1. No say sakey a sister et plano toy miasawa, anto ray nepeg ton itepet ed sarili to?

AMIN ya Kristiano et nepeg ya manpasakop ed inkaulo nen Jesu-Kristo, say perpekton lider tayo. Balet no say sakey a sister et miasawa la, kaukolan to met lay manpasakop ed inkaulo na asawa to, ya aliwan perpekto. Aliwa itan ya mainomay. Kanian no wala lay onkaraw ed sakey a sister tan plano to met so miasawa, maabig no itepet to iraya ed sarili to: ‘Panon kon nibaga ya sayan brother et magmaliw ya maong ya ulo na pamilya? Kasin iyuuna toy Jehova ed bilay to? No andi, anto sirin so basiyan ko ya sarag ton idaulo so pamilya mi diad panlingkor ed si Jehova no sanasawa kami la?’ Siempre, maabig no itepet met na sister ed sarili to: ‘Siak ey, anto ray balibalin ugalik ya makatulong ed relasyon mi no sanasawa kami la? Kasin maanos ak tan aliwa ak ya masiblet? Kumusta met so relasyon kod si Jehova ey?’ (Ecl. 4:9, 12) No say sakey ya marikit et isipen ton maong irayan tepet tan seguroen ton duga so desisyon to, seguradon maliket no wala lay asawa to.

2. Anto ran tepet so ebatan tayo ed sayan artikulo?

² Balibali so alimbawa na minilyon ya agagin bibii ed interon mundo ta mapasakop irad asawa ra. Proud tayo ed sikara! Tan malikeliket tayo ta kaiba tayo irayan matoor ya bibii diad panlilingkor tayod si Jehova. Diad sayan artikulo, ebatan tayo irayan tepet: (1) Anto ray subok ed saray asawan bibii? (2) Akin et nepeg ya manpasakop so asawan bii ed asawa to? (3) Antoy naaralan na sanasawa ed panagpasakop ya impanengneng nen Jesus, Abigail, tan Maria ya ina nen Jesus?

3. Akin et walan walay problema ya arapen na sanasawa?

³ Say pangasawa o piasawa et regalo ya nanlapud Dios. Balet anggapoy perpekton asawa. (1 Juan 1:8) Kanian ibabaga na Biblia ya saray sanasawa et “nawalaay irap”​—walan walay problema ya arapen da. (1 Cor. 7:28) Saray asawan bibii ey, anto ray subok ed sikara?

4. Antoy sakey ya rason ya nayarin isipen na asawan bii ya iyaabeba toy dignidad to no manpasakop ed asawa to?

⁴ No maminsan, ompan isipen na asawan bii ya iyaabeba toy dignidad to no sikatoy manpasakop ed asawa to lapud kultura ya binalegan to. “Diad lugar ya binalegan ko,” kuan nen Marisol ya taga United States, “iisipen na totoo ya pantay-pantay ya lanang iray lalaki tan bibii. Amtak ya si Jehova so angiyuksoy ed inkaulo, tan ingganggan to ray asawan bibii ya manpasakop irad asawa ra. Pero lapud impluensya na sayan mundo, nanairapan ak ya respetoen so autoridad nen asawak.”

5. Antoy pakanengneng na arum ya lalaki ed saray bibii?

⁵ Dia balet ed arum ya lugar, abebbeba so pakanengneng na saray lalaki ed saray bibii. Oniay imbaga nen Sister Yvonne ya taga South America: “Diad lugar mi, say unonan mangan et saray lalaki. No asumpal la ra, insan labat mangan iray bibii. Say manluto tan manlinis et saray anak ya bibii. Saray anak ya lalaki balet et serbian na ina tan agagi dan bibii, ta sikara kuno so ‘ari ed abung.’” Onia met so imbaga nen Sister Yingling ya taga Asia: “Walay kasabihan ed lugar mi ya ayos labat anggano aliwan matalino odino aliwan maabilidad so bii. Para met labat ira kunod abung tan ag-ira nayarin mangibaga na opinyon da ed asawa ra.” No say asawan laki et ontan so pakanengneng tod bibii, agto natutumbok so ganggan na Biblia, agto naaalig si Jesus, agto napapaliket si Jehova, tan pakaskasi so bilay na asawa to.​—Efe. 5:28, 29; 1 Ped. 3:7.

6. Antoy nepeg ya gawaen na saray bibii pian ombiskeg so espiritualidad da?

⁶ Singa abitla ed inmunan artikulo, saray asawan lalaki so inikdan nen Jehova na responsabilidad ya mangitarya ed espiritual, emosyonal, tan materyal ya pankaukolan na pamilya ra. (1 Tim. 5:8) Pero agto labay ya ibaga ya agla mansagpot iray asawan bibii pian ombiskeg so espiritualidad da. Anggano dakel so kimey da, dapat walay inagew-agew ya eskedyul da parad personal ya panagaral na Biblia, panagdalepdep, tan impapuson panagpikasi ed si Jehova. Ag-itan mainomay a gawaen ta dakel so kimey na saray asawan bibii. Ompan mabanal la ra tan ngalngali agda la nisalet iratan ya gawaen. Balet agda nepeg ya ibaliwala iratan. Akin ey? On ta labay nen Jehova ya pansagpotan tayon mismo ya pabiskegen so espiritualidad tayo.​—Gawa 17:27.

7. Anto dapat so natatalosan na asawan bii pian mas mainomay toy manpasakop ed asawa to?

⁷ Talagan kaukolan ya aralen na asawan bii so manpasakop ed asawa to. Balet no natatalosan toy ibabaga na Biblia no akin ya kaukolan toy manpasakop, mas mainomay ton gawaen so betang ya inter nen Jehova ed sikato.

8. Base ed Efeso 5:22-24, akin et nepeg ya manpasakop so asawan bii ed asawa to?

⁸ Say asawan bii et manpasakop ed asawa to ta atan so labay nen Jehova ya gawaen to. (Basaen so Efeso 5:22-24.) Kombinsido iray Kristianon asawan bibii ya inar-aro ira nen Aman Jehova tan parad pankaabigan da lanlamang so ipapagawa tod sikara.​—Deu. 6:24; 1 Juan 5:3.

9. Antoy resulta no say Kristianon asawan bii et mapasakop ed asawa to?

⁹ Diad mundo, ibabaga ra ya no say asawan bii et manpasakop ed asawa to, singa to  iyaabeba so sarili to. No ontan so nonoten na Kristianon asawan bii, ompan agmet la manpasakop ed asawa to. Pero tandaan tayo ya saray mangibabangat ed satan ya ideya et agda kabat si Aman Jehova. Sikatoy maar-aron Dios, kanian segurado tayo ya agbalot mangiter na ganggan ya mangiyabeba ed kagalangan na saray ananak ton bibii. No say sakey ya asawan bii et manpasakop ed asawa to ta atan so betang ya inter nen Jehova ed sikato, mareen so interon pamilya. (Sal. 119:165) Nalikna na mister to so respeto kanian mas ar-aroen to, tan makaaral iray ananak da ed alimbawa ra.

10. Antoy naaralan tayo ed imbaga nen Sister Carol?

¹⁰ No say asawan bii et manpapasakop ed asawa to, ipapanengneng to ya inar-aro tan rerespetoen toy Jehova, say angiyuksoy ed inkaulo. Oniay imbaga nen Carol ya taga South America: “Amtak ya aliwan perpekto si asawak. Pero amtak met ya no makagawa na lingo, nanengneng ed reaksion ko no talagan inarok si Jehova. Anggano wala ray nagagawaan ton lingo, manpapasakop ak nin siansia ed sikato ta labay kon paliketen so Amak ed tawen.”

11. Antoy imbaga nen Sister Aneese ya gagawaen to pian naperdona toy asawa to, tan antoy naaralan tayod sikato?

¹¹ No say pakalikna na asawan bii et anggapoy pibabali na mister to ed liknaan tan pakakaaburidoan to, ompan mairap ton respetoen. Balet imanoen no antoy gagawaen nen Sister Aneese no ontan so nalilikna to. Imbaga to: “Agak onsyosyodot ya tampol. Iisipen ko ya amin tayo et nalilingo. Labay kon aligey Jehova ya akaparaan ya mamerdona. No palabasen koy lingo nen asawak, ondeen lay nonot ko.” (Sal. 86:5) On, mas mainomay ya manpasakop so asawan bii no sikatoy akaparaan ya mamerdona.

12. Anto ran alimbawa so nabasa ed Biblia?

¹² Ompan isipen na arum ya no say sakey ya too et mapasakop, sikatoy makapuy tan unor-unor labat. Aliwan tua ’tan. Dakel so karakter ya nabasa ed Biblia ya mapasakop balet ta makmakpel ira tan ag-ira natatakot. Nengnengen tayo no antoy naaralan tayod si Jesus, Abigail, tan Maria.

13. Akin et manpapasakop si Jesus ed si Aman Jehova? Ipaliwawa.

 ¹³ Si Jesus et manpapasakop ed si Jehova, aliwan lapud makapuy odino anggapoy abilidad to. Diad tua, matalino pay Jesus ta simpli so panagbangat to tan malinlinew. (Juan 7:45, 46) Baleg so tiwala nen Jehova ed abilidad nen Jesus. Nen ginawa nen Jehova so interon uniberso, kaiba toy Jesus ya nankimey diad abay to. (Pro. 8:30; Heb. 1:2-4) Tan nen pinaoli nen Jehova si Jesus, inter tod sikato so “amin a pakauley ed tawen tan diad dalin.” (Mat. 28:18) Balet anggano maabilidad si Jesus tan baleg so autoridad to, sikatoy manpapasakop tan manpapatulong nin siansia ed si Jehova. Akin ey? On, ta inar-aro toy Ama to.​—Juan 14:31.

14. Antoy naaralan na asawan lalaki ed (a) pakanengneng nen Jehova ed saray bibii (b) saramay akasulat ed Proverbio 31?

¹⁴ Saray naaralan na asawan lalaki. Labay nen Jehova ya manpasakop so asawan bii ed asawa to, aliwan lapud abebbeba so pakanengneng To ed saray bibii. Diad tua, wala ray pinili ton bibii ya manuley ya kaiba nen Jesus. (Gal. 3:26-29) Impanengneng nen Jehova ya walay tiwala tod si Jesus nen inikdan toy autoridad. Ontan met so nepeg ya gawaen na asawan laki. Nipanengneng to ya walay tiwala tod si asawa to no ipiya to lad sikato so arum ya bengatla. Singa bilang, ibabaga na Biblia ya say maong ya asawan bii et aasikasoen to ray kimey ed abung, sarag toy mangaliw tan manlako na dalin, tan maong ya mannegosyo. (Basaen so Proverbio 31:15, 16, 18.) Kanian say asawan laki et agto nepeg ya tratoen so asawa to ya singa aripen ya agnayarin mangibaga na opinyon to. Imbes, pantitiwalaan to tan dedengelen to ray ideya to. (Basaen so Proverbio 31:11, 26, 27.) No ipanengneng na asawan laki so ontan ya respeto, mas panliketan na asawan bii so manpasakop ed sikato.

15. Antoy naaralan na asawan bibii ed alimbawa nen Jesus?

¹⁵ Saray naaralan na asawan bibii. Anggano dakdakel so maabig ya agawaan nen Jesus, agto inisip ya agto la kaukolan so manpasakop ed inkaulo nen Jehova. (1 Cor. 15:28; Fil. 2:5, 6) Maabig no aligen na asawan bibii so alimbawa nen Jesus. Anggano say sakey ya bii et marundunong tan maabilidad, agto nepeg ya isipen ya iyaabeba toy sarili to no manpapasakop ed asawa to. Inar-aro toy asawa to kanian susuportaan to. Pero manuna ed amin, gawaen to itan lapud inar-aro tan rerespetoen toy Jehova.

16. Base ed 1 Samuel 25:3, 23-28, akin et aliwan mainomay so situasyon nen Abigail? (Nengnengen so litrato ed apis.)

¹⁶ Si Abigail et asawa nen Nabal. Masiblet si Nabal, atagtagey so pakanengneng tod sarili to, tan anggapoy utang na loob to. Balet anggano aliwliway ugali nen Nabal, agtinaynan nen Abigail. Nen labay ya pateyen nen David tan saray bataan to si Nabal, sarag pa nen Abigail so manpareen labat pian makapiasawa lad arum. Pero andi. Nanggaway paraan si Abigail pian naprotektaan toy Nabal tan saray walad pudir da. Imadyin mo pay pakpel nen Abigail ya inmarap ed 400 ya armadon lalaki tan marespeton akikasi ed si David. Imbaga to ni ingen ya sikato la so natetel ed ginawa nen asawa to. (Basaen so 1 Samuel 25:3, 23-28.) Alikas ya tampol nen David ya inusar nen Jehova iyan makmakpel ya bii pian agmakagawa na ambelat a kasalanan si David.

17. Antoy naaralan na asawan lalaki ed salaysay na Biblia ed si David tan Abigail?

¹⁷ Saray naaralan na asawan lalaki. Marunong ya bii si Abigail. Maong labat ta dinengel nen David so imbaga to. Ta no andi, dakel lawari inosentin totoo ya inatey. Kanian no wala ray importantin desisyonan na asawan laki, maabig no dengelen toy opinyon  na asawa to. Nayarin makatulong so ibaga na misis to pian naiwasan toy manggawa na desisyon ya pagbabawian to lanlamang.

18. Antoy naaralan na asawan bibii ed alimbawa nen Abigail?

¹⁸ Saray naaralan na asawan bibii. No say asawan bii et inar-aro tan rerespetoen toy Jehova, maong so epekto na ugali to ed pamilya to, anggano makapuy so espiritualidad na mister to odino aliwan Tasi. Agmanggawa na paraan pian misian. Imbes, manpasakop nin siansia tan respetoen to lapud sankanonot to ya ompan atan so paraan pian napakiwas toy asawa to ya manlingkor ed si Jehova. (1 Ped. 3:1, 2) Tan anggano ag-itan nagawa, naliliketan nin siansia si Jehova ed asawan bii ta uunoren toy uksoyan na inkaulo.

19. Diad anto ran situasyon ya ag-unoren na asawan bii so asawa to?

¹⁹ Anggaman ontan, say mapasakop ya Kristianon asawan bii et agto unoren so mister to no say ipapagawa to et kontra ed ganggan odino prinsipyo na Biblia. Singa bilang, ompan iganggan nen asawa to ya mantila, mantakew, odino arum ni ya aglabay nen Jehova. Sankanonot na amin ya Kristiano, kaiba la ray asawan bibii, ya say unonan panmatooran da et si Aman Jehova. Kanian no say sakey ya Kristianon asawan bii et iganggan na asawa to ya manggaway aliwa, agto itan gawaen. Tan diad mauyamon paraan et ipaliwawa tod asawa to no akin ya ag-itan naako na konsiensia to.​—Gawa 5:29.

20. Akin et nibaga tayon maap-apit si Maria ed si Jehova?

²⁰ Si Maria et maap-apit ed si Jehova. Kabisado ton maong so Kasulatan. Diad samay impitongtong tod si Elizabet ya ina nen Juan Bautista, masulok ya 20 ed saray imbaga nen Maria so nanlapud Hebreon Kasulatan. (Luc. 1:46-55) Tan isip mo pa: Anggano akisipanan lan miasawa si Maria ed si Jose, aliwan si Jose so unonan nampanengnengan na samay anghel nen Jehova. Say direktan kinatongtong na anghel et si Maria tan imbaga to ya ilukon toy Anak na Dios. (Luc. 1:26-33) Kabkabat nen Jehova si Maria, kanian amta To ya ar-aroen tan asikasoen ya maong nen Maria so Anak To. Tan anggan sanen pinmawil lad tawen si Jesus, nansiansian maapit si Maria ed si Jehova.​—Gawa 1:14.

21. Antoy naaralan na asawan lalaki ed ibabaga na Biblia tungkol ed si Maria?

 ²¹ Saray naaralan na asawan lalaki. Say maong ya asawan laki et maliket no say asawa to et dakel so amta tod Biblia. Agto dapat isipen ya sasapawan la na asawa to tan labay ton samsamen so inkaulo. Amta to ya no say sakey ya sister et mabasa na Biblia tan kabisado to ray prinsipyo ya wadtan, baleg so nitulong to ed pamilya. Siempre, anggano mas atagey so inaral na asawan bii, responsabilidad nin siansia na asawan laki ya idaulo so Panagdayew na Pamilya ra tan arum nin espiritual ya aktibidad.​—Efe. 6:4.

22. Antoy naaralan na asawan bibii ed si Maria?

²² Saray naaralan na asawan bibii. Tua, say sakey ya bii et nepeg ya manpasakop ed asawa to. Balet responsabilidad ton mismo ya pabiskegey espiritualidad to. (Gal. 6:5) Kanian kaukolan ya walay eskedyul to parad personal ya panagaral tan panagdalepdep. No ontan so gawaen to, lalo ton naaro tan narespeto si Jehova tan panliketan toy manpasakop ed asawa to.

23. No say asawan bii et mapasakop, antoy epekto na satan ed sikaton mismo, ed pamilya to, tan ed kongregasyon?

²³ Saray asawan bibii ya manpapasakop ed asawa ra lapud panangaro dad si Jehova et mas maliket tan kontento ira no ikomparad saray bibii ya agda labay ya unoren so uksoyan na inkaulo. Makaaral iray balolaki tan mamarikit ed maong ya alimbawa na sarayan asawan bibii. Tan lapud pampapasakop da ed inkaulo, makakatulong ira pian niwala so aroan tan deen diad pamilya ra tan diad interon kongregasyon. (Tito 2:3-5) Diad tua, dakel ed saray matoor ya lingkor nen Jehova natan et bibii. (Sal. 68:11) Pero amin tayo, laki man o bii, et walay nagawaan to pian mansiansian maliket so kongregasyon. Pantongtongan tayo itan diad onsublay ya artikulo.