1. Anton importantin kualidad so intongtong nen Jesus ed saray disipulo to diad samay labi antis na ipatey to?

DIAD samay sampot lan labi ya kaiba nen Jesus iray disipulo to, binitla to so aro ya ngalngali 30 ya beses. Binilin to ray disipulo to ya nepeg iran “manaaroan.” (Juan 15:12, 17) Importante ya manaaroan ira lapud satan so malinew a pakabidbiran ya sikara so tuan papatumbok to. (Juan 13:34, 35) Satan ya panangaro et ag-angangga ed liknaan labat. Tutukoyen nen Jesus so sankaimportantian ya kualidad​—say masakripisyon aro. Imbaga to: “Anggapo lay walaan na mas baleg a panangaro nen saya, a say sakey et iter toy bilay to parad kakaaro to. Kakaaro ta kayo no gagawaen yoy igaganggan kod sikayo.”​—Juan 15:13, 14.

2. (a) Antoy sankaimano ed saray totoo na Dios? (b) Anto ran tepet so ebatan tayo ed sayan artikulo?

² Say tua tan masakripisyon aro tan agnaderal ya pankakasakey na saray lingkor nen Jehova natan so pakabidbiran ya sikara so totoo na Dios. (1 Juan 3:10, 11) Talagan misalsalamat tayo ta say singa-Kriston aro et ipapatnag na saray lingkor nen Jehova antokaman so bansa, tribu, lenguahe, odino binalegan da! Balet ompan isipen tayo: ‘Akin ya importantin ipanengneng tayo so panangaro nagkalalo la natan? Panon itayon papabiskegen nen Jehova tan  Jesus diad aro? Panon ya nipatnag na kada sakey ed sikatayo so singa-Kriston aro ya “makapabiskeg”?’​—1 Cor. 8:1.

3. Panon ya nanaapektoan iray totoo ed sarayan ‘mapeligron panaon’?

³ Lapud say bilay et ‘napno na gonigon tan ermen,’ dakel so makakaeksperiensya na nanduruman klase na pakakaermenan ed sarayan ‘mapeligron panaon.’ (Sal. 90:10; 2 Tim. 3:1-5) Dakel so ngalngali la onsuko. Base ed tantiya, masulok ya 800,000 so ompapatey kada taon lapud manbibikkel ira​—sakey so ompapatey diad kada 40 segundo. Makapaermen ta anggan diad saray agagi et wala ray adaeg na saray problema ra kanian akapambikkel ira.

4. Siopa ran karakter ed Biblia so angibalikas ya labay da lay ompatey?

⁴ Diad panaon na Biblia, wala ray matoor ya lingkor na Dios ya masyado lan nairapan ed saray kipapasen da kanian nilabay da lay ompatey. Singa bilang, lapud graben sakit ya alikna nen Job, oniay maer-ermen ya imbaga to: “Kabusol koy bilay ko; agko la labay so manbilay.” (Job 7:16; 14:13) Dismayadon maong si Jonas ed nansumpalan na asainmin to kanian imbaga to: “Natan, O Jehova, ipangasim, panampot mo lay bilay ko, ta magmaong nin ompatey ak nen say manbilay ak.” (Jon. 4:3) Ontan met, aminsan et naapektoan a maong so matoor a propeta ya si Elias ed situasyon to, kanian kinerew ton sikatoy ompatey la komon. Imbaga to: “Duga la! O Jehova, paandim lay bilay ko.” (1 Ara. 19:4) Balet pinabli nen Jehova iratan ya lingkor to tan labay to ran manbilay. Imbes ya husgaan ira, tinulongan to iran nalabanan da so pilalek dan ompatey, tan pinabiskeg to ra diad aro pian nitultuloy day matoor ya panlilingkor dad sikato.

5. Akin et kaukolan na saray agagi so panangaro tayo nagkalalo la natan?

⁵ Anggano agmet labay na saray agagi tayo so onsuko, dakel natan so onaarap ed makapa-stress iran situasyon tan kaukolan iran pabiskegen diad aro. Wala ray susungdoan day panamasegsegang tan panagbalaw. Say arum et biktima na panagkritiko odino panagpauges diad pantratrabahoan da. Odino nakekesawan iran maong lapud pano-overtime dad trabaho, odino lapud saray agnaupot ya deadline ya kaukolan dan aboten. Say arum balet et kaukolan dan arapen iray makapakapuy ya problema ed abung, nayarin lapud panagkritiko na agmananisian asawa. Kanian lapud saratan tan arum nin rason, dakel ed saray agagi ed kongregasyon so talagan nakekesawan, parehon diad pisikal tan emosyonal. Siopa so nayarin makatulong ed saray nadidismaya pian makapantultuloy ira?

6. Panon ya papabiskegen nen Jehova iray lingkor to panamegley na aro?

⁶ Papabiskegen nen Jehova iray mandadayew ed sikato diad pangipapaseguro to ya agmangangga so panangaro tod sikara. Seguradon apaseseg iray matoor ya Israelita nen nadngel da iyan imbaga nen Jehova: “Nagmaliw kan mabmabli ed pakanengneng ko, apagalangan ka, tan inaro ta ka. . . . Agka ontatakot, ta wala ak ed sika”! (Isa. 43:4, 5) Bilang sakey ed saray lingkor to, makaseguro ka ya inar-aro kan maong nen Jehova. * Oniay insipan na Salita na Dios ed saramay aanapen da so dugan panagdayew: “Sikatoy mangiliktar bilang Sakey a makapanyari. Sikatoy manliket a maong lapud sika.”​—Sof. 3:16, 17.

7. Diad anton paraan ya say panangaro nen Jehova et nikompara ed panangasikaso na sakey ya ina? (Nengnengen so litratod gapo na artikulo.)

 ⁷ Anggan anton subok so arapen na saray totoo nen Jehova, isisipan ton asikasoen tan ligliwaen to ira. “Pasusoen tan ebaen to kayo, tan panlugtoten to kayo ed akwalan to. Singa sakey ya ina a liligliwaen toy anak to, itultuloy ta kayo met a ligliwaen.” (Isa. 66:12, 13) Talagan balibali itan ya nengnengen​—sakey a maaron ina ya sankaeba toy anak to odino panlulugtoten to ed akwalan to! Diad sayan ilustrasyon, ipapanengneng nen Jehova no panon kabaleg so panangaro tan panangasikaso to ed saray tuan mandadayew ed sikato. Tandaan mo ya pinabpabli tan inar-aro ka nen Jehova.​—Jer. 31:3.

8, 9. Panon itayon napabiskeg na panangaro nen Jesus?

⁸ Saray tuan Kristiano et onaapit ed panangaro na Dios lapud sayan sakey nin rason: “Ontan lay panangaro na Dios ed mundo ya inter to so bogbogtong ya Anak to, pian kada sakey a mangipapanengneng na pananisia ed sikato et agnaderal noagta nawalaan na bilay ya andi-anggaan.” (Juan 3:16) Inar-aro itayo met nen Jesus lapud inter toy bilay to parad sikatayo! Seguradon napabiskeg itayo ed satan ya panangaro! Isisipan na Salita na Dios ya anggan say “kairapan odino gonigon” et agbalot “makapangisian ed sikatayo ed panangaro na Kristo.”​—Roma 8:35, 38, 39.

⁹ No wala ray susungdoan tayon subok ya mamapakapuy ed sikatayo diad pisikal, emosyonal, odino diad espiritual, say panangaro na Kristo so mamabiskeg ed sikatayo pian makapansungdo. (Basaen so 2 Corinto 5:14, 15.) Sarag itayon pabiskegen tan pakiwasen na panangaro nen Jesus pian agtayo onsuko, anggano nipaarap tayod saray subok a singa saray trahedya, panamasegsegang, pakakadismaya, odino kapagaan.

10, 11. Siopa ray walaan na responsabilidad ya mamabiskeg ed saray nadidismayan agagi? Ipaliwawa.

¹⁰ Say sakey ya uusaren nen Jehova pian pabiskegen itayo diad aro et say Kristianon kongregasyon. Kada sakey ed sikatayo et sarag ton balesen itan ya panangaro To diad pangaro tan pamabiskeg ed saray agagi tayo, aliwa labat ya diad espiritual noagta dia met ed emosyonal. (1 Juan 4:19-21) Pinaseseg nen apostol Pablo iray Kristiano: “Itultuloy yon pasesegen tan pabiskegen so sakey tan sakey, a singa gagawaen yo la.” (1 Tes. 5:11) On, sarag  na interon kongregasyon​—aliwan saray elder labat—​ya aligen si Jehova tan Jesus diad panligliwa tan pamabiskeg ed saray agagi.​—Basaen so Roma 15:1, 2.

¹¹ Say arum ya agagi ed kongregasyon ya walaan na graben depresyon et nayarin mankaukolan na propesyonal a tulong tan panagtambal. (Luc. 5:31) Mapaabeban bibidbiren na saray elder tan arum nin agagi ed kongregasyon ya aliwa ran doktor parad ontan iran sakit. Balet walay importantin nagawaan da​—sarag dan ‘ligliwaen iramay maer-ermen, tulongan iramay makapuy, anosan so amin.’ (1 Tes. 5:14) Kaukolan ya ipatnag na amin a Kristiano so maaron pililikna tan anos, tan ligliwaen da iramay nadidismaya. Kasin sakey kad saray manliligliwa tan mamapaseseg? No amtaen mo no panon kan makatulong, mas magmaliw kan epektibo ed pansasagpot mo.

12. Mangiter na alimbawa no panon ya apabiskeg so sakey a sister lapud panangaro na kongregasyon.

¹² Panon ya napabiskeg na panangaro tayo iramay walaan na graben problema ed emosyon? “No maminsan, iisipen ko lay manbikkel,” so kuan na sakey a sister diad Europe. “Pero walay pangaalaan koy biskeg. Say kongregasyon mi so angisalba ed siak. Naynay ya makapaseseg tan maar-aro iray agagi. Anggano daiset labat so makaamta ya walay depresyon ko, naynay ya wadtan iray agagi. Sakey ya sanasawa so nagmaliw a singa atateng kod espiritual. Inasikaso da ak, tan literal ya wadtan ira parad siak, 24 oras kada agew.” Tua, aliwan amin et sarag dan gawaen itan. Balet, baleg so nagawaan na iiter tayon tulong ed saramay ondadalan ed graben problema ed emosyon. *

13. Antoy importantin gawaen tayo pian napabiskeg tayoy arum?

¹³ Ondengel a maong. (Sant. 1:19) Say idengel ya walaan na pililikna et pangipanengneng na aro. Magmaliw ya mataktika tan makonsidera no mantetepet ka pian natalosan mo so nalilikna na samay toon naiirapan. No ontan so gawaen mo, nipanengneng moy pililikna tan napabiskeg moy agim. Komon ta nanengneng ed ekspresyon na lupam so maaron panangiyansakit mo. No kaukolan ya detalyadon ibalikas na agim so amin ya nalilikna to, anosan mon dengelen tan agka onsasalet. No maanos kan ondengel, seguradon natalosan mo no anton talagay nalilikna to. Makatulong itan pian sikatoy nawalaan na kompiyansa ed sika, tan mas dengelen toy ibagam legan mon pansasagpotan ya pabiskegen. No ipanengneng mo ya sikatoy talagan iyaansakit mo, seguradon naligliwam.

14. Akin et labay tayon paliisan so magmaliw ya makritiko?

¹⁴ Paliisan so pagmaliw ya makritiko. No magmaliw tayon makritiko ed saray nadi-depress, mas naermenan ira laingen tan nayarin nabaliwala so pansasagpot tayon pabiskegen ira diad aro. “Say salitan agla ninonot et singa saray saksak na espada, balet say dila na marunong et mamaabig.” (Pro. 12:18) Siempre, agtayo gagalaen ya ‘saksaken’ na ansakit iran salita iramay nadi-depress. Balet, anggano agtayo ginagalan ‘saksaken’ so sakey, say epekto na satan et talagan ansakisakit. Pian napabiskeg tan napaseseg tayoy arum diad aro, kaukolan tayon ipanengneng so pililikna ed sikara, tan ipasen tayoy sarili tayo ed situasyon da anggad posible.​—Mat. 7:12.

15. Antoy nayarin usaren tayo pian napabiskeg tayoy arum diad aro?

¹⁵ Ligliwaen so arum panamegley na Salita na  Dios. (Basaen so Roma 15:4, 5.) Say Masanton Kasulatan et mankarga na kayamanan ya makaligliwa. Say Biblia et nanlapud “Dios a manliligliwa tan ontutulong ed sikatayon makapansungdo.” Likud ed saray makaligliwan teksto, dakdakel iray nausar tayon makatulong ed panagaral na Biblia. Sarag tayon usaren so Watch Tower Publications Index tan Giya ed Pan-research na Saray Tasi nen Jehova. Makatulong iratan pian naromog tayo ray makapabiskeg a simbawa ya base ed Biblia pian nasarag tayo so antokaman ya problema. Natulongan itayo na saratan ya uusaren ed panagaral na Biblia pian makapangiter tayo na makapabiskeg iran salita, tan magmaliw tayon mas epektibo ed maaron pansasagpot tayo ya ontulong.

16. Anto ran kualidad so kaukolan tayo no papasesegen tayo so sakey ya Kristianon nadi-depress?

¹⁶ Magmaliw ya maaro tan mauyamo. Agnaparaan irayan kabiangan na masakripisyon aro ya ipapanengneng tayo no papasesegen tan papabiskegen tayo so arum. Si Jehova ya mismo et “Ama na maaron panangasi tan say Dios na amin a ligliwa,” tan sikatoy walaan na “maaron panangabagey” ed saray lingkor to. (Basaen so 2 Corinto 1:3-6; Luc. 1:78; Roma 15:13) Angipanengneng na maong ya alimbawa si Pablo nipaakar ed saya, insulat to: “Nagmaliw kamin mauyamo ed panagtrato mid sikayo, a singa sakey a manpapasuson ina a maar-aron mangaasikaso ed ananak to. Kanian lapud maaron panamabli mid sikayo, aliwa labat a say maong a balita nipaakar ed Dios so determinado min inabang ed sikayo, noag pati say mismon bilay mi, ta inar-aro mi kayo.” (1 Tes. 2:7, 8) No aaligen tayoy panamabli na Dios, nayarin sikatayo so ebat ed pikakasi na sakey ya naeermenan a maong.

17. Akin et makatulong ed sikatayo so balansin panmoria ed saray agagi pian napabiskeg tayo ra diad aro?

¹⁷ Agmo iisipen ya perpekto iray agagim. Pansiansiam ya balanse so panmoriam ed saray agagi. Aliwan realistiko no ilaloan mon agnalingo iray agagim tan nadismaya ka labat. (Ecl. 7:21, 22) Tandaan ya si Jehova et realistiko ed saray kekerewen tod lingkor to. No aligen tayoy alimbawa to, nitepel tayoy lingo na arum. (Efe. 4:2, 32) Imbes ya ipalikna ed sikara ya kulang ni so gagawaen da, komendaan tayo ira ed saray nagagawaan da. Napaseseg irad satan. Makapabiskeg so impapuson komendasyon tan makatulong itan pian nawalaan ira na “rason a manliket” diad panlilingkor da. Mas maabig no ontan so gawaen tayo nen say ikompara tayo rad arum ta nadismaya labat ira.​—Gal. 6:4.

18. Akin et labay tayon pabiskegen so sakey tan sakey diad aro?

¹⁸ Kada sakey ya karnero nen Jehova et talagan mabmabli ed sikato tan ed si Jesus, ya angitarya na dondon bagat. (Gal. 2:20) Inar-aro tayo ray agagi. Tan labay tayo ran asikasoen diad makonsidera tan maaron paraan. Pian magmaliw tayon makaparepresko, “seetan tayon gawaen iray bengatlan mamapawala na kareenan tan saray bengatlan makapabiskeg ed sakey tan sakey.” (Roma 14:19) Talagan tatalaranan tayo la so isabi na panaon, diad Paraiso, ya no iner et anggapo lan balot so nadismaya! Anggapo lay sakit, guerra, ipapatey, panamasegsegang, pambubusolan ed pamilya, tan pakadismayaan. Kayari na Sanlibon Taon ya Uley na Kristo, magmaliw lan perpekto so amin ya totoo. Saramay nalampasan day unor ya subok et tagibien nen Jehova ya Dios bilang ananak to diad dalin tan nawalaan iray “maglorian kawayangan bilang ananak na Dios.” (Roma 8:21) Komon ta itultuloy tayon amin ya ipatnag so aro ya makapabiskeg tan tulongan tayoy sakey tan sakey ya naawat so makapaliket tan mabmablin tumang.