1. Diad anto ran situasyon ya makaawat tayoy simbawa, tan akin et kaukolan tayon amin itan?

WALAN-WALAY panaon ya kaukolan tayoy simbawa na arum. No maminsan, sikatayo lan mismoy onkerew na advice ed toon pantitiwalaan tayo. Pero no maminsan, ompan walay agi ya katongtongen to tayo tan ipaimano to ya ‘aliwa la manayay aarapen tayo’ pian naiwasan tayo lay makagawa na lingo. (Gal. 6:1) Tan no bilang ta akagawa tayo lay lingo, nayarin walay manbilin o mangipetek ed sikatayo. Antokaman so rason ya walay mansimbawa ed sikatayo, importante ya ondengel tayo ta parad pankaabigan tayo lanlamang itan. Tan ompan atan so makapangiliktar na bilay tayo!—Pro. 6:23.

2. Base ed Proverbio 12:15, akin et kaukolan tayoy ondengel ed simbawa?

² Ibabaga na pinagkateman teksto tayo ya ‘ondengel tayo ed saray salita na marunong.’ (Pro. 22:17) Diad tua, anggapo tay too ya amta to lan amin. Walan-walay too ya mas dakel so amta o eksperiensya to nen say sikatayo. (Basaen so Proverbio 12:15.) Kanian no ondedengel kad simbawa, labay ton ibaga, mapaabeba ka. Sankanonot mo ya wala ni ray agmo amta tan kaukolan moy tulong pian duga iray desisyon mo. Oniay impaisulat na Dios ed marunong ya ari ya si Solomon: “Agnasumpal iray plano no anggapoy pantotongtong, balet walay nagawaan no dakel so mananimbawa.”—Pro. 15:22.

3. Diad anton duaran paraan ya makakaawat tayoy simbawa?

³ Ompan makaawat tayoy simbawa ed sakey ya too. Nayarin ipaimano ed sikatayo na sakey ya elder o maespiritual ya agi iray kaukolan tayon umanen o paaligwasen ed sarili tayo. Atan imay direkta ya simbawa. No walay nansimbawa ed sika base ed Biblia, labay ton ibaga, inar-aro to ka. Kanian dengel mo tan  ipapusom so simbawa to. Pero makaawat tayo met na simbawa diad aliwan direkta ya paraan. Singa bilang, ompan walay nabasam ed Biblia o diad saray publikasyon tayo ya mangipa-realize ed sika ya aliwa la manayay gagawaen mo tan kaukolan moy manguman.—Heb. 4:12.

4. Base ed Eclesiastes 7:9, antoy agtayo dapat gagawaen no makaawat tayoy simbawa?

⁴ Anggano tanggap tayo met ed sarili tayo ya aliwa tayon perpekto, no maminsan et aliwan mainomay ya awaten so direktan simbawa. Diad tua, ompan nasakitan tayo no walay mangipaimano na lingo tayo. (Basaen so Eclesiastes 7:9.) Ompan say sakey et manrason tan mankatunongan ni ingen pian palemewen so ginawa ton lingo. Ompan kuestionen toy motibo na nansimbawa ed sikato, o mansinti lapud paraan na impansimbawa ed sikato. Ompan anapan to ni ingen na lingo imay nansimbawa tan ibaga ton: ‘Masita-sita! Singa aga nalilingo!’ Sakey ni, no agto agustoan imay insimbawa ed sikato, ibaliwala to itan odino ompan say kerewan toy advice et saramay kakaaro to ya say ibaga ra et no anto may labay to labat ya narengel.

5. Anto ray pantongtongan tayo ed sayan artikulo?

⁵ Diad sayan artikulo, pantongtongan tayo ray alimbawa ed Biblia ya agdinmengel tan dinmengel ed simbawa. Aralen tayo met no antoy makatulong pian mas mainomay tayon awaten so simbawa.

6. Antoy naaralan tayo ed reaksion nen Arin Rehoboam nen akaawat na simbawa?

⁶ Imanoen so ginawa nen Rehoboam. Nen sikato so ari ed Israel, akikasi iray sakop to ya palemewen to komon so obligasyon ya impasakbat ed sikara na ama ton si Solomon. Nen unaan, maabig so ginawa nen Rehoboam ta kinmonsulta ed saray mamasiken ed Israel tan tinepetan to ra no antoy iyebat to ed saray totoo. Binagaan da ya pagbigyan toy kerew na totoo pian ag-ira manrebelde. (1 Ara. 12:3-7) Pero aliwan saman so labay ton narengel, kanian kinmonsulta ed saray kaedaran to. Seguro masulok lan 40 so edad da, kanian wala met lay eksperiensya rad bilay. (2 Awa. 12:13) Pero nen tinepetan to ra, aliwliway insimbawa rad sikato. Binagaan da ya pabelaten to ni ingen so obligasyon na saray sakop to. (1 Ara. 12:8-11) Mandumaan ya simbawa so naawat nen Rehoboam. Kasin sikatoy nampikasi tan nampatulong ed si Jehova pian naamtaan to no dinan ya simbawa so dengelen to? Andi. Basta labat dinmengel ed simbawa na saray kaedaran to. Lapud satan ya desisyon nen Rehoboam, aliwliway nansumpalan to tan na bansan Israel. Antoy naaralan tayo ed saya? Anggano agtayo labay so insimbawa ed sikatayo balet ta akabase itan ed Salita na Dios, dengelen tan iyaplika tayo nin siansia.

7. Antoy naaralan tayo ed reaksion nen Arin Uzias nen sinimbawa na saray saserdote?

⁷ Say sakey ni ya agdinmengel ed simbawa et si Arin Uzias. Sikatoy linmoob ed santuaryo diad templo nen Jehova anta saray saserdote labat so nayarin onloob ditan. Tan sinali to ni ingen so mamool na insenso! Sikatoy binano na saray saserdote. Imbaga ra: “Uzias, aliwan sikay manepeg a mamool na insenso parad si Jehova! Saray saserdote labat so nepeg a mamool na insenso.” Antoy reaksion nen Uzias ey? Imbes ya manpaabeba tan ompaway ya tampol ed santuaryo tan onkerew na perdona ed si Jehova, “sinmanok si Uzias” ed saray saserdote. Akin et ontay reaksion to? Seguro inisip to ya lapud sikato so ari, nagawaan to lay amin ya labay to. Pero ag-agustoan nen Jehova so ginawa na sayan mapaatagey ya ari kanian dinusa to. Sikatoy “akating ya anggad agew na impatey to.” (2 Awa. 26:16-21) Antoy  naaralan tayo ed saya? Anggano walay pribilehyo tayo ed organisasyon, no agtayo ondengel ed simbawa, naandi ed sikatayo so pabor nen Jehova.

8. Antoy reaksion nen Job nen sinimbawa nen Elihu tan nen Jehova?

⁸ Pero, wala met iray alimbawa ed Biblia ya dinmengel ed simbawa. Say sakey et si Job. Sikatoy matoor ed Dios, pero siempre, agmet perpekto. Wala ray inisip tan imbaga ton aliwa nen sikatoy dinmalan ed graben subok. Kanian sikatoy direktan sinimbawa nen Elihu tan nen Jehova. Antoy reaksion nen Job? Mapaabeba ton inawat so simbawa. Imbaga to: “Nansalita ak, balet andian ak na pakatalos . . . Bababawien ko iramay imbagak, tan diad pagbabawik et akayurong ak ed dabok tan dapol.” Benendisyonan nen Jehova si Job ta mapaabeban dinmengel ed simbawa.—Job 42:3-6, 12-17.

9. Antoy reaksion nen Moises nen impetek nen Jehova, tan antoy naaralan tayo ed sikato?

⁹ Say sakey nin maong ya alimbawa et si Moises. Nen sikatoy akagawa na seryoson lingo, inawat toy disiplina nen Aman Jehova. Aminsan lapud petang na ulo to, agto impaarap so galang ed Dios. Lapud satan, imbaga nen Jehova ed si Moises ya agla makaloob ed Insipan a Dalin. (Num. 20:1-13) Nen akikasi ya umanen komon nen Jehova so desisyon to, oniay imbaga nen Jehova ed sikato: “Tunda ka la! Agmo lan balot bibitlaen iyad siak.” (Deu. 3:23-27) Kasin binmarong si Moises? Andi. Inawat toy desisyon nen Jehova, kanian inusar nin siansia nen Jehova pian idaulo iray Israelita. (Deu. 4:1) Maabig no aligen tayoy Job tan Moises. Nen atalosan nen Job ya aliway iisipen to, agla akirasonan. Binirbir to ya alingo. Nen impetek nen Jehova si Moises, sikatoy nansiansian matoor anggano amta to ya agto la naawat so pribilehyo ya abaybayag to lan tatalaranan.

10. (a) Base ed Proverbio 4:10-13, akin et parad pankaabigan tayo lanlamang no ondengel tayo ed simbawa? (b) Antoy reaksion na pigaran agagi nen akaawat iray simbawa?

¹⁰ Parad pankaabigan tayo lanlamang so idengel tayod simbawa. (Basaen so Proverbio 4:10-13.) Inalig na dakel ya agagi tayo so alimbawa nen Job tan Moises. Imanoen so imbaga nen Brother Emmanuel ya taga Congo: “Nen anengneng na saray maespiritual ya brother ed kongregasyon mi ya aliwa lay aarapen ko, binilin tan pinasakbayan da ak. Maong labat ta inunor koy simbawa ra, ta no andi nipasubo ak ed dakel ya problema.” * Onia met so imbaga nen Sister Megan ya payunir ed Canada tungkol ed pangawat na bilin: “No maminsan, agko nagugustoan so ibabaga dad siak. Pero diad tua, aman so kaukolan kon narengel.” Tan oniay imbaga nen Brother Marko ya taga Croatia: “Nakal ak ed pribilehyok, pero lapud disiplina ya naawat ko, apapawil koy espiritualidad ko.”

11. Antoy imbaga nen Brother Karl Klein tungkol ed pangawat na simbawa?

¹¹ Say sakey ni ya dinmengel ed simbawa et si Brother Karl Klein, ya nanlingkor bilang membro na Mananguley ya Ulop. Diad istoryay bilay to, imbaga to ya sikatoy prangkan sinimbawa na malet ya kaaro to ya si Joseph F. Rutherford. Inamin nen Brother Klein ya asakitan ed saman. Oniay inistorya ton agawa: “Nen nannengneng kami lamet nen Brother Rutherford, maligligsa to ak ya imbano. Kuan to, ‘Hello, Karl!’ Pero lapud ombabarong ak ni, apilitan ak labat ya angibano. Imbaga tod siak, ‘Karl, manalwar ka! Pupuntiryaen ka la na Diablo!’ Nababaingan ak, kanian say kuan ko, ‘Ayos ak labat, Brother Rutherford.’ Pero alikas to ya ombabarong ak ni,  kanian inulit to may imbaga to, ‘Sirin? Basta manalwar ka. Pupuntiryaen ka la na Diablo.’” Antoy naaralan nen Brother Klein ed satan ya agawa? Oniay imbaga to: “Duga si Brother Rutherford! No manem-em tayoy sakit na linawa ed sakey ya agi, lalo la no binagaan to tayo lapud obligasyon to itan ya gawaen, aabuloyan tayoy Diablo ya mamatit ed sikatayo.” * (Efe. 4:25-27) Inawat nen Brother Klein so simbawa nen Brother Rutherford, tan ag-aderal so pankakaaro da.

12. Akin et importante ya mapaabeba tayo no walay mansimbawa ed sikatayo? (Salmo 141:5)

¹² Antoy makatulong pian mas mainomay tayon awaten so simbawa? Dapat mapaabeba tayo. Tandaan tayo ya ag-itayo perpekto tan no maminsan et talagan makakagawa tayoy aliwa. Singa abitla nen niman, wala ray aliwan inisip tan imbaga nen Job. Pero binirbir to lanlamang so lingo to kanian benendisyonan nen Aman Jehova. Lapud mapaabebay Job, inawat toy simbawa nen Elihu, anggano mas ugaw si Elihu nen say sikato. (Job 32:6, 7) No mapaabeba tayo ya singa si Job, ondengel tayod simbawa anggano mas ugaw so nansimbawa ed sikatayo tan singa anggapo met so makapuy ya ginawa tayo. Oniay imbaga na sakey ya elder ed Canada: “Wala ray nanenengneng na arum ya agtayo nanenengneng ed sarili tayo. Kanian no maminsan, agtayo amta no antoy kaukolan tayon umanen no anggapoy mangibaga ed sikatayo.” Diad tua, kaukolan tayoy tulong na arum pian mas naalig tayo ray ugali nen Jesus tan magmaliw tayon mas epektibo ed ministeryo.—Basaen so Salmo 141:5.

13. Antoy nepeg tayon isipen no makaawat tayoy simbawa?

¹³Isip mo ya say simbawa et panangaro nen Jehova ed sika. Labay nen Aman Jehova ya maong so pansumpalan tayo. (Pro. 4:20-22) Inar-aro to tayo kanian lanang to tayon bibilinen. Uusaren to so Biblia, saray publikasyon tayo, tan saray maespiritual ya agagi. “Gagawaen itan na Dios parad pakagunggonaan tayo,” so kuan na Hebreo 12:9, 10.

14. Antoy pampokusan tayo no walay nansimbawa ed sikatayo?

¹⁴Manpokus ed mensahe, aliwan diad paraan na impansimbawa. No walay nansimbawa ed sikatayo, ompan isipen tayo ya agto labat inapipiger so panagsalita to. Siempre, no say sakey et mangiter na simbawa, dapat mauyamo so pangibaga to pian mas mainomay ya awaten na sisimbawaen to. * (Gal. 6:1) Pero, antokaman so paraan na impansimbawa ed sikatayo,  say pampokusan tayo et samay mensahe. Maabig no tepetan tayoy sarili tayo: ‘Anggano agko agustoan so impansimbawa tod siak, wala kasi punto to? Tua, asakitan ak ed paraan na panagsalita to, pero antoy naaralan ko ed imbaga tod siak?’ Say nonoten tayo la et parad pankaabigan tayo lanlamang imay mismon simbawa.—Pro. 15:31.

15. Akin et mas maabig no sikatayo lay onkerew na simbawa?

¹⁵ Papasesegen itayo na Biblia ya onkerew tayoy simbawa. Oniay nabasa ed Proverbio 13:10: “Say karunongan et walad saramay onkekerew na simbawa.” Tua itan ta maslak ed saray onkekerew na simbawa et mas maaligwas ed espiritual kompara ed saramay alagaren da ni ya walay manbilin ed sikara. Kanian maabig no sika lay unonan onasingger ed maespiritual ya agi pian onkerew na advice.

16. Anto ray situasyon ya maabig no onkerew tayoy advice ed saray agagi?

¹⁶ Anto ray situasyon ya maabig no onkerew tayoy advice ed saray agagi? Isipen irayan situasyon. (1) Intagar na sister so sakey ya eksperiensyadon sister ya man-study, insan kayari to et tinepetan to no anto ni ray papaaligwasen tod panagbangat to. (2) Mano-online shopping so sakey ya sister ta mangaliw na kawes, pero nantepet ni ed maespiritual ya sister no antoy nibaga to ed samay apili to. (3) First time ya man-public talk so sakey a brother. Imbaga to ed sakey ya eksperiensyadon espiker ya obserbaan ton maong so pampaliwawa to pian nipaimano tod sikato iray kaukolan to nin paaligwasen. Diad tua, anggano abaybayag lan manpapaliwawa so sakey a brother, maabig no tepetan to nin siansia iray eksperiensyadon espiker no anto ni ray kaukolan ton paaligwasen, insan to iyaplika so suggestion da.

17. Antoy resulta no ondengel kad simbawa?

¹⁷ Diad onsusublay iran agew, simba, o bulan, amin tayo et makaawat na simbawa, nayarin direkta o aliwan direkta. No makaawat kay simbawa, nonot mo irayay apantongtongan tayo natan. Manpaabeba ka. Manpokus ka ed mensahe, aliwan diad paraan na impansimbawa. Tan iyaplikam so simbawa. Anggapod sikatayoy inyanak ya marunong la. Pero no ‘ondengel kad simbawa tan awaten moy disiplina,’ ibabaga na Biblia ya “magmaliw kan marunong.”—Pro. 19:20.