1. Singa nabasa ed Mateo 11:28-30, anton sipan so imbaga nen Jesus?

IMBAGA nen Jesus so sakey a balibalin sipan ed saray ondedengel ed sikato. “Dago kayod siak,” so inkuan to, “tan pampainawaen ta kayo.” (Basaen so Mateo 11:28-30.) Aliwa labat ya anggad salita si Jesus, noagta tinoor to itan ya imbaga to. Bilang alimbawa, nonoten pa so ginawa to ed sakey a bii ya maniirap lapud graben sakit.

2. Antoy ginawa nen Jesus ed samay mansasakit a bii?

² Kakkaukolan na samay bii so tulong. Dakel lan managtambal so nila to ta labalabay to lay onabig. Labinduan taon lan maniirap, balet anggapoy makatambal ed sikato. Base ed Ganggan, sikatoy agmalinis. (Lev. 15:25) Nadngelan to ya sarag nen Jesus ya paabigen iray mansasakit, kanian sikatoy inanap to. Nen nalmo to la, diniwit toy saloy na kawes nen Jesus, tan inmabig ya tampol! Balet sikatoy aglabat pinaabig nen Jesus, noagta pinagalangan to met. Singa bilang, nen kinatongtong nen Jesus iyan bii, impalikna toy panangaro tan respeto diad impanawag tod sikato ya “ana’ko.” Seguradon nainawaan tan apabiskeg iyan bii!​—Luc. 8:43-48.

3. Anto ran tepet so ebatan tayo?

³ Imanoen ya samay bii so linmad si Jesus. Sikatoy nansagpot pian makaasingger ed si Jesus. Ontan met natan, nepeg ya mansagpot tayo pian ‘makadago’ odino makaasingger tayo ed si Jesus. Diad panaon tayo, agla mamilagron papaabigen nen Jesus iray onaasingger ed sikato. Balet siansia nin iimbitaan to itayo: “Dago kayod siak, . . . tan pampainawaen ta kayo.” Diad sayan  artikulo, ebatan tayo irayan limaran tepet: Anto ray nepeg tayon gawaen pian ‘makadago’ tayo ed si Jesus? Antoy labay ya ibaga nen Jesus sanen imbaga ton: “Sakbat yoy pakok”? Anto ray naaralan tayo ed si Jesus? Akin ya naiinawaan itayo diad panggagawa tayod kimey ya inter nen Jesus ed sikatayo? Tan anto ray gawaen tayo pian tuloytuloy itayon nainawaan ed panasakbat tayod pako to?

4-5. Anto ray pigaran paraan ya ‘makadago’ tayo ed si Jesus?

⁴ Say sakey a paraan pian ‘makadago’ tayo ed si Jesus et no maseet tayon aralen iray imbaga tan ginawa to. (Luc. 1:1-4) Ag-itan nayarin gawaen na arum parad sikatayo, kanian sikatayon mismo so nepeg a manaral ed saratan. ‘Makadago’ itayo met ed si Jesus no mandesisyon tayon manpabautismo tan magmaliw a disipulo na Kristo.

⁵ Say sakey nin paraan pian ‘makadago’ tayo ed si Jesus et diad iyasingger tayo ed saray elder no kaukolan tayoy tulong. Uusaren nen Jesus irayan “regalo a lalaki” pian asikasoen iray karnero to. (Efe. 4:7, 8, 11; Juan 21:16; 1 Ped. 5:1-3) Sikatayo lay unonan onasingger pian onkerew na tulong. Agtayo iisipen ya nabasa na saray elder so nonot tayo tan amta da no antoy kaukolan tayo. Imanoen so imbaga na sakey a brother a manngaran na Julian: “Nen kaukolan kon taynanan so asainmin ko ed Bethel lapud sakit, insuheri na sakey a kaarok ya kerewen kod saray elder ya bisitaen da ak. Nen unaan, inisip ko ya singa agko itan kaukolan. Balet kinerew ko lanlamang ya bisitaen da ak, tan saman ya imbisita ra so sakey ed saray sankaabigan ya regalo ya naawat ko.” Saray matoor ya elder, a singa samay duara ya binmisita ed si Julian, et natulongan da itayon amtaen so “kanonotan nen Kristo,” diad ontan et natalosan tan naalig tayo so panagnonot tan panmoria to. (1 Cor. 2:16; 1 Ped. 2:21) Satan so sakey ed saray sankaabigan ya regalo ya niiter dad sikatayo.

6. Antoy labay ya ibaga nen Jesus nen inkuan to ya: “Sakbat yoy pakok”?

⁶ Nen inkuan nen Jesus ya: “Sakbat yoy pakok,” nayarin say labay ton ibaga et “Bidbir yoy autoridad ko.” Nayari met ya say labay ton ibaga et “Misakbatan kayo ed pakok, tan mantulongan tayo ya mankimey parad si Jehova.” Dinanman ed satan so labay ya ibaga nen Jesus, pareho ya mankabaliksan itan ya kaukolan tayoy mankimey.

7. Base ed Mateo 28:18-20, anton kimey so niiter ed sikatayo, tan makaseguro itayo ed anto?

⁷ Inawat tayoy imbitasyon nen Jesus sanen indedika tayoy bilay tayo ed si Jehova tan nampabautismo tayo. Satan ya imbitasyon et parad amin​—agbalot ipulisay nen Jesus so siopaman ya talagan malabay a manlingkor ed Dios. (Juan 6:37, 38) Amin a papatumbok nen Jesus et walaan na pribilehyo ya mibiang ed kimey ya inter nen Jehova ed sikato. Makaseguro itayo ya naynay tayon kaiba si Jesus ed sayan kimey.​—Basaen so Mateo 28:18-20.

8-9. Akin et maasingger iray mapaabeban totoo ed si Jesus, tan anto ray nepeg tayon itepet ed sarili tayo?

⁸ Saray mapaabeban totoo et maasingger ed si Jesus. (Mat. 19:13, 14; Luc. 7:37, 38) Akin? Imanoen so pidumaan nen Jesus ed saray Fariseo. Sarayan lider na relihyon et anggapoy panangaro ra ed arum tan mapaatagey ira. (Mat. 12:9-14) Si Jesus et maar-aro tan mapaabeba. Pabidbir iray Fariseo tan ipapasirayew da so atagey a posisyon da. Balet binilin nen Jesus iray disipulo to ya ag-ira nepeg ya pabidbir, tan imbangat to ra ya ipasen day sarili da bilang mapaabeban lingkor. (Mat. 23:2, 6-11) Tataktakoten na saray Fariseo iray totoo pian unoren da ra. (Juan 9:13, 22) Si Jesus et maomaong so  panagtrato tan pitotongtong to ed totoo kanian naiinawaan ira.

⁹ Antoy naaralan mod si Jesus? Tepetan moy sarilim: ‘Kasin say pakanengneng na arum ed siak et mauyamo tan mapaabeba ak? Kasin mabulos ak ya manggawa na abeban kimey pian naserbian koy arum? Kasin maong so panagtratok ed arum?’

12-14. Akin ya naiinawaan tayo diad panggagawa tayo ed kimey ya inter nen Jesus?

¹² Akin ya naiinawaan itayo diad panggagawa tayod kimey ya inter nen Jesus ed sikatayo? Dakel iray rason, balet pantongtongan tayoy pigara.

¹³ Walaan itayo na sankaabigan iran manangasikaso. Si Jehova so Sankatagyan, balet sikatoy maapresya tan aliwan maruksa. Papablien to iray gagawaen tayo. (Heb. 6:10) Tan iikdan to itayo na biskeg pian nagawaan tayo iray responsabilidad tayo. (2 Cor. 4:7; Gal. 6:5) Si Jesus, say Ari tayo, et ipapanengneng toy maong ya alimbawa ya nepeg tayon aligen. (Juan 13:15) Tan saray elder ya manpapastol ed sikatayo et gagawaen day anggaay nayarian dan aligen si Jesus, say “manunan managpastol.” (Heb. 13:20; 1 Ped. 5:2) Papasesegen da tayo, tan pansasagpotan dan ipanengneng so kaabigan tan pakpel legan da tayon aasikasoen tan proprotektaan.

¹⁴ Walaan itayo na sankaabigan iran kakaaro. Anggapo lay arum ya grupo na totoo ya walaan na makabaliksan ya kimey tan malet ya aroan ya singa walad sikatayo. Isipen pa: Pribilehyo tayoy mankimey kaiba iray totoo ya walaan na atagey iran estandarte ed moral balet agda nononoten ya mas matunong ira nen say arum. Maabilidad ira balet agda itan ipapasirayew, tan ipapasen dan mas atagey so arum. Aliwa labat ya kakimeyan so pangipapasen dad sikatayo, noagta ipapasen da itayo met ya kakaaro. Tan ontan lay kabaleg na panangaro dad sikatayo kanian mabulos dan iter so bilay da parad sikatayo!

15. Antoy nalilikna tayo ed kimey ya gagawaen tayo?

¹⁵ Walaan itayo na sankaabigan a kimey. Panliliketan tayo so kimey ya ibangat ed totoo so katuaan nipaakar ed si Jehova tan ipaamta iray katilaan na Diablo. (Juan 8:44) Uusaren nen Satanas iray katilaan pian nabelatan iray totoo tan naandian ira na ilalo. Singa bilang, labay to ya manisia itayo ya agperdonaen nen Jehova iray kasalanan tayo tan ag-itayo makanepegan ed panangaro To. Talagan makapakapuy itan na liknaan, tan mauge-uges itan a tila! Diad tua, naperdona iray kasalanan tayo no ‘ondago’ itayo ed si Kristo, tan inar-aro itayon amin nen Jehova. (Roma 8:32, 38, 39) Talagan naliliketan  tayo no tutulongan tayo ray totoo pian naaralan day manmatalek ed si Jehova tan no nanenengneng tayo ya magmamaliw ya mas maliket so bilay da.

16. Antoy pandumaan na responsabilidad ya ipapasakbat nen Jesus tan say arum ya responsabilidad ya sasakbaten tayo?

¹⁶ Saray responsabilidad ya ipapasakbat nen Jesus ed sikatayo et duma ed arum ya responsabilidad ya sasakbaten tayo. Singa bilang, dakel so mangibaga ya naknaksawan ira tan ag-ira maliket kayari na sanagew ya impantrabaho da. Balet malikeliket tayo kayari na sanagew ya impanlingkor tayod si Jehova tan Jesus. No naknaksawan tayo ya nanlapud trabaho, nayarin kaukolan tayon piliten so sarili tayo ya miaral. Balet kayari na aral, nalikna tayo ya nainawaan tan binmiskeg tayo. Ontan met so nalikna tayo no gagawaen tayoy anggaay nayarian tayon manpulong tan no ipanaon tayoy personal ya panagaral na Biblia. Mas baleg so naawat tayon gunggona nen say biskeg ya usaren tayo!

17. Antoy nepeg tayon tandaan tan nonoten ya maong?

¹⁷ Nepeg tayon tandaan ya walay limitasyon na biskeg tayo. Kanian nonoten tayon maong no antoy panguusaran tayo ed satan. Singa bilang, nasayang so biskeg tayo no usaren tayo itan pian nawalaan tayo na dakel ya kaykayarian. Imanoen so salaysay nipaakar ed mayaman ya kalangweran a laki ya nantepet ed si Jesus: “Antoy nepeg kon gawaen pian natawir koy bilay ya andi-anggaan?” Uunoren la na sayan kalangweran a laki so Ganggan. Seguradon sikatoy maong ya too ta nabasa diad Ebanghelyo nen Marcos ya si Jesus et “alikna toy panangaro” ed sayan laki. Oniay imbitasyon nen Jesus ed sayan kalangweran a manuley: “La ka, ilakom so antokaman a kayarian mo . . . tan gala, magmaliw kan patumbok ko.” Labay na sayan laki so magmaliw ya patumbok nen Jesus, balet mapatnag ya agto nataynanan so ‘dakel a kaykayarian to.’ (Mar. 10:17-22) Kanian agto inawat so pako nen Jesus tan nansiansian aripen na “Kayamanan.” (Mat. 6:24) No sika iman, antoy pilien mo?

18. Antoy nepeg tayon gawaen a sagpaminsan, tan akin?

¹⁸ Maabig ya no sagpaminsan et usisaen tayo no anto ray prayuridad tayo ed bilay. Akin? Pian naseguro tayo ya duga so panguusaran tayo ed biskeg tayo. Imanoen so imbaga na kalangweran a laki ya si Mark: “Dakel a taon ya say amtak et simpli so bilay ko. Payunir ak, balet agko nalilikas ya dakel manayay uusaren kon panaon tan biskeg diad panaanap koy kuarta pian magmaliw a mainaway bilay ko. Kanian pankelawan ko no akin ya nabebelatan ak. Insan naisip ko ya iyuunak manaya so sarilik, tan say iiter kod si Jehova et say kera-kera labat ya panaon tan biskeg ko.” Inuman nen Mark so kanonotan tan kabibilay to pian napalaknab to ni so panaglingkor tod si Jehova. “No maminsan, napapagaan ak met,” so kuan nen Mark, “balet diad tulong nen Jehova tan Jesus, makakapampokus ak ed panaglingkor ko.”

19. Akin et importante ya pansiansiaen tayoy dugan panmoria?

¹⁹ Tuloytuloy itayon nainawaan ed panasakbat tayod pako nen Jesus no gawaen tayo so taloran bengatla. Unona, pansiansiaen so dugan panmoria. Kimey nen Jehova so gagawaen tayo, kanian gawaen tayo itan diad paraan to. Sikatayo ray komikimey, tan si Jehova so Katawan. (Luc. 17:10) No salien tayon gawaen so kimey ya ipapagawa to diad sarili tayon paraan, sikatayo lanlamang so nabelatan. Anggan say mabiskeg ya baka et nayarin nasugatan tan nakesawan no salien toy onla ed direksion ya labay to tan lanang ton susumlangen so direksion na pako ya kokontrolen na akanggawad sikato. Balet no tumboken tayoy panangigiya  nen Jehova, nagawaan tayo ray singa imposible ya gawaen tan nalampasan tayo so anggan anton subok. Tandaan, anggapoy siopaman ya makaamper ed pakasumpal na linawa to!​—Roma 8:31; 1 Juan 4:4.

20. Anto so dugan motibo ed panasakbat tayod pako nen Jesus?

²⁰ Komadua, mankimey ya walaan na dugan motibo. Nepeg ya say motibo tayo et say pangigloria ed maaron Ama tayo, si Jehova. Nen inmunan siglo, saramay makasarili so motibo da et agnansiansian maliket tan tinaynan da so pako nen Jesus. (Juan 6:25-27, 51, 60, 66; Fil. 3:18, 19) Balet saramay pinakiwas na masakripisyon aro ed Dios tan ed kaparan too et maliket dan sinakbat itan ya pako ed interon bilay da diad dalin, tan awalaan ira na ilalo ya manlingkor a kaiba na Kristo diad tawen. Mansiansia tayo met ya maliket ya singa sikara no duga so motibo tayo ed panasakbat tayod pako nen Jesus.

21. Base ed Mateo 6:31-33, antoy nailaloan tayon gawaen nen Jehova?

²¹ Komatlo, nepeg ya duga so iilaloan tayo. Amta tayo ya say pinili tayon bilay et napnoy sakripisyo tan kimey. Impasakbay nen Jesus ya napasegsegang itayo. Balet nailaloan tayo ya ikdan itayo nen Jehova na biskeg pian nasungdoan tayo so anggan anton subok. Legan tayon susungdoan iratan, lalo tayon ombibiskeg. (Sant. 1:2-4) Nailaloan tayo met ya iter nen Jehova iray nakaukolan tayo, asikasoen itayo nen Jesus, tan pasesegen itayo na saray agagi. (Basaen so Mateo 6:31-33; Juan 10:14; 1 Tes. 5:11) Anto ni anapen tayo?

22. Antoy pisalsalamatan tayo?

²² Samay bii ya pinaabig nen Jesus et nainawaan ed samay mismon agew na inyabig to. Balet sikatoy tuloytuloy ya nainawaan no sikatoy nagmaliw ya matoor a disipulo na Kristo. Anto kasi ginawa to? No pinili ton sakbaten so pako nen Jesus, isip mo pay premyo to​—say panlingkor a kaibay Jesus diad tawen! Antokaman so insakripisyo to pian magmaliw ya patumbok na Kristo et melmelag no ikompara ed satan ya bendisyon. Balanglan say ilalo tayo et manbilay na andi-anggaan diad dalin o diad tawen, misalsalamat tayo ta inawat tayoy imbitasyon nen Jesus ya: “Dago kayod siak.”