No tua itan, isip mo pay epekto na satan. Oniay intepet na sakey a brother ya nambikkel so anak to: ‘Kasin inamta la nen Jehova ya nasarag min sanasawa so pambikkel na anak mi? Kasin agawa itan ta inisip na Dios ya nasarag mi?’ Kasin walay makatunongan ya rason pian panisiaan tayon imamaneobra nen Jehova iray nagagawad bilay tayo?

No aralen tayon maong so imbaga nen Pablo ed 1 Corinto 10:13, oniay magmaliw ya konklusyon tayo: Anggapoy Makasulatan a basiyan ya aamtaen la nen Jehova no anto ray nasarag tayo insan manpili na saray subok ya arapen tayo. Pantongtongan tayoy apatiran rason no akin ya ontan so konklusyon tayo.

Unona, inikdan nen Jehova iray totoo na kawayangan a mandesisyon. Labay ton sikatayoy manpili no antoy gawaen tayod bilay tayo. (Deu. 30:19, 20; Jos. 24:15) No dugay pilien tayo, nailaloan tayoy panangigiya to. (Pro. 16:9) Balet no aliway pilien tayo, anien tayoy resulta na ginawa tayo. (Gal. 6:7) No si Jehova so manpipili ed saray subok ya arapen tayo, agta singa to lanlamang isisiblet so kawayangan tayon mandesisyon?

Komadua, ag-itayo ipapaliis nen Jehova ed “saray ag-iilaloan a nagawa.” (Ecl. 9:11) Nagagawa iray graben aksidente tan ompan mabayag ni ingen so epekto na satan, lapud nibanan wadman itayo. Walay imbaga nen Jesus ya trahedyan 18 so inatey ta atapilan iray tori, tan impaimano ton aglabay na Dios itan ya agawa. (Luc. 13:1-5) No ontan sirin, agta aliwan makatunongan ya isipen ya dedesisyonan la na Dios no siopa ray nabilay tan ompatey lapud saray ag-iilaloan ya nagawa?

Komatlo, kada sakey ed sikatayo et nalalanor ed isyu na katooran. Tandaan ya kinuestion nen Satanas so katooran na amin ya manlilingkor ed si Jehova, tan ibabaga ton ag-itayo mansiansian matoor ed si Jehova no wala ray subok. (Job 1:9-11; 2:4; Apo. 12:10) No ipaliis itayo nen Jehova ed saray subok lapud inamta to la ya agtayo nasarag iratan, agta napruebaan laingen ya dugay akusasyon  nen Satanas ya manlilingkor tayod Dios lapud walay napipinabangan tayo?

Komapat, agkaukolan nen Jehova ya amtaen so amin ya nagawad sikatayo. No aamtaen la nen Jehova iray subok ya arapen tayo, di singa ompapaway ya amta to lay amin ya nagawad sikatayo. Balet aliwa itan ya base ed Kasulatan. Tua, sarag na Dios ya amtaen so nagawad arapen. (Isa. 46:10) Balet ibabaga na Biblia ya pipilien to labat iray aamtaen ton nagawa. (Gen. 18:20, 21; 22:12) Babalansien to sirin so pakayari ton amtaey arapen tan say panrerespeto tod kawayangan tayon mandesisyon. Agta ontan so iilaloan tayod Dios ya mamapabli ed kawayangan tayo tan naynay ya balanse so panguusar tod amin ya kualidad to?—Deu. 32:4; 2 Cor. 3:17.

Anto sirin so labay ya ibaga na sayan imbaga nen Pablo: “Matoor so Dios, tan agto abuloyan a nipaarap kayod tukso ya agyo nayarian”? Say tutukoyen nen Pablo et no antoy gagawaen nen Jehova legan ya nasusubok * itayo, aliwan antis. Ipapaseguro nen apostol Pablo ya anggan anton subok so arapen tayo, tulongan itayo nen Jehova no manmatalek tayod sikato. (Sal. 55:22) Sayan makaligliwan imbaga nen Pablo et nibase ed duaran importantin katuaan.

Unona, saray subok ya aarapen tayo et “asali na arum a totoo.” No ontan sirin, naeeksperiensya met na arum iray subok ya aarapen tayo. Saratan ya subok et nasarag tayo no manmatalek tayod Dios. (1 Ped. 5:8, 9) Diad konteksto na 1 Corinto 10:13, binitla nen Pablo iray subok ya naeksperiensya na saray Israelita diad kalawakan. (1 Cor. 10:6-11) Anggapod saraman ya subok so ag-asarag odino agnaanosan na saray matoor ya Israelita. Amipat ya imbaga nen Pablo ya agtinmulok so “arum ed sikara.” Makapaermen ta wala ray Israelitan nampatalo ed saray mauges ya pilalek lapud ag-ira nanmatalek ed Dios.

Komadua, “matoor so Dios.” Ipapatnag na impantrato na Dios ed totoo to ya matoor so panangaro tod “saramay mangaaro ed sikato tan manusumpal ed saray ganggan to.” (Deu. 7:9) Papaneknekan met na saray salaysay ed Biblia ya naynay a totooren na Dios iray promisa to. (Jos. 23:14) Lapud saray prueba ya talagan matoor so Dios, makapanmatalek iramay mangaaro tan manguunor ed sikato ya tooren to iyan duaran promisa to no wala ray subok: (1) Agto abuloyan ya onloor so subok ya anggad imposible lan naanosan itan, tan (2) ‘sikatoy manggawa na dalan a pawayan pian nasungdoan da itan.’

Panon ya manggagawa si Jehova na dalan a pawayan na saray manmamatalek ed sikato sano nasusubok? Siempre no labayen to, sarag ton ekalen so subok. Balet tandaan tayo imay imbaga nen Pablo: “Sikatoy [si Jehova] manggawa met na dalan a pawayan pian nasungdoan yo itan.” Kanian diad dakel ya situasyon, sikatoy manggagawa na “dalan a pawayan” diad pangiter toy nakaukolan tayo pian naanosan tayo ray subok. Imanoen no panon ya gagawaen nen Jehova itan:

• Sikato so “manliligliwa ed sikatayo diad amin a subok a dadalanen tayo.” (2 Cor. 1:3, 4) Sarag nen Jehova ya pakalmaen so nonot, puso, tan emosyon tayo panamegley na Salita to, say masanton espiritu to, tan say espiritual a naakan ya itatarya na matoor ya aripen.—Mat. 24:45; Juan 14:16, paimanod leksab; Roma 15:4.

• Nayarin igiya to itayo panamegley na masanton espiritu. (Juan 14:26) No wala ray subok, nayarin ipanonot na espiritu iray salaysay tan prinsipyod Biblia pian natebek tayo ray makabat ya gawaen.

• Sarag ton ibaki iray anghel ya ontulong ed sikatayo.—Heb. 1:14.

• Sarag ton usaren iray kaagian tayo ya mangibaga o manggawa na ‘mamabiskeg ed sikatayo.’—Col. 4:11, paimanod leksab.

Anto sirin so konklusyon tayod kabaliksan na imbaga nen Pablo ed 1 Corinto 10:13? Agmanpipili si Jehova na saray subok ya arapen tayo. Balet no wala ray subok, aya so segurado: No sigpot itayon manmatalek ed si Jehova, agto abuloyan ya onloor iray subok ya anggad agtayo la nasarag; sikatoy ‘manggawa na dalan’ pian naanosan tayo iratan. Talagan makaligliwa itan!