1-2. (a) Akin et maslak ya totoo natan et anggapo lay tiwala dad arum? (b) Antoy aralen tayo ed sayan artikulo?

LAPUD saray nagagawa natan, maslak ya totoo et anggapo lay tiwala dad arum. Singa bilang, nanenengneng dan mas papaboran na gobierno iray mayaman tan atagey so posisyon da. Pero no mairap so bilay mo, pakaskasi ka anggano walay karapatan mo tan sika so duga. Kanian susto may ibabaga na Biblia: “Say too et uuleyan toy kapara ton too diad pankaugsan to.” (Ecl. 8:9) Anggan saray lider na relihyon et wala ray mauges ya gagawaen da. Lapud satan, aderal laingen so tiwala na arum ya totoo ed Dios. Kanian no walay Bible study tayo, kaukolan tayon tulongan pian naaralan toy mantiwala ed si Jehova tan ed saray pinili To ya mangidaulo ed organisasyon To.

² Pero diad tua, aliwan saray Bible study labat so kaukolan ya mantiwala ed si Jehova tan diad organisasyon to. Anggan saramay abayag lan Tasi et importantin agan balot onkapuy so pananisia tan tiwala rad si Jehova. Pero wala ray situasyon ya nasubok so tiwala tayo ed si Jehova. Aralen tayod sayan artikulo so taloran situasyon: (1) no walay agtayo natatalosan ya desisyon o ginawa nen Jehova diad abasa tayon salaysay ed Biblia, (2) no walay naawat tayon instruksion ya nanlapud organisasyon nen Jehova, tan (3) no ondadalan tayod saray subok legan tan kayari na baleg a kairapan.

3. Panon ya nayarin nasubok so tiwalam ed si Jehova diad pigaran salaysay ya nabasam ed Biblia?

 ³ Diad pambabasam na Biblia, ompan wala ray napansin mon salaysay ya singa aliwan patas si Jehova. Singa bilang,  nabasa tayo ed libro na Numeros ya senentensiaan nen Jehova na patey so sakey ya Israelita ya nan-kiew diad agew na Sabaton. Pero nabasa tayo ed komaduan libro na Samuel ya pinerdona nen Jehova si Arin David nen akirelasyon ed si Bat-sheba tan nanggaway paraan pian ompatey so asawa to yan bii. (Num. 15:32, 35; 2 Sam. 12:9, 13) Kanian ompan naisip mo, ‘Akin et pinerdona nen Jehova si David anta ambelat so kasalanan to, balet amay Israelita ya singa anlemew labat so kasalanan to et patey so sentensia to?’ Pian naebatan iya, walay talora ya dapat tayon tandaan no manbabasa tayoy Biblia.

4. Base ed Genesis 18:20, 21 tan Deuteronomio 10:17, akin et makapantiwala tayo ya dugan lanang iray desisyon nen Jehova?

⁴No maminsan, agla ibabaga na Biblia so amin ya detalye ed sakey ya salaysay. Nabasa tayo ed Biblia ya impapuson nagbabawi si David ed saray kasalanan ya agawaan to. (Sal. 51:2-4) Pero amay Israelitan ag-inmunor ed ganggan na Sabaton ey? Kasin pagbabawian toy ginawa to? Kasin kagagawa to lay ag-onunor ed saray ganggan nen Jehova? Kasin abilin la dati pero imbaliwala to? Anggapoy nabasa tayod Biblia. Pero niay segurado: Si Jehova et “agbalot manggaway ag-inkahustisya.” (Deu. 32:4) Saray desisyon to et akabase ed no anton talagay agawa. Sikatoy agnanaapektoan na opinyon na arum, anggapoy mas papaboran to, tan aliwan singa too ya nasuholan. (Basaen so Genesis 18:20, 21; Deuteronomio 10:17.) Diad tua, no diman tayo mas nakakabat si Jehova tan mas nanaaralan iray prinsipyo to, diman met mas ombiskeg so tiwala tayo ya dugan lanang iray desisyon to. Kanian anggano walay tepet tayo ed sakey ya salaysay ed Biblia ya agni naebatan natan lapud agtayo amta so amin ya detalye, makaseguro tayo ya “si Jehova et matunong ed amin a gagawaen to.”—Sal. 145:17.

5. Antoy epekto na ag-inkaperpekto ed saray iisipen tayo? (Nengnengen met so kahon ya “ Aburagas so Pakatalos Tayo Lapud Agtayo Perpekto.”)

⁵Agtayo perpekto kanian aliwa no maminsan iray iisipen tayo. Pinalsa itayo na Dios ya sarag tayon ipanengneng iray kualidad to, singa say hustisya, kanian agtayo labay ya walay nanaagrabiado. (Gen. 1:26) Pero lapud agtayo perpekto, no maminsan et aliwa so  iisipen tayo anggano say pakalikna tayo et amta tayon amin so detalye. Ontan so agawa ed si Jonas. Agaylay petang na ulo to nen nandesisyon si Jehova ya agto la deralen iray taga Ninive. (Jon. 3:10–4:1) Pero isip mo pay resulta nen kinasian nen Jehova iray taga Ninive nen nagbabawi ira. Masulok ya 120,000 ya totoo so akaligtas! Antoy nibaga tayo ed desisyon nen Jehova ey? Duga si Jehova; si Jonas so aliwa.

6. Akin et ag-obligado si Jehova ya ipaliwawa ed sikatayo iray desisyon to?

⁶Ag-obligado si Jehova ya ipaliwawa ed sikatayo iray desisyon to. Nen wala ray lingkor nen Jehova nensaman ya nantepet tungkol ed desisyon to, inabuloyan to ran mansalita pian nibaga ray nalilikna ra. (Gen. 18:25; Jon. 4:2, 3) Tan no maminsan et ibabaga to no akin ya onmay desisyon to. (Jon. 4:10, 11) Pero diad tua, aga pa obligadoy Jehova ya ipaliwawa nid sikatayo iray desisyon to. Sikato so Amalsa ed sikatayo kanian agto la kaukolan ya laen so opinyon tayo, antis o kayari ton mandesisyon.—Isa. 40:13, 14; 55:9.

7. Antoy subok ed sikatayo no maminsan, tan akin?

⁷ Amta tayo ya dugan lanang so gagawaen nen Jehova. Pero saray pinili ton mangidaulo ed organisasyon to et aliwan perpekto. Kanian ompan panduaruwaan tayo no kasin duga iray desisyon da tan no talaga kasin manpapaigiya ira ed si Jehova. Subok la itan ed arum ya lingkor na Dios diad panaon na Biblia. Isip mo pa may duaran salaysay ya abitla ed  parapo 3. No kanayon to ka may laki ya nan-kiew ed agew na Sabaton, seguro naisip mo no talaga kasin kinmonsulta si Moises ed si Jehova antis ya asentensiaan na patey may kanayon mo. Tan panon to met no kaarom si Urias ya asawa nen Bat-sheba? Seguro kuestionen mo no akin et ag-asentensiaan na patey si David anta inala toy asawa nen Urias. Tan ompan isipen mo ya inusar toy posisyon to bilang ari. Pero nia so tandaan tayo: Pantitiwalaan nen Jehova iray pinili ton mangidaulo ed saray kongregasyon tan ed organisasyon to. Kanian no agtayo ra pantitiwalaan, labay ton ibaga, agtayo met mantitiwala ed si Jehova.

8. Base ed Gawa 16:4, 5, anton uksoyan so tutumboken na saray Kristiano nen inmunan siglo ya gagawaen tayo nin siansia natan?

⁸ Uusaren nen Jehova natan so “matoor tan makabat ya aripen” pian idaulo so kabiangan na organisasyon to diad dalin. (Mat. 24:45) Singa ginawa na mananguley ya ulop nen inmunan siglo, aasikasoen na sayan aripen iray pankaukolan na saray lingkor na Dios natan ed interon mundo, tan mangipapawit iray instruksion ed saray elder diad amin ya kongregasyon. (Basaen so Gawa 16:4, 5.) No naawat la itan na saray elder, seseguroen da ya natutumbok itan ed kongregasyon. Ipapanengneng tayon mantitiwala tayod si Jehova no ontutulok tayod saray instruksion ya manlalapud organisasyon to tan ed saray elder.

9. Diad anto ran situasyon ya nayarin mairap tayon unoren so desisyon na saray elder, tan akin?

⁹ No maminsan, ompan nairapan tayon unoren so desisyon na saray elder. Singa bilang, diad imbebeneg iran taon et impan-merge so arum ya kongregasyon, tan wala ray kongregasyon ya inyalis ed arum ya sirkito. Wala met iray situasyon ya nandesisyon iray elder ya iyalis na kongregasyon iray arum ya publisher pian naseguro ya sulit so pangusar ed Kingdom Hall. Panon to no sakey ka ed saray publisher ya iyalis ed arum ya kongregasyon? Ompan subok itan ed sika lalo la no agmo la  naka-kongregasyon iray kapamilyam o kakaarom. Siempre, amta tayo ya agdirektan manlalapud si Jehova so instruksion no siopan publisher so iyalis, kanian ompan nairapan tayon onunor. Pero tandaan tayo ya imamatalek la nen Jehova ed saray elder iray ontan ya desisyon ta pantitiwalaan to ra. Kanian pantiwalaan tayo met ira. *

10. Base ed Hebreo 13:17, akin et kaukolan tayon unoren tan suportaan so desisyon na saray elder?

¹⁰ Akin et kaukolan tayon suportaan tan unoren iray desisyon na saray elder anggano agtayo masyadon kompormi ed satan? On ta no ontan so gawaen tayo, walay nitutulong tayo pian naprotektaan so pankakasakey ed kongregasyon. (Efe. 4:2, 3) No mapasakop iray agagi tan mapaabeba dan unoren so desisyon na ulop na mamatatken, maaligwas so kongregasyon. (Basaen so Hebreo 13:17.) Tan say sankaimportantian, no susuportaan tayo ray lalaki ya tinuro nen Jehova ya mangasikaso ed sikatayo, ipapanengneng tayo ya mantitiwala tayo ed sikato.—Gawa 20:28.

11. Antoy nepeg tayon tandaan pian ombiskeg so tiwala tayo ed saray elder?

¹¹ Pian ombiskeg so tiwala tayo ed saray elder, tandaan tayo ya antis iran mandesisyon et manpipikasi ni ra tan kekerewen day masanton espiritu nen Jehova. Ikokonsidera da met iray prinsipyo ed Biblia ya makatulong ed pandesisyon da, tan rerebyuen da iray guidelines o instruksion ya nanlapud organisasyon. Say sankanonot da et say pankaabigan na agagi tan no antoy makapaliket ed si Jehova. Seseryosoen na sarayan matoor ya lalaki so responsabilidad dan asikasoen so pulok na Dios ta amta ran mikuentaan ira ed si Jehova. (1 Ped. 5:2, 3) Isip mo pa ’ya: Diad sayan mundo, manbubusolan iray totoo lapud nandurumay lahi da, relihyon, tan susuportaan dan partido ed politika. Pero sikatayo ran Tasi et nankakasakey tayon mandadayew ed tuan Dios, si Jehova. Ebidensya itan ya talagan bebendisyonan nen Jehova so organisasyon to!

12. Antoy gagawaen na saray elder pian natebek da no talaga kasin magbabawi so sakey ya nankasalanan?

¹² Responsabilidad met na saray elder ya pansiansiaen ya malinis so kongregasyon. Ambelat itan ya responsabilidad ya inter nen Jehova ed sikara. No walay sakey ya agi ya akagaway seryoson kasalanan, saray elder so tinuro nen Jehova ya mandesisyon no kasin sikatoy mansiansia ni ed kongregasyon. Pero antis iran mandesisyon, dapat amtaen da ni no talagan magbabawi may akagawa na kasalanan. Ompan ibaga to ya magbabawi met, pero talaga kasin kabkabusol to may ginawa ton kasalanan? Kasin desidido ya agto lan talaga uliten? No agawaan to itan lapud impluensya na saray kaaro to, kasin akaparaan ya oniwas lad sikara? Ikonsidera irayan amin na saray elder. Manpikasi irad si Jehova, imbestigaan da no anton talagay agawa, amtaen da ray nalalanor ya prinsipyo ed Biblia, tan tebeken da no antoy nalilikna na agi ed ginawa to. Insan ira mandesisyon no kasin mansiansia ni ed kongregasyon imay nankasalanan o kaukolan ya nadispelo.—1 Cor. 5:11-13.

13. Akin et nayarin nasubok so tiwalam ed saray elder no walay adispelon kapamilyam o kaarom?

¹³ No walay nadispelo ed kongregasyon, panon ya nasubok so tiwala tayo ed saray elder? No say adispelo et agtayo kapamilya o kaaro, ompan naawat tayon tampol so desisyon da.  Pero panon to no ka-close tayo may adispelo? Ompan kuestionen tayo so desisyon na saray elder tan isipen tayon agda inamta so amin ya agawa tan ag-ira nampaigiya ed si Jehova nen nandesisyon ira. Antoy makatulong pian agtayo kuestionen so desisyon na saray elder?

14. Antoy makatulong pian naawat tayoy desisyon na saray elder no walay ka-close tayon adispelo?

¹⁴ Tandaan tayo ya say panagdispelo et uksoyan nen Jehova. Parad pankaabigan itan na kongregasyon tan samay mismon nankasalanan. No say sakey ya agmagbabawin nankasalanan et agnadispelo, ompan naimpluensyaan toy arum ya agagi. (Gal. 5:9) Sakey ni, ompan agto natalosan ya ambelat may ginawa ton kasalanan. Kanian imbes ya mansagpot komon pian napapawil toy relasyon tod si Jehova, ompan ikakkaloor to laingen. (Ecl. 8:11) On, tandaan tayo ya agbasta-basta mandi-dispelo iray elder. Amta ra ya seryoso itan ya desisyon. Kanian singa saray ukom ed Israel nensaman, ‘ag-ira manguukom parad too, noagta parad si Jehova.’—2 Awa. 19:6, 7.

15. Akin et kakkaukolan tayo lay mantiwala ed si Jehova natan?

¹⁵ Kakkaukolan tayo lay mantiwala ed si Jehova natan ta asingsingger lay anggaan na sayan sistema na mundo. Legan na baleg a kairapan, ompan wala ray naawat tayon instruksion ya singa aliwan praktikal tan singa mairap ya unoren. Siempre, agmet direktan mitongtong ed sikatayo si Jehova. Pero usaren to ray pinili ton mangidadaulo pian mangiter na instruksion ed sikatayo. No baleg a kairapan la, duga kasi ya kuestionen moy instruksion da tan isipen mon, ‘Talaga kasin nanlapu yad si Jehova? Singa gawa-gawa labat amo na saray elder?’ Odino manmatalek ka ed si Jehova tan ed organisasyon to? Say ebat ed satan et akadepende no kasin onuunor ka la ed saray instruksion na organisasyon natan. No natan ni labat et maunor ka lad saray instruksion, seguradon ontan met so gawaen mo legan na baleg a kairapan.—Luc. 16:10.

16. Anto ni sakey ya pakasubokan na tiwala tayo ed si Jehova diad arapen?

¹⁶ Nasubok met so tiwala tayod si Jehova no ukomen to la ray totoo. Tua, agtayo nanaandian na ilalo ya saray kapamilya tan kakaaro tayon aliwa nin Tasi et manlingkor met ira komon ed si Jehova antis ya onsabi so anggaan. Pero no Armagedon la, si Jehova so mandesisyon no kasin niliktar ira o andi, tan usaren toy Jesus ya mangipaakseb na panangukom to. (Mat. 25:31-33; 2 Tes. 1:7-9) Aliwan sikatayoy mandesisyon no siopa ray kasian nen Jehova tan no siopa ray naderal. (Mat. 25:34,  41, 46) Kasin mantiwala ka ed desisyon nen Jehova, odino kuestionen mo tan ombarong ka? No natan ni labat et papabiskegen mo lay tiwalam ed si Jehova, seguradon buo so tiwalam ed sikato diad arapen.

17. Kayari na Armagedon, anto ray nanengneng tayon resulta na panangukom nen Jehova?

¹⁷ Imadyin mo pa no antoy naliknam no nanengneng moy resulta na impangukom nen Jehova kayari na Armagedon. Anggapo lay palson relihyon, komersyalismo, tan corrupt ya gobierno ya abaybayag lan mamapairap ed totoo. Agtayo met la mansakit tan ontatken, tan agtayo la mapaga ya ompan naandid bilay iray inar-aro tayo. Ibantak ed kaaralman si Satanas tan saray demonyo to diad loob na sanlibon taon. Tan naandi lan amin so mauges ya resulta na impanrebelde da. (Apo. 20:2, 3) No nagawa la iratan ya amin, seguradon misalsalamat ka tan nibagam ya, ‘Maong labat ta nantiwala ak ed si Jehova!’

18. Antoy naaralan tayod makapuy ya ginawa na saray Israelita ya nabasad Numeros 11:4-6 tan 21:5?

¹⁸ Kayari na Armagedon tan balon mundo la, wala ni ra kasi so pakasubokan na tiwala tayo ed si Jehova? Isipen pay agawa ed saray Israelita nen kakkayari iran impaway nen Jehova ed Ehipto. Arum ed sikara et nanreklamo ta nanailiw da ray sira tan pisipising ed Ehipto tan onsasawa la ra kuno ed panangan ya iiter nen Jehova, say mana. (Basaen so Numeros 11:4-6; 21:5.) Posible met kasin nagawa itan ed sikatayo? Kayari Armagedon, seguradon dakel so linisan tayo ta amayamay so aderal, tan siempre impasya tayon mankimey pian magmaliw ya paraiso so dalin. Kanian diad gapo na balon mundo, ompan aliwan mainawan tampol so bilay. Legan na satan ya panaon, kasin manreklamo ka ed si Jehova? O mankontento ka ed saray iter to? Aya so tandaan mo: No natan ni labat et papablien mo la ray itatarya nen Jehova, seguradon ontan met so gawaen mod arapen.

19. Anto ray manunan punto ya naaralan mo ed sayan artikulo?

¹⁹ Mantiwala tayo ya dugan lanang so gagawaen nen Jehova. Mantiwala tayo met ed saray pinili ton mangidaulo ed organisasyon to ta pantitiwalaan to ra. Tandaan tayo may imbaga nen Jehova ya impaisulat to ed si propetan Isaias: “Say biskeg yo et akadepende ed pansiansia yon kalmado tan pangipatnag yoy panagmatalek.”—Isa. 30:15.