DIAD interon mundo, papablien na saray elder so pribilehyo da ya panlingkoran iray totoo na Dios. Talagan bendisyon ira ed sikatayon amin! Balet diad agano ni, walay agawan pananguman. Saray maedad lan elder et kaukolan da lan ipasa ed saray mas ugaw nin elder so arum ed saray ambelat ya responsabilidad da. Diad anton paraan?

Base ed balon uksoyan, saray manangasikaso na sirkito tan field instructor et ontunda lad satan ya klase na panaglingkor no asabi da lay edad ya 70. Ontan met, saray elder ya mantaon na 80 et iter da lad saray mas ugaw nin elder so arum ya asainmin da, singa say pagmaliw ya coordinator na Branch Committee odino coordinator na ulop na mamatatken ed sakey ya kongregasyon. Antoy reaksion na saray maedad lan elder ed sayan pananguman? Nansiansia ran matoor ed si Jehova tan ed organisasyon to!

“Talagan onabobon ak ed saman ya pananguman,” so imbaga nen Ken, ya nanlingkor bilang coordinator na Branch Committee diad ngalngali 49 taon. “Diad tua, diad samay mismon kabuasan ya akabatan ko itan, kakkapampikasik ed si Jehova, kinerew ko ya wala komon so mas ugaw ya brother ya makapanlingkor bilang coordinator.” Say reaksion nen Ken et mipara  ed arum ya matoor a maedad lan elder diad interon mundo. Siempre, lapud labalabay dan panlingkoran iray agagi, wala met iray adismaya diad gapo.

“Medyo naermenan ak,” so imbaga nen Esperandio, ya datin coordinator na ulop na mamatatken ed kongregasyon ya kawalaan to. Balet binidbir to, “Kaukolan koy mas dakel ya panaon pian asikasoen so onkakapuy lan laman ko.” Singa ilaloan tayon gawaen nen Esperandio, intultuloy toy matoor ya panaglingkor to ed si Jehova tan sikatoy nagmaliw ya bendisyon ed kongregasyon ya kawalaan to.

Anto balet so reaksion na saramay abayag lan manlilingkor bilang ombiabiahen manangasikaso nen biglan anguman so asainmin da? Oniay inamin nen Allan ya nanlingkor bilang ombiabiahen manangasikaso ed loob na 38 taon, “Nen naamtaan ko, abigla ak.” Balet anengneng to lanlamang so gunggona ed pangipasal ed saray mas ugaw nin brother parad satan ya kimey, tan sikatoy nantultuloy ya matoor ed panaglingkor.

Si Russell, ya nanlingkor bilang ombiabiahen manangasikaso tan sakey ya field instructor diad loob na 40 taon, et imbaga ton sikatoy dismayado tan say asawa to diad gapo. “Talagan pinabpabli mi so pribilehyo mi tan pakalikna mi et sarag mi ni mantultuloy.” Natan et uusaren nen Russell tan say asawa to so naawat dan panangipasal tan eksperiensya diad kongregasyon ya kawalaan da, tan malikeliket iray agagi ya kaiba dan manlilingkor.

Anggaman agmo personal ya naeksperiensya iray alikna na saratan ya agagi, nayarin makatulong so nabasa ed 2 Samuel pian natalosan mo iramay ondadalan ed satan.

Isip mo pa may impanrebelde na anak nen Arin David ya si Absalom. Tinmakas si David manlapud Jerusalem paonlad Mahanaim, diad bukig na Ilog Jordan. Ditan et mankakkaukolan si David tan saray kaiba to. Nanonotan mo no antoy agawa?

Taloran lalaki ed satan ya lugar so mabulbulos ya angiter na saray dukolan, naakan, tan arum nin kagawaan. Sakey ed sikara si Barzilai. (2 Sam. 17:27-29) Nen anampot lay impanrebelde nen Absalom, nayari lan ompawil si David ed Jerusalem, tan sikatoy inibaan nen Barzilai paonlad Jordan. Kinombinse nen David si Barzilai ya mila ed Jerusalem. Inyopresi na ari ya sikatoy suplayan to na naakan, anggano si Barzilai et ‘mayamyaman a too’ tan agto la kaukolan so naakan ya inyopresi ed sikato. (2 Sam. 19:31-33) Posiblin inapresyan maong nen David iray kualidad nen Barzilai tan saray maong ya simbawa to ya nayarin nitulong tod sikato. Seguradon baleg komon ya pribilehyo so panayam tan panlingkor ed palasyo na ari!

Balet lapud realistiko tan mapaabeba si Barzilai, imbaga ton 80 lay taon to. Imbaga to ni: “Nibiig ko ni kasi so maong tan makapuy?” Antoy labay ton ibaga? Seguradon awalaan lay karunongan si Barzilai legan na andukey ya  pambibilay to. Tan sarag to ni mangiter na maabig ya simbawa, a singa ginawa na “saray mamasiken” ed si Arin Rehoboam. (1 Ara. 12:6, 7; Sal. 92:12-14; Pro. 16:31) Kanian nen imbaga nen Barzilai so nipaakar ed pangibiig na maong tan makapuy, nayarin say tutukoyen to et say pisikal ya limitasyon to lapud matatken la. Binidbir to ya kinmapuy lay pakataway tan pakadngel to lapud masiken la. (Ecl. 12:4, 5) Kanian imbaga nen Barzilai ed si David ya say ipila to lad Jerusalem et say mas ugaw nin si Kimham, ya nayarin anak nen Barzilai.​—2 Sam. 19:35-40.

Say pananguman ya abitlad gapo et mipara ed kanonotan ya impatnag nen Barzilai. Diad panaon tayo, amta tayo ya aliwan say kipapasen tan abilidad labat na sakey ya too so kaukolan ya ikonsidera, a singa ed situasyon nen Barzilai. Kaukolan ya realistikon ikonsidera no antoy sankaabigan parad saray matoor ya elder a manlilingkor diad interon mundo.

Nanengneng ya tampol na sarayan mapaabeban maedad lan Kristiano ya say organisasyon nen Jehova et mas ombiskeg, tan onaligwas diad arapen no ipasa dad saray mas ugaw nin brother iray responsabilidad ya abayag da lan aasikasoen. Diad maslak iran situasyon, saray maedad lan brother so mangipapasal lanlamang ed saray mas ugaw nin brother, a singa impangipasal nen Barzilai ed anak to, tan nen apostol Pablo ed si Timoteo. (1 Cor. 4:17; Fil. 2:20-22) Natan, papaneknekan na sarayan mas ugaw nin brother ya sikaray “regalo a lalaki” ya ontutulong “pian pabiskegen day laman na Kristo.”​—Efe. 4:8-12; ikompara so Numeros 11:16, 17, 29.

Diad saray kongregasyon ed interon mundo, dakel ed saray totoo na Dios ya angipasa na arum ed saray responsabilidad da et awalaan na pankanawnawa pian makaloob ed balo odino mas malaknab ya panaglingkor ed kimey nen Jehova.

“Lapud balon kipapasen ko natan, atulongan ko iray agmananisian asawa na saray sister diad kongregasyon mi,” so inkuan nen Marco, ya nanlingkor bilang ombiabiahen manangasikaso ed loob na 19 taon.

“Kaiba ed saray balon goal mi so itulong ed inaktibo tan makapangikondukta na dakel nin iyaaralan na Biblia,” so imbaga nen Geraldo, ya nanlingkor bilang ombiabiahen manangasikaso ed loob na 28 taon. Imbaga to ya sikaran dua nen asawa to et walaan na 15 ya iyaaralan na Biblia tan wala ray inaktibo ya onaatendi la natan ed saray aral.

Oniay imbaga nen Allan ya abitla niman: “Dakel la natan so panaon mi ya mibiang ed nanduruman klase na panagpulong. Mani-enjoy kami ed panagpulong ed publiko, diad saray lugar na negosyo, tan pampupulong ed saray kakaabay mi, duara ed sikara et akapiaral la.”

No sakey kan eksperiensyado tan matoor a brother ya akaawat na balon asainmin diad organisasyon na Dios, wala ni arum ya espisyal ya paraan pian makapitulongan ka. Sarag mon suportaan so kimey nen Jehova diad panginabang mo na eksperiensyam ed saray kalangweran nin brother diad kongregasyon. “Ipapasal tan uusaren nen Jehova iray maong tan maabilidad ya kalangweran,” so imbaga nen Russell ya abitla niman. “Nagugunggonaan iray agagi ed maligsan panagbangat tan panagpastol da!”​—Nengnengen so kahon ya “ Tulongan Iray Mas Ugaw nin Brother ya Niiter so Sankaabigan Da.”

No diad agano ni et linmoob kad duman klase na panaglingkor, mansiansia kan positibo. Dakel lay atulongan mon totoo lapud impapuson pankikimey mo, tan itultuloy mo labat itan ya gawaen. Naar-aro da ka tan ar-aroen da ka ni.

Nagkalalo la, wala lay permanentin pasen mo ed puso nen Jehova. “Agto lingwanan so gawa yo tan say aro ya impanengneng yo parad ngaran to diad panlilingkor yo ed saray masanto tan diad pantultuloy yon panlingkor ed sikara.” (Heb. 6:10) Ipapaseguro ed sikatayo na satan  ya teksto ya agto lingwanan anggan saray ginawa tayo nensaman. Mabmabli kan maong ed si Jehova kanian agto lingwanan iray ginawam tan say tuloytuloy nin pansasagpot mo pian sikatoy napaliket mo!

Panon to no balet no agmet anguman so asainmin mo? Siansia nin walay epekto na saya ed sika. Diad anton paraan?

No walay kabat mon matoor ya maedad lan brother ya anguman so asainmin to, nagunggonaan ka ed inkatatken tod espiritual tan ed dakel lan eksperiensya to. Kerew moy simbawa to. Tepet mo no anto ray niiter ton suhestion. Tan obserbaan mo ed balon asainmin to no panon ton matoor ya iyaaplika iray eksperiensya to.

Balanglan sakey kan maedad ya anguman so asainmin mo lapud balon uksoyan, odino sakey ya brother o sister ya nagugunggonaan ed satan, tandaan ya papablien nen Jehova so katooran na saramay abayag lan manlilingkor ed sikato, tan mantutultuloy nid satan.