NENSAMAN, no say duaran pamilya et nampaknaan la ya pan-asawaen day ananak da, mangiter na dasel so nobyo ed pamilya na nobya. Say dasel et nayarin kuarta, ayayep, odino antokaman ya balbaleg so bili to. No maminsan, serbian ni na nobyo so pamilya na nobya tan atan so pinagka-dasel to. Ontan so ginawa nen Jacob pian naasawa toy Raquel. Sikatoy nanlingkor na pitoy taon ed pikatulangan to. (Gen. 29:17, 18, 20) Akin et mangiiter iray dasel nensaman?

Oniay ibabaga na Bible scholar ya si Carol Meyers: “Say dasel et pinagka-regalo ed pamilya na nobya ta no asawaen da la, agla makatrabaho parad pamilya da, lalo la ta say anapan nensaman et panagdalus tan panag-asikaso na ayep.” Ontan met, say pangiter na dasel et paeleten toy ulopan na duaran pamilya ya man-abalayan. No malet so ulopan da, mantulongan ira no walay onlesan problema. Sakey ni, no niiter la so dasel, tanda itan ya akisipanan lan mikasal so sakey ya bii tan asingger lan onekal ed pudir nen ama to, tan say mangasikaso lad sikato et say asawa to.

Kasin labay ya ibaga na saya ya singa da sasaliwen o ilalako so sakey ya bii nensaman? Andi. Oniay imbaga na libron Ancient Israel—Its Life and Institutions: “Ompan diad pakanengneng na arum, say pangiter na dasel ed Israel nensaman et singa da sasaliwen so sakey ya bii. Pero andi, ipapasen da itan ya pinagka-regalo ed pamilya to. Agda iisipen ya atan so presyo to.”

Wala ni ray bansa natan ya manggagawa na onia. No saray Tasin atateng et onkerew na dasel, komon ta “makatunongan” ira. (Fil. 4:5; 1 Cor. 10:32, 33) No aliwan alablabas so kerewen da, ipapanengneng dan ag-ira “maaro ed kuarta” odino materyalistiko. (2 Tim. 3:2) Sakey ni, agnapilitan so manugangen da ya mantrabaho lan mantrabaho pian naasawa toy anak da. Tan ompan lapud satan et agnatuttuloy so kasal da ta mantipon ni odino ompan napilitan ya itunda so pampapayunir to ta mantrabaho lay full-time pian makapangiter na dasel.

Diad arum ya bansa, wala ray batas na gobierno tungkol ed pangiter na dasel. Kaukolan ya unoren itan na saray atateng ya Tasi. Akin ey? On ta ibabaga na Biblia ya “manpasakop [tayo] ed saray atagey ya autoridad” tan unoren tayo iray batas na gobierno ya agmet kontra ed ganggan na Dios.—Roma 13:1; Gawa 5:29.