1, 2. (a) Aliwan singa saray totoon walaan na pakayari, panon ya tratratoen nen Jehova iray totoo? (b) Antoy aralen tayo ed sayan artikulo?

SARAY walaan na pakayari tan maimpluensyan totoo et maslak ya “pakakatawan,” tan papairapen da ni ingen so arum. (Mat. 20:25; Ecl. 8:9) Talagan baleg so pidumaan nen Jehova ed sikara! Anggano sikato so Makapanyarin-amin, sikatoy makonsideran maong ed saray agperpekton totoo. Sikatoy maomaong tan manonot. Ikokonsidera toy liknaan tayo tan iimanoen to ray pankaukolan tayo. Lapud “sankanonot ton dabok itayo,” agton balot kekerewen so bengatlan agtayo nayarian.​—Sal. 103:13, 14.

² Dakel so nabasa tayon alimbawa ed Biblia no panon ya impanengneng nen Jehova so inkamakonsidera to ed saray lingkor to. Manpokus tayod taloran alimbawa. Unona, say makonsideran paraan na Dios nen tinulongan toy ugaw nin Samuel pian ipasabi so mensahe na panangukom ed Atagey a Saserdoten si Eli; komadua, say inkaanos nen Jehova ed si Moises nen agto labay so magmaliw ya lider na saray Israelita; tan komatlo, say makonsideran paraan na Dios legan ton ipapaway iray Israelita ed Ehipto. Legan tayon aaralen irayan alimbawa, imanoen no antoy naaralan tayod si  Jehova tan no anto ray leksion ya niyaplika tayo.

3. Sakey a labi, antoy makapakelaw ya agawa ed ugaw nin Samuel, tan antoy nayarin nitepet tayo? (Nengnengen so litratod gapo na artikulo.)

³ Ugaw ni Samuel nen ginmapon “nanlingkor ed si Jehova” diad tabernakulo. (1 Sam. 3:1) Sakey ya labi, nen akarukol lay Samuel, walay makapakelaw ya agawa. * (Basaen so 1 Samuel 3:2-10.) Walay nadngel ton boses ya manatawag ed ngaran to. Lapud say amta to et boses iman na masiken lan Atagey a Saserdote ya si Eli, batik si Samuel ed sikato tan imbaga to: “Wadia ak, ta tinawag yo ak.” Imbaga nen Eli ya agto tinawag. Nen agawa lamet iman ya amidua, atebek nen Eli ya say Dios so manatawag ed si Samuel. Kanian imbaga tod ugaw nin Samuel no antoy iyebat to, tan inunor to itan. Akin ya agtampol impakabat nen Jehova so sarili to ed si Samuel diad unonan pankanawnawa ni labat? Anggapoy ibabaga na Biblia, balet ipapanengneng na nantutumbokan ya agawa a say sakey ya importantin rason et lapud konsiderasyon to ed ugaw nin Samuel. Panon?

4, 5. (a) Antoy reaksion nen Samuel ed asainmin ya inter na Dios ed sikato, tan anto ray agawa kaimbuasan to? (b) Diad sayan salaysay, antoy naaralan tayo nipaakar ed si Jehova?

⁴ Basaen so 1 Samuel 3:11-18. Kaiba ed Ganggan nen Jehova ya nepeg a respetoen na saray ugugaw iray maedad la, lalo la no sakey a pangulo. (Exo. 22:28; Lev. 19:32) Kasin naimadyin moy Samuel ya kabangon tod kabuasan et onlad si Eli tan makmakpel ton ibaga so makapakebbiew ya mensahe na panangukom na Dios? Siempre andi! Diad tua, nabasa tayo ya “natatakot si Samuel a mangibagad si Eli ed samay anengneng ton pasingawey.” Balet, sineguro na Dios ed si Eli ya Sikato so manatawag ed si Samuel. Kanian si Eli lay nantepet ed si Samuel tan imbaga ton mansalita labat. ‘Agmo iyaamot ed siak so anggan sakey a salita ed amin ya imbaga tod sika,’ so imbaga nen Eli. Tinmulok si Samuel, ‘imbaga ton amin ed sikato.’

⁵ Agla dapat makapabigla ed si Eli so imbaga nen Samuel, lapud mitukoyan itan ed samay imbaga na agnginaranan a “too na Dios” ya akauna lan akitongtong ed sayan atagey ya saserdote. (1 Sam. 2:27-36) Ipapanengneng na salaysay nipaakar ed si Samuel tan Eli ya si Jehova et talagan makonsidera tan marunong.

6. Anto ray naaralan tayo ed paraan na intulong na Dios ed ugaw nin Samuel?

⁶ Kasin sakey kan kabataan? No on, ipapanengneng na salaysay nipaakar ed ugaw nin Samuel ya natatalosan nen Jehova iray subok ya dadalanen mo tan say naliliknam. Nayarin mabaing ka kanian naiirapan kan mangipulong na mensahe na Panarian ed saray matatken la, odino ompan naiirapan ka met ya mansiansian duma ed saray kaedad mo. Makaseguro kan labay nen Jehova ya tulongan ka. Ibalikas mod sikato so amin ya walad pusom diad pikakasi. (Sal. 62:8) Nonot mo ray alimbawa na saray kabataan ya nabasad Biblia, a singa si Samuel. Tan mitongtong kad saray agagi​—kabataan man odino matatken—​ya nayarin wala ray alampasan dan subok ya mipara ed sika. On, nayarin istoryaen dad sika no panon iran tinulongan nen Jehova, ompan diad paraan ya agdan balot inilaloan.

7, 8. Panon ya impanengneng nen Jehova so nikadkaduman konsiderasyon ed si Moises?

⁷ Nen mantaon lay 80 si Moises, sikatoy inikdan nen Jehova na mairap ya asainmin. Kaukolan ton ipaway so Israel ed panamairap na Ehipto. (Exo. 3:10) Lapud 40 taon lan mankikimey si Moises bilang sakey ya pastol diad Midian, nayarin sikatoy abigla nen naawat to itan ya asainmin. “Siopa ak pian onla ed Faraon tan mangipaway ed saray Israelita  diad Ehipto?” so imbaga nen Moises. Balet impaseguro na Dios ed sikato: “Wala ak ed sika.” (Exo. 3:11, 12) Insipan To met: Saray mamatatken ed Israel et “seguradon dengelen day boses mo.” Balet siansian imbaga nen Moises: “Panon to no agda ak . . . dengelen?” (Exo. 3:18; 4:1) Singa laingen kokontraen nen Moises so ibabaga na Dios! Balet nansiansian maanos si Jehova. Diad tua, lalo ton pinaseguroan si Moises. Inikdan to na pakayari pian makapanggawa na saray milagro, ya lapud satan et sikato so inmunan too ya nirekord ya awalaan na ontan a pakayari.​—Exo. 4:2-9, 21.

⁸ Balet siansian nambaraan si Moises, ya ibaga ton makapuy kunon mansalita. Imbaga balet na Dios ed sikato: “Wala ak ed sika sano mansasalita ka, tan ibangat ta ka no antoy ibagam.” Kasin akombinsin siansia si Moises? Andi, ta sikatoy akikasi nid Dios ya mangibaki lay arum. Diad satan et sinmanok lay Jehova. Balet talagan sikatoy makonsidera. Impanengneng lamet na Dios ya ikokonsidera to so liknaan nen Moises ta tinuro To si Aaron bilang pinagkasangiyan nen Moises.​—Exo. 4:10-16.

9. Panon ya say inkaanos tan inkamakonsidera nen Jehova et akatulong ed si Moises pian nasumpal toy asainmin to?

⁹ Antoy naaralan tayo ed sayan salaysay nipaakar ed si Jehova? Bilang Makapanyarin-amin a Dios, sarag to komon ya taktakoten si Moises pian ontulok lan tampol. Balet agto itan ginawa, imbes, maanos tan maomaong si Jehova, lanang ton papaseguroan so mapaabeban lingkor to. Kasin epektibo iyan makonsideran paraan to? On! Si Moises et nagmaliw ya kabkabat a lider ya mauyamo tan makonsidera ed panagtrato tod arum a singa ed impantrato nen Jehova ed sikato.​—Num. 12:3.

10. Panon itayon nagunggonaan no aligen tayoy inkamakonsidera nen Jehova?

¹⁰ Saray leksion ya niyaplika tayo: Kasin sakey kan asawan laki, ateng, odino sakey ya elder ed kongregasyon? No on, nibagan walay autoridad mo. Talagan importante sirin ya aligen moy Jehova ya magmaliw kan makonsidera, maomaong, tan maanos diad panagtratom ed saray walad panangasikasom! (Col. 3:19-21; 1 Ped. 5:1-3) No gagawaen moy anggaay nayarian mon aligen si Jehova tan say  Babaleg a Moises, si Jesu-Kristo, magmaliw kan mainomay ya asinggeran na agagi tan makaparepresko kad sikara. (Mat. 11:28, 29) Magmaliw ka met a maong ya alimbawa ya balibalin aligen.​—Heb. 13:7.

11, 12. Legan ya ipapaway nen Jehova iray Israelita ed Ehipto, panon ton impalikna ed sikara ya maligen tan protektado ira?

¹¹ Nen tinaynan na saray Israelita so Ehipto nen 1513 B.C.E., nayarin say bilang da et masulok ya taloran milyon. Ompan onabot ni ra ingen ed talora odino apatiran henerasyon, wala ray ugugaw, maedad la, tan seguradon wala ray makapuy la odino walaan na kapansanan. Pian nidaulo so ontan karakel ya totoo papaway ed Ehipto, kaukolan so Lider ya makatalos tan makonsidera. Panamegley nen Moises et impanengneng nen Jehova iratan ya kualidad. Bilang resulta, maligen so liknaan na saray Israelita legan dan tataynanan so lugar ya alenleneg ya amta ran panayaman.​—Sal. 78:52, 53.

¹² Panon ya impalikna nen Jehova ed saray totoo to ya maligen tan protektado ira? Say sakey ya paraan et nen impaway to rad Ehipto ya organisadon maong, ya nandarasig ira “a singa ra miguerra.” (Exo. 13:18) Lapud organisado iran maong, segurado iray Israelita ya kontrolado na Dios da so amin ya bengatla. Ontan met, impanengneng nen Jehova so kiwawala to panamegley na ‘lurem no agew tan liwawa na apoy no labi.’ (Sal. 78:14) Singa ibabaga nen Jehova: “Agkayo natatakot. Kaiba yo ak, igiya tan protektaan ta kayo.” Talagan kakkaukolan da itan ya panamaseguro lalo lad saray sinmublay ya agawa!

13, 14. (a) Antoy makonsideran ginawa nen Jehova parad saray Israelita diad Ambalangan Dayat? (b) Panon ya impanengneng nen Jehova so pakayari to ed saray Ehipsio?

¹³ Basaen so Exodo 14:19-22. Imadyin mo pan wadman ka, diad benegan yo et saray sundalo na Faraon tan diad arapan yo et say Ambalangan Dayat. Balet walay ginawa na Dios. Inmalis ed benegan na kampo so singa lusek a lurem, kanian asaraan iray Ehipsio tan ambilbilunget so kawalaan da. Balet say maawa-awang a kampo yo et maliwliwawa! Insan mo anengneng si Moises ya inyunat toy lima to ed dayat, tan walay maksil a dagem ya manlalapud bukig ya amelsay ed danum kanian niwalay maawang a dalan paonlad basil na dayat. Diad mauksoy ya paraan, sika, say pamilyam, tan saray ayayep yo et manaakar ed buer kaiba iray arum a totoo. Insan biglan walay nikadkaduman naimanom. Say buer et aliwan ambasa odino makurinyas; amaga tan agka onkutep, tan agka nairapan ya manakar. Kanian anggan samay sankatantanan lan manakar et maligen ya akasabi ed basil.

¹⁴ Basaen so Exodo 14:23, 26-30. Kaleganan to, say malastog tan makulangkulang ya Faraon et manapuran inmusil. Inyunat lamet nen Moises so lima to ed dayat, insan nagba so duaran singa padir ya danum. Say danum ed biek tan biek et mapmaples ya nanabet, ya singa duaran tsunami ya nansalpokan. Kanian anggapon balot so tsansa na Faraon tan saray sundalo to ya makaliktar!​—Exo. 15:8-10.

15. Antoy naaralan mod si Jehova diad sayan salaysay?

¹⁵ Nanengneng tayod sayan salaysay ya si Jehova a Dios et organisado​—sakey ya kualidad ya ontulong ed sikatayon nalikna ya maligen tan protektado tayo. (1 Cor. 14:33) Ipapanengneng met nen Jehova ya sikatoy maaron pastol ya mangaasikaso ed totoo to diad praktikal iran paraan. Lalakapen to ra, proprotektaan to ra ed saray mamubusol ed sikara. Talagan napabiskeg itayo ed saratan ya katuaan legan tayon onaarap ed anggaan na sayan sistema na mundo!​—Pro. 1:33.

16. Panon itayon nagunggonaan no aralen tayoy paraan na impangiliktar nen Jehova ed saray Israelita?

¹⁶ Natan, aasikasoen met nen Jehova iray  totoo to bilang sakey a grupo​—diad espiritual tan pisikal ya paraan. Itultuloy to itan ya gawaen legan ya manasingger so baleg a kairapan. (Apo. 7:9, 10) Kanian ugaw man o matatken, mabiskeg o walay kapansanan, saray totoo na Dios et ag-onggiwgiw odino ontakot legan na baleg a kairapan. * Diad tua, duma laingen so gawaen da! Sankanonot da irayan salita nen Jesu-Kristo: “Alagey kayoy maptek tan itangwa yo ray ulo yo, lapud asingger lay kililiktar yo.” (Luc. 21:28) Mansiansia ran matalek ed si Jehova ya iliktar to ra anggan diad iyataki na Gog​—say alyansa na saray bansa ya mas mabiskeg ni nen say Faraon nensaman. (Eze. 38:2, 14-16) Akin et mansiansian kalmado iray totoo na Dios? Lapud amta da ya agmanguuman si Jehova. Pruebaan to lamet ya sikatoy mangiyaansakit tan makonsidera ya Manangiliktar.​—Isa. 26:3, 20.

17. (a) Panon tayon nagunggonaan ed saray salaysay ed Biblia nipaakar ed paraan na panangasikaso nen Jehova ed saray totoo to? (b) Antoy aralen tayod ontumbok ya artikulo?

¹⁷ Saray alimbawa ed sayan artikulo et pigara labat ed dakel ya pakanengnengan na maomaong tan makonsideran paraan na panangasikaso, panangigiya, tan panangiliktar nen Jehova ed saray totoo to. Legan mon dadalepdepen iratan ya salaysay, imanom iray detalye ya pakanengnengan na anggan saray agtanton mapatnag ya aspekto na saray kualidad nen Jehova. No ontan so gawaen mo, mansiansia ed nonot tan pusom iratan ya balibalin kualidad, ombiskeg so panangarom tan pananisiam ed Dios. Aralen tayod ontumbok ya artikulo iray paraan no panon tayon naalig si Jehova diad pangipanengneng tayoy konsiderasyon ed arum. Manpokus tayod pamilya, say Kristianon kongregasyon, tan diad lawak na ministeryo.