (Col. 4:11) Uusaren ira nen Jehova pian ipalikna ed sikatayo ya inar-aro to tayo. Akaparaan iran ondengel. Tan anggano ag-ira mansalita, amay wadtan irad abay tayo et makapaligliwa la. Ompan walay ipanonot da ed sikatayo ya makapaseseg ya teksto ed Biblia odino manpikasi ran kaiba tayo. d (Roma 15:4) No maminsan, ipanonot dad sikatayo iray prinsipyo ed Biblia pian mas makapan-isip tayoy duga. Tutulongan da tayo  met diad praktikal ya paraan. Singa bilang, ompan ikdan da tayoy naakan o ilutoan da tayo ni ingen pian onlemew so liknaan tayo.

16. Antoy gawaen tayo pian natulongan itayo na saray agagi?

¹⁶ Pian natulongan itayo na saray agagi, ompan kaukolan tayon ibagad sikara ya kailangan tayoy tulong da. Inar-aro da tayo kanian seguradon labalabay da tayon tulongan. (Pro. 17:17) Pero ompan agda amta no antoy nalilikna tayo o no antoy kailangan tayo. (Pro. 14:10) Kanian no maer-ermen tan nadi-depress ka, ibalikas moy naliliknam ed saray maespiritual ya kakaarom tan ibagam ed sikara no panon da kan natulongan. No labay mo, mitongtong ka ed sakey o duaran elder tan ibagam ed sikaray dadalanen mo. No sakey kan sister, ompan mas mainomay mon ibalikas so naliliknam ed sakey ya maespiritual ya sister.

17. Antoy sakey ya rason ya ag-itayo napaseseg na agagi, pero anto dapat so gawaen tayo?

¹⁷ Agmo iyaarawi so sarilim ed saray agagi. No maminsan, ompan lapud maer-ermen ka, agmo la labay so miistoryaan o milimog ed arum. Tan ompan isipen mo ya agda ka lanlamang natalosan o walay ibaga da ya ompan nasakitan ka. (Sant. 3:2) Pero komon ta agka manpapatalo ed satan ya naliliknam. Tandaan mo ya kaukolan moy panamaseseg tan ompan sikara so usaren nen Jehova pian onlemew so liknaan mo. Oniay imbaga nen Brother Gavin, sakey ya elder ya walay depression to: “No maminsan, agko labay so mitongtong ed anggan siopa.” Pero lalabanan kuno nen Brother Gavin itan ya liknaan to. Tan apatunayan to ya kada no kaiba to ray agagi, onlelemew so liknaan to. Onia met so imbaga nen Sister Amy: “Lapud saray agawad bilay ko nensaman, agak la bastabasta mantitiwala ed anggan siopa. Pero labay kon aligen si Jehova kanian pansasagpotan kon aroen tan pantiwalaan iray agagi. Amtak ya no ontan so gawaen ko, napapaliket koy Jehova kanian maliket ak met.”

NONOT MOY PANAON YA SIGPOT LAN PAABIGEN NEN JEHOVA SO SUGAT ED PUSOM

18. Antoy tatalaranan tayo lan nagawa? Pero antoy gawaen tayo la natan?

¹⁸ Asingsingger lan ekalen nen Jehova so amin ya panlalapuan na sakit na linawa tan problema tayo. (Apo. 21:​3, 4) Diad satan ya panaon, amin ya ansakisakit ya agawad bilay mo et ‘agmo la nanonotan’ tan ‘agla mansiansia ed pusom.’ (Isa. 65:17) Pero natan ni labat, “bebedberan” la nen Jehova iray sugat mo. Dakdakel so uusaren to pian naligliwa to ka tan pian onlemew so liknaan mo. Awat mo sirin so tulong to. Komon ta agmon balot pandududaan ya ‘iyaansakit to ka.’—1 Ped. 5:7.