1-2. (a) Akin ya say Armagedon et sakey a maong a balita parad totoo? (b) Anto ran tepet so konsideraen tayo ed sayan artikulo?

IISIPEN na dakel a totoo ya say salitan “Armagedon” et ontutukoy ed nuklear a guerra odino baleg a kalamidad. Balet ibabaga na Biblia ya say Armagedon et ontutukoy ed sakey a maong a balita ya panliketan tayo! (Apo. 1:3) Say guerra na Armagedon et agmanderal ed mundo noagta iliktar na satan iray totoo! Panon?

² Ibabaga na Biblia ya panampoten na guerra na Armagedon so uley na too tan manresulta itan ed kililiktar na saray totoo. Diad satan ya guerra et naderal iray mauges balet mansiansian mabilay iray matunong. Tan diad satan a guerra et naderal iramay manederal ed dalin kanian naprotektaan itan. (Apo. 11:18) Pian mas natalosan tayo iraya, konsideraen tayo so apatiran tepet: Anto so Armagedon? Anto ray nagawa antis na satan? Antoy gawaen tayo pian kaiba tayo ed saray niliktar ed Armagedon? Panon itayon makapanmatoor legan ya manasingger so Armagedon?

3. (a) Antoy kabaliksan na salitan “Armagedon”? (b) Base ed Apocalipsis 16:14, 16, akin et nibaga tayo ya aliwan literal a pasen so Armagedon?

³ Basaen so Apocalipsis 16:14, 16. Say salitan “Armagedon” et aminsan labat ya nausar ed Kasulatan, tan nanlapu itan ed Hebreon termino a mankabaliksay “Palandey na Megido.” (Apo. 16:16; paimanod leksab) Say Megido et sakey a syudad diad Israel nensaman. (Jos. 17:11) Balet say Armagedon et ag-ontutukoy ed anggan anton literal a pasen diad dalin. Ontutukoy itan ed situasyon sano mantitipon iray “arari na interon dalin” pian milaban ed si Jehova. (Apo. 16:14) Balet diad sayan artikulo, nausar  met so salitan “Armagedon” ya ontukoy ed guerra ya tampol a nagawa sano nantitipon la iray arari na dalin. Panon tayon amta ya say Armagedon et aliwan literal a pasen? Unona, anggapoy literal ya palandey na Megido. Komadua, say Megido et melmelag ya lugar kanian ag-onduga ditan iray “arari na interon dalin” tan saray armada tan armas da. Komatlo, singa nanengneng tayo ed sayan artikulo, say guerra na Armagedon et onggapo sano saray “arari” na mundo et atakien da iray totoo na Dios, ya manaayam ed nanduruman pasen diad interon mundo.

4. Akin ya say impanawag na Dios ed sampot ya baleg a guerra et mikonektaan ed pasen a Megido?

⁴ Akin ya say impanawag na Dios ed sampot ya baleg a guerra et mikonektaan ed pasen a Megido? Dakel so agawan guerra ed Megido tan ed Lawak na Jezreel ya asingger ditan. Wala ray inkagawa ya tinulongan a mismo nen Jehova iray totoo to pian manalo ira ed saratan a guerra. Singa bilang, diad “abay na danum na Megido,” tinulongan na Dios so Israelitan ukom a si Barak pian taloen to so Canaanitan armada ya idadaulo nen Sisera. Akisalamat ed si Jehova si Barak tan say propetesan si Debora lapud satan ya makapakelaw ya impanalo da. Inkansion da: “Manlapud tawen et akilaban iray bitewen . . . sumpad si Sisera. Inyanor ira na say agus na Kison.”​—Ukom 5:19-21.

5. Antoy pidumaan na guerra na Armagedon ed samay guerra ya akilabanan nen Barak?

⁵ Oniay sampot na kansion nen Barak tan Debora: “Kanian naandi komon iray kalaban mo, O Jehova, balet saray mangaaro ed sika et magmaliw komon a singa say agew sano ombutay tan onsinag a maliwliwawa.” (Ukom 5:31) Ontan so nagawa ed Armagedon. Naandi iray kalaban na Dios, balet niliktar iray mangaaro ed sikato. Anggaman ontan, walay pidumaan na guerra na Armagedon ed samay guerra ya akilabanan nen Barak. Diad Armagedon, saray totoo na Dios et agmilaban. Anggapo ingen so armas da! Say ‘biskeg da et akadepende ed pansiansia dan kalmado tan pangipatnag day panagmatalek’ ed si Jehova tan ed armada to ed tawen.​—Isa. 30:15; Apo. 19:11-15.

6. Panon ya taloen nen Jehova iray kalaban to diad Armagedon?

⁶ Panon ya taloen na Dios iray kalaban to diad Armagedon? Nanduruma so nayarin usaren to. Singa bilang, nayarin usaren to so yegyeg, uran a kristal, tan kirmat. (Job 38:22, 23; Eze. 38:19-22) Sarag to met ya panlalabanen iray kakabusol to pian sikara la so manpapateyan. (2 Awa. 20:17, 22, 23) Tan sarag ton usaren iray anghel to pian pateyen iray mauges. (Isa. 37:36) Antokaman so usaren na Dios, segurado so panalo to. Amin ya kalaban to et naderal. Tan amin ya matunong et niliktar.​—Pro. 3:25, 26.

7-8. (a) Base ed 1 Tesalonica 5:1-6, anton nikaduman proklamasyon so ideklara na saray lider na mundo? (b) Akin et sakey itan ya mapeligron tila?

⁷ Ideklara so “kareenan tan kaligenan” insan onggapo so “agew nen Jehova.” (Basaen so 1 Tesalonica 5:1-6.) Diad 1 Tesalonica 5:2, say “agew nen Jehova” et ontutukoy ed “baleg a kairapan.” (Apo. 7:14) Panon tayon naamtaan ya onggapo la itan ya kairapan? Ibabaga na Biblia so nipaakar ed sakey ya nikaduman proklamasyon. Satan so tanda ya onggapo la so baleg a kairapan.

⁸ Satan imay nipropesiya ya pangideklara ed “kareenan tan kaligenan.” Akin et ideklara itan na saray lider na mundo? Agtayo amta so eksakton rason. Kasin mibiang iray lider na relihyon ed satan? Posible. Balet amta tayo ya satan a proklamasyon et tila ya nanlapud saray demonyo. Satan ya tila et talagan mapeligro lapud isipen na totoo ya maligen so bilay da, anta diad tua et onggapo la manaya so baleg a kairapan ya agnin balot agawa ed kapiganman. On, “tampol ya onsabid sikara so biglan kadederal, a singa  pampasakit na biin malukon.” Anto balet so reaksion na saray matoor ya lingkor nen Jehova? Nayarin nabigla met ira lapud agda amta no kapigan so eksakton igapo na baleg a kairapan, balet akaparaan la ra parad satan.

9. Kasin pinsanan so paneral na Dios ed mundo nen Satanas? Ipaliwawa.

⁹ Aliwan pinsanan so paneral nen Jehova ed mundo nen Satanas, a singa ginawa to ed panaon nen Noe. Imbes, deralen to nin unona so sakey ya kabiangan na mundo nen Satanas insan to deralen iray nakekeraan ya kabiangan na satan. Say unonan deralen to et say Makapanyarin Babilonia, say empiryo na palson relihyon. Insan diad Armagedon, deralen to iray nakekeraan ya kabiangan na mundo nen Satanas, kaiba la ditan so politika, militar, tan komersyo. Pantongtongan tayo natan iray detalye nipaakar ed satan ya duaran importantin nagawa.

10. Base ed Apocalipsis 17:1, 6 tan 18:24, akin ya deralen nen Jehova so Makapanyarin Babilonia?

¹⁰ Ukomen so “maimpluensyan imoral a bii.” (Basaen so Apocalipsis 17:1, 6; 18:24.) Say Makapanyarin Babilonia et mangiiter na baleg a kabalawan ed ngaran na Dios. Sikatoy mangibabangat na saray katilaan nipaakar ed Dios. Say palson relihyon et singa imoral a bii ya agmatoor ed si Jehova lapud susuportaan to iray gobierno na too. Uusaren toy pakayari tan impluensya to pian pairapen tan pankuartaan iray membro to. Tan dakel lan dala so inyibung to, kaiba lay dala na saray lingkor na Dios. (Apo. 19:2) Panon ya deralen nen Jehova so Makapanyarin Babilonia?

11. Anto so irerepresenta na “ambalbalangan atap ya ayep,” tan panon itan ya usaren na Dios sumpad Makapanyarin Babilonia?

¹¹ Deralen nen Jehova so “maimpluensyan imoral a bii” panamegley na “samploran saklor” na “ambalbalangan atap ya ayep.” Irerepresenta na atap ya ayep so organisasyon ya United Nations. Irerepresenta na samploran saklor iray gobierno ya onsusuporta ed satan ya organisasyon. Diad panaon ya inggeter na Dios, atakien na sarayan gobierno so Makapanyarin Babilonia. Sikatoy “deralen tan lakseban da,” ya alaen  da iray kayamanan to tan iparungtal day kaugsan to. (Apo. 17:3, 16) Mapmaples so kaderal to, ya nagawa itan ed singa labat “sakey ya agew.” Kanian nabigla iramay onsusuporta ed sikato, lalo la ta abayag to lan ipapasirayew: “Akayurong ak bilang reyna, tan aliwa ak a balo, tan agak balot manermen.”​—Apo. 18:7, 8.

12. Antoy ag-abuloyan nen Jehova ya gawaen na saray nasyon, tan akin?

¹² Ag-abuloyan na Dios ya deralen na saray nasyon iray totoo to. Akin? Lapud inunor day ganggan to ya ompaway ed Makapanyarin Babilonia tan maliket iran natawag ed ngaran to. (Gawa 15:16, 17; Apo. 18:4) Ginawa da met so anggaay nayarian da pian natulongan so arum ya ompaway ed palson relihyon. Kanian saray lingkor nen Jehova et ag-ira “nalanor a mangawat ed saray salot” na Makapanyarin Babilonia. Balet siansia nin nasubok so pananisia da.

13. (a) Siopa si Gog? (b) Base ed Ezequiel 38:2, 8, 9, kapigan onsabi si Gog ed simbolikon pasen a tatawagen ya Armagedon?

¹³ Onataki si Gog. (Basaen so Ezequiel 38:2, 8, 9.) Kayari na kaderal na amin ya organisasyon na palson relihyon, saray totoo na Dios et magmaliw ya singa kiew ya bukbukor toy akaalagey kayari na maksil ya bagyo. Seguradon ampetang so ulo nen Satanas. Ipangget to itan ya petang na ulo to diad pangusar to ed “marutak ya impuyan iran balikas” odino demonikon propaganda. Lapud satan ya propaganda et naporma so alyansa na saray bansa ya onataki ed saray lingkor nen Jehova. (Apo. 16:13, 14) Satan ya alyansa et tatawagen ya “Gog ed dalin na Magog.” No onataki la irayan nasyon, nibagan sinmabi la ra ed simbolikon pasen a tatawagen ya Armagedon.​—Apo. 16:16.

14. Antoy namoria nen Gog?

¹⁴ Manmatalek si Gog ed “taklay na too”​—say pakayari to ed militar. (2 Awa. 32:8) Manmatalek tayo balet ed si Jehova a Dios tayo, tan satan ya talek tayo et ipasen na saray nasyon ya kakulangkulangan. Akin? Say Makapanyarin Babilonia et agniliktar na saray dios to ed “atap ya ayep” tan ed “samploran saklor” na satan. (Apo. 17:16) Kanian isipen nen Gog ya main-inomay to tayon taloen. “Singa saray  lurem a manakbong ed dalin,” sikatoy onataki ed saray totoo nen Jehova. (Eze. 38:16) Balet agmanbayag, nanengneng nen Gog ya sikatoy apatitan. Singa say Faraon diad Ambalangan Dayat, namoria nen Gog ya si Jehova so lalabanan to.​—Exo. 14:1-4; Eze. 38:3, 4, 18, 21-23.

15. Anto ray gawaen na Kristo pian nakompleto so panalo to?

¹⁵ Iyagel na Kristo tan say armada to ed tawen iray totoo na Dios tan deralen da so armada nen Gog. (Apo. 19:11, 14, 15) Anto balet so nagawa ed si Satanas, say manunan kabusol nen Jehova, ya lapud propaganda to et nantitipon iray nasyon tan nanresulta itan ed Armagedon? Sikato tan saray demonyo to et ibantak nen Jesus ed kaaralman, tan ipriso ira ditan diad loob na sanlibon taon.​—Apo. 20:1-3.

16. (a) Panon tayon nipanengneng ya “kabat [tayo] so Dios”? (b) Diad Armagedon, antoy nagawa ed saray totoo ya kabat day Jehova?

¹⁶ Balanglan balo odino abayag tayo lad katuaan, nepeg tayon ipanengneng ya “kabat [tayo] so Dios” tan nepeg tayon ‘unoren so maong a balita nipaakar ed Katawan tayon Jesus.’ No ontan so gawaen tayo, niliktar itayo ed Armagedon. (2 Tes. 1:7-9) Nibagan “kabat [tayo] so Dios” no amta tayo ray labay to, saray agto labay, tan saray estandarte to. Nipanengneng tayo met ya kabat tayo so Dios no sikatoy aaroen tan uunoren tayo, tan no sikato labat so dadayewen tayo. (1 Juan 2:3-5; 5:3) No say sakey a too et ipapanengneng to ya kabat to so Dios, sayan too et kabat met na Dios. Baleg itan ya kagalangan tan mankabaliksan itan na kililiktar ed Armagedon! (1 Cor. 8:3) Akin? Lapud aabobonan na Dios iramay “kabat to.”

17. Antoy labay ya ibaga na ‘pangunor ed maong a balita nipaakar ed Katawan tayon Jesus’?

¹⁷ Say “maong a balita nipaakar ed Katawan tayon Jesus” et ontutukoy ed amin ya katuaan ya imbangat nen Jesus ya nabasa ed Salita na Dios. Uunoren tayo itan ya maong a balita no iyaaplika tayo itan ed bilay tayo. Uunoren tayo met itan no iyuuna tayo so Panarian, no manbibilay  tayo base ed saray matunong ya estandarte na Dios, tan no ipupulong tayo so Panarian na Dios. (Mat. 6:33; 24:14) Nepeg tayo met ya suportaan iray alanaan ya agagi na Kristo legan dan aasikasoen iray ambelat ya responsabilidad da.​—Mat. 25:31-40.

18. Panon ya balesen na saray alanaan ya agagi na Kristo so kaabigan ya impanengneng ed sikara?

¹⁸ Magano lan balesen na saray alanaan ya lingkor na Dios so kaabigan ya impanengneng ed sikara na saray ‘arum a karnero.’ (Juan 10:16) Panon dan nagawaan itan? Antis ya onggapo so guerra na Armagedon, amin ya kabiangan na 144,000 et wala lad tawen bilang imortal ya espiritu. Kaiba la ra ed armada ed tawen ya maneral ed si Gog tan manprotekta ed “baleg ya ulop” na saray totoo nen Jehova. (Apo. 2:26, 27; 7:9, 10) On, talagan pribilehyo na baleg ya ulop ya suportaan iray alanaan ya lingkor nen Jehova legan ya wadia ni rad dalin!

19-20. Antokaman so subok ya dadalanen tayo, panon itayon makapanmatoor legan ya manasingger so Armagedon?

¹⁹ Diad sayan mair-irap ya kaunoran iran agew, dakel ya lingkor nen Jehova so ondadalan ed subok. Anggano bilang ta ontan so situasyon tayo, sarag tayoy mansiansian maliket legan tayon mansusungdo. (Sant. 1:2-4) Say sakey a makatulong et no naynay tayon manpikasi ya impapuso. (Luc. 21:36) Balet agtayo labat manpikasi, noagta nepeg tayo met ya aralen ya inagew-agew so Salita na Dios tan dalepdepen tayo itan, pati saray makapakelaw ya propesiya ya magano lan nagawa. (Sal. 77:12) No ontan so gawaen tayo tan no aktibo tayo ed ministeryo, mansiansian mabiskeg so pananisia tan ilalo tayo!

²⁰ Isip mo pay liket mo sano aderal la so Makapanyarin Babilonia tan asumpal la so Armagedon! Tan say mas importante, imadyin moy agnasabaan ya liket mo sano niyalangon la so ngaran na Dios tan say soberanya to! (Eze. 38:23) On, say Armagedon et maong ya balita parad saramay kabat da so Dios, uunoren day Anak to, tan mansusungdo anggad anggaan.​—Mat. 24:13.