ASALIM la may walay problemam pero singa anggapoy nakerewan moy tulong? Manbibilay tayo ed “mapeligro tan mair-irap a panaon” kanian matmainomay ya onkapuy so liknaan tayo tan pakalikna tayo et bukbukor tayo. (2 Tim. 3:1) Pero diad tua, wala ray totoo ya akaparaan ya ontulong ed sikatayo. Tinawag ira na Biblia ya “tuan kaaro . . . a nailaloan diad panaon na gonigon.”—Pro. 17:17.

Nen ombiabiahe si apostol Pablo bilang misionero, wala ray akilan kakaaro to, tan baleg so nitulong dad sikato. (Col. 4:​7-11) Nen akapriso si Pablo diad Roma, saray kakaaro to la so angiyulo ed saramay agto la nagawaan. Singa bilang, inyawitan nen Epafrodito si Pablo na saray kaukolan to ya nanlapud saray agagi ed Filipos. (Fil. 4:18) Si Tiquico balet so angiyakar na saray sulat nen Pablo parad nanduruman kongregasyon. (Col. 4:7; nengnengen so study note diad nwtsty-TG.) Kanian anggano akapriso si Pablo o aka-house arrest, nituloy to nin siansia so ministeryo to lapud tulong na saray kakaaro to. Sika ey, anto met so gawaen mo pian magmaliw kan tuan kaaro?

Makaaral tayo ed alimbawa na saray agagi ya pinaneknekan dan tuan kaaro ira. Imanoen so ginawa na sakey ya sister parad kaaro ton si Elisabet, ya regular payunir ed Spain. Nen a-diagnose so nanay nen Elisabet ya walay graben cancer to, lanang ya ite-text na samay sister si Elisabet tan papawitan to na saray makapaseseg ya mensahe base ed Biblia. Oniay imbaga nen Elisabet: “Kada no nababasak so mensahe to, ombibiskeg so liknaan ko ta amtak ya agko bukbukor.”—Pro. 18:24.

Onelet so pikakaaro tayo ed saray agagi no tulongan tayo ra diad panagpulong tan diad pipiaral. Singa bilang, kasin sarag mon samaren tan ilugan so maedad lan brother o sister paonlad aral odino diad ministeryo? No manggawa kay paraan pian natulongan mo ray agagi, napaseseg mo ra tan napaseseg da ka met. (Roma 1:12) Pero panon to balet iramay agagi ya agla makaalis ed abung da? Panon tayon nipaliknad sikara ya tuan kaaro da tayo?

Wala ray agagi ya agla makakapiaral ed Kingdom Hall lapud mansasakit ira tan makapuy lay laman da. Ontan so situasyon nen David. Sikatoy a-diagnose ya walay lymphoma to. Masulok ya anem bulan ya nampa-chemotherapy. Legan ya manpapa-chemo, diad videoconference labat la ra makakapiaral nen asawa to ya si Lidia.

Antoy ginawa na saray kakaaro da ed kongregasyon pian napaseseg da ra? Kada kayari na  aral, wala ray agagi diad Kingdom Hall ya mimiistoryaan ni ed si David tan Lidia diad videoconference. Tan no nankomento si David tan Lidia ed aral, ite-text ira na agagi tan pisasalamatan da ra. Antoy epekto to ’tan ed sikara? Alikna ra kuno ya inar-aro ira na agagi.

No manpulong tayo o mangiyaral tayoy Biblia, wala kasi sarag tayon gawaen pian nakaiba tayo ray agagin agla makaalis ed abung pian agda nalikna ya singa alingwanan tayo la ra? (Pro. 3:27) Singa bilang, anto kasi no iyeskedyul moy onlad abung da pian nakaibam ira ya man-letter writing o man-telephone witnessing? No meeting for field service, ompan sarag day onkonek diad videoconference. Walay ontan ya uksoyan ed kongregasyon nen David tan Lidia. Oniay kuan nen David: “Anggano antiktikey labat so meeting for field service, amay nanengneng mi ray agagi tan kaiba mi ran manpikasi, napapabiskeg kami lan maong.” No iyabuloy met na situasyon, ompan sagpaminsan et sarag mon awiten so iyaaralan mo na Biblia ed abung to may agi pian nakaibam ed panaral yo.

No nakaiba tayon manpulong tan mangiyaral na Biblia iray agagi ya agla makaalis ed abung, nanengneng tayo ray balibalin ugali da kanian mas lalon onapit so liknaan tayod sikara. Singa bilang, no nanengneng mo ya marundunong iran manpulong tan manbangat tan matmainomay dan nasabi so puso na sakey ya too, lalom ira ya naapresya. Tan no lanang mo ran nakakaiba ed ministeryo, ompan magmaliw kayon malet ya sankaaro.—2 Cor. 6:13.

Nen mair-irap so situasyon nen Pablo, aligliwan maong nen pinasyar na kaaro ton si Tito. (2 Cor. 7:​5-7) Antoy naaralan tayo ed si Tito? Tua ya napaseseg tayo ray agagi diad saray ibabaga tayod sikara. Pero marakep no manggawa tayo met na paraan pian nakaiba tan natulongan tayo ra.—1 Juan 3:18.

No pantutulongan tan pankakaaro so pantongtongan, makaaral tayo ed saray agagi tayod Russia. Imanoen so dinalan di Sergey tan say asawa to ya si Tatyana. Kayari ya ininspeksion na saray pulis so abung da, inawit da rad istasyon na pulis insan da ra tinepet-tepetan. Si Tatyana so unonan pinasempet da. Oniay kuan nen Sergey: “Kasempet nen Tatyana, nitan met lay sakey ya makmakpel ya sister ya pinmasyar ed abung mi. Insan nagunoyan, mansasbi la ray arum ya agagi. Tinmulong ira pian ayosen tan linisan so abung mi.”

Onia ni imbaga nen Sergey: “Paboritok ya teksto may Proverbio 17:17. Say kuan tod man: ‘Say tuan kaaro et mangaaro ed amin a panaon tan sakey ya agi a nailaloan diad panaon na gonigon.’ Nen dinmalan kamid panamasegsegang, mas apatunayan ko ya tua so ibabaga to ’tan ya teksto. Agko man asarag no anggapo ray kakaarok. Inikdan ak nen Jehova na makpel ya kakaaro ya akaparaan ya ontulong ed siak.” a

Ilaloan tayo ya lalo nin onirap so situasyon tayo. Kanian kakkaukolan tayoy tulong na saray kakaaro tayo, lalo la no baleg ya kairapan la. Kanian natan ni labat, paneknekan tayo la ya tuan kaaro itayo!—1 Ped. 4:​7, 8.