1. Panon ya napatnagan so panangaro diad saray totoo na Dios?

SAY totoo na Dios et sakey ya espiritual a pamilya​—ya kabkabat lapud panangaro dad sakey tan sakey. (1 Juan 4:16, 21) Satan ya panangaro et maslak ya napatnagan, aliwa labat ya diad angkabaleg iran gawa na panagsakripisyo, noagta diad dakel met iran angkelag a paraan, singa say maabig ya panagsalita tan gawa. No maabig tan makonsidera so panagtrato tayo ed arum, ‘aaligen tayoy Dios, bilang inad-aro ton ananak.’​—Efe. 5:1.

2. Panon ya inalig nen Jesus so panangaro na Dios?

² Perpekton inalig nen Jesus so Ama to. “Dago kayod siak, amin yon mansasagpot tan nabebelatan,” so imbaga nen Jesus, “tan pampainawaen ta kayo . . . , ta mauyamo tan mapaabeba ak.” (Mat. 11:28, 29) No aaligen tayoy alimbawa na Kristo diad “[pangipapatnag] na konsiderasyon ed samay pakaskasi,” niwalad sikatayo so pabor na Ama tayo tan naliketan itayon maong. (Sal. 41:1) Aralen tayo no panon tayon nipanengneng so konsiderasyon diad pamilya, kongregasyon, tan diad lawak na ministeryo.

3. Parad sakey ya asawan laki, panon ya say pakatalos tan konsiderasyon et naynay ya mankaiba? (Nengnengen so litratod gapo na artikulo.)

³ Saray asawan lalaki so nepeg ya manunan mangipatnag na konsiderasyon diad loob na pamilya. (Efe. 5:25; 6:4) Singa bilang, nabibilin ira ya nepeg dan tratoen so kaasawaan da “unong ed kakabatan”​—ya nayarin mankabaliksan na ‘pangipatnag ed sikara na konsiderasyon; ya tatalosan ira.’ (1 Ped. 3:7; paimanod leksab) Say pakatalos tan konsiderasyon et naynay ya mankaiba. Singa bilang, say makatalos ya asawan laki et amta ton say asawa to, bilang katulongan to, et duma ed sikato diad dakel ya paraan, balet agto labay ya ibagan abebbeba ed sikato. (Gen. 2:18) Kanian ikokonsidera toy liknaan na asawa to, tan tratratoen to ya walaan na dignidad tan galang. Oniay imbaga na asawan bii diad Canada nipaakar ed asawa to: “Agton balot ibabaliwala so naliliknak odino ibabagan, ‘Dapat aliwan ontan so naliknam.’ Sikatoy maong met ya ondengel. No tutulongan to ak ya ipetek so panmoriak ed sakey ya bengatla, gagawaen to itan diad maaron paraan.”

4. Panon ya nipanengneng na asawan laki so konsiderasyon to ed asawa to diad pidedeneng tod arum ya bibii?

⁴ Say makonsideran asawan laki et sankanonot to met so liknaan na asawa to diad pidedeneng tod arum ya bibii. Agton balot mi-flirt odino mangipanengneng na agmakanepegan ya interes ed sikara; agto met itan gawaen diad social media odino diad Internet. (Job 31:1) On, sikatoy mansiasiansian matoor ed asawa to, aliwa labat ya lapud sikatoy inaro to, noagta lapud inaro toy Dios tan kabusol toy kaugsan.​—Basaen so Salmo 19:14; 97:10.

5. Panon ya nipanengneng na asawan bii so konsiderasyon ed asawa to?

⁵ No say asawan laki et onnenengneng ed ulo to, si Jesu-Kristo, say manunan alimbawa to, tutulongan toy asawa to ya nawalaan na “aralem a respeto” ed sikato. (Efe. 5:22-25, 33) Satan ya respeto na asawan bii so mamakiwas ed sikaton magmaliw ya makonsidera ed asawa to, singa bilang no kaukolan na asawan laki so mangusar na dakel ya panaon parad saray teokratikon responsabilidad odino no dakel so problema ya nononoten to. “No maminsan, natebek na asawak diad saray kiwas ko ya walay probleman sankanonot ko,” so imbaga na asawan laki diad Britain. “Iyaaplika toy prinsipyo ya walad Proverbio 20:5, anggano mankabaliksan itan na panalagar ed dugan panaon pian “papawayen” iray nononoten ko, no nayari ya ipaamtak iratan ed sikato.”

6. Panon tayon napaseseg iray ugugaw ya magmaliw a makonsidera ed arum, tan antoy epekto na satan ed ugaw?

⁶ No ipapatnag na saray atateng so konsiderasyon ed sakey tan sakey, mangipapanengneng ira na maabig ya alimbawa ed ananak da. Siempre, manunan responsabilidad na atateng ya ibangat ed ananak da no panon so magmaliw ya makonsidera ed arum. Singa bilang, nayarin bilinen da ray ananak da ya ag-ira manbatik-batik ed Kingdom Hall. Sano walay okasyon, nayarin ibaga dad ananak da ya paunaen da ni ray maedad la ya mangala na naakan. Siempre, makatulong so amin ya agagi ed saray atateng. Singa bilang, no walay balibalin ginawa na ugaw ed sikatayo​—nayarin no nilukasan toy puerta—​maabig no komendaan tayo. No ontan so gawaen tayo, maong so epekto na satan ed ugaw, natalosan ton “mas makapaliket so mangiter nen say mangawat.”​—Gawa 20:35.

7. Panon ya impanengneng nen Jesus so konsiderasyon ed samay lakin telek, tan anto ray naaralan tayo ed alimbawa nen Jesus?

⁷ Aminsan, nen walad rehyon na Decapolis si Jesus, “inyakar dad sikato so sakey a lakin telek tan walay deperensya tod panagsalita.” (Mar. 7:31-35) Imbes ya paabigen nen Jesus diad arap na totoo, “sikatoy inyarawi” to insan to pinaabig. Akin? Nayarin  agkomportable imay laki ed dakel a totoo lapud kapansanan to. Nayarin alikas iya nen Jesus kanian sikatoy pinaabig to ya arawi ed saray totoo. Siempre, agtayo sarag so manggaway milagro. Balet, sarag tan nepeg tayon nonoten so pankaukolan tan liknaan na saray agagi. Insulat nen apostol Pablo: “Nonoten tayoy sakey tan sakey pian makapansasagyatan itayo a mangaro tan manggaway maabig iran kimey.” (Heb. 10:24) Atalosan nen Jesus so liknaan na samay lakin telek tan impanengneng toy konsiderasyon sanen pinaabig to. Talagan balibalin alimbawa itan ed sikatayo!

8, 9. Diad anto ran paraan ya nipanengneng tayo so konsiderasyon ed saray maedad tan makapuy la? (Mangiter na alimbawa.)

⁸ Ipanengneng so konsiderasyon ed saray maedad tan makapuy la. Say Kristianon kongregasyon et kabkabat, aliwan diad karakel na nagagawaan da, noagta diad aro dad sakey tan sakey. (Juan 13:34, 35) Satan ya aro so mamapakiwas ed sikatayon ontulong ed saray maedad la tan ed saray walaay kapansanan pian makaatendi ira ed saray Kristianon pantitipon tan pian makapanpulong ira, anggano limitado lay nagawaan da. (Mat. 13:23) Si Michael, ya aka-wheelchair la, et aapresyaen ton maong so tulong na pamilya to tan saray kagrupo tod lawak na kimeyan. “Lapud tutulongan da ak,” so imbaga to, “maslak ed saray pantitipon tayo et naaatendian ko tan makapanpupulong ak ya regular. Labalabay koy man-public witnessing.”

⁹ Diad dakel iran Bethel home, wala ray maedad tan makapuy la ran membro. Ipapanengneng na saray maaron manangasikaso so konsiderasyon ed sarayan matoor ya lingkor diad impangiyuksoy da ya makapibiang ira ed panagpulong panamegley na sulat tan telepono. “Aapresyaen mi so pribilehyo ya makapanpulong panamegley na sulat,” so imbaga nen Bill, ya mantaon na 86, tan susulatan to ray totoo ya manaayam ed nisulinek iran lugar. Oniay imbaga met nen Nancy, ya ngalngali la mantaon na 90: “Agko ipapasen ya say panagpulong panamegley na sulat et basta labat pankarga ed sobre. Panagpulong iya. Kaukolan ya naamtaan na totoo so katuaan!” Oniay imbaga nen Ethel, ya inyanak nen 1921: “Kabiangan la na bilay ko so panlikna na sakit. Wala ray agew ya anggan say pampales labat et nanairapan ak la.” Anggaman ontan, nai-enjoy to so panagpulong panamegley na telepono tan wala ray pigaran papawilen to. Onia met so imbaga nen Barbara ya mantaon na 85: “Lapud makapuy lay laman ko, agko la sarag so manpulong ed kaabungan. Balet panamegley na panagpulong ed telepono, nakakatongtong koy arum. Salamat, Jehova!” Diad loob na ngalngali sakey taon, sakey ya grupo na saray pinablin maedad la so akapangusar na 1,228 ya oras ed ministeryo, akapanggawa na 6,265 ya sulat, masulok ya 2,000 ya intawag ed telepono, tan akapangipalima na 6,315 iran publikasyon! Seguradon malikeliket si Jehova ed sayan impansagpot da!​—Pro. 27:11.

10. Panon tayon natulongan iray agagi ya nagunggonaan ed saray Kristianon pantitipon tayo?

¹⁰ Ipanengneng so konsiderasyon diad saray Kristianon pantitipon. Labay tayon nagunggonaan ya maong iray agagi ed saray pantitipon. Nagawaan tayo itan no makonsidera tayo. Panon? Say sakey ya paraan et no onsabi tayod suston oras pian agtayo makadisturbo. Siempre, no maminsan et wala ray nagawan ag-iilaloan ya nayarin lapud satan et naatrasado tayo. Balet no lanang la, kaukolan tayon pannonotan no panon tayon magmaliw ya mas makonsidera. Tandaan tayo ya si Jehova tan say Anak to so angimbita ed sikatayo. (Mat. 18:20) Nepeg labat ya respetoen tayo ran maong!

11. Akin et nepeg ya iyaplika na saramay walaan na parte ed pantitipon so instruksion ya walad 1 Corinto 14:40?

¹¹ Kaiba met ed pangipanengneng tayo na konsiderasyon ed saray agagi so itumbok ed sayan instruksion: “Amin a bengatla et nagawa komon a masimpit tan mauksoy.” (1 Cor. 14:40) Saray brother ya walaan na parte ed aral et tutumboken da itan diad agda ilampas ed oras ya niiter ed sikara. No ontan so gagawaen da, ipapanengneng da so konsiderasyon aliwa labat ed samay ontumbok ya espiker,  noagta pati ed saray agagi. Say arum ed saray agagi et nayarin arawi ni sempetan da. Nayarin say arum met et mandedepende labat ed saray publikon luluganan. Tan arum et nayarin walaan na agmananisian asawa ya manaalagar ed isempet da diad suston oras.

12. Akin ya makanepegan ed “mas nagkalalon konsiderasyon tan panangaro” iray makukulin elder? (Nengnengen so kahon ya “ Ipanengneng so Konsiderasyon ed Saray Mangidadaulo.”)

¹² Saray espiritual a pastol ya mansasagpot a maong ed kongregasyon tan maseseg ya mangidadaulo ed ministeryo et makanepegan ed nagkalalon konsiderasyon. (Basaen so 1 Tesalonica 5:12, 13.) Seguradon aapresyaen mo so pansasagpot na saray elder parad sika. No ontan sirin, ipanengneng mo itan diad maliket mon pikoopera tan isuporta ed sikara. Lalo la ta “sikaray naynay a mangaasikaso ed [sika] tan walay eebatan da ed saya.”​—Heb. 13:7, 17.

13. Antoy naaralan tayo ed paraan na impantrato nen Jesus ed totoo?

¹³ Oniay impasakbay nen Isaias nipaakar ed si Jesus: “Agto puteren so abalbal a tanubong, tan agto erepen so makuykuyep a pabilo.” (Isa. 42:3) Nakakasian nen Jesus iray totoo lapud inaro to ra. Natatalosan toy liknaan na saramay singa abalbal ya tanubong odino makuykuyep ya pabilo a ngalngali la naerep. Kanian sikatoy makonsidera, mapangasi, tan maanos. Anggan saray ugugaw et maasingger ed sikato. (Mar. 10:14) Siempre, agtayo naparaan so karunongan tan abilidad nen Jesus ya manbangat! Balet sarag tan nepeg tayon  ikonsidera iray totoo ed teritorya tayo. Kaiba ed satan so paraan na pitotongtong tayo, no kapigan tan panon kabayag so pitongtong tayod sikara.

14. Akin et kaukolan tayon asikasoen ya maong so paraan na pitotongtong tayod saray totoo?

¹⁴ Panon so nepeg ya pitongtong tayod totoo? Natan, minilyon ya totoo so “singa ra kinatatan tan pinaulyanan” na saray kurakot tan anggapoy panangasi iran negosyante, politiko, tan lider na relihyon. (Mat. 9:36) Kanian dakel so totoon negatibo tan anggapo lay ilalo da. Importante sirin ya magmaliw tayon mauyamo tan mapangasi ed saray ibabaga tayo tan ed tono na boses tayo! On, dakel so ondedengel ed mensahe tayo aliwan lapud dakel so amta tayod Biblia odino maong tayon mankatunongan, noagta lapud nanenengneng dan talagan interesado tayo ed sikara tan walay konsiderasyon tayo.

15. Diad anto ran praktikal a paraan ya nipanengneng tayoy konsiderasyon ed saray totoon pupulongan tayo?

¹⁵ Dakel so praktikal ya paraan no panon tayon nipanengneng so konsiderasyon ed saray totoon pupulongan tayo. Singa bilang, say pantepet et maabig ya paraan na panagbangat. Balet kaukolan ya mantepet tayo diad maong tan marespeton paraan. Diad teritorya na sakey ya payunir, dakel so ag-apasal ya mitongtong tan mabaing, kanian pinaliisan to ray makapaopendi ya tepet. Kaibad saratan ya tepet iramay mairap ya ebatan odino nayarin duma so ebat. Singa bilang, pinaliisan to iramay tepet ya singa say ‘Antam so ngaran na Dios?’ odino ‘Antam no anto ’tay Panarian na Dios?’ Imbes, oniay ibabaga to, “Naamtaan kod Biblia ya walay personal a ngaran na Dios. Nayarin ipanengneng kod sika so ngaran to?” Siempre, nanduruma so kultura tan totoo, kanian anggapo ray ganggan ya nepeg tayon tumboken. Balet, nepeg ya naynay tayon makonsidera tan marespeto, tan kabisadoen met iray totoo ed lugar tayo.

16, 17. Panon tayon nipanengneng so konsiderasyon ed totoo (a) diad oras na pampulong tayo ed kaabungan? (b) diad kabayag na pitongtong tayo?

¹⁶ Kapigan so nepeg ya pampulong tayo ed saray totoo? No manpupulong tayo ed kaabungan, ag-iilaloan na saray totoo so iyakar tayod sikara. Importante sirin ya no onla tayod sikara et diad oras ya mas akaparaan iran mitongtong! (Mat. 7:12) Singa bilang, kasin saray totoo ed teritorya yo et labalabay day onugip na andukey kada weekend? No ontan, ompan mas maabig no igapom ni ministeryom diad pampulong ed karsada, publiko, odino diad pamawil ed saramay totoon antam ya masakbay so ibabangon da.

¹⁷ Panon kabayag so pitongtong tayo? Dakel so totoon busy ya maong, kanian ompan maabig no magano tayo labat, lalo la no diad unonan pankanawnawa. Maabig no antikey labat so pitongtong tan agla manbabayag. (1 Cor. 9:20-23) No nanengneng dan ikokonsidera tayoy situasyon da odino say busy ya eskedyul da, nayarin labay dan ompawil tayo. Nepeg ya nipatnag tayoy bunga na espiritu na Dios diad ministeryo tayo. No ontan so gawaen tayo, talagan magmaliw itayon ‘kakimeyan na Dios’​—ya usaren nen Jehova pian niyasingger so sakey ed katuaan.​—1 Cor. 3:6, 7, 9.

18. No magmaliw tayon makonsidera ed arum, anto ran bendisyon so naawat tayo?

¹⁸ Kanian gawaen tayoy anggaay nayarian tayo pian magmaliw tayon makonsidera ed arum​—diad pamilya, kongregasyon, tan lawak na ministeryo. Diad ontan et makaawat tayo na dakel ya bendisyon natan tan diad arapen. Oniay ibabaga na Salmo 41:1, 2: “Maliket so siopaman a mangipapatnag na konsiderasyon ed samay pakaskasi; sikatoy iliktar nen Jehova diad agew na kairapan. . . . Sikatoy nibagan maliket diad dalin.”