1. Panon ya nayarin naapektoan itayo na sayan makasarilin mundo?

AKIN ya no maminsan et nairapan tayon iyaplika iray nanaaralan tayod Salita na Dios? Say sakey ya rason et kaukolan so kapaabebaan pian gawaen so duga, tan say abilidad tayon mansiansian mapaabeba et nasusubok. Diad sayan “kaunoran iran agew,” apaliberan itayo na totoon “maaro ed sarili ra, maaro ed kuarta, mapasirayew, mapaatagey,” tan “anggapoy kontrol da ed sarili ra.” (2 Tim. 3:1-3) Balet no onaaligwas tan singa maliket iray totoon makasarili, nayarin say sakey a lingkor na Dios et makaibeg anggano amta ton mauges so makasarilin ugali. (Sal. 37:1; 73:3) Nayarin nonoten to laingen: ‘Wala kasi gunggona no iyunak so pankaabigan na arum nen say sarilik? Kasin naekal so respeto na arum ed siak no magmaliw ak ya “mapaabeba”?’ (Luc. 9:48) No abuloyan tayon naimpluensyaan na sayan makasarilin mundo, nayarin naderal so maabig a relasyon tayod saray agagi tan say pakabidbiran tayo bilang Kristiano. Balet nabendisyonan itayo no aralen tan aligen tayo ray balibalin alimbawa diad Biblia.

2. Panon ya makatulong ed sikatayo so alimbawa na saray matoor ya lingkor na Dios nensaman?

 ² Pian naalig tayo iramay matoor ya lingkor na Dios nensaman, kaukolan tayon aralen no anto ray ginawa da ya nansumpal ed maabig ya resulta. Panon iran nagmaliw ya kaaro na Dios? Panon dan naawat so pabor na Dios? Tan antoy amabiskeg ed sikaran sumpalen so linawa to? Say onian panagaral et importantin kabiangan na pamabiskeg ed espiritualidad tayo.

3, 4. (a) Diad anto ran paraan ya nanaawat tayo ray espiritual ya naakan? (b) Akin et nibaga tayon say espiritual ya naakan et aliwa labat ya basta pakawalaan na kakabatan?

³ Dakel so nanaawat tayon alay-abig iran simbawa tan panangipasal panamegley na Biblia, saray publikasyon, website tayo, JW Broadcasting, tan saray pantitipon tan asemblea tayo. Balet base ed imbaga nen Jesus ya nabasad Juan 4:34, say espiritual a naakan et aliwa labat ya basta pakawalaan na kakabatan. Anto ni kaukolan ya gawaen? Imbaga nen Jesus: “Say kanen ko et say panggaway linawa na samay angibaki ed siak tan say panumpal ed kimey to.”

⁴ Parad si Jesus, kaiba ed espiritual ya naakan so ikiwas ed panangigiya na Dios. Diad anton paraan ya singa itan naakan? No panon ya say laman tayo et napepenek tan ombibiskeg no masustansia so kakanen tayo, ombibiskeg met so liknaan tan pananisia tayo ed andi-anggaan ya bilay no gagawaen tayoy linawa na Dios. Aminpigam lan asali so linmad pantitipon parad lawak na kimeyan ya singa aliwliway liknaan mo, balet nen kayarim ya nampulong et balibali lay liknaan mo tan maligsa ka la?

5. Antoy nagunggona no onkiwas tayon walaay karunongan?

⁵ Say pangiyaplika ed saray instruksion na Dios et pakapatnagan na tuan karunongan. (Sal. 107:43) Talagan nabawbawi so pansagpot pian nawalaan na karunongan. “Agmakapipara ed satan so antokaman a pipirawaten mo. . . . Sikatoy kiew na bilay diad saramay ombebemben ed sikato, tan ipasen a maliket iramay akabemben a maong ed sikato.” (Pro. 3:13-18) Imbaga nen Jesus: “Lapud amta yo la iraya, maliket kayo no gawaen yo.” (Juan 13:17) Mansiansian maliket iray disipulo no itultuloy dan gawaen iray ganggan nen Jesus ed sikara. Agda labat aminpinsan ya inyaplika iray bangat tan alimbawa to, noagta nagmaliw iratan ya kabiangan na bilay da.

6. Akin et nepeg ya tuloytuloy tayon ipatnag so karunongan?

⁶ Natan, importantin itultuloy tayon iyaplika iray nanaaralan tayon katuaan. Bilang alimbawa, say sakey a mekaniko et wala ray kagawaan, materyales, tan kakabatan to. Balet anggapoy kana na saratan no agto lanlamang uusaren. No sikatoy dati lan akapantrabaho bilang mekaniko tan awalaan la na eksperiensya ed satan, kaukolan ton itultuloy ya iyaplika iray naaralan to pian mansiansian marunong a mekaniko. Mipadpara, nayarin diad gapo et aliketan tayo lapud niyaplika tayo ray nanaaralan tayod Biblia. Balet tuloytuloy itayon maliket no mapaabeba tayon tuloken iray instruksion nen Jehova diad kada agew.

7. Pian nawalaan tayoy karunongan, antoy nepeg ya epekto ed sikatayo na saray alimbawa ed Biblia?

⁷ Aralen tayo so pigara ya nanduruman situasyon ya nayarin nasubok so inkamapaabeba tayo tan nengnengen tayo no panon iratan ya inarap na saray matoor a lingkor na Dios nensaman. Say mabiskeg ya espiritualidad et aglabat akadepende ed pangamta ed saray impormasyon. Kanian isip mo no panon mon niyaplikan mismo so kada punto, tan gawam itan ya tampol.

8, 9. Antoy ipapanengneng na saray akarekord ed Gawa 14:8-15 nipaakar ed kapaabebaan nen apostol Pablo? (Nengnengen so litratod gapo na artikulo.)

⁸ Linawa na Dios ya “niliktar so amin a klase na totoo tan nawalaan ira na suston kakabatan ed katuaan.” (1 Tim. 2:4) Antoy pakanengneng mo ed saray totoo ya agda ni akabatan so katuaan? Anggaman say inanap nen apostol Pablo ya pulongan diad saray sinagoga et saray Judio ya wala lay amta da nipaakar ed Dios, aliwan sikara labat so pinulongan to. Diad tua, asubok so kapaabebaan nen Pablo lapud reaksion na saray mandadayew ed palson dirios.

⁹ Singa bilang, diad unonan impanbiahe nen Pablo bilang misionero, abaloan na totoo ed Licaonia ya sikaran dua nen Bernabe et dirios ya nagmaliw a totoo​—say palson dirios da ya si Zeus tan Hermes. Kasin atukso si Pablo tan Bernabe ya panliketan so impangirayew ed sikara? Kasin inisip dan pankanawnawa da la itan pian makainawa ra ed amin ya panamasegsegang ya naeksperiensya da diad duaran syudad ya akaunan binisita ra? Kasin inisip da ya no kabkabat ira et makatulong itan pian mainomay dan nipulong so maong a balita? Andin balot! Tampol iran kinmontra tan pinilat da ray kawes da insan ira linmad pegley na totoo, tan inyeyag da: “Akin et oniay gagawaen yo? Totoo kami met a walaan na saray kakapuyan a singa sikayo.”​—Gawa 14:8-15.

10. Antoy labay ya ibaga nen Pablo tan Bernabe nen imbaga dan kapareho da iray totoo ed Licaonia?

¹⁰ Sanen binidbir nen Pablo tan Bernabe ya aliwa met iran perpekto, agda labay ya ibagan say paraan na panagdayew da et mipara ed saraman ya pagano. Agta misionero ran dua ya atawag parad espisyal a kimey? (Gawa 13:2) Agta nilanaan ira na masanton espiritu tan walaan ira na marakdakep ya ilalo? On, balet natatalosan nen Pablo tan Bernabe ya nayarin niwala met iratan ed saray totoo ed Licaonia no awaten da so maong a balita.

11. No manpupulong tayo, panon tayon naalig so inkamapaabeba nen Pablo?

¹¹ Panon tayon naalig so inkamapaabeba nen Pablo? Unona, kaukolan tayon labanan so antokaman a tukso ya manilalo odino mangawat na dayew lapud saray agawaan tayo diad tulong nen Jehova. Maabig no tepetan tayoy sarili tayo: ‘Antoy panmoriak ed saray totoon napupulongan ko? Kasin agko nalilikas ya wala la manayay panangidumadumak ed saray totoo diad lugar mi?’ Diad interon mundo, aaralen a maong na saray Tasi nen Jehova iray teritorya da no kasin wala ni ray nayarin onkiwas ed maong a balita. Pian nagawaan itan, no maminsan et kaukolan dan aralen iray lenguahe tan kultura na saray totoo ya maslak et memelmelagen na karaklan. Balet, agnepeg ya isipen na saray Tasi ya mas maong ni ira nen say sarayan napupulongan da. Imbes, tatalosan da so kada indibidual pian say mensahe na Panarian et onsabi ed puso to.

12. Panon ya impanengneng nen Epafras so panangiyansakit tod arum?

¹² Say sakey nin paraan pian nipanengneng tayon mapaabeba tayon ontutumbok ed panangigiya na Dios et diad pangipikasi ed saramay “angawat ed pananisia, a mabmabli a singa say pananisia [tayo].” (2 Ped. 1:1) Ontan so ginawa nen Epafras. Sikatoy amitlo labat ya abitla ed Biblia​—amin et diad saray pinuyanan a sulat nen Pablo. Legan ya akapriso ed abung si Pablo diad Roma, sinulatan to ray Kristiano ya manaayam ed Colosas tan imbaga ton si Epafras et “panseseetan ton naynay so mangipikasi ed [sikara].” (Col. 4:12) Kabkabat nen  Epafras iray agagi, tan iyaansakit to iran maong. Say situasyon to bilang ‘kaparan priso’ nen Pablo et ag-angamper ed sikaton nonoten so espiritual ya pankaukolan na arum. (Filem. 23) Tan walay ginawa to pian natulongan ira. Agta pakapatnagan itan na agmakasarilin ugali? Baleg so nagawaan na pangipikasi ed saray kapara tayon mandadayew ed si Jehova, lalo la no bitlaen tayoy kangaranan da.​—2 Cor. 1:11; Sant. 5:16.

13. Panon tayon naalig so alimbawa nen Epafras diad panagpikasi tayo?

¹³ Isip mo iramay sarag mon bitlaen so ngaran da diad pikakasim. Singa si Epafras, dakel ed saray agagi tayo so mangipipikasi ed saray kakongregasyon da tan saray pamilya ya walaan na ambelat iran responsabilidad, walaan na ambelat iran dedesisyonan, odino onaarap ed saray tukso. Dakel so mangipipikasi ed saramay say ngaran da et walad jw.org diad artikulon “Jehovah’s Witnesses Imprisoned for Their Faith.” (Nengnengen ed NEWSROOM > LEGAL DEVELOPMENTS.) Sakey ni, maabig met no nonoten tayo iramay inateyan na inad-aro ed bilay, saramay akaliktar ed saray kalamidad tan guerra, tan saramay mansusungdo ed kairapan na bilay. Talagan dakel ed saray agagi tayo so kaukolan ya ipikasi tayo, tan seguradon makatulong itan ed sikara. No ipipikasi tayo ira, ipapanengneng tayo ya aliwan say pankaabigan tayo labat so nononoten tayo, noagta pati pankaabigan met na arum. (Fil. 2:4) Dedengelen nen Jehova iratan ya pikakasi.

14. Akin et si Jehova so sankaabigan ya alimbawa na maong ya idengel?

¹⁴ Say sakey nin paraan pian nipanengneng tayo ya talagan mapaabeba tayo et no akaparaan tayon ondengel ed arum. Ibabaga na Santiago 1:19 ya nepeg a sikatayoy “aliston ondengel.” Si Jehova so sankaabigan ya alimbawa nipaakar ed saya. (Gen. 18:32; Jos. 10:14) Imanoen no antoy naaralan tayo ed impantongtong nen Jehova tan Moises ya nabasa ed Exodo 32:11-14. (Basaen.) Anggaman agkaukolan nen Jehova so opinyon nen Moises, sikatoy inikdan nen Jehova na pankanawnawa ya ibalikas so nalilikna to. Kasin anosan mo nin dengelen so sakey a toon nalilingo, insan mo gawaen no antoy ibaga to? Ontan so gagawaen nen Jehova, maanos ton dedengelen iray pikakasi na totoon walaan na pananisia ed sikato.

15. Panon tayon nipanengneng so respeto ed arum ya singa gagawaen nen Jehova?

¹⁵ Maabig no itepet tayod sarili tayo: ‘No si Jehova et mapaabeba ya mitongtong tan ondengel ed saray totoo a singa ginawa tod si Abraham, Raquel, Moises, Josue, Manoa, Elias, tan Hezekias, siopa ak ya agko respetoen tan pagalangan iray agagik, ya agko dengelen odino gawaen ni ingen iray balibalin suhestion da? Kasin walay kakongregasyon ko odino kapamilyak ya mankaukolan natan na atension ko? Antoy nepeg kon gawaen?’​—Gen. 30:6; Ukom 13:9; 1 Ara. 17:22; 2 Awa. 30:20.

16. Antoy reaksion nen David sanen sikatoy ininsulto nen Simei?

¹⁶ Makatulong met ed sikatayo so kapaabebaan pian nawalaan tayoy kontrol ed sarili no walay manggaway makapuy ed sikatayo. (Efe. 4:2) Say balibalin alimbawa ed saya et nabasa ed 2 Samuel 16:5-13. (Basaen.) Inanosan nen David tan saray lingkor to so impan-insulto tan impangataki nen Simei, ya kanayon nen Arin Saul. Ontan so ginawa nen David anggano walay pakayari ton patundaen itan. Panon ya akontrol nen David so sarili to? Naamtaan tayo no aralen tayoy komatlon Salmo.

17. Antoy akatulong ed si David pian nakontrol toy sarili to, tan panon tayon naalig so alimbawa to?

¹⁷ Nanengneng ed superskripsion na Salmo 3  ya kinompos itan nen David sanen sikatoy “ontatakas ed anak ton si Absalom.” Mitukoyan so bersikulo 1 tan 2 diad saray agawa ya adeskribe ed kapitulo 16 na Komaduan Samuel. Insan indanet ed Salmo 3:4 so kompiyansa nen David: “Ontawag ak na maksil ed si Jehova, tan ebatan to ak manlapud masanton palandey to.” Sarag tayo met so manpikasi no walay manggagaway makapuy ed sikatayo. Ebatan nen Jehova itan diad pangiter to na masanton espiritu to, ya ontulong ed sikatayo ya makapansungdo. Kasin walay nanonotan mon situasyon ya no iner et kaukolan mon kontrolen so sarilim, odino mabulos ya perdonaen imay nanggawa na makapuy ed sika? Kasin manmamatalek kan nanenengneng nen Jehova so paniirap mo tan bendisyonan to ka?

18. Panon itayon nagunggonaan no tuloytuloy tayon iyaplika iray instruksion na Dios?

¹⁸ No gawaen tayo so duga, seguradon nabendisyonan itayo. Talagan tua so ibabaga na Proverbio 4:7 ya “say karunongan so sankaimportantian”! Anggaman say karunongan et akabase ed kakabatan, aliwa labat itan ya basta natatalosan tayo iray katuaan. Napatnagan so karunongan diad saray gagawaen tayon desisyon. Anggan diad saray gilata et napatnagan so karunongan. Nanengneng ed sikara so nisipor ya karunongan diad pampaparaan day naakan da no tiagew. (Pro. 30:24, 25) Si Kristo, say “karunongan na Dios,” et naynay ton gagawaen iray makapaliket ed Ama to. (1 Cor. 1:24; Juan 8:29) Amta na Dios so pandumaan na pampili no antoy duga tan ikiwas ed satan. Tan bebendisyonan to iramay mapaabeban mansusungdo tan manggagawa ed no antoy duga. (Basaen so Mateo 7:21-23.) Kanian pansagpotan tayo sirin ya pansiansiaen so kapaabebaan diad loob na kongregasyon. Say pangiyaplika ed no antoy duga et mankaukolan na panaon tan anos, balet pakapatnagan itan na kapaabebaan ya manresulta ed liket natan tan diad andi-anggaan.