WALAY duaran marikit ya manaakar diad Baguio City. Walay alabasan dan cart tayo. Diad saman, say manbabantay na cart et si Sister Helen tan inimisan to ra. Anggano ag-ira inmasingger ed cart, agda nalingwanan may balibalin imis to.

Diad saman lanlamang ya agew, nen akalugan so duaran marikit ed bus ta pasempet la rad abung da, walay anengneng dan balbaleg ya logo na jw.org diad arap na Kingdom Hall. Anonotan da ya atan met lanlamang may logo ed cart ya alabasan da nen niman. Pinara da may bus tan inmepas ira. Insan ninengneng day eskedyul na aral ya akapaskil ed gate na Kingdom Hall.

Diad tinmumbok ya aral, inmatendi may duaran marikit. Tan amta yo no siopay anengneng da kaloob dad Kingdom Hall? Si Sister Helen! Abirbir dan tampol ya sikato may bii ya balibali imis to. “Nen inmasingger irad siak,” so kuan nen Helen, “mannerbiyos ak. Say amtak, walay ginawak ya aliwa.” Pero inistorya dad si Helen ya sikato may anengneng da legan ya manka-cart witnessing.

Agustoan na saramay mamarikit so aral tan alemew so liknaan dad saray agagi. Kayari na aral, nen anengneng da ya manlilinis iray agagi, labay da met so mangiba! Nan-abroad la imay sakey ya marikit, balet amay sakey et manaaral lay Biblia tan mimiaral la. Resulta iya na balibalin imis!