SAY labay na dakel ya totoo natan et espisyal so pantrato ed sikara, tan iisipen da ya dapat labat iran panserbian na arum. Tan anggano balibali lay pantratrato na arum ed sikara, agni ran siansia kontento. Makasarili iray ontan ya totoo tan agda amtay misalamat. Ontan so ibabaga na Biblia ya ugali na maslak ya totoo diad sayan kaunoran iran agew.—2 Tim. 3:2.

Diad tua, manlapu la nensaman, wala la ray totoon makasarili. Singa bilang, si Adan tan Eva. Labay da ya sikaray mandesisyon no antoy duga tan aliwa, tan adamay tayo laingen nen aliwliway nansumpalan na desisyon da. Say sakey nin alimbawa et si Uzias ya ari na Juda. Atagtagey so pakanengneng tod sarili to. Inisip to ya walay karapatan ton mamool na insenso ed templo. Pero diad tua, anggapon balot so kanepegan ton gawaen itan. (2 Awa. 26:​18, 19) Ontan met iray Fariseo tan Saduceo. Inisip da ya dapat labat ya espisyal so pantrato na Dios ed sikara ta nanlapu ra ed poli nen Abraham.—Mat. 3:9.

Apaliberan tayo na saray totoon makasarili tan mapaatagey. Kanian no agtayo manalwar, ompan naalig tayo ra. (Gal. 5:26) Ompan isipen tayo met la ya dapat labat ya espisyal so pantrato na arum ed sikatayo. Antoy gawaen tayo pian agtayo naalisan na ontan ya panagnonot? Makatulong no amtaen tayo no antoy nibaga nen Jehova. Pantongtongan tayo so duaran prinsipyo ed Biblia.

Si Jehova so walaan na karapatan ya mangibaga no antoy kanepegan tayo. Nia ray pigara ed saratan.

• Diad pamilya, say labay nen Jehova et respetoen na asawan bii so mister to, tan aroen na asawan  laki so misis to. (Efe. 5:33) Imbaga nen Jehova ya say pangipanengnengan na sanasawa na romantikon panangaro et dia labat ed sakey tan sakey, anggapo lay arum. (1 Cor. 7:3) Kanepegan na saray atateng ya unoren ira na saray ananak da, tan kanepegan met na ananak ya aroen tan asikasoen ira na atateng da.—2 Cor. 12:14; Efe. 6:2.

• Diad kongregasyon, kanepegan na saray elder so narespeto lapud pansasagpot tan pangidadaulo da. (1 Tes. 5:12) Balet anggapoy kanepegan dan manari-arian ed saray agagi.—1 Ped. 5:​2, 3.

• Inikdan na Dios so gobiernoy too na kanepegan ya mansingil na buis. Nanlapu met ed Dios so kanepegan da ya respetoen ira na saray sakop da.—Roma 13:​1, 6, 7.

Maar-aroy Jehova kanian mas ni so inter to nen say kanepegan tayo. Diad tua, makasalanan tayo kanian say kanepegan tayo labat et ompatey. (Roma 6:23) Pero lapud matoor ya panangaro nen Jehova, dakdakel ya bendisyon so iiter tod sikatayo. (Sal. 103:​10, 11) Iiter ton amin iratan, aliwan lapud kanepegan tayo iratan ya naawat, noagta lapud panangaro tan agnaparaan ya kaabigan to.—Roma 12:​6-8; Efe. 2:8.

Manalwar tayo pian agtayo naalig so panagnonot na sayan mundo. Ompan agtayo nalilikas ya atagtagey la manayay pakanengneng tayod sarili tayo tan iisipen tayo la ya mas importante tayo nen say arum. Walay ilustrasyon ya inusar nen Jesus ya mangipapanengneng ya walay tendensia tayon magmaliw ya ontan. Diad sayan ilustrasyon, imbaga to ya wala ray pigaran komikimey ya pinmayag ya mantrabaho ed kaubasan ya say upa et sansakey ya denario. Say arum ed sikara et angabkabuasan ya nantrabaho tan sanagew iran nankimey anggano mansasnit so petang. Aray arum balet, sakey oras labat ya nankimey. Kasabi labi, nen panag-iiter lay upa, pareparehoy upa na amin ya trabahador. Nanreklamo iramay angabkabuasan ya nankimey. Inisip da ya mas baleg dapat so upa da. (Mat. 20:​1-16) Inusar nen Jesus iyan ilustrasyon pian ibangat iray disipulo to ya dapat ya mankontento ra ed no antoy inter na Dios ed sikara.

Aralen tayoy misalamat tan agtayo onaasa ed tulong na arum. (1 Tes. 5:18) Balibalin aligen so alimbawa nen apostol Pablo. Wala komoy kanepegan to ya onkerew na materyal ya tulong ed saray agagi ed Corinto, pero agto itan ginawa. (1 Cor. 9: 11-14) Komon ta magmaliw tayon maapresya ed amin ya tulong tan kamaongan ya gagawaen na arum parad sikatayo, tan agtayo iilaloan ya espisyal so pantrato da ed sikatayo.

Magmaliw ya mapaabeba. No say sakey et atagtagey so pakanengneng tod sarili to, aga kontento ed no antoy walad sikato. Iisipen to ya mas ni so kanepegan to. Pero no say sakey et mapaabeba, agto itan isipen ta amta to ya mauges itan ya panagnonot.

Balibalin aligen so alimbawa nen propetan Daniel. Kabkabat so pamilya to, guapo, matalino, tan maabilidad ya too. Singa wala lad sikaton amin, kanian sarag to komon ya isipen ya duga labat ya espisyal so pantrato na arum ed sikato tan kanepegan to labat iramay naawat ton pribilehyo. (Dan. 1:​3, 4, 19, 20) Pero agbalot itan inisip nen Daniel. Mapabpaabeba iyan laki kanian naar-aro nen Aman Jehova.—Dan. 2:30; 10:​11, 12.

Agtayo sirin aaligen iray totoo ed sayan mundo ya makasarili tan mapaatagey. Komon ta itultuloy tayon apresyaen so agnaparaan ya kaabigan nen Jehova tan amin ya iiter ton bendisyon ed sikatayo.