1-2. Akin ya say kipapasen tayo et pareho ed situasyon na samay kabataan ya abitlad parapo 1?

 IMADYIN mo pay sakey ya kabataan ya binmaleg ed mayaman ya pamilya. Sakey agew, naaksidente iray atateng to tan inatey ira. Agaylay ermen to tan agmakapanisia ed agawa. Pero say sakey nin makapaermen, naamtaan to ya pinerdi manaya na atateng to so kayamanan na pamilya ra tan dakdakel so utang da. Kanian utang so atawir to imbes ya kayamanan. Balbaleg natay problema to ta sisingilen la na saray akautangan na atateng to. Pero diad kabaleg na utang da, imposiblin nabayaran to itan ya amin.

² Parehoy kipapasen tayo ed situasyon na sayan kabataan. Balibali so bilay na inmunan atateng tayo, si Adan tan Eva. Perpekto ira tan manaayam irad marakdakep ya paraiso. (Gen. 1:27; 2:​7-9) Walay ilalo dan manbilay na andi-anggaan. Pero, anguman itan ya amin nen nankasalanan ira. Pinapaway ira nen Jehova diad hardin na Eden tan abalang day ilalo ran manbilay ya anggapoy anggaan. Antoy impatawir da ed sikatayo ran ananak da? Oniay ibabaga na Biblia: “Diad panamegley na sakey a too (ontutukoy iya ed si Adan) et linmoob ed mundo so kasalanan, tan say patey ed panamegley na kasalanan, ontan met a say patey et kinmayat ed amin a totoo lapud nankasalanan iran amin.” (Roma 5:12) On, kasalanan so impatawir ed sikatayo nen Adan, tan atan so rason no akin ya ompapatey tayo. Say atawir tayon kasalanan et singa balbaleg ya utang ya agtayon balot nabayaran.—Sal. 49:8.

 3. Akin ya saray kasalanan tayo et singa “utang”?

³ Inkompara nen Jesus iray kasalanan tayo ed “utang.” (Mat. 6:12; Luc. 11:​4, paimanod leksab) Kada no mankasalanan  tayo, singa tayo makakautang ed si Jehova. Siempre no imbagan utang, kaukolan ya bayaran. Ibabaga na Biblia ya “say bayar na kasalanan et patey.” Labay ton ibaga sirin, no ompatey tayo, diman labat nabayaran so utang tayo ed si Jehova.—Roma 6:​7, 23.

 4. (a) No anggapoy tulong nen Jehova, antoy nagawa ed amin a totoo? (Salmo 49:​7-9) (b) Antoy tutukoyen na salitan “kasalanan” diad Biblia? (Nengnengen so kahon ya “ Kasalanan.”)

⁴ Nabawi tayo ni kasi so amin ya abalang nen Adan tan Eva? No diad sarili tayo labat ya abilidad, imposible itan ya nagawa. (Basaen so Salmo 49:​7-9.) Ta diad tua, no anggapoy tulong nen Jehova, singa tayo labat aalagaren so ipatey tayo. Tan singa tayo labat ayayep ya no ompatey tayo, anggapo lan balot so ilalo tayon nabilay lamet.—Ecl. 3:19; 2 Ped. 2:12.

 5. Antoy ginawa nen Aman Jehova pian nabayaran so atawir tayon kasalanan? (Nengnengen so litrato.)

⁵ Pawilen tayo pa may kabataan ya abitlad parapo 1. Anto kasi nalikna to no walay mayaman ya laki ya angibagad sikato ya, ‘Agka la mapaga ta siak lay akauley ya manbayar ed amin ya utang yo’? Seguradon misatsalamat iyan kabataan tan agto itan tanggian. Ontan ya ontan so ginawa nen Jehova, say maar-aron Ama tayo. Walay inter tod sikatayo ya regalo pian nabayaran so kasalanan ya impatawir nen Adan. Anto itan ya regalo? Oniay imbaga nen Jesus: “Ontan lay panangaro na Dios ed mundo ya inter to so bogbogtong ya Anak to, pian kada sakey a mangipapanengneng na pananisia ed sikato et agnaderal noagta nawalaan na bilay ya andi-anggaan.” (Juan 3:16) Tan lapud satan ya regalo, wala met so tsansa tayon magmaliw ya kaaro nen Jehova.

 6. Anto ran termino so pantongtongan tayo ed sayan artikulo, tan akin et importante ya pantongtongan tayo iratan?

⁶ Antoy gawaen tayo pian minabang tayo ed sayan balibalin regalo nen Aman Jehova tan pian naperdona iray kasalanan tayo? Pian naebatan itan ya tepet, kaukolan tayon talosan irayan termino ed Biblia: pikakareenan, pananakbong, pipupulangan, dondon, nibulos tayo la, tan niyabawag tayo lan matunong. Sansakeyen tayon pantongtongan iratan ed sayan artikulo. No dalepdepen tan talosan mo so kabaliksan na sarayan termino, mas napablim so ginawa nen Jehova pian naperdona iray kasalanan mo.

SAY GAGALA NEN JEHOVA: LABAY TO YA MAKAPIKAREENAN TAYO ED SIKATO

 7. (a) Anto ni abalang nen Adan tan Eva? (b) Bilang ananak nen Adan tan Eva, antoy kakkaukolan tayon gawaen? (Roma 5:​10, 11)

⁷ Nen nankasalanan si Adan tan Eva, aliwa labat ya bilay ya andi-anggaan so abalang da.  Abalang da met so mabmablin relasyon da ed Ama ra, si Jehova. Antis iran nankasalanan, kabiangan ira na pamilya to. (Luc. 3:38) Pero nen nanrebelde ira, kinalaban day Aman Jehova. Kanian pinaekal to ra ed pamilya to. Agawa iya antis iran awalaan na ananak. (Gen. 3:​23, 24; 4:1) Lapud ananak da tayo, adamay tayod kasalanan da, kanian kaukolan tayoy makapikareenan ed si Jehova. (Basaen so Roma 5:​10, 11.) Labay ton ibaga, manggawa tayo dapat na paraan pian nakaaro tayo so Dios. Base ed sakey ya reperensya, amay Griegon salita parad “mikareenan” et mankabaliksay “kaaroen moy kalaban mo.” Say makapadinayew, anta si Jehova so asakitan, sikato ni so nanggaway paraan pian nakaaro to tayo. Antoy ginawa to?

SAY UKSOYAN: PANANAKBONG

 8. Anto tay pananakbong?

⁸ Say pananakbong so uksoyan ya ginawa nen Jehova pian nakaaro to iray totoo anggano makasalanan ira. Diad Hebreon lenguahe, say salita parad “pananakbong” et nayarin mankabaliksan met na “sakob.” Ginawa nen Jehova so uksoyan ya pananakbong pian “nasakoban” o “nasakbongan” so kasalanan na totoo. Diad Kristianon Griegon Kasulatan, nausar met so salitan “pipupulangan” ya pareho so labay ton ibaga ed “pananakbong.”—Roma 3:25.

 9. Anton temporaryon uksoyan so ginawa nen Jehova pian naperdona iray kasalanan na saray Israelita?

⁹ Walay temporaryon uksoyan ya ginawa nen Jehova pian naperdona iray kasalanan na saray Israelita tan makapikaaro ira ed sikato. Diad Israel nensaman, tinaon dan seselebraan so Agew na Pananakbong. Diad satan ya agew, mangiyapay na saray bagat ya ayayep so atagey ya saserdote pian naperdona so kasalanan na saray Israelita. Siempre, agan talaga nasakbongan o naekal na saratan ya bagat so kasalanan da ta mas abeba iray ayayep nen saray totoo. Pero mabulos iran perdonaen nen Jehova basta magbabawi ira tan unoren da itan ya uksoyan. (Heb. 10:​1-4) Kada no Agew na Pananakbong tan kada no mangibagat na ayayep iray Israelita diad arum nin panaon, napapanonotan ira ya makasalanan ira, tan mas ni nen saray bagat ya ayayep so kaukolan da pian talagan nasakbongan o naperdona iray kasalanan da.

10. Anton permanentin uksoyan so ginawa nen Jehova pian naperdona iray kasalanan tayo?

¹⁰ Wala kasi permanentin uksoyan ya ginawa nen Jehova pian naperdona iray kasalanan na totoo? On, wala. Imbaki toy inar-aro ton Anak diad dalin pian ‘maminpinsan ya iyapay tan awiten to ray kasalanan na dakel.’ (Heb. 9:28) ‘Inter nen Jesus so bilay to pian nadondon so amayamay.’ (Mat. 20:28) Anto balet tay dondon?

SAY BAYAR: DONDON

11. (a) Base ed Biblia, anto tay dondon? (b) Antoy kaukolan pian nabayaran so dondon?

¹¹ Base ed Biblia, say dondon et ontutukoy ed samay kaukolan ya ibayar pian nasakbongan iray kasalanan tayo tan makapikareenan tayo ed si Jehova. Kaukolan itan ya nabayaran pian walay basiyan nen Jehova ya iter ed saray anak nen Adan tan Eva iramay abalang da. Panon itan ya nabayaran? Tandaan, abalang nen Adan tan Eva so perpekton bilay da pati say ilalo ran manbilay ya andi-anggaan. Nabawi labat itan no walay manbayar na dondon ya petekan to may presyo o bili na samay abalang. (1 Tim. 2:6) Say nayarin manbayar labat ed dondon et laki ya: (1) perpekto; (2) sarag toy manbilay ya andi-anggaan diad dalin; tan (3) mabulos ton iter o isakripisyo so bilay to parad sikatayo. Say bilay to so mismon  ibayar to pian nabawi imay bilay ya abalang nen Adan.

12. Akin et kualipikado si Jesus ya bayaran so dondon?

¹² Walay taloran rason no akin ya kualipikado si Jesus ya bayaran so dondon. (1) Sikatoy perpekto, tan ibabaga na Biblia ya “anggapoy ginawa ton kasalanan.” (1 Ped. 2:22) (2) Lapud perpekto si Jesus, sarag toy manbilay ya andi-anggaan diad dalin. (3) Sikatoy mabulos ya ompatey parad sikatayo. (Heb. 10:​9, 10) Perpekto si Jesus ya singa si Adan nen antis ya nankasalanan. (1 Cor. 15:45) Kanian nen inatey si Jesus, abayaran to so eksakton presyo ya kaukolan pian nabawi imay abalang nen Adan. (Roma 5:19) Atan so rason no akin ya atawag si Jesus ya “unor ya Adan.” Agla sirin kaukolan ya wala lamet so ompatey ya perpekton too pian nabayaran so dondon ta “pinsanan” la itan ya binayaran nen Jesus.—Heb. 7:27; 10:12.

13. Antoy ginawa nen Jehova pian makapikareenan tayo ed sikato?

¹³ On, nanggawa si Jehova na paraan pian naperdona iray kasalanan tayo tan makapikareenan tayo ed sikato. Atan imay uksoyan ya pananakbong. Pero pian onggana itan ya uksoyan, kaukolan so dondon. Atan imay kaukolan ya ibayar pian nasakbongan so kasalanan tayo. Imbayar nen Jesus so mabmablin dala to pian nadondon tayo. (Efe. 1:7; Heb. 9:14) Antoy resulta na satan ey? Atan so onsublay ya pantongtongan tayo.

SAY RESULTA: NIBULOS TAYO TAN NIYABAWAG TAYON MATUNONG

14. Antoy onsublay ya pantongtongan tayo, tan akin et importantin pantongtongan tayo itan?

¹⁴ Panon tayon minabang ed uksoyan na pananakbong? Pian naebatan itan ya tepet, pantongtongan tayo so duaran termino ya abitla ed Biblia. No antam so kabaliksan na sarayan termino, diman mo mas napabli so panamerdona nen Jehova tan mas natalosan mo no antoy epekto na uksoyan na pananakbong ed mismon bilay mo.

15-16. (a) Base ed Biblia, akin et ‘nibulos tayo la’? (b) Antoy naliliknam ed ginawa nen Jehova tan si Jesus pian nibulos kad kasalanan tan patey?

¹⁵ Ibabaga na Biblia ya nibulos tayo la lapud abayaran la so dondon. Oniay imbaga nen apostol Pedro: “Amta yo a nibulos kayo [literal, “dinondon kayo”] ed andi-kakanaan a paraan na kabibilay yo a tinawir yo ed inmuunan atateng yo, aliwan diad panamegley na saray bengatlan naderal, a singa say pilak odino balitok. Imbes, nibulos kayo diad panamegley na mablin dala, a singa say dala na kordero ya andiay pakabalawan tan malinis, say dala nen Kristo.”—1 Ped. 1:​18, 19; paimanod leksab.

¹⁶ Amin ya too et aripen na kasalanan tan patey. Pero lapud dondon bagat nen Jesus, sarag tayo lay makalukpos o makablos ed satan. (Roma 5:21) Say mabmablin dala nen Jesus so imbayar pian nibulos tayo. Talagan misatsalamat tayod sikato tan ed si Aman Jehova!—1 Cor. 15:22.

17-18. (a) Antoy labay ya ibaga na ‘niyabawag tayo lan matunong’? (b) Antoy epekto to ’ya ed kada sakey ed sikatayo?

¹⁷ Ibabaga met na Biblia ya saray lingkor nen Jehova et niyabawag lan matunong. Diad pakanengneng nen Jehova, malinis tayo la ta abural la iray utang o kasalanan tayod sikato, kanian agto tayo la singilen. Kasin inyabawag itayo nen Jehova ya matunong lapud kanepegan tayo itan, tan singa to kokonsintien so kasalanan tayo? Andi. Sinegurado nen Jehova ya walay basiyan to pian naperdona to ray kasalanan tayo. Tandaan, atan so rason no akin ya ginawa to so uksoyan na pananakbong tan nanggaway paraan pian nadondon tayo. On, tinumbok nin siansia nen Jehova so mismon estandarte tod hustisya pian  niyabawag to tayon matunong. Mabulos to tayon peperdonaen lapud walay pananisia tayo ed uksoyan na pananakbong tan ed dondon.—Roma 3:24; Gal. 2:16.

¹⁸ Antoy epekto to ’ya ed kada sakey ed sikatayo? Saramay apili ya kaiba nen Jesus ya manuley ed tawen et niyabawag lan matunong bilang ananak na Dios. (Tito 3:7; 1 Juan 3:1) Pinerdona la nen Jehova iray kasalanan da. Diad pakanengneng to, singa ag-iran balot nankasalanan. Kanian kualipikado iran manuley diad Panarian. (Roma 8:​1, 2, 30) Saray parad dalin ey? Niyabawag met la ran matunong bilang kakaaro na Dios tan pinerdona to met la iray kasalanan da. (Sant. 2:​21-23) Say baleg ya ulop ya makaliktar ed Armagedon et walay ilalo ra ya aglan balot ompatey. (Juan 11:26) Saray inatey ya “matunong” tan “agmatunong” et nabilay lamet. (Gawa 24:15; Juan 5:​28, 29) Tan onsabi panaon, amin ya maunor ya lingkor nen Jehova diad dalin et “nawalaan na maglorian kawayangan bilang ananak na Dios.” (Roma 8:21) Imadyin mo pa ’tan ya panaon ya close kayo lan maong nen Aman Jehova tan talagan anak la so turing tod sika. Atan la so sankarakepan ya bendisyon ed balon mundo!

19. Panon ya anguman so situasyon tayo? (Nengnengen met so kahon ya “ Say Panamerdona nen Jehova.”)

¹⁹ On, say situasyon tayo et singa samay pakaskasin kabataan ya abitlad gapo ya anggapon balot so akerad sikato tan akatawir na balbaleg ya utang ya agton balot nabayaran. Pero maong labat ta tinulongan to tayo nen Aman Jehova. Anguman so situasyon tayo lapud uksoyan na pananakbong tan nen abayaran so dondon. Lapud walay pananisia tayod si Jesu-Kristo, nibulos tayo la ed kasalanan tan ipapatey. Malinis tayo met la ed pakanengneng nen Jehova ta binural to la ray kasalanan tayo. Tan say sankaimportantian ed amin, walay maong ya relasyon tayo ed si Jehova—say maar-aron Ama tayo ed tawen.

20. Antoy pantongtongan tayo ed ontumbok ya artikulo?

²⁰ No dalepdepen tayoy ginawa nen Jehova tan si Jesus parad sikatayo, seguradon napakiwas tayo ya ipanengneng so pisasalamat tayod sikara. (2 Cor. 5:15) No agda tayo tinulongan, anggapon balot so ilalo tayo. Diad ontumbok ya artikulo, pantongtongan tayo so pigaran ilustrasyon ed Biblia ya mangipapanengneng ya talagan espisyal so panamerdona nen Jehova.