1. Anto ray patunay ya importantin maong ed si Jesus so Masanton Kasulatan?

 IMADYIN mo pa ya mabilay ka la nen wadiad dalin si Jesus. Seguradon labalabay mon dengelen iray ibabangat to. Mabetbet ton bibitlaen iray nabasa ed Masanton Kasulatan tan memorize to iratan. Diad tua, say sankaunaan ya akarekord ya imbaga to kayari na bautismo to et nanlapud Kasulatan. b Tan anggan saray imbaga to antis ya inatey et akabase met ditan. (Deu. 8:3; Sal. 31:5; Luc. 4:4; 23:46) Tan legan na talora tan kapalduan taon na ministeryo nen Jesus, mabetbet ton nabibitla tan babasaen so Kasulatan diad arap na totoo tan ipapaliwawa to itan ed sikara.—Mat. 5:17, 18, 21, 22, 27, 28; Luc. 4:16-20.

2. Akin et kabisado nen Jesus so Kasulatan manlapud inkaugaw to? (Nengnengen so litrato ed apis.)

² Manlapu lad inkaugaw nen Jesus, narerengel to lay Salita na Dios. Maespiritual iray atateng ton si Maria tan Jose kanian seguradon lanang dan nabibitla so Kasulatan no maniistoryaan iran pamilya. c (Deu. 6:6, 7) Seguradon apasalan da lan pamilya so onlad sinagoga kada Sabaton. (Luc. 4:16) Naiimadyin tayoy Jesus ya madengedengel legan ya babasaen so Kasulatan diad sinagoga. Asabi panaon nen baleg la, aglabat ondedengel si Jesus, noagta sikato lan mismo so manbabasa. Kanian kabkabisado toy Kasulatan, naar-aro to itan, tan  nampaigiya ed satan. Seguro nanonotan yo may agawa ed templo nen 12 ni labat so taon to. Saramay managbangat ya kabisado day Mosaikon Ganggan et “mankelkelaw ed pakatalos to tan ed saray ebat to.”—Luc. 2:46, 47, 52.

3. Antoy aralen tayo ed sayan artikulo?

³ Singa si Jesus, nakabisado tan naar-aro tayo met so Salita na Dios no lanang tayo itan ya basaen. Anto balet so gawaen tayo pian talagan minabang tayo ed pambabasa tayoy Biblia? Pian naebatan itan, aralen tayoy imbaga nen Jesus ed saramay akatongtong ton kabisado day Ganggan, singa saray eskriba, Fariseo, tan Saduceo. Anggano lanang dan babasaen so Kasulatan, agdan talaga natatalosan tan anggapoy epekto to ed bilay da. Impaimano nen Jesus no anto komoy ginawa ra pian natalosan day Kasulatan. Makatulong ed sikatayo iray imbaga nen Jesus pian (1) natalosan tayoy babasaen tayo, (2) naalmo tayo ray espiritual ya kayamanan, tan (3) naiyaplika tayod bilay tayo iray bilin na Biblia.

4. Antoy naaralan tayo ed Lucas 10:25-29 tungkol ed panagbasa na Biblia?

⁴ No manbabasa tayoy Biblia, importante ya natatalosan tayoy babasaen tayo. Ta no andi, anggapo lanlamang so gunggona na pambabasa tayo. Singa bilang, imanoen pay impitongtong nen Jesus ed “sakey a lakin makabat ed Ganggan.” (Basaen so Lucas 10:25-29.) Nen intepet na laki no antoy gawaen to pian naawat toy bilay ya andi-anggaan, oniay intepet met nen Jesus ed sikato: “Antoy nisulat ed Ganggan? Antoy atalosan mod abasam?” Inmebat imay laki ya nepeg ton aroen so Dios tan say kapara ton too. Duga so ebat to lapud atan imay walad Levitico 19:18 tan Deuteronomio 6:5. Pero onia ni so intepet to may laki ed si Jesus: “Siopa tay kaparak a too a nepeg kon aroen?” Mapatpatnag ya anggano kabisado toy Ganggan, agto manaya natatalosan. Kanian agto met amta no panon ton iyaplika ed bilay to.

5. Akin et mas natalosan moy babasaen mo no manpikasi ka tan agka manaapuran manbasa?

⁵ Mas natalosan tayo so Biblia no dugay paraan na panagbasa tayo. Nia ray pigaran suggestion ya makatulong. Antis kan manbasa, manpikasi ka ni. Say Biblia et Salita nen Jehova kanian kaukolan tayoy tulong to pian natalosan tayo itan. Espisipikom ya kerewen so masanton espiritu to pian makapampokus ka ed babasaen mo. Insan no manbasa ka la, agka manaapura. Ta no mapmaples kan manbasa, ompan agmo lanlamang natalosan. Maabig no say pambasam et amay narerengel moy sarilim. No available so audio recording na Biblia ed lenguahem, dengel mo itan legan mon susubaybayan ed Bibliam. No parehon onggagana so matam tan layag mo, mas ontatak ed isip tan pusom so Salita na Dios. (Jos. 1:8) Kasumpal mon manbasa, manpikasi ka lamet. Pisalamatan moy Jehova ed impangiter toy Biblia tan kerew moy tulong to pian niyaplikam so abasam.

6. Akin et mas natalosan moy Biblia no tepetan moy sarilim legan kan manbabasa tan isulat mo ray punto ya labay mon tandaan? (Nengnengen met so litrato.)

⁶ Nia ni so duaran suggestion pian mas natalosan moy Biblia. Legan kan manbabasa, tepetan moy sarilim. Singa bilang, no istorya so babasaen mo, nia ray itepet mo: ‘Siopa ray  manunan karakter? Siopay mansasalita dia? Siopay katongtong to, tan akin et onmay imbaga to? Kapigan tan iner iya agawa?’ No amtaen moy ebat ed saratan, mas naimadyin moy babasaen mo. Maabig met no isulat mo ray punto ya labay mon tandaan. No isulat mo no antoy walad nonot mo, mas malinew ed sika iray nababasam tan mas natandaan mo. Singa bilang, isulat mo ray naisip mon tepet tan no antoy ebat, saray makapainteres ya a-research mo, say sumaryo na saray manunan punto, odino no panon mon iyaplika so abasam. Sarag mo ingen ya isulat no antoy aliknam legan mon babasaen so sakey ya bersikulo o salaysay ed Biblia. No mansusulat ka legan kan manbabasa, ditan mo na-realize ya say Biblia et personal ya sulat nen Jehova ed sika.

7. Anton abilidad so kaukolan tayon usaren legan tayon manbabasa, tan akin? (Mateo 24:15)

⁷ Imbaga nen Jesus ya kaukolan so pakatebek pian natalosan tayoy Salita na Dios. (Basaen so Mateo 24:15.) Anto tay pakatebek? Atan imay abilidad ya amtaen no antoy koneksion o pandumaan na sakey ya detalye ed arum nin detalye. Atan met imay abilidad ya talosan so kabaliksan na sakey ya impormasyon anggano ag-itan direktan imbaga. Imbaga nen Jesus ya kaukolan tayoy pakatebek pian nanengneng tayo no kasin nagagawa la iray propesiya ed Biblia. Kaukolan tayo met itan pian minabang tayo ed amin ya nababasa tayo ed Biblia.

8. Antoy gawaen mo pian natebek moy labay ya ibaga na babasaen mo?

⁸ Si Jehova so mangiiter na pakatebek ed saray lingkor to. Kanian ipikasim ed sikato ya ikdan to kay pakatebek. (Pro. 2:6) Antoy gawaen mo pian nipanengneng mod si Jehova ya seryoso ka ed satan ya ipipikasim? Usisam ya maong so babasaen mo tan isip mo no antoy koneksion na satan ed saray dati lan antam. Man-research ka ed saray publikasyon tayo, singa  say Giya ed Pan-research na Saray Tasi nen Jehova. Makatulong iray publikasyon tayo pian natebek mo no antoy labay ya ibaga na sakey ya teksto tan no panon mon niyaplika itan ed bilay mo. (Heb. 5:14) No tebeken moy nababasam, mas onlawak so pakatalos mo ed Biblia.

9. Anton importantin katuaan ed Salita na Dios so ag-atebek na saray Saduceo?

⁹ Kabisadon maong na saray Saduceo so unonan limaran libro na Hebreon Kasulatan, pero agda atebek so arum ya importantin katuaan ya nabasa ditan. Singa bilang, ag-ira manisia ed kioli. Kanian tinepetan day Jesus pian kuestionen itan ya bangat. Bilang ebat, oniay intepet nen Jesus ed sikara: “Agyo ta abasa ed libro nen Moises, diad salaysay nipaakar ed masabit a kiew, ya inkuan na Dios ed sikato: ‘Siak so Dios nen Abraham tan Dios nen Isaac tan Dios nen Jacob’?” d (Mar. 12:18, 26) Seguradon aminpigapiga lan abasa itan na saray Saduceo, pero mapatpatnag ya agda atebek so importantin katuaan ya onsabi panaon et walay nagawan kioli.—Mar. 12:27; Luc. 20:38.

10. Anto ray anapen tayo legan tayon manbabasa na Biblia?

¹⁰ Antoy naaralan tayo ed samay imbaga nen Jesus ed saray Saduceo? No manbabasa tayoy Biblia, labay tayon tebeken so amin ya katuaan tan prinsipyo ya walad sakey ya bersikulo o salaysay. Singa iratan akaamot ya kayamanan ya kaukolan tayon anapen. Kanian aliwan basta akabasa tayo tan atalosan tayo ray manunan bangat et duga la. Say goal tayo et anapen iray espiritual ya kayamanan.

11. Panon mon usaren so 2 Timoteo 3:16, 17 pian naromog mo iray espiritual ya kayamanan ed Biblia?

¹¹ No manbabasa kay Biblia, panon mon naromog iray espiritual ya kayamanan? Makatulong so ibabaga na 2 Timoteo 3:16, 17. (Basaen.) Nabasa ditan ya “say interon Kasulatan et . . . makagunggona” parad (1) panagbangat, (2) pananimbawa, (3) panangipetek, tan (4) panagdisiplina. No manbabasa kay Biblia, imanom iratan ya apatiran gunggona anggan diad saramay libron agka masyadon pamilyar. Singa bilang, isip mo no antoy ibabangat na sakey ya salaysay na Biblia tungkol ed si Jehova, tungkol ed gagala to, o no anto ran prinsipyo so naaralan mo ed satan. Likas mo met no panon kan sisimbawaen nen Jehova. Kasin walay abasam ya bersikulo ya ditan et anengneng mo ya walay kaukolan mon umanen ya ugalim o kagagawam? Isip mo met no panon mon nausar so sakey ya teksto pian naipetek so pikewet ya panagrason, singa diad ministeryo. Imanom met no panon ya makatulong so sakey ya teksto pian nadisiplina o naipasal moy sarilim ya  aligen so panagnonot nen Jehova. No sankanonot mo irayan apatiran gunggona legan kan manbabasa na Biblia, walan-walay naromog mon espiritual a kayamanan.

12. Akin et tinepetan nen Jesus iray Fariseo ya: “Agyo ta abasa?”

¹² Tinepetan met nen Jesus iray Fariseo ya: “Agyo ta abasa?” e (Mat. 12:1-7) Diad sayan inkagawa, aakusaan na saray Fariseo iray disipulo nen Jesus ya agda kuno uunoren so ganggan ed Sabaton. Bilang ebat, binitla nen Jesus so duaran alimbawa ed Kasulatan tan impanonot to so sakey ya bersikulo ed libron Oseas pian ipanengneng ed saray Fariseo ya agda natatalosan no akin ya inter nen Jehova so ganggan tungkol ed Sabaton. Tan mapatpatnag ya anggapoy panangasi ra. Akin et aliwliway ugali na sarayan Fariseo anta basa la ran basa na Kasulatan? On ta imbes ya iyaplika ran mismo so babasaen da, lingo na arum so nenengnengen da tan atagtagey so pakanengneng dad sarili da. Kanian anggano dakdakel so amta rad Kasulatan, anggapoy epekto to ed inkatoo ra.—Mat. 23:23; Juan 5:39, 40.

13. Anton kualidad so kailangan no manbabasa tayo na Biblia, tan akin et importante itan?

¹³ Agtayo aaligen iray Fariseo. Nanengneng tayod samay imbaga nen Jesus ed sikara ya dapat mabulos tayon paibangat tan mapaabeba tayo no manbabasa tayoy Biblia. No mapaabeba tayo, “nitanem ed kapusoan [tayo]” so Salita na Dios tan onlamot itan. (Sant. 1:21) No aliwan atagtagey so pakanengneng tayod sarili tayo tan aliwan lingo na arum so sankanonot tayo, mas mainomay tayon iyaplika iray bilin na Biblia tungkol ed pangipanengneng na panangasi tan panangaro.

14. Antoy pakanengnengan no kasin iyaaplika tayoy nababasa tayod Biblia? (Nengnengen met so litrato.)

 ¹⁴ Nanengneng ed panagtrato tayod arum no kasin iyaaplika tayo iray nababasa tayod Biblia. Lapud agtinmagos ed puso na saray Fariseo so Salita na Dios, aliwliwa nin siansiay ugali da tan mapanghusga ra kanian “inukom da [anggan saray] andian na kasalanan.” (Mat. 12:7) Sikatayo ey? Kasin nanengneng ed panagtrato tayo ed arum ya iyaaplika tayoy Salita na Dios? Singa bilang, kasin say iimanoen tayo ed arum et say kamaongan ya nagagawaan da o masitasita tayo? Kasin makasi tan akaparaan tayon mamerdona o mabalaw tan masinti tayo? Nanengneng ed saray ebat tayo ed saratan ya tepet no kasin iyaaplika tayoy nanaaralan tayo o andi.—1 Tim. 4:12, 15; Heb. 4:12.

15. Antoy nalilikna nen Jesus ed Masanton Kasulatan?

¹⁵ Inar-aro nen Jesus so Masanton Kasulatan ya singa adeskribe ed propesiya ed Salmo 40:8: “Say panggaway linawam, O Dios ko, so panliliketan ko, tan say ganggan mo et walad pusok.” Atan so rason no akin ya sikatoy maliket tan matoor diad panlilingkor tod si Jehova. Singa si Jesus, magmaliw tayon maliket tan makapanmatoor tayo met no inagew-agew tayon babasaen so Salita na Dios tan ipapapuso tayo itan.—Sal. 1:1-3.

16. Anto ray planom ya gawaen pian talagan minabang ka ed pambabasam na Biblia? (Nengnengen so kahon ya “ Makatulong Iray Imbaga nen Jesus Pian Natalosan Moy Babasaen Mo.”)

¹⁶ On, base ed saray apantongtongan tayon imbaga nen Jesus, kaukolan tayon i-improve so panagbasa tayoy Biblia. Makaaral tayo ed mismon alimbawa to. Natalosan moy babasaen mo no manpikasi ka, agka manaapuran manbasa, tepetan moy sarilim tungkol ed babasaen mo, tan isulat mo ray punto ya labay mon tandaan. Usar moy pakatebek mo tan man-research ka ed saray publikasyon tayo pian malinew ed sika iray babasaen mo. Anap mo iray espiritual ya kayamanan, lalo lad saray teksto o libro na Biblia ya agka masyadon pamilyar pian onlawak so pakatalos mod Biblia. Tan komon et mapaabebam ya awaten tan iyaplika iray nababasam ed Salita na Dios. No gawaen tayo iratan ya amin, mas minabang tayo ed pambabasa tayoy Biblia tan mas onapit tayo ed si Jehova.—Sal. 119:17, 18; Sant. 4:8.