PARTE la na bilay na saray Israelita so musika. Dakel so nabasad Biblia ya mangakansion ira tan mantotogtog ira na saray instrumento. Diad katuaan to, dakel pay karga na Biblia ya kansion, singa say Salmo, Kansion nen Solomon, tan Tagleey. Kanian ibabaga na libron Music in Biblical Life ya importantin maong so musika ed bilay na saray Israelita.

Musika diad inagew-agew ya bilay na saray Israelita. Mangakansion tan mantotogtog na instrumento iray Israelita pian ibalikas so nalilikna ra. (Isa. 30:29) Singa bilang, no koronaan so balon ari, no panaoy piesta, tan no manalo rad guerra, malikeliket ya mantotogtog na tamburin iray bibii legan iran mangakansion tan onsasayaw. (Ukom 11:34; 1 Sam. 18:​6, 7; 1 Ara. 1:​39, 40) Mangakansion met iray Israelita kada no walay inatey pian ibalikas so ermen da. (2 Awa. 35:25) Kanian nibaga tayo ya talagan “parte la na bilay [da] so musika” ya singa imbaga na McClintock and Strong’s Cyclopedia.

Musika ed palasyo na ari. Labalabay na saray arari ed Israel so ondengel na musika. Impatawag nen Arin Saul si David ed palasyo to pian mantogtog na arpa parad sikato. (1 Sam. 16:​18, 23) Insan nen ari lay David, wala ray naimbento ton instrumento ed panagtogtog, nanggawa met na saray balibalin kansion, tan imparaan to la so orkestra ya mantogtog ed templo nen Jehova. (2 Awa. 7:6; Amos 6:5) Anggan si Arin Solomon et wala met iray inyasain ton lalaki tan bibii ya mangansion ed palasyo to.—Ecl. 2:8.

Musika parad panagdayew. Mangakansion tan mantotogtog iray Israelita pian idayew si Jehova. Atan so sankaimportantian ya usar na musika ed bilay da. Diad tua, walay 4,000 ya managtogtog ed templo diad Jerusalem. (1 Awa. 23:5) Manguusar iray piangpiang, nandeles ya instrumento, arpa, tan trumpeta. (2 Awa. 5:12) Pero aliwan sikara labat so angidayew ed si Jehova panamegley na musika. Dakel ya Israelita so mangakansion legan iran manaakar paonlad Jerusalem pian selebraan iray tinaon ya piesta diman. Say tawag ed saraman ya kakansionen da et Kansion na Saramay Ontatatdang. (Sal. 120-134) Tan base ed saray sulat na saray Judio, mangakansion iray Israelita na saray Hallel a Salmo a legan na Paskua.

Anggad natan et importante nin siansia so musika ed saray lingkor na Dios. (Sant. 5:13) Kabiangan itan na panagdayew tayo ed si Jehova. (Efe. 5:19) Kada no mangakansion tayo ya kaiba iray agagi, mas lalon onaapit so liknaan tayod sakey tan sakey. (Col. 3:16) Tan lapud musika, ombibiskeg tayo tan naaanosan tayo ray subok. (Gawa 16:25) On, mangansion tan mantogtog tayo sirin parad si Jehova pian nipanengneng tayoy katooran tan panangaro tayo ed sikato.