Si Mary tan say asawa ton si John a et manaayam ed bansa ya dakdakel so Pilipino, tan napupulongan da ra. Nen COVID-19 pandemic, dakdakel so nigapo nen Mary ya panangiyaral na Biblia, aliwa labat ya diad bansan panaayaman da, noagta pati diad arum ni ran bansa. Panon itan ya agawa?

Oniay itetepet nen Mary ed saray Bible study to: “Wala ni ray kabat yo ya labay day manaral na Biblia?” No wala kuan da, ibaga to ya labay to met iran nakabat. Simpli labat iman ya tepet pero mabetbet ya balibali resulta to. Akin ey? On ta no nagugustoan na Bible study iray nanaaralan to, labay to met ya naamtaan itan na saray kapamilya tan kakaaro to. Antoy resulta nen intepet iya nen Mary ed saray Bible study to?

Nen intepet itan nen Mary ed Bible study ton si Jasmin, inkabat to si Mary ed apatiran totoo ya labay day manaral na Biblia. Say sakey ed sikara et si Kristine. Alabayan nen Kristine so panaaral toy Biblia kanian imbaga tod si Mary ya mamidua ed sakey simba so panaral da. Nen tinepetan nen Mary si Kristine no wala ray kabat to ya labay day manaral na Biblia, say kuan to: “On wala, ikabat kod sika iramay kakaarok.” Diad loob labat na pigaran simba, inkabat nen Kristine ed si Mary so apatiran kakaaro to ya labay da met so manaral na Biblia. Ag-abayag, inkabat to nid si Mary so arum nin kakaaro to, tan say arum ed saratan ya kakaaro to et inkabat da met si Mary ed arum nin kakaaro da.

Labay met nen Kristine ya manaral na Biblia iray kapamilya to ya walad Pilipinas, kanian kinontak toy anak ton bii ya si Andrea. Nen unaan, aglabay nen Andrea ta say inisip to, ‘Kulto iratay Tasi, aga ra manisia ed si Jesus. Daan ya Sipan labat so papanisiaan da.’ Pero kayari labat na unonan impanaral da nen Mary, anengneng to ya aliwa manaya may iisipen to ed saray Tasi. Kada no walay balon naaralan to ed Biblia, say ibabaga to: “Aya so walad Biblia, kanian manisia ak ya aya so tua!”

Ag-abayag, inkabat nen Andrea si Mary ed duaran kakaaro to tan sakey ya katrabaho to. Nanaral met iray Biblia. Tan say ag-amta nen Mary, kada no iyaralan toy Andrea, mandengdengel manayay bulag ya panginaen to ya si Angela. Aminsan, imbaga nen Angela ed si Andrea ya ikabat tod si Mary, tan nampaiyaral met na Biblia. Labalabay nen Angela iray nanaaralan to. Diad loob labat na sakey bulan, dakdakel lay akabisado ton teksto, tan labay to kunoy manpaiyaral ya mamipat ed sakey simba! Tan diad tulong nen Andrea, lanang lan mimiaral si Angela panamegley na videoconferencing.

 Nen naamtaan nen Mary ya siber-siber so asawa nen Kristine ya si Joshua kada no manaaral ira na Biblia, tinepetan toy Joshua no labay toy mila ed panaaral da. Say kuan nen Joshua: “Ondengel ak labat, pero agmo ak tetepetan a? No tepetan mo ak, onalis ak la.” Pero limaran minuto ni labat iran manaaral, mas dakel lay tepet nen Joshua nen say si Kristine, tan labay to met lay manpaiyaral.

Lapud samay simplin tepet nen Mary, dakdakel so nampaiyaral na Biblia. Diad karakel da, wala ray inyendorso to la ed arum ya agagi. Diad ami-amin et 28 ya panangiyaral na Biblia so nigapo nen Mary diad apatiran bansa.

Si Jasmin ya unonan abitla ed sayan eksperiensya et abautismoan nen Abril 2021. Si Kristine et abautismoan nen Mayo 2022, tan pinmawil la ed Pilipinas pian nakaiba toy pamilya to. Abautismoan met so duara ed saramay kakaaro nen Kristine ya inkabat to ed si Mary. Tan kalabas na pigaran bulan manlapud impanpabautismo nen Kristine, abautismoan met si Angela, tan natan et regular payunir la. Say asawa nen Kristine ya si Joshua, say anak dan si Andrea, tan saramay arum nin Bible study et onaaligwas met lad espiritual.

Nen inmunan siglo, mapmaples ya kinmayat so maong a balita ed saray mankakapamilya tan sankakaaro. (Juan 1:​41, 42a; Gawa 10:​24, 27, 48; 16:​25-33) Kanian anto kasi no tepetan mo ray Bible study’m tan arum nin interesado ya, “Wala ni ray kabat yo ya labay day manaral na Biblia?” Anggano simpli labat yan tepet, malay mo ompan balibali magmaliw ya resulta to, tan dakel met so naromog mon iyaralan na Biblia.